1. ¿Jehová Diosca imatataj rurachun nin? (Fotomantapish parlapai).

 ¿LLAQUILLA cashpa, ayudata minishtishpaca imatataj rurana canchij? Jehová Diostami mañana canchij. Paillatajmi paita mañachun nin. Chaimantami 1 Tesalonicenses 5:17-pica: “Diosta mañaraichij” nin. Jehová Diostaca tucui ñucanchij causaipi ayudachunmi mañana canchij (Proverbios 3:5, 6). Diosta mashna cutincuna mañajpipish paica siempremi uyan.

2. ¿Cai yachaipica imatataj yachashun?

² Jehová Diosta mañanaca valishcami can. Pero ocupados cashcamantami paita mañangapaj tiempota surcunaca huaquinpica sinchi can. Chaimantami Jehová Diosta tucui shunguhuan mañangapaj esforzarina canchij. Bibliapi nishcacunata catishpami chaita rurai tucushun. Cai yachaipica Jesús shina Jehová Diosta mañangapaj tiempota surcuna cashcatami yachashun. Shinallataj Diosta tucui shunguhuan mañangapaj pichca yuyaicunatapishmi yachashun.

3. ¿Jesusca jahua pachapi cashpaca imatataj ricurca?

³ Jesusca ñucanchij mañashcacuna Jehová Diospaj valishca cashcatami yacharca. Paica manaraj cai Allpaman shamushpaca Jehová Dios paita sirvijcunapaj mañashcacunata ima shina cutichij cashcatami ricurca. Por ejemplo, Jesusca Anapaj, Davidpaj, Eliaspaj mañashcacunata  Jehová Dios ima shina cutichijtami ricurca (1 Samuel 1:10, 11, 20; 1 Reyes 19:4-6; Salmo 32:5). Chaita ricushcamantami Jesusca Diosta mañaraichij nishpa mandarca (Mateo 7:7-11).

4. ¿Jesusmantaca imatataj yachanchij?

⁴ Jesusca cai Allpapi cashpaca ocupado cashpapish siempremi Jehová Diosta mañangapaj tiempota llujchij carca (Marcos 6:31, 45, 46). Paica utca jatarishpami pi mana causan chulunlla ladoman rishpa Diosta mañaj carca (Marcos 1:35). Shuj cutincarin shuj jatun decisionta japingapajca tucui tutami mañashpa pacarirca (Lucas 6:12, 13). Shinallataj huañungapaj ashalla horascuna faltajpica paiman mingashcacunata alli pajtachingapajmi Jehová Diostaca cutin cutin mañarca (Mateo 26:39, 42, 44). Chashnami paita catijcunamanca alli ejemplota curca.

5. ¿Ima shinataj Jesuspaj ejemplota cati tucunchij?

⁵ Ocupado cashpapish Jesús shinami Jehová Diosta mañangapaj tiempota surcuna canchij. Paica Diosta mañangapajca utcami jatarij carca. O mana cashpaca tutacamami mañashpa saquirij carca. Ñucanchijpish chashnallatajmi rurai tucunchij. Chashnami Jehová Diosta mañana valishca cashcata ricuchishun. Pani Lynneca Jehová Diosta mañashpa, paihuan parlai tucushcata yachashpaca cushillami sintirirca. Paica: “Jehová Diosta mañajpi, pai uyaj cashcata yachaj chayashpaca paitaca shuj alli amigota shinami ricui callarircani. Chaimi tucui shunguhuan paita mañangapaj esforzari callarircani” nircami. Ñucanchijpish cai pani shinachari sintirinchij. Cunanca Jehová Diosta imacunallamanta mañai tucushcatami yachashun.

