1, 2. a) ¿Apóstol Pabloca Éfeso llajtapi caj huauqui panicunamanca imamantataj shuj cartata quillcarca? b) ¿Cai yachaipica ima tapuicunatataj cutichigrinchij?

 APÓSTOL Pabloca Roma llajtapi prezupi cashpaca huauqui panicunatami animasha nirca. Pero paicunata ñahui ñahui mana ricui pudishcamantami paicunata animangapajca huaquin cartacunata quillcarca. Por ejemplo, huata 60 o 61-pimi Éfeso llajtapi causaj huauqui panicunaman shuj cartata cacharca (Efesios 1:1; 4:1).

² Apóstol Pabloca mas o menos huata 50-pimi Éfeso llajtapi huillashca carca (Hechos 19:​1, 8-10; 20:​20, 21). Paica huauqui panicunataca achcatami cꞌuyaj carca. Chaimantami Jehová Diosta sirvishpa catichun paicunataca ayudasha nirca. Pero ¿paicunamanca amsamanta, luzmanta imamantataj quillcarca? ¿Pablo quillcashcacunamantaca ñucanchijpish imatataj yachai tucunchij? Cai yachaipimi caicunamanta yachashun.

AMSAMANTAMI LUZMAN LLUJSHIRCACUNA

3. ¿Pabloca Efesopi caj huauqui panicunaman yachachingapajca ima chꞌimbapuraitataj churarca?

³ Pabloca Efesopi caj huauqui panicunamanca: “Ñaupaca cancunaca amsapimi carcanguichij. Shinapish cunanca luzpimi canguichij” nishpami quillcarca (Efesios 5:8). Chai huauqui panicuna paicunapaj causaipi achca cambiocunata rurashcata ricuchingapajmi Pabloca amsamanta, luzmantapish parlarca. Puntapica, imamanta paicunaca amsapi puricushcata ricushun.

4. ¿Efesopi causaj gentecunaca ima shinataj causajcuna carca?

⁴ Efesopi causajcunaca panda religioncunata catishcamantami amsapi puricushca shina causacurcacuna. Éfeso llajtapica Ártemis nishca yanga diosta adorangapajmi shuj jatun templo  tiyarca. Chai templo shinaca shujtaj templocunaca mana tanto tiyarcachu. Chaimi chai temploca achca rijsishca carca. Achca gentecunaca chaipi yanga dioscunata adorangapajmi rijcuna carca. Huaquin gentecunacarin Artemispaj uchilla templocunata rurashpami trabajajcuna carca (Hechos 19:​23-27). Shinallataj Efesopi causaj gentecunaca brujiana ruraicunata rurashpami causajcuna carca (Hechos 19:19).

5. ¿Imamantataj Efesopi cajcunaca amsapi causarcacuna?

⁵ Efesopi causajcunaca mapa ruraicunata rurashpa causacushcamantami amsapi shina carcacuna. Chashna causacushpapish paicunaca mana pingarijcunallapishchu carca. Paicunapaj fiestacunapipishmi yanga Dioscunata adorangapaj huainayajcuna carca. Shinallataj mapa cosascunatami ricujcuna carca (Efesios 5:3). Paicunaca millaita rurashcamantaca paicunapaj concienciapica ña imata mana sintircacunachu (Efesios 4:​17-19). Shinallataj paicunapaj rurashcacunamanta Yaya Dios ima shina sintirishcapica mana yuyajcunachu carca. Paicunaca ima alli cashcata, ima mana alli cashcata mana yachashcamantami apóstol Pabloca: “Paicunapaj yuyaicunaca amsapimi. Diosmanta mana yachasha nishcamanta, rumi shungucuna cashcamantami Dios cusha nishca causaitapish mana chasquincuna” nirca.

6. ¿Imamantataj Pabloca Efesopi caj huauqui panicunataca ‘cunanca luzpimi canguichij’ nirca?

⁶ Efesopi causaj huaquin runacunaca amsa causaimantami llujshircacuna. Chaimantami Pabloca paicunataca: “Cunanca Amito Jesushuan shuj shinalla cashcamantami luzpi canguichij” nirca (Efesios 5:8). Paicunaca Jehová mandashca shina causai callarishcamantami luzpi puri callarishca shina carca (Salmo 119:105). Shinallataj yanga dioscunata adoranata, huainayanata, mapa ruraicunatami saquircacuna. Chashnami Jehová Dios munashca shina causangapaj esforzaricushcata ricuchircacuna (Efesios 5:1).

