YACHAI 19
Allita rurashpa millaita mishashunchij
“Canca millaita ruranacunahuanca mana cushicuj Diosmi cangui. Chaimanta millaicunaca cambaj cꞌuchupica mana causai tucunchu” (SALMO 5:4).
CANTO 142 Diospi shunguta churashpa shuyashunchij
CAITAMI YACHASHUN *
1-3. a) Salmo 5:4-6-pi nishca shinaca Diosca millai ruraicunataca ¿ima shinataj ricun? b) ¿Huahuacunata violajcunaca imamantataj Jesuspaj mandashcata mana cazun ninchij?
JEHOVÁ DIOSCA tucui millai ruraicunatami pꞌiñan (Salmo 5:4-6-ta liyipai). Chaimantami huahuacunata llaquichina o violana ruraicunataca Jehová Diosca manataj ricunayachin. Ñucanchijpish chai mapa ruraicunatami pꞌiñana canchij. Congregacionpi tiyachunpish manataj saquinachu canchij (Romanos 12:9; Hebreos 12:15, 16).
2 Jesusca paipaj rurashcacunahuan, rimashcacunahuanmi ima shina causana cashcata ricuchirca. Chaitami Bibliapica ‘Cristopaj mandashcacuna’ nin (Gálatas 6:2). Jesusca cꞌuyaj cashcamanta, allita ruraj cashcamantami alli causanata yachachirca. Diosta sirvijcunaca Jesuspaj mandashcacunatami cazunchij. Chaimantami huahuacunata llaquichinapaj randica cꞌuyaihuan alli tratana, alli cuidana canchij. Huahuacunata violajcuna, llaquichijcunaca Jesuspaj mandashcataca mana cazuncunachu. Paicunapaj culpamantami llaquichishca huahuacunaca, ñucataca ni pi mana cꞌuyanchu nishpa llaquilla sintirincuna.
3 Huahuacunata llaquichina, violana ruraicunaca mundo enteropimi dimastij mirarishca. Cunan punllacunaca achca millai, umaj gentecunami tiyan. Cashna shina millai gentecunami huaquinpica congregacionman yaicusha nishcacuna (2 Timoteo 3:13). Chaimi congregacioncunapipish huaquinpica mapa ruraicuna tiyashca. Maijancunaca Diosta sirvijcuna cashpapish paicunapaj mapa munaicunamantaca mana jarcarishcacunachu. Chaimantami huahuacunataca jatunta llaquichishcacuna o violashcacuna. Cai yachaipica huahuacunata llaquichina o violana jatun jucha cashcata, huahuacunata pi llaquichijpi ancianocuna imata rurana cashcata, yaya mamacunapish huahuacunata pi ama llaquichichun imata rurana cashcatami yachashun. *
HUAHUACUNATA VIOLANACA JATUN JUCHAMI CAN
4, 5. ¿Huahuacunata violashpa llaquichinaca imamantataj jatun jucha can?
4 Huahuacunata violana, llaquichinaca jatun juchami can. Shuj huahuata chashna llaquichishca o violashca cajpica huahuaca achca huatacunatami llaquicunahuan causanga. Shinallataj huahuapaj familiapish, congregacionpi huauqui panicunapish llaquillami sintiringacuna.
5 Shujtajcunata llaquichinaca Diospaj ñaupajpica jatun juchami can. Shuj huahuata umashpa pi llaquichijpica huahuaca achca manchaihuanmi causanga. Chaimantami huahuacunata violashpa pi ama llaquichichunca cuidana canchij. Shinallataj violashca huahuacunataca cꞌuyaihuanmi ayudana canchij (1 Tesalonicenses 5:14). Catij yachaipimi chai huahuacuna ima laya llaquicunata charishcata yachashun.
6, 7. a) ¿Huahuacunata violashpa llaquichijcunaca imamantataj congregacionta pingaipi churancuna? b) ¿Huahuacunata violashpa llaquichijcunaca imamantataj gobiernocunata mana cazushcata ricuchincuna?
