1. ¿Diosta sirvij yaya mamacunaca imatataj paicunapaj huahuacunaman yachachisha nincuna?

 YAYA mamacunaca cancunapaj huahuacuna Diosta cꞌuyachun, Diosta rijsichunmi yachachisha ninguichij. Pero ¿huahuacuna Diosta mana ricui tucushcamanta Dios de veras tiyashcata crichun, paipajman cꞌuchuyachunca ima shinataj ayudai tucunguichij? (Santiago 4:8).

2. ¿Yaya mamacuna, cancunapaj huahuacuna Jehová Dios ima shina cashcata yachachunca imatataj rurana canguichij?

² Yaya mamacunaca paicunapaj huahuacunaman Jehová Diosmanta yachachingapajmi paicunahuan Bibliamanta estudiana cancuna (2 Timoteo 3:14-17). Shinapish yaya mamacunaca Diospaj rurashcacunata ricuchishpapish Yayitu Diosmantami yachachi tucuncuna. Proverbios libropica shuj yayaca paipaj huahuamanca Diospaj rurashcacunata yuyarishpami Dios ima shina cashcata yachachun animarca (Proverbios 3:19-21). Cai yachaipimi yaya mamacuna paicunapaj huahuacunaman Dios ima shina cashcata yachachingapaj imata rurana cashcata ricushun.

3. ¿Yaya mamacuna cancunapaj huahuacunaman imata ricuchishpataj yachachina canguichij?

³ Bibliapica: “Diosta mana ricui tucushpapish pai ima shina cashcataca cai pachata ima shina rurashcata ricushpa, pai imallata rurashcata ricushpami yachai tucunchij” ninmi (Romanos 1:20). Yaya mamacuna, cancunapaj huahuacunahuan shuj campopi cashpa o parquepi cashpa Diospaj rurashcacunata ricushpami cushilla sintiringuichij ¿nachu? Chaimi cancunapaj huahuacunamanca Diospaj rurashcacunata ricuchishpa Yayitu Dios ima shina cashcata yachachi tucunguichij. Caita ima shina pajtachinata  yachangapajca cunanca Jesuspaj ejemplomantami yachashun.

4. ¿Jesusca paipaj discipulocunamanca ima shinataj Diospaj rurashcacunamanta yachachirca? (Lucas 12:24, 27-30).

⁴ ¿Jesusca Diospaj rurashcacunamantaca ima shinataj yachachirca? Shuj cutinca paipaj discipulocunataca cuervocunata, lirio sisacunatapish ricuchunmi nirca (Lucas 12:24, 27-30-ta liyipai). Jesusca paipaj discipulocuna chai animalitocunata, chai sisacunata ña alli rijsishcamantami chaicunamanta yachachi callarirca. Shinallataj chaicunata señalashpami yachachishcanga. ¿Chai cuervocunamanta, lirio sisacunamantaca Jesusca imatataj yachachisha nirca? Jehová Dios cuervocunaman micunata carashca shinallataj, sisacunatapish alajata churachishca shinallatajmi paipaj discipulocunatapish cuidanata yachachisha nirca.

5. ¿Canpish cambaj huahuacunamanca ima shinataj Diosmanta yachachi tucungui?

⁵ ¿Yaya mamacuna cancunapaj huahuacunamanca ima shinataj Jesús laya yachachi tucunguichij? Por ejemplo, cambaj huahuacunamanca can munashca animalitocunamanta, plantitacunamantami parlai tucungui. Chaicunamanta parlashpaca Jehová Dios ima shina cashcatami yachachina cangui. Qꞌuipaca cambaj huahuitocunamanpish “¿cutin canca ima animalitocunata, ima plantitacunatataj ashtahuan munangui?” nishpami tapuna cangui. Cambaj huahuitocuna yachasha nishcacunamanta parlajpica paicunaca Yayitu Diosmantami ashtahuan yachanata munangacuna.

6. ¿Christopherpaj mamaca ima shinataj yachachij carca?