7. ¿Efesopi caj huauqui panicuna shinaca ñucanchijpish imatataj rurashcanchij?

⁷ Ñucanchijpish Jehová Diosta manaraj rijsishpaca amsapi puricushca shinami causarcanchij. Maijancunaca yanga fiestacunata rurashpa, mapa cosascunata rurashpami causarcanchij. Pero Jehová Diosta rijsishpaca ñucanchij ñaupa  causaita huashaman saquishpami pai munashca shina causai callarircanchij. Shinallataj Diospaj ñaupajpi ima alli cashcata, ima mana alli cashcatami intindircanchij. Chaita intindishcamantami cunanca cushilla causaita charinchij (Isaías 48:17). Shinapish luzpi puricushpapish mana cuidadota charishpaca cutinmi amsapi puri callarishun. Pero ama chashna tucungapajca ¿imatataj rurana canchij?

AMSA ÑANPICA AMA CUTIN PURISHUNCHIJ

8. Efesios 5:​3-5-pi nishca shinaca, ¿Efesopi caj huauqui panicunaca ima ruraicunamantataj caruyana carca?

⁸ (Efesios 5:​3-5-ta liyipai). Amsa ñanpi ama cutin puringapajca Efesopi caj huauqui panicunaca Jehová Dios mana munashca ruraicunamantami caruyana carca. Paicunaca huainayanapi ama urmangapaj esforzarishpapish mapa shimicunata ama ningapajpishmi esforzarina carca. Pabloca ‘Diospaj Gobiernopi herenciata japisha nishpaca mapa ruraicunamantami caruyana canchij’ nishpami yuyachirca.

9. ¿Mapa ruraicunapica imamantataj mana chagrurina canchij?

⁹ Ñucanchijpish “amsapaj yanga ruraicunapi” ama urmangapajmi cuidadota charina canchij (Efesios 5:11). Mapa cosascunata ricujcuna, uyajcuna o chaicunamanta parlajcunaca jahuallami jatun juchacunapi urmai tucuncuna (Génesis 3:6; Santiago 1:​14, 15). Por ejemplo, shuj llajtapica achca huauqui panicunaca paicunapura parlanacungapajmi shuj red socialpi shuj grupota rurarcacuna. Paicunaca callaripica Diosmantami parlanacujcuna carca. Pero asha asha Diosmanta parlanacunata saquishpami mapa cosascunamanta parlanacui callarircacuna. Chai huauqui panicunaca mapa cosascunamanta parlanacuj cashcamantaca ¿imataj tucurca? Qꞌuipaca achcacunami huainayanapi urmarcacuna.

10. ¿Diabloca ima shinataj ñucanchijta pandachisha nin? (Efesios 5:6).

¹⁰ Diabloca mana allitaca allita shina ricuchunmi pandachisha nin (Isaías 5:20; 2 Corintios 4:4). Shinallataj Diabloca Jehová Dios millashca ruraicunata rurana mana jatun jucha cashcatami crichisha nin (2 Pedro 2:19). Por ejemplo, cunan punllacunapica achca peliculacunapi, programacunapi, internetpipish Jehová Diospaj mandashcacunata ama cazuchunmi animan. Shinallataj achca gentecunaca: “Mapa cosascunata rurana, ñucanchij munashca shina causanaca mana juchachu can. Ashtahuanpish chaicunata ruranaca alajami can. Ima dañotapish mana ruranchu” nishpami yuyancuna. Diabloca ñucanchijcunapish chai gentecuna shina yuyachunmi munan (Efesios 5:​6-ta liyipai).

