1, 2. ¿Huaquinpica imatataj tapurishcanchij?

 CANCA, ¿“Jehová Diosca ñuca mañashcacunataca cutichingachushi” nishpachu yuyashcangui? Achca huauqui panicunami llaquicunahuan chꞌimbapuracushpaca chashna nishpa tapurishcacuna. Ñucanchijpish llaquicunata charishpaca chashnami tapurishcanchij.

² Cai yachaipica Jehová Dios ñucanchij mañashcacunata cutichij cashcatami ricushun (1 Juan 5:15). Shinallataj ñucanchij mañashcacunata ima shina cutichishcata cuentata cuna imamanta huaquinpica sinchi cashcatami yachashun. Ashtahuancarin ñucanchij mañashcacunata ima shina cutichij cashcatapishmi ricushun.

3. ¿Diosca imamantataj paita mañachun munan?

³ Bibliapi nishca shinaca Jehová Diosca ñucanchijtaca achcatami cꞌuyan. Paipajca achca valishcami canchij (Ageo 2:7; 1 Juan 4:10). Jehová Diosca llaquicunata ahuantachun, paimanta ama caruyachunmi ayudasha nin. Chaimantami paica, ‘cancunata ayudachun ñucata mañaichij’ nin (1 Pedro 5:6, 7).

4. ¿Jehová Dios paipaj sirvijcunapaj mañaicunata cutichij cashcataca imamantataj seguros canchij? (Fotomantapish parlapai).

⁴ Bibliapica Jehová Dios paita sirvijcunapaj mañaicunata ima shina cutichij cashcatami yachachin. Rey Davidmanta parlashun. Paitaca achca contracunami llaquichisha nirca.  Chaimi Jehová Diostaca ayudahuai nishpa mañaj carca. Shuj cutincarin cashna nishpami mañarca: “Mandaj Dioslla, ñuca mañashcata uyahuayari. Ñuca rogarishcata uyahuayari. Quiquinca cashcata ruraj, pajtachij cashcamanta cutichihuayari” (Salmo 143:1). Diosca Davidpaj mañaitaca uyarcami. Chaimantami paitaca ayudarca (1 Samuel 19:10, 18-20; 2 Samuel 5:17-25). Davidca Jehová Dios paipaj mañaita cutichijta ricushpaca: “Mandaj Diosca, tucui paita mañajcunapajca cꞌuchullapimi” nircami. Ñucanchijpish Jehová Dios ñucanchij mañashcacunata cutichij cashcataca segurosmi cana canchij (Salmo 145:18).

5. ¿Diosca paita sirvijcunapaj mañaicunataca paicuna munashca shinachu cutichin? Shuj ejemplota churashpa parlai. (Fotomantapish parlapai).

⁵ Huaquinpica Jehová Diosca mañaicunataca ñucanchij munashca shinaca mana cutichinchu. Apóstol Pablopi yuyashun. Paica llaquitaca aichapi tujsicuj casha shinatami charirca. Chaimantami quimsa cutintaca cai cashata anchuchihuai nishpa Diosta mañarca. ¿Paipaj mañaitaca Jehová Diosca uyarcachu? Ari. Pero Pablo munashca shinaca mana cutichircachu. Paipaj llaquicunata anchuchinapaj randica paita sirvishpa catichunmi fuerzasta curca (2 Corintios 12:7-10).

6. ¿Imamantataj huaquinpica Jehová Dios ñucanchij mañaicunata mana cutichishcata yuyashcanchij?

⁶ Jehová Diosca ñucanchijpaj ima alli cashcataca allimi yachan. Paica, “paipaj poderhuanmi tucui ñucanchij mañashcatapish yalli, ñucanchij yuyashcatapish yalli rurai tucun” (Efesios 3:20). Chaimantami huaquinpica ñucanchij mana yuyashca horas o ñucanchij mana yuyashca shina ñucanchij mañaicunataca cutichin.