6. Apocalipsis 4:10, 11-pi nishca shinaca, ¿Jehová Diosca imatataj chasquina can?

⁶ Jehová Diosta alabashunchij. Apóstol Juanca muscuipi shinami jahua pachapi 24 ancianocuna Jehová Diosta alabacushcata ricurca. Paicunaca paitaca: “Canmi jatunyachishca canatapish, alli nishca canatapish chasquina cangui” nishpami jatunyachicurcacuna (Apocalipsis 4:10, 11-ta liyipai). ¿Angelcunaca imamantataj Jehová Diosta jatunyachincuna? Paihuan jahua  pachapi cashcamantami paitaca alli rijsincuna. Shinallataj , paicunaca Jehová Dios cꞌuyaj, llaquij cashcataca allimi yachancuna. Chaimantami paitaca jatunyachincuna (Job 38:4-7).

7. ¿Jehová Diosta mañacushpaca paitaca imacunallamantataj jatunyachina canchij?

⁷ Ñucanchijpish Jehová Diosta mañacushpaca paitami jatunyachina canchij. Por ejemplo, imamanta paita cꞌuyashcatami nina canchij. Shinallataj, Bibliata liyicushpaca Jehová Dios ima cualidadcunallata charishcatami mashcana canchij (Job 37:23; Romanos 11:33). Chai qꞌuipaca Jehová Diosta mañacushpaca chai cualidadcunata charishcamantami jatunyachina canchij. Jehová Dios ñucanchijta o shujtaj huauqui panicunata ayudashcamantapishmi jatunyachina canchij. Paica siempremi ñucanchijtaca ricuracun (1 Samuel 1:27; 2:1, 2).

8. ¿Jehová Diostaca imacunallamantataj agradicina canchij? (1 Tesalonicenses 5:18).

⁸ Jehová Diosta pagui nishunchij. Jehová Diostaca achca cosascunamantami agradici tucunchij (1 Tesalonicenses 5:18-ta liyipai). Tucui allicunaca Jehová Diosmantami shamun. Chaimantami paitaca tucui shunguhuan agradicina canchij (Santiago 1:17). Por ejemplo, Jehová Diostaca cai Allpapi tucui imalla tiyashcacunata rurashcamanta, causaita cushcamanta, ñucanchij familiata charishcamanta, ñucanchij amigocunamanta, shamuj punllacunapi sumaj causai tiyagrishcamanta, paihuan alli apanacui tucushcamantami pagui nina canchij.

9. ¿Jehová Dioshuan agradecido canaca imamantataj huaquinpica sinchi can?

⁹ ¿Canca imacunallamantataj Jehová Diosta pagui ni tucungui? Chaita cuentata cunaca huaquinpica sinchimi can. ¿Imamanta? Cai millai mundopi causacushcamanta. Jehová Diosta mana sirvijcunaca agradecido canapaj randica ashtahuan charina yuyaillami causancuna. Ñucanchijpish paicuna shina yuyashpaca Jehová Diostaca ñucanchij munashcacunallata cuchunmi mañai callarishun. Ama chashna mañangapajca agradecido cangapajmi esforzarina canchij. Shinallataj Jehová Diosta tucui imalla minishtishcacunata cushcamanta pagui ningapajmi esforzarina canchij (Lucas 6:45).

10. ¿Shuj panica llaquicunata ahuantangapajca imatataj rurarca? (Fotomantapish parlapai).

¹⁰ Agradecidos cashpaca llaquicunatami ahuantai tucushun. La Atalaya del 15 de enero de 2015 revistapica pani Kyung-sookpaj experienciami llujshirca. Doctorcunaca pulmonpi cáncer ungüi japishcamanta anchayacushcatami huillarcacuna. Chaimi paica: “Doctorcuna ancha ungushca cashcata huillajpica manchaihuan, llaquillami sintirircani” nirca. ¿Cai pani ñaupajman catingapajca imatataj rurarca? Paica cada tutami huasimanta llujshishpa Yaya Diostaca  pichca cosascunamanta agradicishpa mañaj carca. Shinallataj Jehová Diosta achcata cꞌuyashcatami nij carca. Chashnami paica tranquila sintirij carca. Pani Kyung-sookca llaquicunata apacushpaca Jehová Dios paita sirvijcunata cuidaj cashcata, llaquicunata charishpapish Jehová Dios siempre ayudaj cashcatami cuentata curca. Ñucanchijpish jatun llaquicunahuan chꞌimbapuracushpapish Jehová Dios achca bendicioncunata cushcamantami agradicina canchij. Chashnami llaquicunataca tranquilo ahuantai tucushun.

