1. ¿Jehová Diosta sirvicushcamantaca ima shinataj causanchij?

 TUCURI punllacunapi causacushcamantami ashtahuan llaquicunata charishun. Pero ñucanchij huauqui panicunahuan Jehová Diosta tandalla sirvicushcamantami cushilla causanchij (Salmo 133:1). Jehová Diospaj ayudahuanmi familia ucupipish cushilla causai tucunchij (Efesios 5:33–6:1). Shinallataj pai ñucanchijta ayudashcamantami ñucanchij llaquicunata chꞌimbapurashpa cushilla causai tucushcanchij.

2. ¿Llaquicunata charishpapish imatataj rurana canchij?

² Tucuicunami Jehová Diosta tucui shunguhuan sirvishpa catingapaj esforzarishpa catina canchij. Shinapish huaquinpica chaita ruranaca mana jahuallachu canga. ¿Imamanta? Shujtajcuna paicunapaj rimashcacunahuan, rurashcacunahuan llaquichijpica achcatami llaquiri tucunchij. Mana cashpaca ñucanchij pandarishcacunallamantatajmi desanimari tucunchij. Chaillapitaj chaillapitaj pandarishpacarin ashtahuanmi llaquirishun. Cai yachaipica huauqui panicuna llaquichijpipish, ñucanchij cusa huarmi mana alli tratajpipish, ñucanchij pandarishcacunamanta llaquilla sintirishpapish Jehová Diosta sirvishpa catingapaj imata ruranatami yachashun. Shinallataj ñaupa tiempopi Diosta sirvijcuna llaquicunata ahuantangapaj imata rurashcatami ricushun.

HUAUQUI PANICUNA LLAQUICHIJPI

3. ¿Maijan huauqui panicunaca ima llaquitataj charishcacuna?

³ ¿Ima llaquitataj chari tucunchij? Huaquinpica huauqui panicunaca paicunapaj rurashcacunahuan, paicunapaj rimashcacunahuanmi ñucanchijta pꞌiñachingacuna. Mana cashpaca mana alli tratashpami llaquichingacuna. Anciano huauquicuna pandarijpipish pꞌiñari tucunchijmi. Chashna tucujpica maijancunaca  Diospaj pueblopi cashcatami dudai callarincuna. Chaimi huauqui panicunahuanca shuj shinalla Jehová Diostaca ña mana sirvisha nincuna. Cutin maijancunaca paicunata llaquichishca huauquihuan panihuan parlanacunata saquishpa, tandanacuicunaman rinata saquishpami Diosmanta caruyancuna (Sofonías 3:9). ¿Pero chaita ruranaca allichu canga? Apóstol Pablo cashna laya llaquicunata chꞌimbapurangapaj imata rurashcata ricushun.

4. ¿Pabloca ima llaquicunatataj charirca?

⁴ ¿Pabloca ima llaquitataj charirca? Apóstol Pabloca huauqui panicuna juchayujcuna cashcamanta imapipish pandarijllacuna cashcataca allimi yacharca. ¿Huaquincunaca Pablotaca ima shinataj tratarcacuna? Por ejemplo, Jerusalenpi tiyaj congregacionman ri callarijpica maijan huauqui panicunaca pai shungumanta cambiashcataca mana crircacunachu (Hechos 9:26). Maijancunacarin Pablomantami huashalla mana allicunata rimai callarircacuna (2 Corintios 10:10). Shinallataj Pabloca apóstol Pedro huauqui panicunata ima shina ñitcachicushcatami ricurca (Gálatas 2:​11, 12). Paipaj alli amigo Marcospish paihuan huillanaman mana risha nishcamantami Pabloca llaquilla sintirishcanga (Hechos 15:​37, 38). ¿Huauqui panicuna chashna llaquichijpica Pabloca paicunamanta caruyarcachu? Mana. Ashtahuanpish Pabloca paicunamanta allicunata yuyashpami paicunahuan shuj shinalla Jehová Diosta sirvishpa catirca. Cunanca huauqui panicunapi confiashpa catingapaj Pablo imata rurashcata ricushun.