⁶ Pero yaya mamacunaca huahuacunaman yachachingapajca animalitocunamanta, plantitacunamantaca mana manchanaita investiganachu can. Jesusca cuervocuna imallata micujcuna cashcata, lirio sisacunapish ima shina cashcataca mana tucuita parlarcachu. Cambaj huahuitocunaca animalitocunamanta, plantitacunamanta tucuita callarishpami yachanata munangacuna. Shinapish huaquinpica ashalla shimicunapi o shuj tapuillata rurashpami cancunapaj huahuacunaman yachachi tucunguichij. Christopher shuti huauquica paipaj mama chashna yachachij cashcatami yuyarin. Huauqui Christopherca: “Ñuca mamitaca ashalla shimicunahuanmi Diospaj rurashcacunata valorachun yachachirca. Por ejemplo, urcucunapaj cꞌuchullapi cashpaca ‘chai urcucunaca dimastij jatun, sumajmari cancuna. ¿Chai tucuita rurashcamantaca manachu Jehová Diosta jatunyachisha ninchij?’ nijmi carca. O mama cucha caiman chaiman manchanaita cuyurijta ricushpaca ‘caicunaca Yayitu Dios poderoso cashcatami ricuchin’ nishpami yachachij carca. Ñuca mamitaca ashalla shimicunahuan yachachishpapish Jehová Dios ima shina cashcapi yuyachunmi ayudarca” ninmi.

7. ¿Cancunapaj huahuacuna Jehová Diospaj rurashcacunapi yuyachunca imatataj rurana canguichij?

⁷ Cancunapaj huahuacuna ña jatunyajpica paicunamanca Diospaj rurashcacunapi yuyashpa Jehová Dios ima shina cashcata yachachunmi ayudai tucunguichij. Chaipajca Diospaj rurashcacunata ricuchishpami “¿caicunaca Jehová Diosmantaca imatataj yachachin?” nishpa tapuna canguichij. Cancunapaj huahuacuna imata cutichijta uyashpaca achcatami cushiyaringuichij (Mateo 21:16).

8. ¿Israelitacunaca ñanta puricushpaca ima shinataj Yayitu Diosmanta huahuacunaman yachachijcuna carca?

⁸ Israelitacunaca paicunapaj huahuacunahuan ñanta puricushpami Diospaj mandashcacunata yachachina carcacuna (Deuteronomio 11:19). Ñanta puricushpaca paicunaca achca animalitocunata, sisacunatapishmi ricujcuna  carca. Chaimi yaya mamacunaca paicunapaj huahuacunamanca Diospaj rurashcacunamanta yachachi tucurcacuna. Cunan punllacunapish yaya mamacunaca paicunapaj huahuacunaman chashnallatajmi yachachi tucuncuna. Huaquin yaya mamacuna imata rurashcata ricushun.

9. ¿Pani Punithamanta, pani Katyamantaca imatataj yachangui?

⁹ Punitha shuti mamaca paipaj familiahuanmi India llajtapi saquirij shuj jatun ciudadpi causancuna. Paica: “Ciudadpica achca gentecuna, achca carrocunapishmi tiyan. Chaipica Diospaj rurashcacunamanta huahuacunaman yachachinaca mana facilchu can. Chaimantami campopi causaj ñucanchij familiacunata visitanaman rishpaca, huahuitocunaman Diospaj rurashcacunamanta yachachingapaj esforzarinchij. Chaipi Diospaj rurashcacunata ricushpaca huahuacunaca ashtahuan allimi intindincuna” ninmi. Yaya mamacuna, cancunapaj huahuitocunaca cancunahuan campopi o shujtaj sumaj lugarpi alajata pasashcataca mana nunca cungaringacunachu. Moldavia llajtamanta Katya shuti panica: “Ñuca yaya mamahuan campopi alajata pasashcataca cunancamami yuyarini. Uchillamantapacha Diospaj rurashcacunata ricushpa, Jehová Dios ima shina cashcapi yuyachun yachachishcamantami achcata agradicini. Chashna yachachishcamantami cunancama chaita rurani” ninmi.

10. ¿Campoman mana ri tucushpaca yaya mamacunaca imatataj rurana can? (“ Yaya mamacunapaj ayudacuna” nishca recuadromantapish parlapai).

