1, 2. ¿Manaraj bautizarishpaca imatataj rurana canchij?

 HUATA 2018-manta huata 2022-camaca shuj millón yalli gentecunami bautizarishcacuna. Maijancunaca Timoteo shinami uchillamantapacha Diosmanta yacharcacuna (2 Timoteo 3:​14, 15). Shujtajcunaca jatuncuna cashpa o mayorllacuna cashpami Diosmanta yachai callarircacuna. Por ejemplo, shuj huarmica 97 huatacunata charishpami bautizarirca.

² ¿Canca Bibliata estudiacunguichu? ¿O cambaj yaya mamacunaca testigo de Jehovacunachu can? Seguramente paicunaca canmanca Bibliamantami yachachicuncuna. Tal vez canca bautizarinatami munangui. Chaita ruranaca allimi can. Pero manaraj bautizarishpaca Yaya Diosmanmi mingarina cangui. Cai yachaipica Yaya Diosman mingarina ima cashcatami yachashun. Shinallataj Yaya Diosman mingarishpa bautizarinata imamanta mana manchana cashcatami ricushun. Chashnami chai decisionta japingapaj allichirishca cangui.

¿DIOSMAN MINGARINACA IMATAJ CAN?

3. ¿Ñaupa punllacunapica Jehová Diosta sirvingapajca picunallataj mingarircacuna?

³ Bibliapica Diosman mingarina nishpaca Jehová Diosta sirvingapaj agllashca o chꞌicanyachishca nisha ninmi. Ñaupa Israel llajtaca Jehová Diosta sirvingapajmi chꞌicanyachishca carcacuna. Maijan israelitacunapish huaquin ruraicunata rurangapajmi agllashca carcacuna. Por ejemplo, Jehová Diosca sumo sacerdote cachunmi Aaronta agllarca. Paitaca sacerdote cashcamantami umapica shuj turbanteta churachircacuna. Turbante ñaupaj ladopica uchilla curi latapi quillcashcatami churarcacuna. Chai quillcataca “Diospajlla chꞌicanyachishca cashcata ricuchingapajmi churarcacuna” (Levítico 8:9). Shinallataj nazareocunaca  Jehová Diosta sirvingapajmi paiman mingarishcacuna carca. Nazareo shimica nazír nishca shimimantami shamun. Chai shimica “chꞌicanyachishca, agllashca” nisha ninmi. Nazareocunaca Moisesman cushca huaquin mandashcacunatami cazuna carcacuna (Números 6:​2-8).

4. a) ¿Diosman mingarishpaca imatataj agllanchij? b) ¿Ñucanchijpajlla ña mana causacushcataca ima shinataj ricuchinchij? (Fotomantapish parlapai).

⁴ Jehová Diosman mingarishpaca Jesuspaj catijcuna canatami agllanchij. Shinallataj ñucanchij causaipi Diospaj munaita ruranata punta lugarpi churanatami agllanchij. Jesusca: “Maijanpish ñucata catisha nijca paipajllaca ña ama causachun” nircami (Mateo 16:24). Griego rimaipi “paipajllaca ña ama causachun” nishpaca “pai munashcata ama rurachun” ninmi. Shinashpaca Jehová Diosman mingarishpaca pai millashca ruraicunamantami caruyana canchij (2 Corintios 5:​14, 15). Por ejemplo, aichapaj ruraicunamanta, huainayanamantami caruyana canchij (Gálatas 5:​19-21; 1 Corintios 6:18). ¿Chai mapa ruraicunamanta caruyanaca sinchichu can? Jehová Diosta tucui shunguhuan cꞌuyashpa, shinallataj paipaj mandashcacuna ñucanchij allipajllataj alli cashcata seguro cashpaca mapa ruraicunamanta caruyanaca mana sinchichu canga (Salmo 119:97; Isaías 48:​17, 18). Nicholas shuti huauquica cashnami nirca: “Diospaj mandashcacunataca ñucanchij munashcata rurachun mana saquij jaulata shinami ricui tucunchij. Pero mana chashnachu can. Ashtahuanpish Diospaj mandashcacunaca pꞌiñaj león ñucanchijta ama dañota rurachun shuj jarcaj jaulata churashca shinami can”.

5. a) ¿Jehová Diosmanca ima shinataj mingarinchij? b) ¿Jehová Diosman mingarina, bautizarinaca imapitaj chꞌican can? (Fotomantapish parlapai).

