1. ¿Jehová Diosca Abrahanmanca imatataj intindichirca?

 JEHOVÁ DIOSCA shuj angelta cachashpami Sodoma, Gomorra llajtacunata tucuchigrishcata Abrahanman huillarca. Abrahanca chai ángel nishcacunataca tucui vidami yuyarishcanga. Paica Jehová Diospica sinchi fetami charirca. Pero Jehová Dios imamanta chaita ruragrishcataca mana tucuita intindircachu. Chaimantami Jehová Diostaca: ‘¿Ciertotajchu cashcata ruraj gentecunataca millaita ruraj gentecunahuan igual tucuchigringui? ¿Tucui allpapi causaj gentecunapaj Juezca manachu cashcata ruranga?’ nishpa tapurca. Jehová Diosca paipaj cꞌuyashca amigomanca cashcata ruraj gentecunata millaita ruraj gentecunahuan nunca mana tucuchij cashcatami intindichirca. Chaita yachashpaca ¿manachu cushilla sintirinchij? (Génesis 18:​23-33).

2. ¿Jehová Dios cꞌuyaihuan, cashcata rurashpa siempre juzgaj cashcataca ima shinataj yachanchij?

² ¿Jehová Dios cꞌuyaihuan, cashcata rurashpa siempre juzgaj cashcataca imamantataj seguros canchij? Paica cada unopaj shungu ima shina cashcataca allimi yachan (1 Samuel 16:7; 1 Reyes 8:39; 1 Crónicas 28:9). Chaita yachanaca valishcami can. Jehová Diosca ñucanchijtapish yalli yachaisapami can. Chaimantami huaquinpica pai ima shina juzgaj cashcataca mana tucuita intindi tucunchij. Chaimi apóstol Pabloca: “¿Pai ima shina juzgajtaca pitaj tucuita intindi tucungari?” nirca (Romanos 11:33).

3, 4. a) ¿Huaquinpica imatataj tapurishun? b) ¿Cai yachaipica imatataj yachashun? (Juan 5:​28, 29).

³ Jehová Dios siempre cashcata rurashcataca allimi yachanchij. Chashnapish huaquinpica Abrahán shinami dudacunata charishun. Por ejemplo: “¿Sodoma y Gomorrapi Jehová Dios tucuchishca gentecunamantaca maijancunaca causaringachu? ¿Mana cashcata rurajcuna causarijpica paicunapishchu causaringacuna?” nishpachari tapurishun (Hechos 24:15).

⁴ Cai allpapi picunalla causarigrishcamanta imata yachashcatami  ashata yuyarigrinchij. Recienllami picunalla huiñai causaita charingapaj causarigrishcata, shinallataj picunalla juzgashca cangapaj causarigrishcata yacharcanchij (Juan 5:​28, 29-ta liyipai). a Juan 5:​28, 29-ta alli intindishcamantami huaquin yuyaicunata cambiana canchij. Chaicunatami cai yachaipi, catij yachaipipish intindigrinchij. Cai yachaipica Jehová Diospaj juiciocunamanta imata yachashcata, imata mana yachashcatami yachashun.

¿IMATATAJ MANA YACHANCHIJ?

5. ¿Sodoma, Gomorra llajtacunapi huañushca gentecunamantaca ñaupaca imatataj yuyaj carcanchij?

⁵ Ñaupa punllacunapica Jehová Diosca huaquin gentecunataca cashcata mana rurajcuna cashcamantami tucuchirca. Por ejemplo, Sodoma, Gomorra llajtacunapi causajcunatami tucuchirca. ¿Chai gentecunahuanca imataj tucunga? Ñaupaca chai gentecuna paraisopi mana causarinatami yuyaj carcanchij. Pero alli cazuj, alli yuyaiyuj sirvij huauquicunaca Bibliata alli estudiashca qꞌuipa, Jehová Diostapish achcata mañashca qꞌuipaca chai gentecuna causarinata o mana causarinata mana seguro cai tucushcatami cuentata curcacuna. ¿Imamanta?

6. a) ¿Jehová Diosca picunallatataj tucuchirca? b) ¿Jehová Dios tucuchishca gentecunamantaca imatataj mana ni tucunchij?

