1, 2. ¿Bautizarijcunaca ima bendicioncunatataj chasquincuna?

 CUNANLLA bautizarijcuna Diospaj familia parte tucujta ricushpaca achcatami cushicunchij. Diospaj familia ucupi cajcunaca paihuanmi alli apanacui tucunchij. Chaimantami David shina sintirinchij. Paica: “Maijanpish quiquin agllashcaca cushichishcami. Quiquin pushamushcaca cushichishcami. Quiquinpaj huasi canllacunapi causachunmi pushamushcangui” nircami (Salmo 65:4).

² ¿Jehová Diosca paipaj familia parte tucuchunca picunatataj chasquin? Yachai 9-pi ricushca shinaca Jehová Diosca paipaj amigo casha nijcunatami chasquin (Santiago 4:8). Jehová Diosman mingarishpa, bautizarishpaca paipaj alli amigocunami tucunchij. Paica paipaj amigocunamanca: ‘Cancunapaj imapish ama faltachunca achcatami bendiciasha’ ninmi (Malaquías 3:10; Jeremías 17:​7, 8).

3. ¿Bautizarishca qꞌuipaca imatataj rurana canchij? (Eclesiastés 5:​4, 5).

³ ¿Bautizarishca qꞌuipaca chaillapichu saquirina canchij? Mana. Tucuicunami Jehová Diosman mingarishpa ñucanchij ari nishcata pajtachingapaj esforzarina canchij. Tentacioncuna, llaquicuna ricurijpipish chaitami rurana canchij (Eclesiastés 5:​4, 5-ta liyipai). Shinallataj Jesús shina causanata, paipaj yachachishcacunata pajtachinataca manataj saquinachu canchij (Mateo 28:​19, 20; 1 Pedro 2:21). Cai yachaica Jesús yachachishca shina causashpa catingapajmi ayudanga.

LLAQUICUNA, TENTACIONCUNA RICURIJPIPISH JESUSTA CATINATA AMA SAQUICHU

4. ¿Cancunapaj “llaquichina caspita apashpa” ñucata catichij nishpaca Jesusca imatataj nisha nirca? (Lucas 9:23).

⁴ Bautizarishca qꞌuipa llaquicuna illaj causanataca mana yuyanachu cangui. Ashtahuanpish Jesusca cada uno ñucanchij “llaquichina  caspita apashpa” paita catina cashcatami nirca (Lucas 9:​23-ta liyipai). ¿Chaita nishpaca Jesusca llaquicunallahuan causana cashcatachu nirca? Mana. Ashtahuanpish Jesusta caticushcamanta bendicioncunata chasquina cashpapish huaquinpica problemacunahuan, jatun llaquicunahuan chꞌimbapurana cashcatami nirca (2 Timoteo 3:12).

5. ¿Jesús nishca shinaca Jehová Diosta sirvinata agllajcunaca ima bendicioncunatataj chasquingacuna?

⁵ Jehová Diosta sirvinata agllashcamantami tal vez familia ucupica problemacunata charircangui. Mana cashpaca Jehová Diosta ashtahuan sirvingapajchari huaquin cosascunata huashaman saquircangui (Mateo 6:33). Jehová Dios paita sirvingapaj imalla rurashcataca manataj cungarinchu (Hebreos 6:10). Jesusca: “Maijanpish ñucata catij cashcamanta, alli huillaicunamantapish huasita, huauquicunata, panicunata, yayata, mamata, huahuacunata, allpacunata saquijca, catirashpa llaquichishca cashpapish cunan punllapica 100 cutinhuan yallimi huasicunata, huauquicunata, panicunata, mamacunata, huahuacunata, allpacunata chasquinga. Shamuj punllacunapicarin huiñai causaitami chasquinga” nircami (Marcos 10:​29, 30). Seguramente Jesús nishcacunaca cambaj causaipi pajtarishcatami ricushcangui. Jehová Diosta sirvinata agllashcamanta can chasquishca bendicioncunaca can rurashca sacrificiocunata yallimi can (Salmo 37:4).

6. ¿Ña bautizarishca cashpapish aicha munaicunapi ama urmangapajca imamantataj esforzarishpa catina canchij?