⁵ ¿Jehová Diosmanca ima shinataj mingarinchij? Paitami: “Canllatami adorasha, ñuca causaipica tucuimanta yallica cambaj munaitami rurasha” nishpa mañana canchij. Chashna  mañashpaca Yayitu Diosta ‘tucui shunguhuan, tucui causaihuan, tucui yuyaihuan, tucui fuerzahuan’ cꞌuyagrishcatami ricuchinchij (Marcos 12:30). Ñucanchijlla cashpami Yaya Diosta mañashpa paiman mingarinchij. Cutin Diosman mingarishcata tucuicuna yachachunca tucuicunapaj ñaupajpimi bautizarinchij. Yaya Diosman mingarinaca mana shuj pugllaillachu can. Chaimantami ñucanchij ari nishcata pajtachingapaj esforzarina canchij. Jehová Diosca chaita rurachunmi munan (Eclesiastés 5:​4, 5).

¿JEHOVÁ DIOSMANCA IMAMANTATAJ MINGARINA CANGUI?

6. ¿Imamantataj Jehová Diosman mingarinchij?

⁶ Ñucanchijca Jehová Diosta cꞌuyashcamantami paiman mingarinchij. Jehová Diosta rijsishcamanta chai rato cushilla cashcallamantaca mana mingarinchijchu. Ashtahuanpish Jehová Diosmanta yachacushpaca paitami asha asha cꞌuyai callarircanchij. Shinallataj espíritu santota cushpa Jehová Dios ayudajpimi paitaca alli rijsi tucurcanchij (Colosenses 1:9). Bibliata estudiashpami Jehová Dios tiyashcata, espíritu santota cushpa Bibliata quillcachishcata, paipaj munaita pajtachichun shuj organizacionta agllashcatapish intindinchij.

7. ¿Jehová Diosman mingarisha nishpaca ima shinataj causana canchij?

⁷ Jehová Diosman mingarisha nijcunaca Bibliapi tiyaj callari yachachishcacunatami alli rijsina can. Shinallataj Jehová Diospaj mandashcacunatami cazuna can. Paicunapaj crishcacunamantapish shujtajcunaman yachachingapajmi esforzarina can (Mateo 28:​19, 20). Shinallataj Jehová Diosta tucui shunguhuan cꞌuyashcamantami paillata sirvina can. ¿Canca Jehová Diostaca tucui shunguhuanchu cꞌuyangui? Jehová Diosta chashna cꞌuyashpaca Bibliamanta canman yachachijcunata  cushichingaraicullaca mana bautizaringuichu. Shinallataj joven, cambaj yaya mamata cushichingapajlla o cambaj amigocuna bautizarishcallamantaca canpish mana bautizarinachu cangui.

8. ¿Jehová Diosta agradicingapajca imatataj rurana canchij? (Salmo 116:​12-14).

⁸ Yayitu Dios canmanta imallata rurashcata yuyari (Salmo 116:​12-14-ta liyipai). Bibliapica ‘tucui alli regalocunapish, ima ashtahuan allicunapish Jehová Diosmantami shamun’ ninmi (Santiago 1:17). Por ejemplo, Jehová Diosca ñucanchijmanta huañuchunmi paipaj Churita curca. Chaica valishca regalomi can. Jesús huañushcamantami canca Diospaj amigo cana, huiñai huiñaita causana oportunidadta charingui (1 Juan 4:​9, 10, 19). Shinashpaca Jehová Dios cꞌuyaita ricuchishcamanta, tucuipi ayudashcamanta agradicingapajmi paiman mingarina cangui (Deuteronomio 16:17; 2 Corintios 5:15). Caimanta ashtahuan yachangapajca Cushilla causai libropi, yachai 46-pi, punto 4-ta ricui. Chaipi tiyaj “¿Jehová Diosmanca imatataj cui tucunchij?” nishca videotapish ricui. Chai videoca tres minutosllami can.

¿DIOSMAN MINGARISHPA BAUTIZARINGAPAJCA LISTOCHU CANGUI?

9. ¿Jehová Diosman ima hora mingarinataca imamantataj cada uno agllana canchij?