7. ¿Imamantataj Jehová Diostaca huaquinpica shujtaj laya mañana canchij? Shuj ejemplota churashpa parlai.

⁷ Jehová Diospaj munai maijan cashcata intindishpaca shujtaj laya mañana cashcatachari cuentata cushun. Huauqui Martin Poetzingermi chaitaca rurarca. Paitaca cazarashca qꞌuipallami carcelpi churarca. Chaimi paica Jehová Diostaca: “Ñuca huarmisitahuan cangapaj, huillashpa catingapaj caimanta cacharichichun ayudahuai” nishpa mañarca. Pero punllacuna pasajpica Jehová Dios paipaj mañaita mana cutichishcatami cuentata curca. Chaimantami huauqui Poetzingerca Jehová Diostaca, “cambaj munai maijan cashcata ricuchihuai” nishpa mañarca. Mañashca qꞌuipaca cai huauquica chai  carcelpi caj huauquicunapimi yuyai callarirca. Paicunaca paicunapaj huarmicunamanta, huahuacunamantami achca preocupados carcacuna. Chaita ricushpami huauqui Poetzingerca Jehová Diostaca: “Can imata rurachun munashcataca ñami intindini. Huauquicunata sinchiyachingapaj ayudahuai, pagui cai asignacionta cushcamanta” nishpa mañarca. Huauqui Poetzingerca chai asignaciontaca nueve huatacunatami pajtachirca.

8. ¿Jehová Diosta mañacushpaca imatataj yuyarina canchij?

⁸ Jehová Dios ñalla paipaj munaita pajtachigrishcatapishmi yuyarina canchij. Jesús cai Allpata mandacujpica ima llaquicuna, terremotocuna, jatun acapanacuna, ungüicuna, huañuipish ña mana tiyangachu (Daniel 2:44; Apocalipsis 21:3, 4). Pero chai punlla chayangacamaca Jehová Diosca Diablotami cai Allpata mandachun saquishca (Juan 12:31; Apocalipsis 12:9). b Jehová Dios cai rato tucui llaquicunata tucuchijpica gentecunaca Satanás cai mundota alli mandacushcatami yuyangacuna. Chaimantami llaquicunataca manaraj tucuchishca. Pero chaita manaraj rurashca cajpipish ñucanchijta mana ayudai tucushcataca mana yuyanachu canchij. Cunanca Jehová Dios ñucanchijta ima shina ayudaj cashcatami ricushun.

9. ¿Jehová Diosca alli decisioncunata japichunca ima shinataj ayudan? Shuj ejemplota churashpa parlai.

⁹ Diosca alli yuyaitami cun. Paica alli decisioncunata japichunmi alli yuyaita cusha nin. Causaipi jatun decisioncunata japingapajca Jehová Dios ñucanchijta ayudachunmi minishtinchij. Por ejemplo, cazaranata o mana cazaranata yuyacushpaca Jehová Diospaj ayudatami mashcana canchij (Santiago 1:5). Shuj soltera panipaj ejemplomanta yachashun. Paica María shutimi can. c Mariaca precursora regular shina cushilla sirvicushpami shuj huauquita rijsirca. Ishquindijca allimi apanacui callarircacuna. Qꞌuipacarin enamorarircacunami. Chaimi Mariaca cazaranata o mana cazaranata decidina carca. Paica: “Jehová Dios ñucata ayudachunmi minishtircani. Chaimi paitaca cutin cutin mañarcani. Pero ñucallatajmi imata ruranata decidina carcani” ninmi. Jehová Diosca María mañashcataca alli yachaita cushpami cutichirca. Por ejemplo, Mariaca ñucanchij publicacioncunata estudiashpami imata rurana cashcata alli intindirca. Ashtahuanpish paipaj mamami alli consejocunata cushpa ayudarca. Chashnami Mariaca alli yuyashpa shuj alli decisionta japi tucurca.

10. Filipenses 4:13-pi nishca shinaca ¿Jehová Diosca paita sirvijcunataca ima shinataj ayudan? Shuj ejemplota churashpa parlai. (Fotomantapish parlapai).