5. ¿Pabloca huauqui panicunamanta ama caruyangapajca imatataj rurarca? (Colosenses 3:​13, 14; fotomantapish parlapai).

⁵ Pabloca huauqui panicunataca achcatami cꞌuyarca. Chaimantami paicunapaj pandarishcacunallata ricunapaj randica paicunapaj alli ruraicunata ricurca. Shinallataj paicunata cꞌuyashcamantami shungumanta perdonarca (Colosenses 3:​13, 14-ta liyipai). Por ejemplo, paipaj punta viajepi Marcos shitashpa rijpipish ¿Pablo paihuan mana pꞌiñarishca saquirishcataca ima shinataj yachanchij? Colosaspi caj huauqui panicunaman Pabloca: ‘Marcosca ñucatami ayudashpa achcata cushichishca’ nishpami quillcarca (Colosenses 4:​10, 11). Shinallataj Romapi prezupi cashpaca Pabloca Marcostami paita ayudanaman richun mañarca (2 Timoteo 4:11). Caipi ricushca shinaca huauqui panicuna pandarijpipish Pabloca paicunapimi confiashpa catirca. ¿Paimantaca imatataj yachanchij?

6, 7. ¿Huauqui panicuna pandarijpipish imamantataj cꞌuyaita ricuchishpa catina canchij? (1 Juan 4:7).

⁶ ¿Pablomantaca imatataj yachanchij? Jehová Diosca huauqui panicunata cꞌuyachunmi munan (1 Juan 4:​7-ta liyipai). ¿Shuj huauqui o pani mana alli tratashca cajpica imatataj rurana  canchij? Ñucanchijta de adrede llaquichisha nishcataca mana yuyanachu canchij. Ashtahuanpish allicunata rurangapaj esforzaricushcatami yuyarina canchij. Chashnami paicunata cꞌuyashcata ricuchishun (Proverbios 12:18). Juchayujcuna cajpipish Jehová Diosca tucuicunatami cꞌuyan. Chaimantami ñucanchijcuna imapi pandarijpica paica mana pꞌiñarishca saquirin. Ashtahuanpish ñucanchijpimi confiashpa catin (Salmo 103:9). Chaimanta Jehová Dios shina shujtajcunata perdonashunchij (Efesios 4:32–5:1).

⁷ Diospaj punlla cꞌuchuyamucushcamantami huauqui panicunahuan tandalla canaca minishtirishca can. Chai punllacunapica Diosta sirvijcunataca ashtahuanmi llaquichingacuna. Maijancunatacarin carcelpimi churangacuna (Proverbios 17:17). España llajtapi causaj huauqui Josehuan ima tucushcata ricushun. a Paica ancianomi can. Soldado mana tucusha nishcamantami paitapish, shujtaj huauquicunatapish carcelpi churarcacuna. Paica: “Carcelpica tucuicunatami shuj cuartollapitaj churarcacuna. Chaimi huaquinpica pꞌiñanacuj carcanchij. Pero caishujmanta chaishujmanta ahuantanacunata, shungumanta perdonanacunatami yacharcanchij. Chaita rurashcamantami carcelpi cashpapish shuj shinalla, shuj yuyailla Jehová Diosta sirvishpa catircanchij. Ashtahuancarin Diosta mana sirvij prezucuna ñucanchijta ama llaquichichunmi cuidanacujcuna carcanchij. Shuj cutinca carcelpi cashpaca rigrata chugririshcamantami mana cuyuchi valircani. Chaimi shuj huauquica ñucataca tucuipi ayudarca. Hasta ñuca ropatapishmi tajshashpa curca. Chai huauqui chashna ayudajpimi Diosta sirvijcuna ñucanchijpura ayudanacuna cashcata yacharcani” nircami. ¡Shinashpaca tucui huauqui panicunahuan alli tucungapaj esforzarishunchij! Chashnami llaquicuna shamujpipish tandalla catishun.