¹⁰ ¿Cancuna campoman mana ri tucushpaca imatataj rurai tucunguichij? India llajtapi causaj Amol shuti yayaca: “Ñuca causan ladopica yaya mamacunaca achca horascunatami trabajana can. Campoman ringapajcarin achca cullquimi minishtirin. Shinapish parquepi cashpa o huasipaj balconpi cashpaca ñucanchij huahuacunamanca Diospaj rurashcacunamantami yachachi tucunchij” ninmi. Yaya mamacuna, cancunapaj cꞌuchullapi tiyaj Diospaj rurashcacunamantami huahuacunaman yachachi tucunguichij (Salmo 104:24). Por ejemplo, plantitacunamanta, pajarocunamanta,  insectocunamanta o shujtaj animalitocunamantami yachachi tucunguichij. Alemania llajtamanta pani Karinaca: “Ñuca mamitaca sisacunatami achcata munaj carca. Chaimi ñuca huahuaraj cajpi paihuan paseanaman llujshijpica paica alaja sisacunata ricuchij carca” ninmi. Shinallataj Diospaj organizacionca Diospaj rurashcacunamanta achca videocunata, publicacioncunatapishmi rurashca. Cancunapaj huahuacunaman yachachingapajmi chaicunatapish utilizai tucunguichij. Cancuna maipi causacushpapish Diospaj rurashcacunamantami cancunapaj huahuacunaman yachachi tucunguichij. Cunanca Diospaj cualidadcunamanta yachachingapaj imacunallahuan yachachi tucushcata ricushun.

11. ¿Jehová Dios cꞌuyaj cashcataca yaya mamacunaca ima shinataj yachachi tucuncuna?

¹¹ Cancunapaj huahuacunaman Jehová Dios cꞌuyaj cashcata yachachingapajmi, animalitocuna paicunapaj huahuacunata cꞌuyaihuan cuidaj cashcata ricuchi tucunguichij (Mateo 23:37). Shinallataj chꞌican chꞌican animalitocuna tiyashcata, chꞌican chꞌican sumaj plantitacuna, sisacuna tiyashcatami parlai tucunguichij. Párrafo 10-pi parlashca pani Karinaca: “Ñuca mamahuan paseanaman llujshijpica ñuca mamaca cada sisacuna chꞌican cashcata, sumaj cashcata ricuchunmi animaj carca. ‘Caicunami Jehová Dios cꞌuyaj cashcata ricuchin’ nishpami yachachij carca. Ña achca huatacuna pasashca cajpipish cunancamami sisacuna chꞌican colorcunata charishcata, sumaj, alaja cashcata ricuni. Chaimi Jehová Dios cꞌuyaj cashcata yuyarini” ninmi.

12. ¿Yaya mamacunaca Jehová Dios yachaj cashcataca ima shinataj paicunapaj huahuacunaman yachachi tucuncuna? (Salmo 139:14) (Fotomantapish parlapai).

¹² Cancunapaj huahuacunamanca Jehová Dios ñucanchijmanta yalli yachaj cashcatami yachachina canguichij (Romanos 11:33). Chaipajca yacuhuan ima tucushcamantami parlai tucunguichij. Inti yacuta rupajyachijpica pꞌuyucuna llujshishpami jahua cieloman rishpa chꞌican chꞌican lugarcunapi tamyachin (Job 38:36, 37). Shinallataj ñucanchij cuerpo ima shina rurashca cashcatami yachachina canguichij (Salmo 139:14-ta liyipai). Vladimir shuti shuj yayaca caimanta ima shina yachachishcata ricushun. Paica: “Shuj punllaca ñuca huahuaca bicicletamanta urmashpami chugririrca. Pero huaquin punllacuna huashaca chai chugrica sanoyarcami. Chaimi ñuca huarmindij ñucanchij huahuataca: ‘Jehová Diosmi ñucanchij cuerpota  paillataj alliyarichun chashna rurarca. Gentecuna rurashca cosascunaca mana chashnachu can. Por ejemplo, shuj carro choquiashpaca mana paillataj alliyarinchu’ nishpa yachachircanchij. Chashna yachachijpica ñucanchij huahuaca Jehová Dios dimastij yachaisapa cashcatami intindirca” ninmi.

13. ¿Yaya mamacunaca Jehová Dios achca poderta charishcataca ima shinataj huahuacunaman yachachi tucuncuna? (Isaías 40:26).

