1. ¿Maijancunaca imatataj tapurincuna?

 JEHOVÁ DIOSCA paipaj pueblohuanmi cushicun. Chaita yachashcamantami cushilla sintirinchij (Salmo 149:4). Pero chaita yachashpapish maijancunaca: “¿Jehová Diosca paipaj pueblohuan cushilla cashpapish cada unohuanchu cushicun?” nishpami tapurincuna. Ñaupaj tiempopi Jehová Diosta sirvijcunapajpishmi huaquinpica Jehová Diospaj valishca cashcata crinaca sinchi carca (1 Samuel 1:​6-10; Job 29:​2, 4; Salmo 51:11).

2. ¿Jehová Diospaj ñaupajpi alli ricuringapajca imatataj rurana canchij?

² Bibliapi nishca shinaca juchayujcuna cashpapish tucuicunami Diospaj ñaupajpi alli ricuri tucunchij. ¿Chaipajca imatataj rurana canchij? Jesuspi feta churashpami bautizarina canchij (Juan 3:16). Bautizarishpami ñucanchij juchacunamanta arrepintirishcata, Jehová Diosllata adorasha nishcatapish ricuchinchij (Hechos 2:38; 3:19). Jehová Diosca ñucanchijcuna paipaj amigocuna tucusha nishcata ricushpaca cushillami sintirin. Chaimantami paiman mingarishpa ñucanchij ari nishcata pajtachingapaj sinchita esforzarina canchij. Chaita rurajpimi Diospaj ñaupajpica alli ricurishun. Ashtahuancarin paipaj amigocunami tucushun (Salmo 25:14).

3. ¿Cai yachaipica imatataj yachashun?

³ Cai yachaipica cai tapuicunatami yachashun: ¿Huaquincunaca imamantataj Jehová Diospaj mana valishca cashcata yuyancuna? ¿Jehová Diosca ñucanchijta valorashcataca ima shinataj ricuchin? ¿Jehová Dios ñucanchijta valorashcata tucui shunguhuan cringapajca imatataj rurana canchij?

¿HUAQUINCUNACA IMAMANTATAJ JEHOVÁ DIOSPAJ MANA VALISHCA CASHCATA YUYANCUNA?

4, 5. ¿Imapaj mana valij shina sintirishpaca imatataj rurana canchij?

⁴ Maijancunaca huahuamantapachami imapaj mana valij cashcata yuyashcanchij (Salmo 88:15). Huauqui Adrianca: “Ñucaca imapaj mana valishcata yuyashpami huiñarcani. Uchillaraj cashpaca Yayitu Diostaca: ‘Ñuca familiata paraisopi causachun ayudapai’ nishpami mañaj carcani. Pero ñucaca ‘paraisopi causanataca mana  mericinichu nishpami’ yuyaj carcani” nircami. Cunanca huauqui Tonymanta parlashun. Paipaj yaya mamaca mana testigo de Jehovacunachu carca. Chaimi huahuaraj cajpi paita cꞌuyashcata, paita valorashcataca nunca mana nircacuna. Ashtahuanpish tucuita alli rurangapaj esforzarijpipish paipaj yaya mamaca mana cushicujcunachu carca.

⁵ Imapaj mana valij shina sintirishpaca Jehová Dios, paipaj puebloman ñucanchijta pushamushcatami yuyarina canchij (Juan 6:44). Ñucanchijca: “Ñucaca imapaj mana valinichu” nishpachari yuyanchij. Shinapish Jehová Diosca shungu ucupi ñucanchijcuna ima shina cashcataca allimi yachan (1 Samuel 16:7; 2 Crónicas 6:30). Chaimantami Jehová Dios “cantaca achcatami cꞌuyani” nijpica pai nishcataca tucui shunguhuan crina canchij (1 Juan 3:​19, 20).

6. ¿Apóstol Pabloca paipaj pandarishcacunata yuyarishpaca ima shinataj sintirij carca?