⁶ Bibliapica achca cutincunami Jehová Dios cashcata mana ruraj gentecunata tucuchishcata nin. Por ejemplo, Noepaj punllacunapica Noeca paipaj familiallahuanmi quishpirirca. Shinapish achca gentecunami huañurca. Qꞌuipaca Jehová Diosca israelitacunataca siete llajtacunapi causaj gentecunata tucuchichunmi mandarca. Paicunata huañuchishca qꞌuipaca israelitacunami chaipica causana carcacuna. Shinallataj shuj cutinca Jehová Diosca shuj angelta cachashpami shuj tutallapi 185.000 asirio soldadocunata tucuchirca (Génesis 7:23; Deuteronomio 7:​1-3; Isaías 37:​36, 37). Bibliapica chai tucui gentecunata Jehová Dios imamanta, ima shina tucuchishcataca mana tucuita huillanchu. Chaimantami “Jehová Diosca chai gentecunataca para siempre tucuchirca. Chaimi cutinca manataj causaringacuna” nishpa mana ni tucunchij.

7. ¿Yacu juillupi huañushca gentecunamanta, Canaanta duñuyangapaj huañuchishca gentecunamantaca imatataj mana yachachij? (Fototapish ricui).

⁷ Yacu juillupi huañushca gentecuna, shinallataj Canaanta duñuyangapaj huañuchishca gentecunapi yuyashun. Chai gentecunaca cada uno Diosmanta yachashpa arrepintirina oportunidadta charishcataca mana yachanchijchu. Noemanta parlashpaca Bibliapica: ‘Noeca cashcata ruranamanta huillajmi carca’ ninmi (2 Pedro 2:5). Shinapish Bibliapica arcata ruracushpa Noé tucui allpapi causaj gentecunaman huillashcataca mana ninchu. Shinallataj Caananpi causaj gentecuna tucuicuna Diosmanta yachashpa paicunapaj mana alli ruraicunata saquingapaj oportunidadta charishcataca Bibliapica mana huillanchu.

8. ¿Sodoma, Gomorra llajtapi causaj gentecunamantaca imatataj mana yachanchij?

⁸ Cashcata ruraj Lot runaca Sodoma llajtapimi causaj carca. Pero ¿Sodoma, Gomorra llajtacunapi causajcunamantaca imatataj mana yachanchij? Lot chaipi causaj tucui gentecunaman Diosmanta huillashcataca mana yachanchijchu. Chai gentecunaca yallitaj millaicunami carca. ¿Pero paicunaca ima alli cashcata, ima mana alli cashcataca yacharcacunachu? Chaitaca manachari yacharcacuna. ¿Imamantataj shina ninchij? Por ejemplo, Bibliapica ishqui angelcuna Lotta visitanaman shamujpica ‘Sodoma llajtamanta cꞌaricuna huambracunamanta callarishpa, yuyajcunacama’ paicunata violasha nishcatami nin (Génesis 19:4; 2 Pedro 2:7). ¿Chai tucui gentecunamanta cashcata ruraj Jehová Dios shujllatapish mana causachinataca ni tucunchijchu? Jehová Diosca Abrahanmanca chai llajtapi cashcata ruraj 10 gentecunallapish mana tiyashcatami nirca (Génesis 18:32). Chai llajtapi causajcuna mana cashcata rurajcuna cashcamantami Jehová Diosca paicunataca tucuchirca.  Chashnami cashcata ruraj cashcata ricuchirca. ¿Pero mana cashcata rurajcuna causarijpi chai tucui gentecunamanta ni shujllapish mana causarinataca ni tucunchijchu? Mana. Chaitaca mana ni tucunchijchu.

9. ¿Salomonmantaca imatataj mana yachanchij?

⁹ Shinallataj Bibliapica maijancuna cashcata rurajcuna cashpapish qꞌuipaca cashcata mana rurajcuna tucushcatami nin. Salomonpi yuyashun. Paica Jehová Diostaca allimi rijsirca. Salomonca Jehová Dios munashca shina paita adorashcamantami achca bendicioncunata chasquirca. Pero qꞌuipaca yanga dioscunatami adorai callarirca. Chaita ricushpaca Jehová Diosca achcatami pꞌiñarirca. Ashtahuanpish Salomonpaj culpamantami tucui israelitacunaca achca huatacunata llaquicunahuan causarcacuna (1 Reyes 11:​5-9; 2 Reyes 23:13). “Chai qꞌuipaca Salomonca huañurcami” (1 Reyes 11:43). Hebreo rimaipica “huañurcami” ninapaj randica “Salomonca paipaj ñaupa yayacunahuanmi samarirca” ninmi. Bibliapica Jehová Diosta alli sirvij shujtaj runacunapish huañushpaca paipaj ñaupa yayacunahuan samarishcatami nin. Por ejemplo, Davidmanta parlashpaca chaitami nin (1 Reyes 11:​21-pi tiyaj notata ricui). ¿Pero Bibliapi “Salomonca paipaj ñaupa yayacunahuanmi samarirca” nishpaca cutin causarina cashcatachu nin? Bibliapica chaitaca mana ninchu. Maijancunaca Romanos 6:​7-pi nishcata liyishpaca Salomón cutin causarinatami yuyancuna. Chai versopica “maijanpish huañushpaca paipaj juchamanta perdonashcami can” ninmi. Pero chai versopi chaita nishpapish gentecuna huañushcallamanta cutin causarina cashcataca mana ninchu. Ashtahuanpish Jehová Diosca yallitaj cꞌuyaj cashcamantami picunallata cutin causachinata agllan. Cutin causarinaca Jehová Dios cushca regalomi can (Job 14:​13, 14; Juan 6:44). ¿Shinashpaca Salomonca cutin causaringachu? Chaitaca mana yachachijchu. Jehová Diosllami yachan. Pero chaita mana yachashpapish Jehová Dios siempre cashcata ruraj cashcataca allimi yachanchij.

