1. ¿Huaquin huauqui panicunapajca imamantataj Bibliata, publicacioncunata estudianaca sinchi can?

CUNAN punllacunapica cullquita japinaca sinchimi can. Huaquin huauqui panicunaca paicunapaj familiacunata mantiningapajmi achca horascunata trabajancuna. Maijancunaca caru ladopi trabajashpami chishita huasiman tigrancuna. Cutin shujtajcunaca sinchi trabajopi cainashcamantami shaicushca sintirincuna. Chaimantami cai huauqui panicunaca Bibliata, publicacioncunata estudiangapajca fuerzata mana charincuna.

2. ¿Canca Bibliata estudiangapajca ima horataj tiempota surcungui?

² Ima shina cashpapish Bibliata, publicacioncunata alli estudiangapajmi tiempota surcuna canchij. Jehová Diospaj alli amigo tucungapaj, huiñai causaita charingapajca cada unomi estudiana canchij (1 Timoteo 4:15, 16). Tutamantapica imatapish rurangapajmi fuerzasta charinchij. Chaimantami maijan huauqui panicunaca manaraj ima bulla tiyajpi, utca jatarishpa Bibliata estudiancuna. Cutin shujtajcunaca chishitami Bibliata liyingapaj, liyishcapi cutin cutin yuyangapaj tiempota surcuncuna.

3, 4. a) ¿Cuerpo Gobernante huauquicunaca cunan punllacunapica imatataj ruracun? b) ¿Imamantataj chai cambiocunata ruracuncuna?

³ Tucuicunami estudiangapajca tiempota surcuna cashcata yachanchij. Pero, ¿imatataj estudiana canchij? Maijancunaca tucui publicacioncunata estudiangapaj, tucui videocunata ricungapajmi tiempota llujchincuna. Cutin shujtajcunapajca caita ruranaca sinchimi can. Paicunaca, “achca publicacioncuna tiyashcamantami mana tucuita liyi tucuni” nishpachari yuyancuna. Chaita yachashpami Cuerpo Gobernante huauquicunaca achca publicacioncunata ruranapaj randica cunanca  ashalla publicacioncunata ruracun. Internetpipish ashalla publicacioncunatami llujshichicun.

⁴ Por ejemplo, Anuario de los testigos de Jehová nishca libroca ña mana tiyanchu. Cunanca, jw.org^®, JW Broadcasting^® paginacunapimi sinchiyachij experienciacunata ricui tucunchij. Shinallataj predicangapaj quimsa Huillaj revista, quimsa Rijchari revistacunallami huatapica tiyan. Shinapish, “cunanca ñucanchij munashca cosascunapimi ocupari tucunchij” nishpaca mana yuyanachu canchij. Chaipaj randica “imacuna ashtahuan importante” cashcapimi ocuparina canchij (Filipenses 1:10, NM). Cunanca ñucanchij causaipi ima ashtahuan importante cashcata, Bibliata cada uno alli estudiangapaj imata rurana cashcata yachashun.

5, 6. ¿Imallatataj alli estudiana canchij?

⁵ Tucui punllacunami Bibliata estudiana canchij. Chaupi semana tandanacuipajca cunanca ashalla capitulocunatami liyina canchij. Chaimantami Bibliapi imata liyishcata yuyaringapaj, huaquin versocunamanta ashtahuan estudiangapaj tiempota charinchij. Pero Bibliata liyichun nishcallamantaca mana liyinachu canchij. Chaipaj randica Diospaj Shimi ñucanchij shunguman chayachun, Jehová Dioshuanpish alli amigo tucungapajmi liyina canchij (Salmo 19:14).

⁶ ¿Imallatataj ashtahuan estudiana canchij? Tandanacuipi yachangapaj Huillaj revistata, “Tandanacushcacunahuan Bibliata Yachashun” nishca parteta, chaupi semana tandanacuipajpish allimi prepararina canchij. Shinallataj gentecunaman predicangapaj Huillaj revistata, Rijchari revistacunataca tucuitami liyina canchij.

7. ¿Internetpi JW Broadcasting programapi llujshishca tucui videocunata mana ricui tucushpaca imamantataj mana desanimarina canchij?

⁷ Maijancunaca, “jw.org, Broadcasting paginacunapica achca publicacioncuna, videocunami tiyan, mana tucuita ricui valinica” nishpachari yuyancuna. Shuj ejemplopi yuyashun. Canchari mercadoman ringui. Chaipica tucui laya granocunami tiyan. ¿Manachu tucuita randinapaj randica minishtirishcallata randiguiman? Chashna layallatajmi Internetpi tiyaj tucui publicacioncunata, videocunata mana ricui valishpaca pudishcallata ricuna, liyina canchij. Cunanca imatapish alli estudiangapaj, estudiashcatapish alli intindingapaj imata rurana cashcatami yachagrinchij.

