¿Rut 4:1, 6-pi parlashca runaca Ruthuan cazarashpaca imamantataj “pobreyashami” nirca?

Ñaupa punllacunapica shuj israelita runa manaraj huahuacunata charishpa huañujpica ¿paipaj allpaca pipajtaj saquirina carca? ¿Paipaj shutipish chaipichu chingarina carca? Moisesman cushca Leypimi cai tapuicunata cutichirca.

Shuj runa huañujpi, mana cashpaca pobrella saquirishcamanta paipaj allpacunata cꞌatujpica paipaj huauqui o paipaj cꞌuchulla familiami chai allpacunata randina carca. Chashnami chai allpacunaca familia ucullapitaj saquirina carca (Levítico 25:23-28; Números 27:8-11).

Cutin ¿huañushcapaj shuti ama chingarichunca Leypica imata rurachuntaj nirca? Huañushcapaj huauquimi viuda huarmihuan cazarana carca. Paihuan shuj huahuata charijpica chai huahuaca huañushcapaj shutita, huañushcapaj herenciatapishmi japina carca. Rutca cutin cazarashpaca chai costumbretami catirca. Cai leyta pajtachishcamantami viuda huarmica pi paita cuidachun cutin tigra charirca (Deuteronomio 25:5-7; Mateo 22:23-28).

Noemipaj causaipi yuyashun. Paica Elimelechuanmi cazararca. Pero qꞌuipaca Elimelecpish, paipaj ishqui churicunapishmi huañurcacuna. Chaimi familiata mantinichunca ni shuj cꞌari mana tiyarca (Rut 1:1-5). Noemí Judá llajtaman tigrashpaca Elimelecpaj allpacunata shuj cꞌuchulla familia randi tucushcataca allimi yacharca. Chaimi Noemica Ruttaca Elimelecpaj allpacunata randichun Boazta mañai nishpa yachachirca (Rut 2:1, 19, 20; 3:1-4). Shinapish Boazca ashtahuan cꞌuchulla familia tiyashcatami yacharca. Paimi Elimelecpaj allpacunata randina derechota charirca. Bibliapica paitaca “Runa” nishpami shutichin (Rut 3:9, 12, 13).

Cullqui jahuapish chai runaca Elimelecpaj allpacunatami randisha nirca (Rut 4:1-4). Paica Noemí ña mayorlla cashcata, huahuacunata ña mana chari tucushcatapish allimi yacharca. Chaimi chai runaca Elimelecpaj allpacuna paipaj saquirina cashcata, alli negociota ruracushcata yuyashcanga.

Pero chai runaca Ruthuan cazarana cashcata cuentata cushpaca chai allpacunataca ña mana randisha nircachu. Paica: ‘Ñucaca mana randi tucunichu. Randishpaca pobreyashami’ nircami (Rut 4:5, 6). ¿Chai runaca imamantataj “pobreyashami” nirca?

Chai runa o shujtaj cꞌuchulla familia Ruthuan cazarashpa shuj huahuata charijpica chai huahuami Elimelecpaj allpacunata japina carca. Pero ¿chashna allpacunata japijpica chai runaca imamantataj pobreyana carca? Bibliapica caimantaca mana parlanchu. Shinapish huaquin yuyaicunata ricushun.

• Puntapica, chai runaca cullquita yangamanta pirdigrishcatami yuyashcanga. Elimelecpaj allpacunaca Rutpaj huahuapajmi cana carca. Paipajca ima mana saquirinachu carca.

• Ishquipica, Ruthuan cazarashpaca Noemitapish, Ruttapishmi mantinina carca.

• Quimsapica, chai runa Ruthuan ashtahuan huahuacunata charijpica chai huahuacunaca paipaj herenciatami japina carca.

• Chuscupica, chai runa huahuacunata mana charishca cajpica Ruthuan charishca huahuami Elimelecpaj allpacunatapish, paipaj allpacunatapish tucui dueñoyana carca. Ashtahuancarin chai huahuaca paipaj shutita charinapaj randica Elimelecpaj shutitami charina carca. Chaimi chai runaca Noemita mana ayudasha nishcanga, paipaj herenciatapish mana chingachisha nishcanga. Qꞌuipaca Boaztami Elimelecpaj allpacunata randichun nirca. Boazpish Elimelecpaj cꞌuchulla familiami carca. Paica huañushcapaj shuti ama chingarichunmi Noemita ayudanata decidirca (Rut 4:10).

Noemita mana ayudasha nij runaca paipaj shutita, paipaj herenciata mana chingachina yuyaillami purirca. Chashnami egoísta cashcata ricuchirca. Egoísta cashcamanta, Noemita mana ayudashcamantami paipaj shutitaca cunancamapish mana yachanchij. Alaja bendicioncunatapish mana chasquircachu. Cutin Boaz Noemitapish, Ruttapish ayudashcamantami paipaj huahuamanta Jesucristo shamurca. Chaica shuj sumaj bendicionmi carca (Mateo 1:5; Lucas 3:23, 32).