6 Shuj huauqui o pani huahuacunata violashpa llaquichishpaca muyundij Allpapi Diosta alli sirvicuj huauqui panicunatami pingaipi churan (Mateo 5:16; 1 Pedro 2:12; Judas 3). Maijancunaca, shuj testigo de Jehová shuj huahuata llaquichijpica, “testigocunaca imata mana rurancunachu” nincunami. Pero chaica mana ciertochu can. Maijanpish jatun juchata rurashcamanta mana arrepintirishpaca ña mana testigo de Jehová cai tucunchu.
7 Huahuacunata violashpa llaquichijcunaca leycunata mana cazushcatami ricuchincuna (Hechos 25:8-ta ricui). Diosta sirvijcunaca gobiernocunata, paicuna churashca leycunatami cazuna canchij (Romanos 13:1). Ancianocunaca gobiernopaj leycunata shuj huauqui o pani mana cazujpica mana castigai tucuncunachu. Pero huahuacunata pi violajpica autoridadcuna ama castigachun nishpa ancianocunaca mana pacancunachu (Romanos 13:4). Juchata rurajca ‘imatami tarpurca, chaillatatajmi tandanga’ (Gálatas 6:7).
8. ¿Shujtajcunata llaquichijpica Jehová Diosca ima shinataj sintirin?
8 Shujtajcunata llaquichishpaca Jehová Diosta llaquichishca layami can (Salmo 51:4). Israelitacunaman cushca leypica: ‘Maijanpish shujtajcunata umashpa shuhuashpaca Jehová Diostami pꞌiñachin’ nircami (Levítico 6:2-4). Chashna layallatajmi maijan huauqui o pani shuj huahuata umashpa llaquichishpaca Jehová Diostapish llaquichin. Diospaj shutitapishmi mapayachin. Huahuacunata violashpa llaquichinaca Diospaj ñaupajpica jatun juchami can. Chaimantami congregacionpi cashna mapa ruraicuna tiyachunca manataj saquina canchij.
9. a) ¿Cuerpo Gobernantepi sirvij huauquicunaca ima consejocunatataj cushca? b) ¿Imamantataj chashna rurashcacuna?
9 Cuerpo Gobernantepi sirvij huauquicunaca Bibliamantami achca consejocunata cushca. Por ejemplo, llaquichishcacunapajmi Huillaj, Rijchari revistacunapi, shujtaj publicacioncunapipish achca temacunata llujchishcacuna. Chai temacunata liyishpami paicunaca animarishcacuna. Shinallataj paicunata ima shina animanata yachangapaj, yaya mamacunapish huahuacunata ima shina cuidana cashcata yachachunmi huaquin temacunata llujchishcacuna. Cutin, pi shuj huahuata violashpa llaquichijpi imata rurana cashcata yachachunmi ancianocunaca huaquin instruccioncunata chasquishcacuna. Cuerpo Gobernantepi sirvij huauquicunaca siempremi ancianocunamanca ashtahuan instruccioncunata cuncuna. Chashnami Jesuspaj mandashcata tucuipi pajtachicushcata ricuchincuna.
MAIJANPISH JATUN JUCHATA RURAJPICA ¿ANCIANOCUNACA IMATATAJ RURANA CAN?
10-12. a) ¿Maijanpish jatun juchata rurajpica ancianocunaca imatataj rurana can? b) Santiago 5:14, 15-pi nishca shinaca ancianocunaca juchata rurajtaca ¿ima shinataj ayudana can?
10 Maijanpish jatun juchata rurajpica ancianocunaca Jesuspaj mandashcata cazushpami cashcata rurana can. Chaimantami Diosta sirvijcunataca cꞌuyaihuan tratana can. Pero, tucuimanta yallica Diospaj shutita pi ama mapayachichunmi ricuna can (Levítico 22:31, 32; Mateo 6:9). Shinallataj ancianocunaca huauqui panicuna Diosmanta ama caruyachunmi ayudana can. Ashtahuanpish llaquichishca cajcunata ayudangapajmi esforzarina can.