⁶ Maijancunaca Jehová Diosta manaraj rijsishpa mana allicunata rurashcamantami yallitaj culpable sintirishpa catinchij (1 Pedro 4:3). Cutin shujtajcunaca Jehová Diosta achca huatacunata alli sirvicushpapish mana alli yuyaicunata, mana alli munaicunata ama charingapajmi esforzarishpa caticuncuna. ¿Canpish chashnachu sintiringui? Chashna sintirishpaca ñaupa tiempopi Jehová Diosta sirvijcunapish maipica chashna sintirijcuna cashcatami yuyarina cangui. Por ejemplo, apóstol Pabloca paipaj pandarishcacunata yuyarishpaca achcatami llaquirij carca (Romanos 7:24). Paica paipaj juchacunamanta arrepintirishpami bautizarishca carca. Chashnapish “ñucaca tucui apostolcunamanta último apostolmi cani”. “Tucui juchayujcunamantaca ñucami ashtahuan juchayuj cani” nishpami huaquinpica llaquirij carca (1 Corintios 15:9; 1 Timoteo 1:15).

7. ¿Shungumanta arrepintirishca cashpaca imatataj tucui shunguhuan crina canchij?

⁷ Yayitu Jehová Diosca ‘cancunapaj juchacunamanta shungumanta arrepintirijpica ñucaca perdonashami’ ninmi (Salmo 86:5). Shinashpaca shungumanta arrepintirishca cashpaca Jehová Dios canta perdonashcatami tucui shunguhuan crina cangui (Colosenses 2:13).

8, 9. ¿Jehová Dios ñucanchij esfuerzocunata mana valorashcata ama yuyangapajca imatataj rurana canchij?

⁸ Tucuicunami Jehová Diosta tucui shunguhuan, tucui fuerzahuan sirvingapaj esforzarinchij. Shinapish huaquincunaca Jehová Dios paicunapaj esfuerzocunata mana valorashcatami yuyancuna. Pani Amandaca cashnami nirca: “Jehová Diosta alli sirvingapaj yallitaj esforzarishpa catina cashcatami yuyani. Chaimantami maipica ñuca mana rurai pudishcata rurangapaj yallitaj esforzarini. Pero yallitaj esforzarishpapish chaicunata mana rurai valishpaca ñucallahuantajmi achcata pꞌiñarini. Jehová Diospish ñucahuan pꞌiñarishca cashcatami yuyani” nircami.

⁹ Jehová Dios ñucanchij esfuerzocunata mana valorashcata ama yuyangapajca ¿imatataj rurana canchij? Jehová Dios ñucanchij mana rurai pudishcata rurachun mana obligaj cashcatami yuyarina canchij. Paica ñucanchij rurai tucushcallata rurachunmi mañan. Chaimi ñucanchij esfuerzocuna uchilla o jatun cajpipish Jehová Diospajca achca valishca can. Shinallataj ñaupa tiempopi Jehová Diosta tucui shunguhuan sirvijcunapimi yuyana canchij. Por ejemplo, apóstol Pabloca achca huatacunatami caru ladocunaman rishpa achca congregacioncuna tiyachun ayudarca. Shinapish paipaj causaipi cambiocuna tiyashcamantami ñaupa shinaca ña mana huillai tucurca. Pero ¿ña mana ñaupa shina rurai tucushcamantaca Jehová Diosca pꞌiñarircachu? Mana. Ashtahuanpish Pablo pai rurai pudishcallata rurangapaj esforzarishpa catijpimi Jehová Diosca paita bendiciashpa catirca (Hechos 28:​30, 31). ¿Caimantaca imatataj yachanchij? Ñucanchijpish ñaupa shinaca Jehová Diostaca ña manachari sirvi tucushun. Pero Jehová Diosca ñucanchij rurai pudishcallata rurashpa catichunmi mañan. Cunanca Jehová Dios ñucanchijta valorashpa catishcata ima shina ricuchij cashcatami yachashun.

 ¿JEHOVÁ DIOSCA ÑUCANCHIJTA VALORASHCATACA IMA SHINATAJ RICUCHIN?

10. ¿Jehová Diosca ñucanchijta valorashcataca ima shinataj ricuchin? (Juan 16:27).