11. ¿Jesuspaj discipulocunaca ima jarcaicunahuantaj chꞌimbapurarcacuna?

¹¹ Mana manchashpa huillangapaj Jehová Diosta mañashunchij. Manaraj jahua pachaman rishpaca Jesusca paita catijcunamanca: “Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij” nircami (Hechos 1:8; Lucas 24:46-48). Chai qꞌuipallami panda religionta pushajcunaca Pedrota, Juanta prezu japishpa Sanedrinman aparcacuna. Chaipica paicunataca ama huillashpa catichunmi mandarcacuna (Hechos 4:18, 21). ¿Chaita uyashpaca Pedropish, Juanpish imatataj rurarcacuna?

12. Hechos 4:29, 31-pi nishca shinaca, ¿Jesusta catijcunaca imatataj rurarcacuna?

¹² Pedropish, Juanpish cashna nishpami cutichircacuna: “Diosta cazunapaj randi cancunata cazuna Diospaj ñaupajpi alli cajpica cancunallataj juzgaichij. Shinapish ñucanchijca imata ricushcata, imata uyashcata huillanataca manataj saqui tucunchijchu” (Hechos 4:19, 20). Panda religionta pushajcuna cai ishqui apostolcunata cacharijpica paicunaca shujtaj huauqui panicunahuanmi tandanacurcacuna. Chaipimi paicunaca tandalla Jehová Diostaca cashna nishpa mañarcacuna: “Canta sirvijcuna mana manchashpa cambaj shimimanta huillashpa catichunpish ayudahuai”. Jehová Diosca paicuna mañashcataca cutichircami (Hechos 4:29, 31-ta liyipai).

13. ¿Huauqui Jin-hyukmantaca imatataj yachanchij?

¹³ Autoridadcuna ñucanchijtapish ama huillachun nijpica punta discipulocunapaj ejemplotami catina canchij. Huauqui Jin-hyukmi chaitaca rurarca. Paitaca politicapi mana chagrurisha nishcamantami prezupi churarca. Chaipica huaquin prezucunata ricurachun, paicuna imalla minishtishcacunata cuchunmi mingarcacuna. Pero paicunaman Bibliamanta ama yachachichunmi mandarcacuna. Chaimi paica Jehová Diostaca ‘cai prezucunaman mana manchashpa ima shina huillanata ricuchihuai’ nishpa mañarca (Hechos 5:29). Jehová Diosca cai huauqui mañashcataca cutichircami. Chaimi paica prezucunamanca mana manchashpa huillai tucurca. Paica prezucunamanca pichca minutocunallatami Bibliamanta yachachi callarirca. Shinallataj shujtaj prezucunaman Bibliamanta yachachingapajca cartacunatami quillcaj carca. Ñucanchijpish mana manchashpa ima shina huillanata yachangapajca Jehová Diostami ayudahuai nishpa mañana canchij. Paica ñucanchij mañashcacunataca cutichingatajmi.

14. ¿Llaquicunata ahuantangapajca imatataj rurana canchij? (Salmo 37:3, 5).

¹⁴ Llaquicunata ahuantangapaj Jehová Diosta ayudachun mañashunchij. Familiacuna huañushcamanta, predicachun mana saquishcamanta, familia ucupi o ñucanchij saludpi problemacunata charishcamantami huaquinpica llaquilla sintirishcanchij.  Shinallataj pandemiacunamanta, jatun macanacuicunamantami ashtahuan llaquirishcanchij. Chaimanta ñucanchij shunguta pascashpa Jehová Diosta mañashunchij. Shuj alli amigohuan parlanacushca shina paiman tucuita huillashunchij. Jehová Dios ayudanataca segurosmi cana canchij (Salmo 37:3, 5-ta liyipai).

15. ¿Llaquicunata ahuantangapajca imamantataj Jehová Diosta mañana canchij? Shuj ejemplota churashpa parlai.