 ¹⁰ Llaquicunata ahuantachunmi fuerzasta cun. Jehová Diosca apóstol Pablota ayudashca shinallatajmi llaquicunata ahuantachun fuerzasta cushpa ayudanga (Filipenses 4:13-ta liyipai). Huauqui Benjaminmanta parlashun. Paica África llajtapica huahuamantapachami paipaj familiahuan campos de refugiadospi causarca. Benjaminca: “Jehová Diostami, allita rurangapaj fuerzasta cuchun cutin cutin mañaj carcani. Paica tranquilo sintirichun ayudashpami ñuca mañashcacunataca cutichirca. Shinallataj mana manchashpa huillachun fuerzasta cushpa, paimanta yachashpa catichun publicacioncunata cushpami ayudarca. Ashtahuancarin shujtaj huauqui panicuna llaquicunata ima shina ahuantashcata liyishpami animarircani” nircami.

11, 12. ¿Jehová Diosca ñucanchij mañashcacunata cutichingapajca huauqui panicunataca ima shinataj utilizan? (Fotomantapish parlapai).

¹¹ Diosca huauqui panicunata utilizashpami ñucanchij mañaicunataca cutichin. Jesusca ñalla huañugrishpaca Yaya Diostaca: ‘Gentecuna cambaj shutita mapayachicushcata yuyachunca ama saquihuangui’ nishpami mañarca. Pero Jehová Diosca chaita ruranapaj randica shuj angelta cachashpami paita sinchiyachirca (Lucas 22:42, 43). Jehová Diosca ñucanchijtapishmi huauqui panicunata utilizashpa ayudan. Por ejemplo, huauqui panicuna telefonopi cayashpa o ñucanchijta visitashpami huaquinpica sinchiyachincuna. Chaimantami tucuicuna alaja shimicunahuan huauqui panicunata sinchiyachingapaj esforzarina canchij (Proverbios 12:25).

¹² Shuj viuda panimanta parlashun. Paica Miriam shutimi can. Shuj punllaca paipaj cusa huaquin semanacuna huashalla huañushcata yuyarishpami dimastij llaquilla sintirirca. Pailla paipaj huasipi shungu pꞌaquirishca huacaillatami huacacurca. Paica: “Pi ñucata sinchiyachichunmi minishtircani. Pero shujtajcunata cayangapajca mana fuerzasta charircanichu. Chaimi Jehová Diostaca ayudahuai nishpa huacashpa mañarcani. Mañanata manaraj tucuchijpimi shuj turi ancianoca telefonopi cayarca. Paipish, paipaj huarmipish ñucapaj alli amigocunami can. Paicunami  ñucataca achcata sinchiyachircacuna. Jehová Diosmi ñucata cayachun paicunaman yuyaita curca” nircami.

13. ¿Diosca ñucanchij mañaicunata cutichingapajca ima shinataj paita mana sirvijcunata utilizai tucun? Shuj ejemplota churashpa parlai.

¹³ Diosca ñucanchij mañaicunata cutichingapajca huaquinpica paita mana sirvijcunatami utilizan (Proverbios 21:1). Por ejemplo, Jehová Dios yuyaita cujpimi mandaj Artajerjesca Jerusalenman tigrachun Nehemiasman permisota curca. Chashnami Nehemiasca Jerusalenta cutin shayachi tucurca (Nehemías 2:3-6). Cunan punllacunapipishmi Jehová Diosca paita mana sirvijcunata utilizashpa ñucanchijta ayudai tucun.

14. ¿Pani Soo Hingpaj experienciamantaca imatataj yachanchij? (Fotomantapish parlapai).