11 Shuj huauqui o pani jatun juchata rurajpica ancianocunaca Diospaj ñaupajpi cutin alli ricurichunmi ayudana can (Santiago 5:14, 15-ta liyipai). Maijanpish paipaj mapa munaicunamanta mana jarcarishpa jatun juchapi urmashpaca Diospaj ñaupajpica ungushca runa layami can. * Cutin, ancianocunaca jambij runa shinami can. Chaimantami Bibliamanta consejocunata cushpa juchata ruraj Diospaj ñaupajpi cutin alli ricurichun ayudancuna. Juchata ruraj shungumanta arrepintirijllapimi Diosca perdonanga (Hechos 3:19; 2 Corintios 2:5-10).
12 Diosca ancianocunataca huauqui panicunata cuidachunmi mingashca (1 Pedro 5:1-3). Ancianocunaca huauqui panicuna congregacionpi alli sintirichunmi munan. Chaimantami shuj huahuata violashcata yachaj chayashpaca ancianocunaca utca imata ruranata ricuna can. Caita alli intindingapajca quimsa tapuicunatami yachagrinchij.
13, 14. Shuj huahuatami violashca nishpa ancianocunaman pi huillajpica ¿ancianocunaca imatataj rurana can?
13 Shuj huahuatami violashca nishpa ancianocunaman pi huillajpica ¿ancianocunaca autoridadcunamanca huillanachu can? Ari. Maijan llajtacunapi autoridadcuna chashna rurachun mañajpica ancianocunaca cazuncunami (Romanos 13:1). Chai leycunata cazunaca mana juchachu can (Hechos 5:28, 29). Chaimantami, shuj huahuatami violashca nishpa ancianocunaman pi huillajpica paicunaca Betelman cayana can. Betelmanta huauquicunaca imata rurana cashcata, leycunata ima shina pajtachina cashcatami huillangacuna.
14 Shinallataj ancianocunaca violashca huahuacunaman, yaya mamacunaman, ima tucushcata yachajcunamanmi autoridadcunaman denunciai tucushcata huillana can. Shuj huauqui o panica “shuj huahuatami violarca” nishpa shujtaj huauquita o panitachari denuncianga. Chaitaca tal vez achca gentecunami yachai chayangacuna. Chashna tucujpica ¿denunciajca “Diospaj shutitami pingaipi churashcani” nishpachu yuyana can? Mana. Ashtahuanpish maijanmi huahuata violarca, chaimi Diospaj shutitaca pingaipi churan.
15, 16. a) 1 Timoteo 5:19-pi nishca shinaca ancianocunaca shuj comité judicialta rurangapajca ¿imamantataj ishqui testigocuna tiyachun minishtincuna? b) Maijan huauquita o panita shuj huahuatami violarca nishpa juchachijpica ¿ancianocunaca imatataj rurancuna?
15 Jatun juchata rurajca imata rurashcataca tal vez ancianocunamanca mana huillasha ningachu. Chashna cajpica, por lo menos ishqui testigocuna tiyajpimi ancianocunaca shuj comité judicialta rurai tucuncuna. ¿Ancianocunaca imamantataj chashna rurancuna? Bibliapi mandashcata cazushpami ancianocunaca chaita rurancuna (Deuteronomio 19:15; Mateo 18:16; 1 Timoteo 5:19-ta liyipai). Pero, ¿ishqui testigocuna tiyajllapichu autoridadcunamanca denunciai tucuncuna? Mana. Ishqui testigocuna mana tiyajpipish ancianocuna o shujtajcunaca denunciai tucuncunami.