11. Efesios 5:​7-pi nishcataca ¿imamantataj cazuna canchij? Shuj experienciamanta parlai. (Fotocunamantapish parlapai).

¹¹ Diabloca Diospaj mandashcacunata mana cazujcunahuan tandanacuchunmi munan. Pero paicunahuan tandanacushpaca Jehová Diosta tucuipi cazunaca sinchimi canga. Chaimantami apóstol Pabloca Efesopi caj huauqui panicunataca mapa cosascunata rurashpa causajcunahuan ama tandanacuchun nirca. Ashtahuanpish “paicuna rurashca shinallataj cancunapish ama ruraichijchu” nishpami aconsejarca (Efesios 5:7). Efesopi caj huauqui panicunaca ñahui ñahuillami Diosta mana cazujcunahuan tandanacui tucurcacuna. Pero ñucanchijcunaca redes socialespipishmi Diosta mana sirvijcunahuan tandanacui tucunchij. Chaimantami ashtahuan cuidadota charina canchij. Asiapi causaj pani Angelaca a redes socialesta mana alli yuyashpa utilizashcamantami llaqui tucurca. Paica: “Redes sociales asha asha ñucata pandachicushcataca mana cuentata curcanichu. Chaimi Diosta mana cazujcunataca alli amigocunata  shina ricui callarircani. Qꞌuipacarin Diospaj mandashcacunata mana cazushpa causanaca alli cashcatami yuyai callarircani” nircami. Ancianocuna cꞌuyaihuanmi paipaj yuyaita cambiachun Angelataca ayudarcacuna. Paica: “Cunanca redes socialespi yallitaj ocuparinapaj randica Diospajta ruranapimi ashtahuanca ocuparini” nircami.

12. ¿Jehová Diospaj mandashcacunata tucui shunguhuan cazusha nishpaca imatataj rurana canchij?

¹² Diosta mana sirvijcuna mapa ruraicunata ruranaca mana juchachu can nijpipish ñucanchijca chaitaca mana crinachu canchij. Chaica jatun llullami can (Efesios 4:​19, 20). Chaimantami escuelapi, trabajopi shujtaj ladocunapipish Diospaj mandashcacunata mana cazuj gentecunahuan ama yalli tiempota pasangapaj esforzarina canchij. Shinallataj maijancunaca: “Yaya Diosta tucuipi cazuna cashcataca mana yuyanachu canguichij” ningacunami. Paicuna cashna nijpipish ñucanchijca mana manchashpami ñucanchij crishcacunata difindina canchij. Ashtahuanpish 2 Timoteo 2:​20-22-pi nishca shinaca congregación ucupipish alli yuyashpami pihuan apanacunata agllana canchij. ¿Imamanta? Maijancunaca Jehová Diosta tucui shunguhuan sirvishpa catichunca manachari ñucanchijta ayudangacuna.

“LUZPAJ HUAHUACUNA SHINA CAUSASHPA” CATISHUNCHIJ

13. ¿‘Luzpaj huahuacuna shina causacushcataca’ ima shinataj ricuchinchij? (Efesios 5:​7-9).

¹³ Pabloca amsamanta caruyaichij nishca qꞌuipaca “luzpaj huahuacuna shina causashpa catichij” nishpami aconsejarca (Efesios 5:​7-9-ta liyipai). ¿Pabloca imatataj nisha nirca? Tucui horasmi Diosta alli sirvijcuna cashcata ricuchina canchij. Chaipajca Bibliata, publicacioncunatami liyina, estudiana canchij. Jesusca “gentecunapaj luzmi” carca. Chaimantami Bibliata estudiacushpaca paimanta imata yachai tucushcata yuyana canchij (Juan 8:12; Proverbios 6:23).

14. ¿Espíritu santoca ima shinataj ñucanchijtaca ayudai tucun?

¹⁴ Cai millai mundopi Jehová Dios munashca shina causanaca mana jahuallachu can (1 Tesalonicenses 4:​3-5, 7, 8). Chaimantami “luzpaj huahuacuna shina causashpa” catingapajca Jehová Dios paipaj espíritu santota cushpa  ñucanchijta ayudachun minishtinchij. Jehová Dios paipaj espíritu santota cujpimi cai mundopi tiyaj panda yuyaicunataca mana crishun. Shinallataj espíritu santota chasquishpaca ‘alli shungucuna, cashcata rurajcunami cashun. Ashtahuancarin mana llullapi nishca shinami purishun’ (Efesios 5:9).

15. ¿Espíritu santota chasquingapajca imatataj rurana canchij? (Efesios 5:​19, 20).