¹⁴ Pani Soo Hingpaj churica umapimi achca ungüicunata charin. Shuj punllaca altomanta urmashpami casi huañurca. Chaimi paita cuidangapajca pani Soo Hingpish, paipaj cusapish trabajanata saquircacuna. Pero ña mana trabajacushcamantaca cullqui illajmi saquirircacuna. Pani Soo Hingca yallitaj llaquilla, sustarishcami carca. Chaimi shunguta pascashpa Yaya Diostaca ayudahuai nishpa mañarca. Chai qꞌuipami shuj doctorca gobiernopaj ayudata mashcashpa paicunataca ayudarca. Shinallataj gobiernoca cullquita cushpa, maipi causangapaj shuj baratolla lugarta mashcashpami paicunataca ayudarca. Chaita ricushpami pani Soo Hingca: “Yayitu Diosca cai doctorta utilizashpami ñuca mañashcacunataca cutichirca. Cunanca, ñucanchij mañaicunata cutichij cashcataca tucui shunguhuanmi crini” nirca (Salmo 65:2).

15. ¿Mañaicunata Jehová Dios cutichishcata cuentata cungapajca shuj panica imatataj rurarca?

¹⁵ Jehová Diosca manachari shuj milagrota rurashpa ñucanchij mañashcacunata cutichinga. Pero ima laya cutichishpapish siempremi paimanta ama caruyachun ayudanga. Chaimantami Jehová Dios ñucanchij mañaicunata ima shina cutichijta ricungapaj atentos cana canchij. Pani Yokoca Yayitu Dios paipaj mañaicunata mana cutichij cashcatami yuyaj carca. Chaimi Yaya Diosta imalla mañashcacunata anotai callarirca. Qꞌuipaca imalla anotashcata liyicushpaca Jehová Dios casi tucui paipaj mañaicunata cutichishcatami cuentata curca. Ñucanchijpish Jehová Dios ñucanchij mañashcacunata ima shina cutichishcata cuentata cungapajmi tiempota llujchina canchij (Salmo 66:19, 20).

16. ¿Ima shinataj sinchi feta charishcata ricuchinchij? (Hebreos 11:6).

 ¹⁶ Jehová Dios ñucanchij mañaicunata ñucanchij munashca shina mana cutichijpipish paipimi sinchi feta charishpa catina canchij (Hebreos 11:6-ta liyipai). Mikeca paipaj huarmihuanmi Betelpi sirvinata munarcacuna. Chaimantami paicunaca cutin cutin Diosta mañajcuna carca. Solicitudtapish achca cutincunami cacharcacuna. Shinapish paicunataca Betelpi sirvichunca mana invitarcacunachu. Chashnapish paicunaca Jehová Diosta ashtahuan sirvinapimi ocuparircacuna. Por ejemplo, precursores regulares shinami shujtaj ladopi sirvinaman rircacuna. Tandanacuna Huasicunatapish shayachishpami ayudarcacuna. Cunancarin Mikeca superintendente shinami sirvicun. Paica: “Diosca ñucanchij mañaicunata huaquinpica ñucanchij mana yuyashca shina cutichishpapish siempremi cutichishca. Huaquinpicarin ñucanchij mañashcatapish yalli cushpami cutichishca” nircami.

17, 18. Salmo 86:6, 7-pi nishca shinaca ¿imatataj tucui shunguhuan crinchij?

¹⁷ Salmo 86:6, 7-ta liyipai. Rey Davidca Jehová Dios paipaj mañaicunata uyaj, cutichij cashcatami seguro carca. Ñucanchijpish segurosmi cana canchij. Cai yachaipi yachashca shinaca Jehová Diosca ñucanchij mañaicunataca alli yuyaita, fuerzasta cushpami cutichin. Shinallataj huauqui panicunata, hasta paita mana sirvijcunata utilizashpami ñucanchij mañaicunata cutichi tucun.

¹⁸ Diosca ñucanchij mañaicunataca manachari ñucanchij munashca shina cutichinga. Pero siempremi cutichinga. Paica minishtishca ratomi ñucanchij minishtishcata cushpa ayudanga. Shamuj punllacunapicarin sumaj causaitami cunga (Salmo 145:16). Chaimanta, Yayitu Jehová Diosta tucui shunguhuan mañashpa catishunchij.