¿IMATATAJ YACHANCHIJ?

10. ¿Jehová Diosca gentecunata tucuchishpaca ima shinataj sintirin? (Ezequiel 33:11; fotomantapish parlapai).

¹⁰ (Ezequiel 33:​11-ta liyipai). Cai versopica Jehová Diosca gentecunata tucuchishpaca ima shina sintirishcatami nin. Jehová Dios yuyaita cujpimi apóstol Pedropish ‘Jehová Diosca shujllapish ama chingarichun, ashtahuanpish tucuicuna arrepintirichunmi cancunamanca pacienciata ricuchin’ nirca (2 Pedro 3:9). Caita liyishpaca tranquilosmi sintirinchij. ¿Imamanta? Jehová Dios gentecuna imalla rurashcacunata ricushpa paicunata huiñaipaj tucuchinata o cutin causachinata alli juzgaj cashcataca segurosmi canchij. Paica yallitaj cꞌuyaj cashcamantami gentecunata ayudanata o mana ayudanataca alli yuyashpa decidin.

11. a) ¿Picunataj manataj causaringacuna? b) ¿Chai gentecuna manataj causarina cashcata imamantataj seguros canchij?

¹¹ Maijan gentecuna manataj causarina cashcataca allimi yachanchij. ¿Paicunaca picunataj can? Bibliapica huaquincunallamantami parlan. b Por ejemplo, Jesusca ‘Judas Iscarioteca manataj causaringachu’ nircami (Marcos 14:21; Juan 17:​12-tapish ricui, españolpi tiyaj nota de estudiotapish ricui). Judasca Jehovapaj contra tucuna, shinallataj Jesusta traicionana jatun juchacuna cashcatami yacharca. Pero chaita yachashca jahuami chaitaca rurarca (Marcos 3:​29-ta ricui, españolpi tiyaj nota de estudio nishcatapish ricui). Shinallataj Jesusca chai tiempopi tiyaj panda religionta pushajcunamantaca maijancuna paipaj contracuna tucushcamanta manataj causarina cashcatami nirca (Mateo 23:33; Juan 19:​11-ta ricui, españolpi tiyaj “del hombre” nishca notatapish ricui). Apóstol Pablopish mana arrepintirij apostatacunaca ‘manataj causaringacunachu’ nircami (Hebreos 6:​4-8; 10:29).

12. ¿Jehová Diosca cꞌuyaj, llaquij cashcataca ima shinataj ricuchin? Shuj ejemplota churashpa parlai.

¹² Ñajaman nishca shinaca Jehová Diosca yallitaj llaquij, cꞌuyaj cashcamantami shujllapish tucuchishca  cachunca mana munan. Huaquin gentecuna jatun juchacunapi urmajpica ¿Jehová Diosca paicunata llaquishcataca ima shinataj ricuchirca? Por ejemplo, rey Davidca jatun juchacunapimi urmarca. Paica cazarashca huarmihuanmi huainayarca. Shuj runatapish huañuchichunmi cacharca. Pero David arrepintirijpimi Jehová Diosca paita llaquishpa perdonarca (2 Samuel 12:​1-13). Rey Manasespish achca huatacunatami millaita rurashpa causarca. Pero shungumanta arrepintirijpica Jehová Diosca paita llaquishpami perdonarca (2 Crónicas 33: 9-16). Cai ejemplocunapi ricushca shinaca shungumanta arrepintirijpimi Jehová Diosca perdonai tucun. Davidpish Manasespish shungumanta arrepintirishcamantami Jehová Diosca paicunataca cutin causachinga.