⁶ Ña bautizarishca cashpapish ‘aicha munaicunamantami’ jarcarishpa catina cangui (1 Juan 2:16). Juchayujcuna huacharishcamantami tucuicuna mapa ruraicunapi ama urmangapaj esforzarina canchij. Chaimantami huaquinpica apóstol Pablo shina sintirishun. Paica: “Ñuca ucu yuyaipica, Dios mandashcacunallahuanmi cushicuni. Ashtahuanpish ñuca cuerpopi caj miembrocunapica, shujtaj mandashcatami ricuni. Paimi ñuca yuyaita mandajhuan macanacucun. Chaica ñuca cuerpopi caj miembrocunatami juchapaj mandashcata rurachun huatashpa apacun” nircami (Romanos 7:​22, 23). Aicha munaicunamanta jarcarinaca huaquinpica sinchimi canga. Pero chaicunapi ama urmangapajca Jehová Diosman mingarishpa ari nishcatami yuyarina canchij. Jehová Diosman mingarishcamantami tentacioncunapica mana jahualla urmashun. ¿Imamantataj chaita ninchij?

7. ¿Bautizarishca qꞌuipa tentacioncuna ricurijpica imatataj yuyarina canchij?

⁷ Jehová Diosman mingarishpaca ‘mana alli munaicunata, mana alli ruraicunata huashaman saquishpa Jehová Diosllatami sirvigrini’ nishpami ari nircanchij. Chaita nishpami ñucanchijpajlla ña mana causagrishcata ricuchircanchij (Mateo 16:24). Chaimantami tentacioncuna ricurijpica chaicunapi urmanata yuyanapaj randica “Jehová Diosllatami sirvigrini” nishpa ari nishcata yuyarina canchij. Chaita yuyarishpami Jehová Diosta tucuipi cazungapaj fuerzasta charishun. Ashtahuanpish Job shina cashcatami ricuchishun. Paica jatun llaquicunahuan chꞌimbapuracushpapish Jehová Diostami tucuipi cazurca (Job 27:5).

8. ¿Tentacioncunapi ama urmangapajca imamantataj Jehová Diosman mingarishcata yuyarina canchij?

⁸ Ñajaman nishca shinaca “Jehová Diosllatami sirvigrini” nishpa ari nishcata yuyarishpaca tentacioncunapi ama urmangapajmi fuerzasta charishun. Por ejemplo, ¿ñucanchij ari nishcata yuyaipi charishpaca cazarashca cꞌarihuan o huarmihuan yangamanta asirishpa, pugllarishpachu purishun? ¡Mana! Jehová Diosman mingarishpaca chaitapish mana ruranatami ari nircanchij. Shinallataj mana alli munaicuna, yuyaicuna ñucanchij shungupi sapiyachunca mana saquinachu canchij. Chaita rurashpaca mana alli munaicunamanta caruyanaca ashtahuan jahuallami canga. Chashnami ‘millaicunapaj ñanmanta’ anchurishcata ricuchishun (Proverbios 4:​14, 15).

9. ¿Jehová Diosta sirvinata punta lugarpi churangapajca imamantataj paiman mingarishcata yuyarina canchij?

 ⁹ ¿Tandanacuicunaman richun jarcaj trabajota cusha nijpica imatataj ruranguiman? Chaipica Jehová Diosman mingarishcatami yuyarina cangui. Chai trabajota manaraj ofrecijllapitajmi Diosman mingarishpaca chai trabajota mana chasquinata ari nircangui. Chaimantami “chai trabajotaca chasquigrinillami, qꞌuipami Jehová Diosta sirvishpa catingapaj imata ruranata ricusha” nishpaca mana yuyana cangui. Shinallataj Jesustami yuyarina canchij. Paica Jehová Diosta tucuipi cazungapajmi esforzarirca. Ñucanchijpish Jehová Diosman mingarishca cashcamantami tentacioncuna ricurijpica chaicunamantaca rato caruyana canchij (Mateo 4:10; Juan 8:29).

10. ¿Jesuspaj ejemplota catichunca Jehová Diosca ima shinataj ñucanchijtaca ayudanga?

¹⁰ Llaquicunata, tentacioncunata ahuantashpami Jesusta tucui shunguhuan catisha nishcata ricuchishun. Jehovami Jesuspaj ejemplota catichun ñucanchijtaca ayudasha nin. Chaimantami Bibliapica: “Diosca pai nishcata pajtachij cashcamantami, cancuna apai tucunalla llaquicunata apachun saquinga. Cancunata ima llaquicuna japijpipish Diosllatajmi llaquicunata ahuantashpa catichun ayudanga” nin (1 Corintios 10:13).

¿JESUSPAJ EJEMPLOTA CATINGAPAJCA IMATATAJ RURANA CANGUI?

11. ¿Jesusta caticushcata ricuchingapajca imatataj rurana cangui? (Fotocunamantapish parlapai).