16 Maijan huauquita o panita shuj huahuatami violarca nishpa juchachijpica ancianocunaca ¿imatataj rurancuna? Puntaca autoridadcuna churashca leycunatami catincuna. Qꞌuipaca imalla tucushcata yachangapajmi Bibliapi mandashcata cazushpa investigancuna. Juchachishca huauqui o pani mana imata rurarcanichu nijpica ancianocunaca testigocunatami uyancuna. Chai huauquita o panita juchachijmi shuj testigo can. Cutin, juchachishca huauqui o pani chai huahuallatataj o shujtaj huahuacunata violacujta ricujmi caishuj testigo can. Cai ishqui testigocunata uyashca huashami ancianocunaca juchata rurashcata o mana rurashcata ricushpa, comité judicialta ruranata o mana ruranata decidincuna. * Mana ishqui testigocuna tiyajpica, huauquita o panita juchachijca llullacunmi nishpaca ancianocunaca mana yuyanachu can. Ishqui testigocuna mana tiyajpipish juchachishca huauqui o pani tal vez juchata rurashcata, shujtajcunata achcata llaquichishcatami ancianocunaca yuyaipi charina can. Chaimantami llaquilla sintirij huauqui panicunata ayudana can. Shinallataj juchachishca huauqui o pani congregacionpi pitapish ama llaquichichunmi cuidana can (Hechos 20:28).
17, 18. ¿Ancianocunaca imapajtaj comité judicialta rurancuna?
17 ¿Ancianocunaca imapajtaj comité judicialta rurancuna? Ancianocunaca shuj huauqui o pani jatun juchata rurashcamanta carcelman richun o mana richunca mana shuj comité judicialta rurancunachu. Paicunaca autoridadcunapaj maquipimi chaitaca saquincuna (Romanos 13:2-4; Tito 3:1). Ashtahuanpish ancianocunaca comité judicialpica chai huauqui o pani testigo de Jehová cai tucushcata o ña mana cai tucushcatami ricuncuna.
18 Comité judicialpica anciano huauquicunaca juchata ruraj Diospaj ñaupajpi cutin alli ricurichunmi ayudancuna. Bibliapi ricushpami pai arrepintirishcata o mana arrepintirishcata ricuncuna. Juchata ruraj mana arrepintirijpica congregacionmantami llujshichincuna. Congregacionpipish ña mana testigo de Jehovachu can nishpami huillancuna (1 Corintios 5:11-13). Shungumanta arrenpitirijpica congregacionmantaca mana llujshichincunachu. Pero ancianocunaca juchata rurajmanca, “congregacionpica ima responsabilidadtaca tal vez nunca ña mana charinguichu, siervo ministerial o anciano cachunpish tal vez nunca mana nombrangacunachu” nishpami huillangacuna. Shinallataj juchata rurajmanta yaya mamacuna huahuacunata ima shina cuidanatami tal vez huillangacuna. Shinapish ancianocunaca juchata ruraj maijan huahuata llaquichishcataca mana tucuicunamanchu huillashpa purina can.
YAYA MAMACUNA HUAHUACUNATA CUIDAICHIJ
Huahuacunata pi ama llaquichichunca yaya mamacunaca mashna edadta charijta ricushpami chayarinacunamanta alli yachachina can. Cuerpo Gobernante cushca publicacioncunahuan, videocunahuanmi huahuacunaman yachachina can (Yachai 19, párrafos 19 al 22-ta ricui).
19-22. ¿Yaya mamacunaca ima shinataj paicunapaj huahuacunata cuidana can? (Página 1-pi tiyaj fotota ricui).
19 “Huahuacunaca Mandaj Diosmanta herenciamari” (Salmo 127:3). Chaimanta yaya mamacuna, cancunapaj huahuacunata ama pi llaquichichun cuidaichij. * ¿Huahuacunataca ima shinataj cuidana canguichij?
20 Huahuacunata picuna llaquichij cashcata, ima shina llaquichij cashcatami alli yachana canguichij. Shinallataj violajcuna huahuacunata ima shina umaj cashcatami alli yachana canguichij (Proverbios 22:3; 24:3). Casi siempremi huahuacunahuan apanacujcunallataj o rijsishcacunallataj huahuacunata violancuna. Chaimantami huahuacuna pihuan apanacujta o pihuan saquirijta alli ricuna canguichij.