¹⁰ Jehová Diosca Bibliapimi ñucanchijta valorashcata ricuchin. Bibliapi nishca shinaca Jehová Diosca ishqui cutinmi jahua pachamantaca paipaj Churita achcata cꞌuyashcata, achcata valorashcata nirca (Mateo 3:17; 17:5). ¿Jehová Dios cantapish valorashcata nichunchu munanguiman? Paica jahua pachamanta parlashpa canta valorashcataca mana ningachu. Pero Bibliapimi canta valorashcata ricuchin. Por ejemplo, Bibliapica Jesús paita catijcunata cꞌuyaihuan, alaja shimicunahuan trataj cashcatami nin. Chaita liyishpami Jehová Dios ñucanchijta alaja shimicunahuan tratacushcata sintishun (Juan 16:​27-ta liyipai). Jesusca cai allpapi cashpaca tucuipimi paipaj Yaya laya cashcata ricuchirca. Paica paita catijcunataca “cancuna pandarijllacuna cajpipish cancunataca achcatami cꞌuyani” nircami. Bibliapi chaita liyishpaca Jehová Dios ñucanchijtapish “cantaca achcatami cꞌuyani” nicuj shinami canga (Juan 15:​9, 15).

11. ¿Llaquicuna japijpica Jehová Dios ñucanchijta ña mana valorashcataca imamantataj mana yuyana canchij? (Santiago 1:12).

¹¹ Jehová Diosca ruraicunahuanmi ñucanchijta cꞌuyashcata ricuchin. Shinallataj paica ñucanchij imalla minishtishcata cushpami ñucanchijta ayudasha nishcata ricuchin. Shinapish huaquinpica Job shinami llaquicunata apachun saquinga (Job 1:​8-11). Pero llaquicunata charishpapish Jehová Dios ñucanchijta mana valorashcataca mana yuyanachu canchij. Ashtahuanpish llaquicuna japijpica Jehová Diosta tucui shunguhuan cꞌuyashcata, paipi confiashcata ricuchingapajmi esforzarina canchij (Santiago 1:​12-ta liyipai). Chaita rurajpica Jehová Diosca llaquicunata ahuantashpa catichunmi fuerzata cunga.

12. ¿Huauqui Dimitrimantaca imatataj yachanchij?

¹² Asia llajtapi causaj huauqui Dimitri trabajo illaj saquirishpaca imata rurashcata ricushun. Paica achca quillacuna pasajpipish trabajota mana japishpaca ashtahuan horascunatami huillai callarirca. Chashnami paica Jehová Diospi confiashcata ricuchirca. Pero quillacuna pasajpipish trabajotaca mana japi tucurcachu. Qꞌuipacarin paica ungushca cashcamantami camapi siririshca cainaj carca. Llaquicuna huashan huashan japijpimi Dimitrica mana alli yaya, mana alli cusa cashcata, Jehová Diospish paihuan pꞌiñarishca cashcata yuyai callarirca. Shuj tutaca paipaj ushushica Isaías 30:​15-pi nishca shimicunata imprimishpami paiman curca. Chai versopica: “Ñucapi shunguta churashpa, casijlla causajpica muyujta pirca shinami casha” ninmi. Dimitripaj  ushushica: “Papito llaquilla cashpaca cai versopi nishcacunata yuyari” nircami. Dimitrica Jehová Dios ayudashcamanta paipaj familia churanitata, micunitata, maipi causanata charishcatami cuentata curca. Paica: “Llaquicunata charishpapish mana yallitaj sustarishpa Jehová Diospi shunguta churana cashcatami cuentata curcani” nircami. Canpish cashna laya llaquicunata apacushpaca Jehová Dios canmanta sustarishcata, llaquicunata ahuantachun fuerzata cusha nishcatami yuyarina cangui.

13. ¿Jehová Diosca ñucanchijta valorashcataca ima shinataj ricuchin?