8. a) ¿Huillaj revistataca ima shinataj preparana canchij? b) ¿Huillaj revistataca imamantataj alli estudiana canchij?

⁸ Alli estudiangapajca mana jahua jahualla liyishpachu respuestacunata señalana canchij. Ashtahuanpish yachana munaihuan, shujtaj cosascunapi mana yuyashpami estudiana canchij. ¿Huillaj revistataca ima shinataj preparana canchij? Puntaca, ‘Caitami yachashun’ nishca partetami liyina canchij. Qꞌuipaca yachaipaj punta titulota, catij titulocunatami liyina canchij. Imata yachashcata yuyaringapaj quimsa tapuicunatapishmi liyina canchij. Chai huashaca parrafocunatami alli liyina canchij. Cada parrafopi callari yuyaitami alli intindina canchij. Chashnami tucui parrafopi imata nisha nishcata alli intindishun. Shuj parrafota liyicushpaca ima shina punta titulota, catij titulocunata apoyashcatami ricuna canchij. Chai huashaca mana intindishca shimicunata, yuyaicunatami anotana canchij. Estudiashca huashami chaicunamanta ashtahuan yachai tucunchij.

9. a) ¿Huillaj revistata preparacushpaca imamantataj versocunata liyina canchij? b) ¿Versocunata alli intindingapajca imatataj rurana canchij? c) ¿Josué 1:8-pi nishca shinaca versocunata liyishca huashaca imatataj rurana canchij?

 ⁹ Huillaj revistata estudiashpami Bibliataca alli intindishun. Chaimantami preparacushpaca cada parrafopi ricurij versocunata alli intindina canchij. Ashtahuantajca tandanacuipi liyigrishca versocunatami alli intindina canchij. Versocunapi tiyaj yuyaicunapish ima shina parrafopaj yuyaicunata apoyacushcatami ricuna canchij. Shinallataj liyishca versocunapimi cutin cutin yuyana canchij. Ñucanchij causaipipish ima shina pajtachinatami ricuna canchij (Josué 1:8-ta liyipai).

10. Hebreos 5:14-pi nishca shinaca ¿yaya mamacunaca imamantataj huahuacuna alli estudiachun, alli prepararichun yachachina can?

¹⁰ Ñucanchij familiacunahuan Diosta adorangapajmi cada semana tandanacuna canchij. Yaya mamacunaca huahuacunapish familiahuan Diosta adoracushpa cushilla sintirichunmi munancuna. Chashnapish tucui semanacuna Bibliamanta dramacunata o chai laya shujtaj cosascunata ruranaca mana minishtirinchu. JW Broadcasting programata ricuna, shinallataj Noepaj arcata shina huahuacunahuan ruranaca mai ratoca allimi can. Pero yaya mamacunaca huahuacuna alli estudiajcuna cachunmi yachachina can. Huahuacunaca tandanacuicunapi participangapajmi prepararinata yachana can. Shinallataj escuelapi jarcaicuna ricurijpica imata ruranatami yachana can (Hebreos 5:14-ta liyipai). Huahuacunaca huasipimi Bibliamanta shuj temata alli yachana can. Chashnami tandanacuicunapi mana siempre videocunata churajpipish jahualla intindingacuna. Pero, yaya mamacunaca huahuacuna mashna huatacunata charijta ricushpa, ima shina cashcata ricushpami yachachina can.

11. ¿Bibliamanta yachacujcunataca imamantataj alli estudiajcuna cachun yachachina canchij?

¹¹ Bibliamanta yachacujcunatapish alli estudiajcuna cachunmi ayudana canchij. Callaripica Bibliamanta yachachicujpi, tandanacuicunapipish paicuna señalashcallatami cutichingacuna. Pero paicunalla cashpa Bibliamanta ashtahuan estudiachun, publicacioncunapipish investigachunmi yachachina canchij. Chashnami ima problemacunata charishpaca huauqui panicunata “¿imatataj rurana cani?” nishpa mana tapungacuna. Chaipaj randica publicacioncunapimi ima shina chai problemacunata allichinata mashcangacuna.

12. ¿Imapajllataj alli estudiana canchij?