ÑUCANCHIJ CUSA O HUARMI MANA ALLI TRATAJPI

8. ¿Matrimonio ucupica ima llaquicunataj tiyai tucun?

⁸ ¿Ima llaquitataj chari tucunchij? Bibliapi nishca shinaca tucui cazarashcacunami ‘causaipica llaquicunata charingacuna’ (1 Corintios 7:28). Cusapish, huarmipish juchayujcuna cashcamantami matrimonio ucupica problemacuna, llaquicuna tiyai tucun. Shinallataj cusapish, huarmipish chꞌican chꞌican yuyaicunata, munaicunata, culturacunata charishcamantami huaquinpica pꞌiñanacuicuna tiyai tucun. Ashtahuanpish noviocuna cashpaca cada uno ima laya cashcataca manachari tucuita alli yacharcacuna. Chaimantami cazarashca qꞌuipaca llaquicunata chari tucuncuna. Shinallataj huaquincunaca pandarishcacunata reconocinapaj randica caishuj chaishuj juchachinacushpami llaquicunataca mana allichinata munancuna. Ashtahuancarin chꞌicanyarinata, divorciarinatami yuyai callarincuna. ¿Pero chai decisionta japinaca allichu canga? b Abigaíl huarmi matrimonio ucupi achca llaquicunata charishpapish ima shina ñaupajman catishcata cunanca ricushun.

9. ¿Abigailca ima llaquicunallatataj charirca?

⁹ ¿Abigailca ima llaquitataj charirca? Paica Nabal runahuanmi cazarashca carca. Nabalca yallitaj millai, mana allicunata rurashpa causaj runami carca (1 Samuel 25:3). Paihuan causanaca Abigailpajca sinchimi cashcanga. Abigailca Nabalmanta separaringapaj shuj oportunidadtami charirca. ¿Imamanta shina ninchij? Nabal runaca Davidtapish, paita sirvijcunatapishmi cꞌamishca carca. Chaimantami paita huañuchisha nirca (1 Samuel 25:​9-13). Abigailca Davidpaj maquimanta miticushpa Nabalta huañuchichunmi  saqui tucurca. Pero chaitaca mana rurarcachu. Ashtahuanpish ‘ñuca cusata perdonapai’ nishpami Davidtaca rogarca (1 Samuel 25:​23-27). ¿Abigailca imamantataj chaita rurarca?

10. ¿Abigailca imamantataj Nabaltaca mana shitashpa rirca?

¹⁰ Abigailca Jehová Diostami achcata cꞌuyaj carca. Jehová Diospaj matrimonioca valishca cashcamantami Abigailpajpish valishca carca. Paica Adán y Evata Jehová Dios cazarachishpa imata nishcatami yuyarishcanga (Génesis 2:24). Shinallataj Abigailca Jehová Diosta cꞌuyashcamantami Nabalpish, paipaj huasipi causajcunapish ama huañuchun imata ruranata rato yuyarca. Shinallataj Abigailca ima culpata mana charishpapish ‘ñucata perdonahuai’ nishpami Davidta rogarca. Abigaíl mana manchaj, paillapi mana yuyaj cashcamantami Jehová Diosca paitaca achcata cꞌuyarca. ¿Huarmicunapish, cusacunapish Abigailmantaca imatataj yachai tucuncuna?

11. a) ¿Jehová Diosca cusa huarmicuna ima shina causachuntaj munan? (Efesios 5:33). b) ¿Carmenpaj ejemplomantaca imatataj yachanchij? (Fotocunamantapish parlapai).