¹¹ Jesusca Jehová Diosmanta ama caruyangapajca paitami tucui shunguhuan mañaj carca (Lucas 6:12). Canpish bautizarishca qꞌuipaca Diosmanta ama caruyangapajca paipajta rurashpa catingapajmi esforzarishpa catina cangui. Chashnami Jesusta caticushcata ricuchingui. Bibliapica: “Mashnata sinchiyashca cashpapish chai ñanllapitaj allita rurashpa catishunchij” ninmi (Filipenses 3:16). Chaimi huaquincunaca Escuela para Evangelizadores del Reinoman rishcacuna. Mana cashpaca shujtaj llajtacunapi, shujtaj  ladocunapimi huillanaman rishcacuna. ¿Canpish chaita rurai tucunguichu? Diosta sirvijcunaca paimanta ashtahuan huillangapajmi imata ruranata mashcana canchij (Hechos 16:9). Pero cai rato chaita mana rurai tucushpaca Jehová Diospaj mana valishca cashcataca mana yuyanachu cangui. Paica can mana rurai pudishcata rurachunca mana munanchu. Ashtahuanpish tucuimanta yallica llaquicunata ahuantashpa catichunmi munan (Mateo 10:22). Yayitu Diosca tucui can rurai pudishcata ruracujta ricushpaca cushillami sintirin. Ashtahuantajca Jehová Diosta tucui shunguhuan sirvishpa catingapaj esforzarishpaca Jesustapish caticushcatami ricuchingui (Salmo 26:1).

12, 13. ¿Jehová Diosta sirvishpa catina munaita ña mana tanto charishpaca imatataj rurana cangui? (1 Corintios 9:​16, 17; “ ¿Carrerapi callpashpa catingapajca imatataj rurana cangui?” nishca recuadrotapish ricui).

¹² Bautizarishca qꞌuipaca quillacuna, huatacuna pasajpica Jehová Diosta ña mana tucui shunguhuan mañacushcata, paimanta huillacushpapish ña mana cushilla sintirishcatachari cuentata cungui. Huaquinpicarin Bibliata liyicushpapish asha aburridochari sintiringui. Pero chashna sintirishpaca Jehová Dios espíritu santota canman ña mana cucushcataca mana yuyanachu cangui. Juchayujcuna cashcamantami huaquinpica Diosmanta yachashpa catinataca ña mana tanto munanchij. Chaipica apóstol Pablopimi yuyana canchij. Paica Jesuspaj ejemplota catingapajmi sinchita esforzarij carca. Shinapish huaquinpica Jehová Diosta sirvishpa catina munaitaca mana tanto charircachu (1 Corintios 9:​16, 17-ta liyipai). Chaimi paica: “Chaita rurana cashcallamanta rurana cashpapish, Diosmi chaita rurachun mingarca” nirca. Shinashpaca Pabloca Diospajta rurashpa catina munaita mana tanto charishpapish chaita rurashpa catingapajmi esforzarishpa catirca.

¹³ Shinashpaca ¿Jehová Diosta sirvina munaita charishpallachu paita sirvishpa catina cangui? Mana. Ashtahuanpish Jehová Diosta sirvina  munaita mana charishpapish paita sirvishpa catingapajmi esforzarishpa catina cangui. Chaita rurangapaj esforzarijpica cambaj shungupica Jehová Diosta sirvina munaica ashtahuanmi mirashpa catinga. Shinallataj Bibliata estudianata, tandanacuicunaman rinata, Diosmanta huillanatapish manataj saquinachu cangui. Chaicunata rurashpami Jesusta caticushcata ricuchingui. Ashtahuancarin cambaj esfuerzocunata ricushpami huauqui panicunaca achcata animaringacuna (1 Tesalonicenses 5:11).

“CANCUNALLATAJ ALLI RICURASHPA CATICHIJ”

14. ¿Bautizarishca qꞌuipaca imacunata rurangapajtaj tiempota llujchina canchij? (2 Corintios 13:5).

¹⁴ Bautizarishca qꞌuipaca Jehová Diosta ima shina sirvicushcata yuyangapajmi tiempota surcuna canchij (2 Corintios 13:​5-ta liyipai). Por ejemplo, “¿Jehová Diostaca punllantachu mañani? ¿Bibliata punllanta liyingapaj, estudiangapajchu esforzarini? ¿Tucui tandanacuicunaman ringapaj, predicacionman llujshingapajpishchu esforzarini?” nishpami tapurina cangui. Shinallataj chai ruraicunata cushicushpa rurashpa catingapaj imata ruranatami yuyana cangui. Cashna nishpapishmi tapurina cangui: “¿Bibliapi tiyaj callari yachachishcacunataca allichu explicai tucuni? ¿Cushilla huillashpa catingapajca imatataj rurai tucuni? ¿Jehová Diosta mañacushpaca paimanca ñuca ima shina sintirishcataca tucuitachu huillani? ¿Ñuca mañashcacunaca Jehová Diospi confiashcatachu ricuchin? ¿Tucui tandanacuicunaman ringapajchu esforzarini? ¿Tandanacuicunapi atencionhuan uyangapaj, sumaj comentariocunata cungapajpish imatataj rurai tucuni?”.