¹³ Jehová Diosca estrellacunata ordenpi charishcata ricushpa, pai achca poderta charishcata intindichunmi munan (Isaías 40:26-ta liyipai). Yaya mamacunapish cancunapaj huahuacunaman estrellacunamantami yachachi tucunguichij. Taiwán llajtamanta Tingting shuti panica: “Ñuca huahuaraj cashpa ñuca mamahuanmi campopi dorminaman rircanchij. Ciudadmanta carupi cashcamantami estrellacunata achijnicujta ricui tucurcanchij. Chai tiempopica ñuca escuelapica compañerocunaca mana allita rurachunmi nijcuna carca. Chaimantami Yayitu Diosmanta caruyanata mancharcani. Shinapish ñuca mamitaca estrellacunata ricuchishpami ‘¿chai estrellacunata rurangapajca Diosca mashna podertashi utilizashcanga? ¿Manachu cantapish allita rurachun paipaj poderhuan ayudanga?’ nishpa yachachirca. Chai huashaca Yayitu Diostami ashtahuan alli rijsisha nircani. Shinallataj paillata siempre sirvinatami munarcani” ninmi.

14. ¿Cancunapaj huahuacunaman cushichij Diosta sirvicushcata yachachingapajca imacunamantataj parlai tucunguichij?

¹⁴ Diospaj rurashcacunaca pai cushi cashcata, asichij cashcatami ricuchin. Cientificocunaca pajaritocuna, yacupi causaj animalitocuna, shujtaj animalitocunapish paicunapura pugllashcatami ricushcacuna (Job 40:20). Cambaj huahuacunapish misisitocuna puchcacunahuan pugllacujta, allquitucunapish paicunapura pugllacujta ricushpami asirishcangacuna. Chashna animalitocunamanta asiricujpica cushichij Diosta sirvicushcatami yuyachina canguichij (1 Timoteo 1:11).

15. ¿Yaya mamacunaca huahuacunapaj problemacunamanta yachangapajca imatataj rurai tucuncuna? (Proverbios 20:5) (Fotomantapish parlapai).

¹⁵ Huaquin huahuacunaca paicunapaj yaya mamacunaman ima problemata charishcataca  mana huillancunachu. Shinapish ¿cambaj huahuacuna ima problemata charishcata yachangapajca imatataj rurai tucungui? (Proverbios 20:5-ta liyipai). Huaquin yaya mamacuna imata rurashcata ricushun. Taiwán llajtamanta Masahiko shuti yayaca: “Ñuca huahuitocunahuan playaman ringapaj, urcucunaman ringapaj, shujtaj alaja lugarcunaman ringapajmi tiempota llujchinchij. Chaipi tranquilos cashpami ñuca huahuacunaca ima problemacunata charishcata, ima shina sintirishcatapish parlancunalla” ninmi. Párrafo 9-pi parlashca Katya shuti panica: “Ñuca escuelamanta llujshishca huashaca ñuca mamitaca shuj alaja parquemanmi apaj carca. Chaipi tranquila cashpami escuelapi ima shina sintirishcata, imamanta preocupada cashcatapish parlaj carcani” ninmi.

16. ¿Familiacunaca imata rurashpataj cushilla sintiri tucuncuna?

¹⁶ Bibliapica asingapajpish, bailangapajpish punllami chayan ninmi (Eclesiastés 3:1, 4). Chaimantami Jehová Diosca alaja lugarcunata rurashca. Huaquin familiacunaca campopi cashpa, urcucunapi cashpa, playapi cashpami tranquilos, tandalla, alajata pasancuna. Huaquin huahuacunapish shuj parquepi callpashpa, pugllashpa, animalitocunata ricushpa, yacupipish nadashpami alajata cainancuna. Cai ejemplocunapi ricushca shinaca Diospaj tucui rurashcacunahuanmi cushilla causai tucunchij.

17. ¿Yaya mamacunaca imamantataj paicunapaj huahuacunaman Diospaj rurashcacunamanta yachachina cancuna?

¹⁷ Tucui vidami Paraíso Allpapica yaya mamacunapish, huahuacunapish Jehová Diospaj rurashcacunahuanca cushilla causangacuna. Chaipi cashpaca ñucanchijpish animalitocunataca ña mana manchashunchu. Paicunapish ñucanchijtaca ña mana manchangacunachu (Isaías 11:6-9). Shinapish yaya mamacuna cunanmantapachami cancunapaj huahuacunamanca Yayitu Diospaj rurashcacunata ricuchishpa pai ima shina cashcata yachachina canguichij (Salmo 22:26). Chashna yachachijpica cancunapaj huahuacunapish Jehová Diostaca rey David shinami ninata munangacuna. Rey Davidca Jehová Diostaca: “Quiquin shinaca pi mana tiyanchu. Quiquinpaj rurashcacunahuanca pi rurashcacunataj igualangari” nircami (Salmo 86:8).