¹² Estudianataca manachari munanchij. Pero  estudiacushpa cushilla sintiringapajca asha ashami yachai callarina canchij. Qꞌuipataca ashtahuan yachangapajmi tiempota surcuna canchij. Tucuimanta yallica Jehová Diospaj ñaupajpi alli ricurina munaihuanmi estudiana canchij. Shinallataj ñucanchij crishcacunamanta pi tapujpi mana manchashpa cutichingapajmi yachana canchij. Shuj problemata ima shina allichinata yachangapajpish publicacioncunapimi mashcana canchij.

13. a) ¿Can crishcacunata cambaj compañerocunaman huillangapajca imatataj rurana cangui? b) ¿Colosenses 4:6-pi yachachishcataca ima shinataj pajtachina cangui?

¹³ Canca ¿escuelapi o colegiopichu cangui? Tal vez cambaj compañerocunaca cumpleañoscunatachari rurancuna. Chai fiestacunapi imamanta mana participashcata cambaj compañerocunaman yachachinatachari munangui. Pero mana manchashpa parlangapajca chai temamantami alli yachana cangui. Yaya Dios chai fiestacunata mana munashcata tucui shunguhuan cringapajmi estudiana cangui. Shinallataj Biblia yachachishcacunata shujtajcunaman alli yachachingapajmi estudiana cangui (Mateo 14:6-11; 1 Pedro 3:15). Callaringapajca cambaj compañerocuna imamanta cumpleañosta rurasha nishcatami intindina cangui. Chai huashaca ñucanchij publicacioncunapi cumpleañoscunamanta imata yachachishcatami mashcana cangui. Chashnami cambaj crishcacunata jahualla yachachi tucungui. Achca gentecunaca “tucuicunami cumpleañosta rurancuna” nishpami paicunapish cumpleañosta rurancuna. Pero maijancunaca cumpleañoscunamanta Bibliapi imata nishcatami yachasha ningacuna. Paicunaman shuj o ishqui yuyaicunata ricuchishpami Bibliamanta yachachi tucungui (Colosenses 4:6-ta liyipai).

14, 15. ¿Bibliapaj shuj librota quillcajmanta ashtahuan yachangapajca imatataj rurana canchij?

¹⁴ Bibliamanta shuj librota tandanacuipi estudiana cashcata yuyashun. Chai libroca profeciacunamantami parlan. Pero chai librota quillcajmantaca mana tanto uyashcanchijchu. Chai profeta imata quillcashcata alli intindingapajca yachana munaihuanmi estudiana canchij. ¿Caitaca ima shinataj rurai tucunchij?

¹⁵ Cashna nishpa tapurishunchij: ¿Chai librota quillcaj profetamantaca imatataj yachani? ¿Pitaj carca? ¿Maipitaj causarca? ¿Imatataj ruraj carca? Cashna shina tapuicunata rurashpami chai librota quillcajmantaca ashtahuan yachashun. Shinallataj imamanta huaquin ejemplocunata churashpa yachachishcatami intindishun. Profeta quillcashca huaquin yuyaicunaca pai ima shina cashcatami ricuchin. Chai yuyaicunatami alli ricuna canchij.

16. a) ¿Bibliapaj shuj librota alli intindingapajca imatataj rurana canchij? b) ¿Párrafo 16-pi tiyaj versocunaca ima shinataj Amosmanta ashtahuan yachangapaj ayudan? (“ Diosta sirvijcunamanta yachashunchij” nishca recuadrotapish ricui).

¹⁶ Qꞌuipaca chai librota ima hora quillcashcatami ricuna canchij. Chaipajca “Tabla de los libros de la Biblia”, nishcata Traducción del Nuevo Mundo de las Santas Escrituras (con referencias) Bibliapi mashcai. Shinallataj profetacunamanta, reycunamanta yachangapajca Guía para el estudio de la Palabra de Dios folletopi, parte 3-ta ricui. Ashtahuanpish chai librota quillcashca punllacunapi causaica ima shina cashcatami yachana canchij. Por ejemplo, chai tiempopi maijancunalla causashcata, imata rurashpa causajcuna cashcatami yachai tucunchij. Tucuita alli intindingapajca Bibliapaj shujtaj librocunatapishmi ricuna canchij. Profeta Amosmanta parlashun. Paipaj punllacunapi ima tucushcata yachangapajca 2 Reyes y 2 Crónicas librocunatami  liyi tucunchij. Amós causashca punllacunapica Oseas runapishmi causarca. Chaimantami Oseas librotapish liyi tucunchij. Cashna shina estudiashpami Amós causashca punllacuna ima shina cashcata intindishun (2 Reyes 14:25-28; 2 Crónicas 26:1-15; Oseas 1:1-11; Amós 1:1).