⁹ Jehová Diosman mingarishpa bautizaringapaj manaraj listo cashcatachari yuyangui. Tal vez Jehová Dios munashca shina causangapajca huaquin cambiocunatami ruranaraj cangui. Mana cashpaca cambaj feta sinchiyachingapajchari ashtahuan tiempota minishtingui (Colosenses 2:​6, 7). Bibliamanta yachacujcunaca chꞌican chꞌican cashcamantami cada uno espiritualmente sinchi tucungapajca tiempota minishtin. Jovencunapish espiritualmente sinchi tucungapajca asha huatacunata o ashtahuan huatacunatami minishtincuna. Chaimantami ‘cada uno shujtajcunahuan mana chꞌimbapurarishpa’ ima cambiocunata rurana cashcata alli ricurana canchij (Gálatas 6:​4, 5).

10. ¿Jehová Diosman mingarishpa bautizaringapaj manaraj listo cashcata cuentata cushpaca imatataj rurana cangui? (“ ¿Cambaj yaya mama Testigocuna cajpica imatataj rurana cangui?” nishca recuadrotapish ricui).

¹⁰ Jehová Diosman mingaringapaj manaraj listo cashcata cuentata cushpaca esforzarishpami catina cangui. Shinallataj cambaj causaipi cambiocunata rurashpa catingapajca Jehová Diospaj ayudatami mashcana cangui (Filipenses 2:13; 3:16). Jehová Dios can imalla mañashcacunata cutichinataca seguromi cana cangui (1 Juan 5:14).

¿MAIJANCUNACA IMAMANTATAJ MANARAJ DECIDIRINCUNA?

11. ¿Jehová Diosca ima shinataj ñucanchijta ayudan?

¹¹ Maijancunaca Jehová Diosman mingarishpa bautizaringapajca ñami listos can. Shinapish manaraj decidirincunachu. Paicunaca “juchata rurajpica congregacionmantami llujshichingacuna” nishpami mancharincuna. Pero, bautizarijcunamantaca maijancunallami juchata rurashcamanta congregacionmanta llujshichishca can. ¿Imamanta? Bibliapi nishca shinaca Jehová Diosca pai munashca shina causashpa paita cushichichun, shinallataj allicunata rurachunca paillatajmi ayudanga (Colosenses 1:10). Yayitu Diosca pai munashca shina causachunca cantapishmi ayudanga. Chaimantami mana manchana cangui (1 Corintios 10:13).

12. ¿Jatun juchacunapi ama urmangapajca imatataj rurana canchij?

¹² Juchayujcuna huacharishcamantami tucuicuna maipica mana alli yuyaicunata, mana alli munaicunata charinchij (Santiago 1:14). Pero mana alli yuyaicuna, mana alli munaicuna shamujpica cada unomi chaicunata ruranata o mana ruranata agllai tucunchij. Maijancunaca “mana alli munaicunamantaca mana  jarcari tucunchijchu” nishpami yuyancuna. Pero chaica mana ciertochu can. Tucuicunami mana alli yuyaicunamanta, mana alli munaicunamanta jarcarinata yachai tucunchij. Chaipajca Jehová Diostami punllanta mañana canchij. Shinallataj Bibliata estudiangapaj, tandanacuicunaman ringapaj, huillanaman llujshingapajmi shuj horariota charina canchij. Chaicunata punllanta rurashpaca Jehová Diosman mingarishpa ñucanchij ari nishcata pajtachingapajmi fuerzasta charishun. Shinallataj ñucanchijlla cashcataca mana yuyanachu canchij. Ashtahuanpish Jehová Dios ñucanchijhuan cashcatami yuyarina canchij (Gálatas 5:16).

13. ¿Josemantaca imatataj yachanchij?

¹³ Jehová Diosta tucuipi cazungapajca tentacioncuna manaraj ricurijllapitajmi chaicunapi ama urmangapaj imata ruranata yuyana canchij. Bibliapica Diosta sirvijcuna tentacioncunapi ama urmangapaj imata rurashcatami yachachin. Paicunaca ñucanchij layallatajmi juchayujcuna carca. Josepi yuyashun. Potifarpaj huarmica paihuan siririchunmi cutin cutin obligasha nirca. Pero Joseca juchapi ama urmangapaj imata ruranataca allimi yacharca. Chai huarmi juchapi urmachisha nijpica Joseca: “¿Imamantataj cai millaita rurashpa Diospaj ñaupajpi juchata rurashari?” nishpami cutichij carca (Génesis 39:​8-10). Shinashpaca Potifarpaj huarmi manaraj juchapi urmachisha nijpimi Joseca chaipi ama urmangapaj imata ruranataca ña yacharca. Chaimantami chai tentacionpica mana urmarca.

