1. ¿Huaquincunapajca imataj sinchi cashca?

 ¿CAN CHURARISHCA metacunata pajtachinaca sinchichu cashca? b Metacunata pajtachinaca achcacunapajmi sinchi cashca. Por ejemplo, Philipca Jehová Diostami tucui shunguhuan cutin cutin mañangapaj esforzarisha nirca. Pero chashna mañangapaj tiempota surcunaca mana facilchu carca. Cutin, Erika shuti panica huillana grupoman utca chayasha nishpapish siempremi qꞌuipayaj carca. Shinallataj huauqui Tomášca quimsa cutinmi tucui Bibliata liyingapaj esforzarirca. Pero Levítico librocamallami chayarca.

2. ¿Ñucanchij metacunata mana pajtachi tucushpaca imamantataj mana desanimarina canchij?

² Cambaj metacunata pajtachingapaj esforzaricushpapish mana pajtachi tucushpaca mana desanimarinachu cangui. Uchilla metacunata pajtachingapajpishmi tiempo, esfuerzo minishtirin. Ashtahuanpish chai metacunata pajtachingapaj esforzaricushcamantami Jehová Diosta tucui shunguhuan cꞌuyashcata, paita ashtahuan sirvisha nishcata ricuchingui. Cambaj esfuerzocunata ricushpami Jehová Diosca cushilla sintirin. Paica ñucanchij rurai pudishcallata rurachunmi mañan (Salmo 103:14; Miqueas 6:8). Chaimantami pajtachi tucushca metacunallata churarina canchij. Cunanca chai metacunata pajtachingapaj imallata rurana cashcatami yachashun.

3. ¿Imamantataj metacunata pajtachina munaita charina canchij?

³ Ñucanchij metacunata pajtachingapajca pajtachina munaitami charina canchij. Chashnami metacunata pajtachingacama  esforzarishpa catishun. Ima shinami huairaca barcota pꞌucushpa chayana pushtuman apan, metacunata pajtachina munaimi metacunata pajtachichun ayudan. Huaira ashtahuan ashtahuan pꞌucujpica barcoca utcami chayana pushtuman chayanga. Chashnallatajmi metacunata pajtachina munaita ashtahuan charingapaj esforzarishpaca chai metacunataca utca pajtachi tucushun. El Salvador llajtapi causaj huauqui Davidca cashnami nirca: “Metacunata pajtachina munaita charishpaca jarcaicuna ricurijpipish chai metacunata pajtachingapajmi esforzarishpa catishun”. Shinaca ¿metacunata pajtachina munaita charingapajca imatataj rurana canchij?

4. ¿Jehová Diostaca imatataj mañana canchij? (Filipenses 2:13). (Fotomantapish parlapai).

⁴ Metacunata pajtachina munaita charingapaj Jehová Diosta mañai. Chaita rurajpimi Yaya Diosca espíritu santota cushpa pajtachina munaita charichun ayudanga (Filipenses 2:13-ta liyipai). Jehová Diosta ashtahuan sirvingapaj metacunata churarinaca allimi can. Pero metacunata churarishpapish huaquinpica chaicunataca mana tanto pajtachinata munanchijchu. Uganda llajtapi causaj pani Norinahuanmi chashna tucurca. Paica shuj estudiota charingapajmi esforzaricurca. Pero Bibliamanta mana alli yachachij cashcatami yuyaj carca. Chaimi chai metata pajtachina munaita charinaca sinchi carca. Paica Bibliamanta yachachina munaita charingapaj ayudahuai nishpami Yaya Diostaca punllanta mañai callarirca. Shinallataj alli yachachij cangapajmi esforzarishpa catirca. Quillacuna pasajpimi asha asha Bibliamanta yachachina munaita chari callarirca. Y chai huatallapitajmi ishqui gentecunaman Bibliamanta yachachi callarirca.

5. ¿Jehová Diosta ashtahuan sirvina munaita charingapajca imapitaj yuyana canchij?