21 Huahuacunahuan alli parlanacunata yachaichij (Deuteronomio 6:6, 7). Paicuna ima nicushcataca atentosmi uyana canguichij (Santiago 1:19). Huahuacunaca ima tucushcata parlanataca huaquinpica manchancunami. Mana cringachu nishpachari yuyangacuna. O tal vez paita llaquichijca, ñataj huilla cunguiman nishpachari huahuata manchachirca. Chaimantami cambaj huahua manchaihuan, llaquilla puricujta ricushpaca cꞌuyaihuan tapuna cangui. Pai imata parlajpica mana pꞌiñarishpami uyana cangui.
22 Huahuacunaman yachachichij. Huahuacuna mashna edadta charijta ricushpa chayarinacunamanta alli yachachichij. Shinallataj mapa munaicunahuan paicunata pi japisha nijpi imata rurana cashcata yachachichij. Cuerpo Gobernante cushca publicacioncunahuan videocunahuanpish huahuacunaman yachachichij (“ Familiacunapaj ayudacuna” nishca parteta ricui).
23. a) Huahuacunata violana, llaquichinamantaca ¿testigo de Jehovacunaca imatataj yuyanchij? b) ¿Catij yachaipica imatataj ricushun?
23 Huahuacunata violana, llaquichina ruraicunaca testigo de Jehovacunapajca jatun juchami can. Chaimantami chai mapa ruraicunataca millanayachinchij. Ñucanchijca pi shuj huahuata violajpi o llaquichijpica mana pacanchijchu. Chashnami Jesús mandashcata cazushcata ricuchinchij. Pero uchillapi violashca cajcunataca ¿ima shinataj ayudai tucunchij? Chaitaca catij yachaipimi ricushun.
CANTO 103 Michijcunaca Dios cushca regalomi
^ par. 5 Cai yachaipica huahuacunata ama pi llaquichichun o violachun ima shina cuidana cashcatami ricushun. Shinallataj ancianocuna congregacionta ima shina cuidana cashcata, yaya mamacunapish huahuacunata ima shina cuidana cashcatami yachashun.
^ par. 3 ALLI INTINDISHUNCHIJ: Huaquincunaca paicunapaj mapa munaicunata pajtachisha nishpami huahuacunata llaquichincuna o violancuna. Por ejemplo, paicunaca huahuacunahuanmi chayarincuna, o paicunapaj charishcatami huahuapaj shimipi churancuna. Shinallataj siqui ladotami huahuacunahuan sexota charincuna. Cutin shujtajcunaca huahuapaj siquita, chuchucunata, o paipaj charishcacunatami japincuna. Cꞌaricunami cashna shina millai ruraicunata ashtahuantajca rurashcacuna. Pero huaquin huarmicunapishmi caitaca rurashcacuna. Shinallataj cai millai gentecunaca huarmi huahuacunatami ashtahuantajca llaquichishcacuna. Pero huaquinpica cꞌari huahuacunatapishmi llaquichishcacuna.
^ par. 11 “Diospaj ñaupajpi ungushca shina cashcamantami juchapi urmarcani, ima culpata mana charinichu” nishpaca pipish mana yuyanachu can. Diosca imalla rurashcamantami tucuicunata juzganga (Romanos 14:12).
^ par. 16 Llaquichishca huahuaca tal vez paipaj yaya mamaman, o shujtajcunamanmi imalla tucushcata huillashcanga. Paicunami ancianocunamanca huillana can. Chashnami huahuaca mana ashtahuan sufringa. Ancianocunaca juchachishca runahuan parlacushpaca llaquichishca huahuapish chaipi cachunca nunca mana cayanachu can.
^ par. 19 Cai consejocunaca mana yaya mamacunallapajchu can. Ashtahuanpish huahuacunata huiñachijcunapaj, cuidajcunapajpishmi can.