14. ¿Jehová Dios millashca ruraicunamanta caruyangapajca imatataj rurana canchij?

¹⁴ ¿José shina Jehová Diosta tucuipi cazungapajca imatataj rurana canchij? Tentacioncuna ricurijpi chaicunapi ama urmangapaj imata ruranatami cunanmanta yachana canchij. Shinallataj Dios millashca ruraicunamanta utca caruyanata, chaicunapi ama yuyashpa saquirinatami yachana canchij (Salmo 97:10; 119:165). Chashnami jatun juchacunapica mana urmashun. Ashtahuanpish tentacioncuna ricurijpica chaicunapi mana urmangapajmi allichirishca cashun.

15. ¿Jehová Diosta “tucui shunguhuan” mashcacushcataca ima shinataj ricuchinchij? (Hebreos 11:6).

¹⁵ Canca Diospaj pueblopi cashcata, Jehová Diosta tucui shunguhuan sirvisha nishcataca segurochari cangui. Shinapish “Jehová Diosman mingarishpa bautizaringapajca manaraj listochu cani” nishpachari yuyangui. Chashna yuyacushpaca Jehová Diosman David imata mañashcatami yuyarina cangui. Paica Jehová Diostaca: “Taita Dioslla, ñucataca alli alli ricuhuailla.  Ñuca shungu ima shina cashcata rijsihuailla. Ñuca yuyaicuna ima shina cajta ricuhuayari, rijsihuayari. Ñuca ñanta ricupayari, ñataj mana alli canman. Huiñaita mana tucurij ñanpi pushahuayari” nishpami mañarca (Salmo 139:​23, 24). Jehová Diosman mingarishpa bautizaringapaj esforzaricushcamantami paita tucui shunguhuan mashcacushcata ricuchingui. Bibliapi nishca shinaca Jehová Diosca chaita rurajcunatami bendician (Hebreos 11:​6-ta liyipai).

JEHOVÁ DIOSPAJMAN CꞌUCHUYASHPA CATI

16, 17. ¿Jehová Diosca Testigocunapaj huahuacunataca paipaj pueblomanca ima shinataj pushamun? (Juan 6:44).

¹⁶ Jesús nishca shinaca Jehová Diosmi pai agllashcacunata paipaj puebloman pushamun (Juan 6:​44-ta liyipai). ¿Jehová Dios paipaj puebloman imamanta canta pushamushcata yuyashcanguichu? Paica alli shunguta charishcata ricushpami paipaj puebloman cantaca pushamushca (Deuteronomio 7:6). Paipajca cada unomi valishca canchij. Shinashpaca canpish Jehová Diospajca achca valishcami cangui.

¹⁷ Joven, ¿cambaj yaya mamachu Jehová Diosmanta yachachicun? Chaimantachari “Jehová Diosca ñucataca paipaj pueblomanca mana pushamushcachu. Ñuca yaya mama yachachishcallamantami Diospaj pueblopi cani” nishpa yuyangui. Pero Bibliapica: “Diospajman cꞌuchuyaichij paipish cancunapajman cꞌuchuyangami” ninmi (Santiago 4:8; 1 Crónicas 28:9). Chai versopi nishca shinaca Jehová Dios cambajman cꞌuchuyachunca canrajmi paipajman cꞌuchuyana cangui. Paipajca cada unomi valishca canchij. Chaimantami cada uno ima shina cashcata ricushpa paipaj puebloman pushamushca. Shinashpaca Yaya Diosca Testigocunapaj huahuacunatapishmi paipaj puebloman pushamushca (2 Tesalonicenses 2:​13-pi nishcatapish ricui).

18. ¿Catij yachaipica imatataj yachashun? (Salmo 40:8).

¹⁸ Jesús bautizarishpaca Jehová Diospaj munaita cushicushpa rurangapajmi allichirishca carca (Salmo 40:​8-ta liyipai; Hebreos 10:7). Canpish Jehová Diosman mingarishpa bautizarishpaca Jesuspaj ejemplota caticushcatami ricuchingui. Catij yachaipica bautizarishca qꞌuipa Jehová Diosta sirvishpa catingapaj imata rurana cashcatami yachashun.