⁵ Jehová Dios canmanta imallata rurashcata yuyai (Salmo 143:5). Apóstol Pabloca Jehová Dios paiman cꞌuyaita ima shina ricuchishcapimi yuyaj carca. Chaimantami paitaca ashtahuan sirvinata munarca (1 Corintios 15:9, 10; 1 Timoteo 1:12-14). Ñucanchijpish Jehová Dios ñucanchijman ima shina cꞌuyaita ricuchishcapimi yuyana canchij. Chashnami paitaca ashtahuan sirvinata munashun (Salmo 116:12). Honduraspi causaj shuj panica precursora shina sirvina munaita charingapajca Jehová Dios paipaj puebloman ima shina pushashcapi, paita cꞌuyaihuan cuidacushcapimi yuyarca. Chaicunapi yuyashpami cai panica Jehová Diosta ashtahuan cꞌuyai callarirca. Precursora regular shina sirvina munaitapishmi chari callarirca.

6. ¿Metacunata pajtachina munaita charingapajca ima ashtahuantaj rurana canchij?

⁶ Metacunata imamanta pajtachina cashcata yuyai. Pani Erikamanta cutin parlashun. Paica huillanaman llujshingapaj grupoman  imamanta mana qꞌuipayana cashcatami yuyai callarirca. Por ejemplo, paica: “Chai tandanacuicunaman utca chayashpaca turi ñañacunata saludangapaj, paicunahuan parlanacungapaj tiempota charinatami cuentata curcani. Shinallataj chai tandanacuicunapi alli huillaj cangapaj sumaj consejocunata chasquinatami intindircani” nircami. Cai panica imamanta puntual cana cashcata intindishcamantami chai metata pajtachi tucurca. ¿Ñucanchijpish metacunata pajtachingapajca imapitaj yuyana canchij? Por ejemplo, Bibliata liyinata o Diosta tucui shunguhuan mañanatachari yuyacungui. Chaita pajtachingapajca chaicunata rurashpa Jehová Diosman ashtahuan cꞌuchuyai tucushcatami yuyana cangui (Salmo 145:18, 19). Cutin shuj alli cualidadta charingapaj esforzaricushpaca chai cualidadta charishpa shujtajcunahuan alli apanacui tucushcatami yuyana cangui (Colosenses 3:14). Shinallataj imamanta chai metacunata pajtachisha nishcatami anotana cangui. Qꞌuipaca can anotashcacunapi yuyangapajmi tiempota llujchina cangui. Tomášca: “Ñuca metacunata imamanta pajtachisha nishcata alli intindishpaca chai metacunata pajtachingapajmi esforzarishpa catini” nircami.

7. ¿Juliopish, paipaj huarmipish metacunata pajtachingapajca imatataj rurarcacuna?

⁷ Animaj huauqui panicunahuan apanacui (Proverbios 13:20). Juliopish, paipaj huarmipish Jehová Diostami ashtahuan sirvisha nircacuna. Julioca: “Imata rurasha nishcatami alli amigocunaman parlarcanchij. Maijancunaca Jehová Diostaca ñami ashtahuan sirvicurcacuna. Chaimantami sumaj consejocunata cushpa animarcacuna. Shinallataj ñucanchij metacunata pajtachingapaj imallata ruracushcatami tapujcuna carca” nircami.

8. ¿Metacunata pajtachina munaita mana charishpaca imatataj rurana canchij? (Fotomantapish parlapai).

⁸ ¿Metacunata pajtachina munaita mana charishpaca imatataj rurana canchij? Cutinllataj huairapi, barcopi yuyashun. ¿Barcota manejajca huaira ashalla pꞌucujpi o mana pꞌucujpica barco ñaupajman richunca imatataj rurai tucun? Huaquin barcocunaca shuj motorta o remocunatami charin. Chaicunami barco ñaupajman rishpa catichun ayudan. Ñucanchijpish huaquinpica metacunata pajtachina munaitaca ashallatami charishun. Shujtaj punllacunacarin chai metacunataca ña mana pajtachinata munashunchu. Pero ¿pajtachina munaita mana charishpapish esforzarishpachu catina canchij? Ari. Ima shinami barcota manejaj runa huaira mana tiyajpipish barcota purichishpa catin, chashnallatajmi ñucanchijpish metacunata pajtachina munaita mana charishpapish esforzarishpa catina canchij. Cunanca, imamanta esforzarishpa catina cashcatami ricushun.

9. ¿Metacunata pajtachina munaita mana charishpapish imamantataj esforzarishpa catina canchij?