13. a) ¿Jehová Diosca Nínive llajtapi causajcunata llaquishcataca ima shinataj ricuchirca? b) ¿Jesusca Nínive llajtapi causaj gentecunamantaca imatataj nirca?

¹³ Shinallataj Jehová Dios Nínive llajtapi causajcunata llaquishpa perdonashcatami yachanchij. Yaya Diosca Jonasmanca “paicuna millaita ruracushcatami ricushcani” nircami. Pero paicunapaj juchacunamanta shungumanta arrepintirijpica Jehová Diosca paicunata llaquishpami perdonarca. Chashnami paica Jonastapish yalli cꞌuyaj, llaquij cashcata ricuchirca. Jonasca Jehová Dios chai gentecunata mana tucuchishcata ricushpaca achcatami pꞌiñarirca. Chaimi Yaya Diosca ‘chai gentecuna ima alli cashcata, ima mana alli cashcata mana yachashcata’ yuyachirca (Juan 1:​1, 2; 3:10; 4:​9-11). Jesusca Yaya Dios cashcata ruraj, yallitaj llaquij cashcata yachachingapajca Ninivepi causaj gentecunamantami parlarca. Paica ‘jucio punllapica Nínive llajtamanta gentecunapishmi causaringacuna’ nircami (Mateo 12:41).

14. ¿Nínive llajtamanta gentecuna “juzgashca cangapaj” causarishca qꞌuipaca paicunahuanca imataj tucunga?

¹⁴ ¿Nínive llajtamanta gentecunaca ima horataj cutin causaringacuna? Jesusca shamuj punllacunapi huaquin gentecuna “juzgashca cangapaj” causarinatami huillarca (Juan 5:29). Pai mil huatacunata mandacujpimi “cashcata rurajcunapish, cashcata mana rurajcunapish causaringacuna” (Hechos 24:15). Cashcata mana rurajcunaca “juzgashca cangapajmi causaringacuna”. ¿Chaica imatataj nisha nin? Jehová Diospish, Jesuspish chai gentecuna paicunapaj causaipi Diospaj mandashcacunata pajtachijta o mana pajtachijtami ricungacuna. Nínive llajtamanta shuj runa causarishpaca Jehová Diospaj mandashcacunata manataj cazusha nijpica huañungapajmi sentenciashca canga (Isaías 65:20). Pero Jehová Diosta tucuipi cazushpaca paraisopi huiñai  huiñaita causana oportunidadtami charinga (Daniel 12:2).

15. a) ¿Sodoma Gomorra llajtacunamanta gentecunaca ni pi mana causarinataca imamantataj mana ni tucunchij? b) ¿Judas 7-pi nishcacunaca imatataj nisha nin? (“ ¿Judasca imatataj nisha nirca?” nishca recuadrota ricui).

¹⁵ Jesusca paitapish paipaj yachachishcacunatapish mana chasquijcunamanta parlashpaca “Juicio Punllapica paicunaca Sodoma y Gomorra llajtacunatapish yallimi llaquichishca cangacuna” nircami (Mateo 10:​14, 15; 11:​23, 24; Lucas 10:12). ¿Chaita nishpaca Jesusca imatataj nisha nirca? Tal vez “Jesusca pai yachachishcacunata ama cungarichunmi ashata exagerashpa chaita nishcanga” nishpachari yuyashun. Pero Jesusca manachari exageracurca. Ashtahuanpish chashnataj tucuna cashcatachari nicurca. Yuyashun. Nínive llajtamanta causajcuna “Juicio Punllapi” causarina cashcata parlacushpaca shamuj punllacunapi chashnataj tucuna cashcamantami chaita nirca. Sodoma, Gomorra llajtacunamanta gentecunahuan ima tucunata parlacushpapish chai Jucio Punllallamantatajmi parlacushcanga. Nínive llajtamanta gentecunapish, Sodoma Gomorra llajtacunamanta gentecunapish millai ruraicunatami rurarcacuna. Shinapish Ninivemanta gentecunallami arrepintirina oportunidadta charircacuna. Ashtahuanpish Jesusca “mana allita rurajcunaca juzgashca cangapajmi causaringacuna” nircami (Juan 5:29). Shinashpaca Sodoma Gomorra llajtacunamanta gentecunaca shuj esperanzatami charij yuyachin. Paicunamanta maijancunaca tal vez paraisopimi causaringacuna. Chaipimi ñucanchijcunaca Jehovamanta, Jesusmanta yachachun paicunataca ayudai tucushun.