¹³ Jehová Diosca huauqui panicunahuanmi ñucanchijta valorashcata ricuchin. Pai yuyaita cujpimi huauqui panicunaca minishtishca horas alaja shimicunahuan animai tucun. Asia llajtapi causaj panica trabajo illajmi saquirirca. Shinallataj millai ungüimi paitaca japirca. Chai jahuapish paipaj cusaca jatun juchapi urmashcamantami anciano canata saquirca. Cai panica: “Imamanta chai tucui llaquicunahuan chꞌimbapuracushcataca mana intindircanichu. Chaimi imapi pandarijpichari Yaya Diosca ñucataca ña mana valoran nishpa yuyai callarircani” nircami. Chashna llaquilla sintirishpami cai panica Jehová Diostaca, “ñucata mana saquishcata ricuchihuai” nishpa mañarca. ¿Jehová Diosca cai panipaj mañashcata ima shinataj cutichirca? Paica: “Turi ancianocunami Jehová Dios ñucata achcata cꞌuyashcata ricuchircacuna” nircami. Punllacuna pasajpica cai panica cutinmi Yaya Diostaca “ñucata valorashcata ricuchihuai” nishpa mañarca. ¿Jehová Diosca paipaj mañaitaca ima shinataj cutichirca? Paica: “Chai punllallatajmi ñuca congregacionpi caj turi ñañacuna cachashca cartata chasquircani. Paicunaca alaja shimicunahuanmi ñucataca animarcacuna. Chai cartata liyishpami Jehová Dios ñuca mañashcata cutichishcata cuentata curcani” nircami. Cai experienciapi ricushca shinaca huauqui panicuna alaja shimicunahuan animota cujpimi Jehová Diospaj valishca cashcata cuentata cunchij (Salmo 10:17).

14. ¿Jehová Diosca ñucanchijta valorashcata ricuchingapajca ima shinataj huauqui panicunataca utilizan?

 ¹⁴ Jehová Diosca ñucanchijta consejachunmi huauqui panicunata utilizan. Chashnami ñucanchijta valorashcata ricuchin. Por ejemplo, Jehová Dios yuyaita cujpimi apóstol Pabloca 14 cartacunata quillcarca. Chai cartacunapica Pabloca cꞌuyaihuanmi huauqui panicunamanca consejocunata curca. ¿Jehová Diosca imamantataj chai consejocunata cuchun munashcanga? Jehová Diosca cꞌuyaj, llaquijmi can. Chaimantami paipaj ‘cꞌuyashca huahuacunataca’ cꞌuyaihuan disciplinan (Proverbios 3:​11, 12). Shinashpaca Bibliapi nishcacunata yuyachishpa ñucanchijman shuj consejota cujpica Jehová Dios ñucanchijta mana valorashcataca mana yuyanachu canchij. Ashtahuanpish Jehová Diospaj valishca cashcamanta chai consejota cushcatami yuyarina canchij (Hebreos 12:6). ¿Pero Jehová Diosca ñucanchijta valorashcata ricuchingapajca ima ashtahuantaj ruran?

¿DIOSCA CANTA VALORASHCATA RICUCHINGAPAJCA IMA ASHTAHUANTAJ RURASHCA?

15. a) ¿Jehová Diosca paipaj espíritu santotaca picunamantaj cun? b) ¿Diospaj ñaupajpi alli ricurishcataca ima shinataj cuentata cui tucunchij?

¹⁵ Jehová Diosca paipaj ñaupajpi alli ricurijcunamanmi espíritu santota cun (Mateo 12:18). Jehová Dios espíritu santota cujpimi ñucanchij causaipica chꞌican chꞌican alli cualidadcunata ricuchi tucunchij. Chaimantami tucuicuna: “¿Espíritu santota charishcataca ñuca causaipi ricuchicunichu?” nishpa tapurina canchij. Por ejemplo, Jehová Diosta manaraj rijsishpaca asha pacienciatachari carcanchij. ¿Pero paita rijsishca pachamantaca ashtahuan pacienciatachu charinchij? Shinashpaca Diospaj espíritu santopaj ayudahuan ñucanchij causaipi alli cualidadcunata ricuchishpaca Jehová Diospaj ñaupajpi alli ricurishcatami cuentata cushun (“ Diospaj espíritu pꞌucuchishca grano” nishca recuadrota ricui).