15, 16. ¿Huauqui Robertmantaca imatataj yachanchij?

¹⁵ Juchapi ama urmangapaj imapi mejorai tucushcatapishmi yuyana canchij. Chaita rurana imamanta minishtirishca cashcata intindingapajca huauqui Robertmanta parlashun. Paica cashnami nirca: “20 huatacunata charishpaca medio tiempotami trabajaj carcani. Shuj punllaca trabajomanta alzaricujpimi ñucahuan trabajaj shuj huarmica: ‘Ñucallami huasipi cagrini. Jacu ñucahuan alajata pasashun’ nirca. Pai chashna nijpica callaripica chai invitacionta ama chasquingapajca pretextocunallatami churarcani. Pero qꞌuipaca imamanta chaita mana rurai tucushcatami alli explicarcani” nircami. Robertca chai tentacionpi mana urmashcamantami tranquilo sintirirca. Pero qꞌuipaca imapi mejorai tucushcatami yuyarca. Paica: “Potifarpaj huarmi juchapi urmachisha nijpica Joseca chai ratomi ‘mana’ nirca. Pero ñucaca mana ningapajca ashatami demorarcani (Génesis 39:​7-9). Chai rato mana ninaca ñucapajca sinchimi carca. Chaimantami Jehová Diosta tucui shunguhuan cazungapaj esforzarishpa catina cashcata cuentata curcani” nircami.

 ¹⁶ ¿Huauqui Robertmantaca imatataj yachanchij? Tentacioncuna ricurijpica chaicunapica manachari urmashun. Pero mana urmashca cashpapish Robert layami: “¿mana ninaca ñucapajpish sinchichu carca?” nishpa tapurina canchij. Mejorashpa catina cashcata cuentata cushpaca mana desanimarinachu canchij. Ashtahuanpish juchapi ama urmangapaj imapi mejorana cashcata cuentata cunaca allimi can. Shinallataj Jehová Dios ñucanchijta ayudachunmi mañana canchij. Chai qꞌuipaca Jehová Diosta tucui shunguhuan cazushpa catingapajmi esforzarishpa catina canchij (Salmo 139:​23, 24).

17. ¿Robertca Diospaj shutitaca ima shinataj allipi saquirca?

¹⁷ Huauqui Robertmanta parlashpa catishun. Paica cashnami nirca: “Paipaj invitacionta mana chasquijpica ñuca compañeraca: ‘Pruebatami pasashcangui’ nircami. Chaimi ñucaca: ‘¿Imatataj nisha ningui?’ nishpa tapurcani. Paica: ‘Shuj amigoca testigo de Jehová canatami saquirca. Chai amigoca ñucataca: ‘Tucui joven testigocunaca pacallami mapa cosascunata rurancuna. Mapa cosascunata rurangapaj shuj oportunidad ricurijpica paicunaca ratomi chaipica urmancunalla’ nircami. Chaimi ñuca amigo nishcacuna cierto cashcata ricungapajlla cantaca juchapi urmachisha nircani’” nircami. Robertca Diospaj shutita mana mapayachishcamantami cushilla sintirirca.

18. ¿Bautizarishca qꞌuipaca imatataj rurasha ningui? (“ Ishqui sumaj yachaicuna” nishca recuadrotapish ricui).

¹⁸ Jehová Diosman mingarishpa, bautizarishpaca ima tentacioncuna, ima llaquicuna ricurijpipish paipaj shutita jatunyachisha nishcatami ricuchingui. Jehová Diosca can ima llaquicunata apacushcata, ima tentacioncunahuan chꞌimbapuracushcataca allimi yachan. Paica can sinchita esforzaricujta ricushpaca cushillami sintirin. Chaimantami cantaca bendiciasha nin. Ashtahuancarin allita rurashpa catichunca espíritu santotami cunga (Lucas 11:​11-13). Shinashpaca bautizarishca qꞌuipa Jesuspaj ejemplota catichunca Jehovami ayudanga.