16. ¿Jehová Diosca pita causachinataca ima shinataj decidinga? (Jeremías 17:10).

¹⁶ (Jeremías 17:​10-ta liyipai). Cai versopica huañushcacuna causarinamanta ñucanchijcuna imata yachashcatami intindichin. Jehová Diosca tucuicunapaj shunguta, yuyaitami callarishpa ricun. Paica cada uno imata rurashcata, ima shina causashcata ricushpami paicunata causachinata o mana causachinata decidinga. Chashnami paica cꞌuyaj, llaquij cashcata ricuchinga. Shinaca Bibliapi maijan runa manataj causarinata nijllapimi chai runa mana causarinata seguro canchij. Pero Bibliapi shuj runa causarinata o mana causarinata mana nijpica chai runa causarinata o mana causarinataca mana seguro cai tucunchijchu.

TUCUI ALLPATA JUZGAJ YAYA DIOSCA SIEMPREMI CASHCATA RURANGA

17. ¿Huañushcacunahuanca imataj tucunga?

¹⁷ Huañuica ñucanchij enemigomi can (1 Corintios 15:26). Adán y Eva Jehová Diospaj contra  tucushca punllamantami huaranga huaranga gentecunaca huañushcacuna. ¿Chai tucui gentecunahuanca imataj tucunga? Jehová Diosta alli sirvij 144.000 ungidocunaca mana tucurij causaita charingapajmi jahua pachapi causaringacuna (Apocalipsis 14:1). Shinallataj achca gentecunaca Jehová Diosta alli sirvishpami huañushcacuna. Bibliapica paicunataca “cashcata rurajcuna” ninmi. Paicunaca paraisopimi cutin causaringacuna. Jesús cai allpata mil huatacunata mandacujpi Jehová Diosta tucuipi cazushpa, tucuri pruebatapish pasashpaca paicunaca huiñai huiñaita causana oportunidadtami charingacuna (Daniel 12:13; Hebreos 12:1). Shinallataj Jesús cai allpata mil huatacunata mandacujpica cashcata mana rurajcunapishmi causaringacuna. Paicunaca Jehová Diosta sirvina oportunidadtaca mana charircacunachu. Ashtahuancarin maijancunaca mana alli cosascunata rurashpami causarcacuna. Pero paraisopi causarishpaca paicunapaj ñaupa causaita saquishpami Jehová Diosta sirvina oportunidadta charingacuna (Lucas 23:​42, 43). Shinallataj maijancunaca manaraj huañushpaca yallitaj millaicunami carcacuna. Ashtahuanpish paicunallatajmi Diospaj contra tucunata agllarcacuna. Chaimantami Yayitu Diosca paicunataca mana cutin causachinga (Lucas 12:​4, 5).

18, 19. a) ¿Jehová Dios picunallata causachinata agllacushpa alli decidinataca imamantataj seguros canchij? (Isaías 55:​8, 9). b) ¿Catij yachaipica imatataj yachashun?

¹⁸ ¿Jehová Diosca gentecunata juzgacushpaca siemprechu cashcata rurashpa juzgan? Ari. Ñucanchijca Abrahán shinami cai allpata juzgaj Jehová Dios jucha illaj cashcata, cꞌuyaj, llaquij, yachaisapa cashcataca seguros canchij. Jehová Diosca gentecunata juzgachunca Jesusmanmi mingashca. Shinallataj ima shina juzgana cashcataca paimanca allimi yachachishca (Juan 5:22). Jehová Diospish, Jesuspish gentecunapaj shungu ima shina cashcatami ricui tucuncuna (Mateo 9:4). Chaimantami paicunaca siempre cashcata rurangacuna.

¹⁹ Jehová Diosca siempremi alli yuyashpa imatapish alli decidin. Chaimantami paipi confiana canchij. Ñucanchijca alli juezcunaca mana cai tucunchijchu. Pero Jehová Diosca ima shina juzganataca allimi yachan (Isaías 55:​8, 9-ta liyipai). Jehová Diospish Jesuspish alli juezcuna cashcata yachashcamantami paicunapaj decisioncunapi confianchij. Ñucanchijta mandaj Jesusca Jehová shinallatajmi cꞌuyaj, cashcata ruraj can. Chaimantami paipipish tucui shunguhuan confianchij (Isaías 11:​3, 4). Pero jatun llaqui punllacunapica Jehová Diospish Jesuspish gentecunataca ¿ima shinataj juzgangacuna? Catij yachaipimi chaimanta imata yachashcata, imata mana yachashcata yachashun.