¹¹ ¿Abigailmantaca imatataj yachanchij? Jehová Diosca cazadocuna paicunapura respetohuan tratarichunmi munan. Paicunapura llaquicunata allichingapaj esforzarijpi, cꞌuyanacujpimi Jehová Diosca cushilla sintirin (Efesios 5:​33-ta liyipai). Pani Carmenhuan ima tucushcata ricushun. Paica Bibliata estudiai callarishpaca seis huatacunallatami cazarashca carca. Qꞌuipaca bautizarircami. Pani Carmenca cashnami nirca: “Jehová Diosta tucui shunguhuan sirvicujta ricushpaca ñuca cusaca pꞌiñarircami. Chaimi mana allicunata nij carca. ‘Shitashpami rigrini’ nishpapishmi amenazaj carca. Pero matrimonio Jehová Diospaj valishca cashcata yachashcamantami ñuca cusata intindingapaj, cꞌuyaihuan tratangapaj esforzarircani. Jehová Diosta cꞌuyashcamantami chaita rurangapaj esforzarircani” nircami. Pani Carmenca 50 huatacunatami paipaj cusata cꞌuyaihuan, respetohuan tratangapaj esforzarirca. c Canpish matrimonio ucupi llaquicunata charishpaca Jehová Dios canta ayudanatami seguro cana cangui.

ÑUCANCHIJ PANDARISHCACUNAMANTA LLAQUILLA SINTIRISHPACA ¿IMATATAJ RURANA CANCHIJ?

12. ¿Jatun juchapi urmashpaca ima shinataj sintirishun?

¹² ¿Ima llaquitataj chari tucunchij? Jatun juchapi urmashpaca achcatami desanimarishun. Bibliapi nishca shinaca ñucanchij juchacunamantami ‘shungu pꞌaquirishca, shungu llaquirishca’ saquiri tucunchij (Salmo 51:17). Huauqui Robertmi chashna sintirirca. Paica achca huatacunatami siervo ministerial cangapaj sinchita  esforzaricurca. Pero jatun juchapi urmashpaca Jehová Diospaj shunguta nanachishcatami cuentata curca. Paica: “Ñuca concienciapica mana allimi sintirircani. Yallitaj llaquilla sintirishpaca Yayitu Jehová Diostaca huacashpami mañarcani. Pero paipaj shunguta nanachishcamanta ñucata ña mana cutin uyanatami yuyarcani” nircami. Ñucanchijpish jatun juchapi urmashpaca yallitaj llaquilla sintirishcamantami Jehová Dios ñucanchijta saquishcata yuyashun. Chashna sintirishcamantachari paitaca ña mana sirvinata munashun (Salmo 38:4). ¿Canca chashnachu sintirishcangui? Shinashpaca apóstol Pedromantami yachana cangui. Paica pandarishpapish Jehová Diostami sirvishpa catirca.

13. a) ¿Pedroca ima jatun juchapitaj urmarca? b) ¿Pedroca imamantataj jatun juchapi urmarca?

¹³ ¿Pedroca ima shinataj pandarirca? Millai gentecuna Jesusta manaraj huañuchijpica Pedroca huaquin cosascunapi pandarishpami jatun juchapi urmarca. Puntapica paillapi confiarishpami Jesustaca: ‘Tucui apostolcuna canta saquijpipish ñucaca cantaca manataj saquishachu’ nirca (Marcos 14:​27-29). Chai qꞌuipaca Getsemaní huertapi cashpaca cutin cutinmi dormishca saquirirca (Marcos 14:​32, 37-41). Chai huashaca Jesusta prezu japijpica paitami saquishpa rirca (Marcos 14:50). Gentecuna ‘canpish Jesushuanmi carcangui’ nijpipish quimsa cutinmi ‘paitaca manataj rijsinichu’ nirca (Marcos 14:​66-71). ¿Pedroca Jesusta negashcamanta jatun juchata rurashcata cuentata cushpaca ima shinataj sintirirca? Paica yallitaj llaquilla sintirishpami huacaillata huacai callarirca (Marcos 14:72). Chai qꞌuipaca Pedroca jatun caspipi huarcushpa Jesusta huañuchijtami ricurca. Chaita ricushpaca Pedroca ashtahuanmi llaquirishcanga.

14. ¿Pedroca pandarishpapish Jehová Diosta sirvishpa catingapajca imatataj rurarca? ( fotomantapish parlapai).