¹⁵ Jesusca ‘jahua pachapi caj Yayaca paita mañajcunamanca, ¿manachu paipaj espíritu santota cunga?’ nircami (Lucas 11:13). Shinashpaca espíritu santota cuchun Yaya Diosta mañashunchij. Ashtahuanpish espíritu santota chasquingapajca ñucanchij huauqui panicunahuanmi tandanacuicunapi Jehová Diosta jatunyachina canchij (Efesios 5:​19, 20-ta liyipai). Espíritu santota chasquishpaca Jehová Dios munashca shina causashpa catingapajmi fuerzasta charishun.

16. ¿Alli decisioncunata japingapajca imatataj rurana canchij? (Efesios 5:​10, 17).

¹⁶ Alli decisioncunata japingapajca ¿imatataj rurana canchij? Puntapica, Jehová Diospaj munai maijan cashcatami intindina canchij. Chaita intindishca qꞌuipaca alli yuyashpami imatapish decidina canchij (Efesios 5:​10, 17-ta liyipai). Shinallataj manaraj shuj decisionta japishpaca Bibliapi imata nishcatami ricuna canchij. Chashnami chai decisionta japijpi Jehová Dios ima shina sintirinata intindishun. Bibliapi nishcacunata pajtachishpallami alli decisioncunata japi tucushun.

17. ¿Tiempota alli aprovechacushcataca ima shinataj ricuchinchij? (Efesios 5:​15, 16, fotomantapish parlapai).

¹⁷ Shinallataj Pabloca Efesopi caj huauqui panicunataca tiempota alli aprovechachunmi animarca (Efesios 5:​15, 16-ta liyipai). Millai Diabloca, ñucanchijcuna yanga cosascunapi ocuparishpa Jehová Diosta sirvingapaj tiempota mana charichunmi munan (1 Juan 5:19). Mana cuidadota charishpaca Jehová Diosta sirvinapi ocuparinapaj randica cullquillapi, estudianallapi, trabajanallapimi ocupari callarishun. Pero chaicunallapi ocuparishpaca cai mundopaj panda yuyaicuna ñucanchijta  umacushcatami ricuchishun. Cullquita charina, estudiana, trabajanaca mana juchachu can. Pero chaicunallapica mana ocuparinachu canchij. Ashtahuanpish “luzpaj huahuacuna shina” causacushcata ricuchingapajca Diospajta ruranapimi ocuparina canchij. Chashnami tiempota alli aprovechacushcata ricuchishun.

18. ¿Huauqui Donaldca tiempota alli aprovechangapajca imatataj rurarca?

¹⁸ Shinallataj, “¿Jehová Diosta ashtahuan sirvingapajca imatataj rurai tucuni?” nishpami tapurina canchij. Sudáfrica llajtapi causaj huauqui Donaldmi chaitaca rurarca. Paica: “Jehová Diostami ‘canta ashtahuan sirvingapaj ayudahuai’ nishpa mañarcani. Shinallataj Yayitu Diostaca ‘predicacionmanca ashtahuanmi llujshisha nini. Chaimanta tucui ñuca tiempota mana quichuj trabajota japingapaj ayudahuai’ nishpami mañarcani” nircami. Jehová Diosca cai huauquipaj mañashcatami cutichirca. Chaimi paipish, paipaj huarmipish tiempo completota Jehová Diosta sirvi callarircacuna.

19. ¿“Luzpaj huahuacuna shina causashpa” catingapajca imatataj rurana canchij?

¹⁹ Pablo quillcashca cartata liyishpaca Efesopi caj huauqui panicunaca Jehová Diosta tucui shunguhuan sirvishpa catingapajmi animarircacuna. Ñucanchijpish chaita rurangapajmi esforzarina canchij. Caipi ricushca shinaca Pablo quillcashca cartaca diversioncunata, amigocunata alli yuyashpa agllachunmi animan. Shinallataj chai cartaca Bibliata alli estudiachun, Diospaj mandashcacunata yuyaipi charishpa alli decidichunmi ayudan. Ashtahuanpish Efesios libropica alli cualidadcunata charingapaj espíritu santota cuchun Jehová Diosta mañana cashcatami yachashcanchij. Apóstol Pablo cushca consejocunata pajtachishpaca alli decisioncunatami japishun. Chashnami Jehová Diosta cushichishun. Ashtahuanpish amsapi purinapaj randica luzpimi purishpa catishun.