16. a) 1 Tesalonicenses 2:​4-pi nishca shinaca, ¿Jehová Diosca paimanta huillachunca picunamantaj mingashca? b) ¿Jehová Dios paimanta huillachun canta agllashcamantaca ima shinataj sintiringui?

¹⁶ Jehová Diosca paipaj ñaupajpi alli ricurijcunamanmi alli huillaicunata huillachun mingashca (1 Tesalonicenses 2:​4-ta liyipai). Pani Jocelynmanta yachashun. Paica: “Shuj punllaca fuerzas illaj, imapaj mana valij shinami sintirircani. Pero precursoradotami japishca carcani. Chaimantami Yayitu Diosta mañashpa predicacionman llujshircani” nircami. Chai punllaca Jocelynca Maryhuanmi parlarca. Paica cushillami Bibliamanta yachai callarirca. Huaquin quillacuna qꞌuipaca Mary huarmica Jocelynmanca: “Ñuca huasiman punta cutin shamujpica Yayitu Diostami  ñucata ayudachun mañacurcani” nircami. Chaita uyashpaca ¿Jocelynca ima shinataj sintirirca? Paica: “Jehová Dios ñucata ‘cantaca achcatami valorani’ nicuj shinami carca” nircami. Diosmanta huillacujpi tucui gentecuna ñucanchijta mana uyanataca allimi yachachij. Pero ñucanchij esfuerzocunata ricushpaca Jehová Diosca cushillami sintirin.

17. ¿Pani Vickymantaca imatataj yachachij? (Salmo 5:12).

¹⁷ Jesús paipaj causaita cushcamantami quishpiri tucunchij. Pero Jehová Diosca paipaj ñaupajpi alli ricurijcunallamanmi chai oportunidadta cun (1 Timoteo 2:​5, 6). Ñucanchijca Jesús huañushcapi crishpa bautizarishpaca Jehová Diospaj ñaupajpimi alli ricurinchij. Pero ña bautizarishca cashpapish Diospaj ñaupajpi mana alli ricurishcata yuyashpaca ¿imatataj rurana canchij? Juchayujcuna cashcamantami huaquinpica ñucanchij shunguca chai panda yuyaihuan pandachi tucun. Chaimantami huaquinpica ñucanchij shungupica mana confiana canchij. Ashtahuanpish Jehová Diospimi confiana canchij. Paica ‘Jesús quishpichij cashcata crijpica bendiciashami’ ninmi (Salmo 5:​12-ta liyipai; Romanos 3:26). Pani Vickypajca Jehová Dios paita cꞌuyashcata crinaca sinchimi carca. Pero chaita cringapajca Jehová Dios paipaj churita cushpa, paita quishpichishcatami yuyarirca. Pani Vickyca: “Huaquinpica ‘Jesús ñuca juchacunamanta huañushca cajpipish Jehová Diosca ñuca juchacunataca mana perdonangachu. Ñucata cꞌuyachunpish mana mericinichu’ nishpami yuyaj carcani. Pero ñuca chashna yuyajpipish Jehová Diosca ñucamanca achca huatacunatami pacienciata ricuchishca” nircami. Ñucanchijpish Jehová Dios ñucanchijta valorashcata cringapajca ¿imatataj rurana canchij? Jehová Dios ñucanchijta quishpichichun paipaj cꞌuyashca Churita cushcatami yuyarina canchij.

18. ¿Imamantataj Jehová Diosta cꞌuyashpa catingapaj esforzarina cangui?

¹⁸ Cai yachaipi imalla yachashcacunata pajtachingapaj esforzarishpapish huaquinpica Jehová Dios canta mana valorashcata yuyashpami sustaringui. Chashna sintiricushpaca Jehová Dios ‘paita cꞌuyashpa caticujcunata’ valorashcatami yuyarina cangui (Santiago 1:12). Chaimantami Jehová Diospajman cꞌuchuyashpa catingapaj esforzarishpa catina cangui. Shinallataj Jehová Dios canta valorashcata ima shina ricuchicushcata cuentata cungapajmi esforzarina cangui. Ashtahuancarin Jehová Dios ‘ñucanchijmanta mana carupi’ cashcatami siempre yuyarina cangui (Hechos 17:27).