17, 18. ¿Bibliata alli intindingapajca imatataj rurana canchij? Párrafos 17 y 18-pi ricurij ejemplocunamanta parlai. O mana cashpaca cambaj propio ejemplomanta parlai.

¹⁷ Bibliata liyicushpaca ashtahuan yachana munaihuanmi estudiana canchij. Por ejemplo, Zacarías capítulo 12-tachari liyicunchij. Chai capitulopica Mesías huañuna cashcatami parlan (Zacarías 12:10). Verso 12-pica, ‘Natanpaj huahua huahuacunapish Mesías huañuna cashcata yachashpami achcata huacangacuna’ ninmi. Cai nishcacunata liyishpalla saquirinapaj randica: “Mesiasmanta parlashpaca ¿caipica imamantataj Natanpaj huahua huahuacunamantapish parlacun?” nishpami tapurina canchij. Caita alli intindingapajca investiganami canchij. Por ejemplo, Traducción del Nuevo Mundo Bibliapica Zacarías 12:12-pimi uchilla letracuna ricurin. Paginapaj chaupipi chai letracunallatataj mashcashpaca ishqui versocunatami ricushun. Shujca 2 Samuel 5:14-mi can. Chaipica, Natanca Davidpaj churimi can ninmi. Caishujca Lucas 3:31-mi can. Chaipica, Jesusca Natanpaj huahua huahuacunamanta Mariapi huacharina cashcatami ricuchin (agosto del 2017 huatamanta Huillaj revistapi, página 32, párrafo 4-ta ricui). Jesusca Davidpaj huahua huahuacunamanta shamuna cashcataca yacharcanchijmi (Mateo 22:42). Shinapish Davidca 20 yalli huahuacunatami charirca. Cunanca Davidpaj churi Natanmanta Jesús shamuna cashcatami intindinchij. Shinallataj profeta Zacarías ‘Jesús  huañujpica Natanpaj huahuacunami huacangacuna’ nishpaca imata nisha nishcatami intindinchij.

¹⁸ Shujtaj ejemplopi yuyashun. Lucas capítulo 1-ta liyicushpaca ángel Gabriel Mariata visitashpa shuj huahuatami charingui nishcatami ricunchij. Jesusmanta parlashpami chai Angelca: “Paica jatun nishcami canga. Jahua pachapi caj Jatun Diospaj Churi nishcami canga. Mandaj Diosca, Davidpaj jatun tiyarinatami paimanca cunga. Paica Jacobpaj huahua huahuacunatami huiñaita mandanga” nirca (Lucas 1:32, 33). ‘Diospaj Churimi cangui’ nishpa gentecuna Jesusta cayana cashcatachari yuyashpa saquirishun. Pero ángel Gabrielca Jesús rey cana cashcatapishmi huillarca. Chaimi “Mariaca cai shimicunata uyashpaca ¿imatashi intindishcanga?” nishpa yuyana canchij. ¿Paica, “Jesusca Herodespaj randimi mandanga” o mana cashpaca “paipaj churipaj randimi mandanga” nishpachu yuyashcanga? ¿Mariaca, “rey Jesuspaj mama cashcamantami jatun palaciopi ñuca huahuacunahuan causasha” nishpachu yuyashcanga? Bibliapica ángel Gabrielman María shina cutichishcataca mana maipi ricurinchu. Shinallataj Diospaj gobiernopi paiman alli puestota cuchun mañashcatapish mana maipi ricurinchu. Mariaca humilde cashcamantami chaitaca mana rurarca. Jesusta catij ishqui discipulocunallami alli puestota Diospaj gobiernopi cuchun nishpa mañarcacuna (Mateo 20:20-23).

19-20. ¿Santiago 1:22-25 y 4:8-pica imata rurana cashcatataj yachachin?

¹⁹ Bibliata, publicacioncunata alli yachashpami imapi cambiana cashcata cuenta japishun. Ashtahuantajca Diospajmanmi cꞌuchuyashun (Santiago 1:22-25; 4:8-ta liyipai). Chaimantami imata estudiagrishpaca Yaya Diostaca, “tucuita alli intindingapaj, yachashcata causaipi pajtachingapajpish cambaj espíritu santota cuhuai” nishpa mañana canchij.

²⁰ Bibliapica: ‘Diosta alli sirvijca, Dios mandashcatami tucuimanta yalli munan. Tutapish, punllapish chai yuyaillami causan. Imata rurashcapish allimi llujshin’ ninmi (Salmo 1:2, 3, QC, 1989). Ñucanchijpish alli causangapajca Diospaj Shimitami estudiana canchij.