 ⁹ Jehová Diosca cushilla, tucui shunguhuan paita sirvichunmi munan (Salmo 100:2; 2 Corintios 9:7). Shinaca ¿pajtachina munaita mana charishpapish imamantataj metacunata pajtachingapaj esforzarishpa catina canchij? Apóstol Pablopi yuyashun. Paica: “Ñuca cuerpotaca sinchita macashpami ñucata sirvij cachun rurani” nircami (1 Corintios 9:25-27). Pabloca Jehová Diosta cazuna munaita mana tanto charishpapish paita tucui shunguhuan cazushpa catingapajmi sinchita esforzarirca. Pablo esforzarijta ricushpaca Jehová Diosca achcatami cushicurca. Chaimantami paitaca achcata bendiciarca (2 Timoteo 4:7, 8).

10. ¿Metacunata pajtachingapaj esforzarishpaca ima shinataj sintirishun?

¹⁰ Huaquinpica huaquin metacunata mana tanto pajtachisha nishpapish Jehová Diosta cꞌuyashcamantami pajtachingapaj esforzarinchij. Chaita ricushpaca Jehová Diosca cushillami sintirin. Paica Pablota bendiciashca shinami ñucanchijtapish bendicianga (Salmo 126:5). Ñucanchijpish Jehová Dios bendiciajta ricushpaca paita ashtahuan sirvina munaitami charishun. Poloniapi causaj pani Lucynaca: “Predicacionman llujshinaca ñucapajca mana facilchu can. Shaicushca cashpacarin ashtahuan sinchimi can. Pero shaicushca cashpapish predicacionman llujshishpaca cushillami sintirini” nircami. Cunanca, metacunata pajtachina munaita mana charishpaca imata rurana cashcatami yachashun.

11. ¿Jehová Diosca jarcarijcuna cachunca ima shinataj ayudan?

¹¹ Jarcarij cangapaj Diosta mañai. Jarcarijcuna cashpaca mana allicunata ruranamantami jarcarishun. Shinallataj mana jahualla cajpipish allicunata rurangapajmi esforzarishun. Bibliapi nishca shinaca Jehová Diosmi paipaj espíritu santota cushpa jarcarijcuna cachun ayudai tucun (Lucas 11:13; Gálatas 5:22, 23). Párrafo 3-pi parlashca huauqui Davidmanta parlashpa catishun. Paica Bibliata estudiangapajmi esforzarishpa catirca. Chai metata pajtachingapaj, jarcarij cangapajmi siempre Jehová Diosta mañaj carca. Davidca: “Jehová Diosca ñuca mañashcacunatami cutichirca. Cunanca Bibliata estudiangapajmi shuj horariota charini. Y chaita pajtachingapajmi sinchita esforzaricuni” nircami.

12. ¿Eclesiastés 11:4-pica imatataj yachachin?

¹² Cambaj causaipi tucui alli cachunca mana shuyanachu cangui. Causaipica siempremi llaquicuna, jarcaicuna tiyanga. Chaimantami jarcaicunata, llaquicunata charishpapish ñucanchij metacunata pajtachingapaj esforzarina canchij (Eclesiastés 11:4-ta liyipai). Daynielca: “Ñucanchij metacunata ama pajtachichunca siempremi jarcaicuna tiyanga. Pero metacunata pajtachingapaj esforzarishpaca jarcaicuna ña mana tiyashca shinami sintirishun” nircami. Ugandapi causaj huauqui Paulca cashnapishmi nin: “Jarcaicuna ricurijpipish cambaj metacunata pajtachingapaj esforzarijpica Yayitu Diosmi bendiciashpa catinga” (Malaquías 3:10).

13. ¿Ñucanchij metacunataca imamantataj asha asha pajtachishpa rina canchij?

¹³ Asha asha esforzarishpa cati. Huaquinpica yallitaj jatun metacunata churarishcamantami chaicunata pajtachinataca ña mana munashun. Chaipaj randica uchilla metacunataraj pajtachishpami callarina canchij. Por ejemplo, shuj cualidadtachari charinata munashun. Callaripica chai cualidadtaca uchilla cosascunapimi ricuchi tucunchij. Shinallataj Bibliatachari ashtahuan liyinata munanchij.  Achca versocunata liyinapaj randica ashalla versocunata liyishpami callari tucunchij. Huauqui Tomášca tucui Bibliata shuj huatapi liyisha nishpapish mana avanzarcachu. Chaita ruranaca paipajca dimastij sinchimi carca. Chaimantami cada punlla ashalla versocunata liyi callarirca. Qꞌuipaca chai versocunapimi yuyaj carca. Bibliata chashna liyi callarishcamantaca paica cushillami sintirirca. Qꞌuipacarin punllapica ashtahuan versocunatami liyi callarirca. Chashnami tucui Bibliata liyishpa tucuchirca. c

14. ¿Huaquinpica ima jarcaicunahuantaj chꞌimbapurashun?