¹⁴ ¿Pedroca pandarishpapish Jehová Diosta sirvishpa catingapajca imatataj rurarca? Paica huauqui panicunamantaca mana caruyarcachu. Chaimi paicunaca paita animai tucurcacuna (Lucas 24:33). Shinallataj Jesusca causarishca qꞌuipaca Pedromanmi ricurirca. Jesusca Pedrota animangapajmi paiman ricurishcanga (Lucas 24:34; 1 Corintios 15:5). Jesusca imamanta paita negashcata Pedrota reclamanapaj randica shamuj punllacunapi Jehová Dios paiman chꞌican chꞌican ruraicunata mingagrishcatami nirca (Juan 21:​15-17). Pedroca jatun juchata rurashcataca allimi yacharca. Pero ¿chaita yachashpapish imamantataj ñaupajman catirca? Paica Jesús paita shungumanta perdonashcata, huauqui panicunapish paipi confiashpa catinatami seguro carca. ¿Paimantaca imatataj yachanchij?

15. ¿Jehová Diosca imata crichuntaj munan? (Salmo 86:5; Romanos 8:​38, 39; fotomantapish parlapai).

 ¹⁵ ¿Pedromantaca imatataj yachanchij? Jehová Diosca ñucanchijta uyaj cashcata, shungumanta perdonaj cashcata crichunmi munan (Salmo 86:5; Romanos 8:​38, 39-ta liyipai). Jatun juchapi urmashpaca achcatami llaquirishun. Pero chashna sintirishpapish Jehová Dios ñucanchijta ña mana cꞌuyashcata, mana perdonanatapish mana yuyanachu canchij. Ashtahuanpish paipaj ayudatami utca mashcana canchij. Huauqui Robertca chaitami rurarca. Paica: “Tentacioncunata ñucalla ahuantai tucushcata yuyashcamantami juchapi urmarcani. Pero juchapi urmashca qꞌuipaca ancianocunapaj ayudata mashcana cashcatami cuentata curcani. Ancianocunaca Jehová Dios ñucata cꞌuyashpa catishcata crichunmi ayudarcacuna. Paicunaca ñucapimi confiashpa catircacuna. Shinallataj Jehová Dios ñucata mana saquishcatami intindichircacuna” nircami. Ñucanchijpish Jehová Diospaj valishca cashcatami yuyarina canchij. Ñucanchijta perdonachunca ñucanchij juchacunamantami arrepintirina canchij. Shujtajcuna ñucanchijta ayudachunpishmi mashcana canchij. Ashtahuanpish ama chai juchallapitaj cutin urmangapajmi esforzarina canchij (1 Juan 1:​8, 9). Jehová Diospaj valishca cashcata yuyarishpaca imapi pandarishpapish paita sirvishpa catingapajmi fuerzasta charishun.

16. ¿Jehová Diostaca imamantataj sirvishpa catisha ningui?

¹⁶ Cai tucuri punllacunapi Jehová Diospaj munaita rurangapaj esforzarishunchij. Chaita ricushpaca paica achcatami cushicunga. Shinallataj llaquicunata ahuantachunmi ayudanga. Huauqui panicuna ñucanchijta llaquichijpica paicunata cꞌuyashcamantami perdonai tucushun. Shinallataj Jehová Diosta cꞌuyashcata, matrimoniotapish valorashcata ricuchingapajca cusandij huarmindijmi jarcaicunata chꞌimbapurangapaj esforzarina canchij. Cutin, shuj juchapi urmashca cashpaca Jehová Diospaj ayudatami mashcana canchij. Pai cꞌuyaj cashcamanta perdonaj cashcatapishmi yuyarina canchij. Shinallataj paita sirvishpa catingapajmi esforzarishpa catina canchij. ‘Shinaca allita ruranataca ama saquishunchij’. Chaita rurajpica Jehová Diosca achcatami bendicianga (Gálatas 6:9).