¹⁵ Llaquicunata ahuantangapajca Jehová Diostami cutin cutin mañana canchij (Romanos 12:12). Jehová Diosca ñucanchijcuna ima shina sintirishcataca allimi yachan. Paita rogarishpa mañajpipish uyanmi (Salmo 145:18, 19). Shuj precursoramanta yachashun. Pani Kristieca 29 huatacunatami charin. Paitaca huashan huashanmi achca ungüicuna japirca. Chaimantami paica dimastij llaquilla sintirirca. Qꞌuipacarin paipaj mamataca millai ungüimi japirca. Kristieca cashnami nirca: “Llaquicunata ahuantashpa catingapajmi Jehová Diostaca cutin cutin mañarcani. Tandanacuicunaman rinatapish, Bibliata estudianatapish manataj saquircanichu. Shinallataj chai llaqui punllacunapica Jehová Diosta mañanami achcata ayudarca. Mana rato alliyashpapish Yayitu Dios ñuca cꞌuchullapi cashcata yachashpami tranquila sintirircani”. Cai ejemplopi ricushca shinaca Jehová Diosca tucui shunguhuan paita adorajcunata llaquicunamanta ima shina quishpichinatami yachan (2 Pedro 2:9).

16. ¿Imamantataj tentacioncunapi ama urmangapaj Jehová Diosta mañana canchij?

¹⁶ Tentacioncunapi ama urmangapaj Jehová Diosta mañashunchij. Juchayujcuna cashcamantami tentacioncunapi ama urmangapaj punllanta esforzarishpa catina canchij. Diabloca tucui laya trampacunata churashpami ñucanchijta urmachisha nin. Por ejemplo, mapa, mana alli diversioncunahuanmi  Diosmanta caruyachisha nin. Cai mana alli diversioncunapi chagrurishpaca Diospaj ñaupajpimi mana alli ricurishun. Qꞌuipacarin hasta jatun juchacunapimi urmashun (Marcos 7:21-23; Santiago 1:14, 15).

17. ¿Tentacioncunapi ama urmangapajca ima ashtahuantaj rurana canchij? (Fotomantapish parlapai).

¹⁷ Tentacioncunataca mana ñucanchijllachu ahuantai tucunchij. Chaimantami Jehová Dios ñucanchijta ayudachun minishtinchij. Jesusca Jehová Diosta cashna nishpa mañachunmi yachachirca: “Ima mana alli ruraicunapi urmachunpish ama saquihuangui. Diablopaj maquimantapish quishpichihuangui” (Mateo 6:13). Jehová Diosca ñucanchijta ayudangapajca listomi can. Pero ñucanchijta ayudachunca paitami mañana canchij. Diosta mañashpapish tentacioncunapi ama urmangapajca cada unomi esforzarishpa catina canchij. Shinallataj panda yachachishcacunata ama uyangapaj, ama ricungapajmi esforzarina canchij (Salmo 97:10). Bibliata liyishpa, estudiashpa, tandanacuicunaman rishpa, predicacionman llujshishpami alli yuyaicunata charishun. Caita rurajpica Jehová Diosca tentacioncunapi ama urmachunmi ayudanga (1 Corintios 10:12, 13).

18. ¿Imatataj tucuicuna rurana canchij?

¹⁸ Cai tucuri punllacunapi llaquicunata ahuantangapajca Jehová Diostami cutin cutin mañana canchij. Paica tucui shunguhuan paita mañachunmi munan (Salmo 62:8). Chaimanta punllanta Yayitu Diosta tucui shunguhuan mañangapaj tiempota surcushunchij. Paita jatunyachinata, pagui ninatapish amataj saquishunchijchu. Mana manchashpa huillangapaj, llaquicunata ahuantangapaj, tentacioncunapi ama urmangapajpish ayudachun mañashunchij. Shujtajcuna jarcasha nijpipish paita mañanataca manataj saquinachu canchij. Pero ¿Jehová Diosca ñucanchij mañashcacunataca ima shinataj cutichin? Chaitaca catij yachaipimi yachashun.