¹⁴ Metacunata pajtachisha nijpipish jarcaicunami ricuri tucun. Por ejemplo, ima atraso japijpichari shuj metata pajtachingapajca ña mana tiempota charishun (Eclesiastés 9:11). Shinallataj problemacunamantami huaquinpica llaquilla sintirishun (Proverbios 24:10). Ashtahuanpish imapi pandarishcamantachari huaquin metacunataca ña mana pajtachi tucushun (Romanos 7:23). Huaquinpicarin shaicushca cashcamantami metacunataca ña mana pajtachinata munashun (Mateo 26:43). Pero ¿jarcaicuna ricurijpipish metacunata pajtachingapajca imatataj rurana canchij?

15. ¿Jarcaicuna mishachunca imamantataj mana saquina canchij? (Salmo 145:14).

¹⁵ Jarcaicuna ricurijpipish ñaupajman cati. Bibliapi nishca shinaca achca jarcaicunata, llaquicunatami charishun. Shinallataj Bibliapica, jarcaicuna ricurijpipish Jehová Diospaj ayudahuan metacunata pajtachi tucushcatami huillan (Salmo 145:14-ta liyipai). Huauqui Philipca: “Ñuca metacunata achca cutin mana pajtachi tucushcata yuyarinapaj randica chaicunata pajtachingapajmi sinchita esforzarishpa catini” nircami. Shinallataj huauqui Davidca: “Jarcaicuna ñucata mishachunca mana saquinichu. Ashtahuanpish chai  jarcaicunata mishashpa Jehová Diosta tucui shunguhuan cꞌuyashcata ricuchingapajmi esforzarini” nircami. Ñucanchijpish jarcaicuna ricurijpipish ñaupajmanmi catina canchij. Chashnami Jehová Diosta tucui shunguhuan cꞌuyashcata ricuchishun. Ñucanchij metacunata pajtachingapaj sinchita esforzarijta ricushpaca Yayitu Jehová Diosca cushillami sintiringa.

16. ¿Huaquin metacunata mana pajtachi tucushpaca imatataj rurana cangui?

¹⁶ Huaquin metacunata mana pajtachi tucushpaca imapi mejorai tucushcata yuyai. ‘¿Jarcaicuna ñucata ama mishachunca imatataj rurai tucuni?’ nishpa yuyai (Proverbios 27:12). Huaquinpica achcata esforzarishpapish ñucanchij metataca manachari pajtachi tucushun. Chashna tucujpica ¿imatataj rurana canchij? ‘Chai metata mana pajtachi tucushcamanta Jehová Diosca pꞌiñarishcami canga’ nishpaca mana yuyanachu canchij (2 Corintios 8:12). Chaipaj randica shujtaj metata pajtachinatami yuyana canchij. Pero ñucanchij pajtachi tucushca metallatami churarina canchij. d

17. ¿Imamantataj ñucanchij pajtachishca metacunata yuyarina canchij?

¹⁷ Can ña pajtachishca metacunapi yuyai. Bibliapica: ‘Diosca cancuna imata rurashcataca manataj cungaringachu’ ninmi (Hebreos 6:10). Canca ñachari Diospaj amigo cana, publicador cana o bautizarina metata pajtachircangui. Chai metacunata ña pajtachishcataca mana cungarinachu cangui. Ashtahuanpish chai metacunata ña pajtachishcamantami shujtaj metacunatapish pajtachi tucungui (Filipenses 3:16).

18. ¿Cambaj metacunata pajtachingapaj esforzaricushpaca imatataj yuyarina cangui? (Fotomantapish parlapai).

¹⁸ Cambaj metacunataca Jehová Diospaj ayudahuanmi pajtachi tucungui. Barcota manejaj runaca pai munashca pushtuman chayashpaca cushillami sintirin. Canpish can munashca metata pajtachishpaca cushillami sintiringui. Shinallataj barcota manejajcunaca paisajecunata ricushpami cushilla viajancuna. Canpish Jehová Dios cambaj metata pajtachichun ima shina ayudashcatami ricuna cangui. Chashnami cushilla sintiringui (2 Corintios 4:7). Metacunata pajtachingapaj esforzarishpaca achca bendicioncunatami chasquingui (Gálatas 6:9).