¿BIBLIATA cada semana estudianaca cambajca sinchichu can? ¿Bibliata estudiacushpaca ratochu shaicuringui? Maipica tucuicunami chashna sintirishcanchij. Caipi yuyashun. Huaquin cosascunata rurangapajca tiempo y esfuerzomi minishtirin. Por ejemplo, siempremi armana canchij. Pero armashca huashaca allimi sintirinchij. Chashnallatajmi Bibliata estudiashpaca alli sintirinchij (Efesios 5:26). ¿Bibliata cada semana estudiangapajca imatataj rurana cangui?

• Shuj horariota rurai. Diosta sirvijcunapajca cada semana Bibliata estudianaca achca valishcami can (Filipenses 1:10). Chaipajca shuj horariotami rurai tucungui. Chai horariotaca can ricunallapimi churai tucungui. Mana cashpaca telefonopimi shuj alarmata churai tucungui. Cashnami Bibliata estudianataca mana cungaringui.

• Mashnata estudiai tucushcata ricui. ¿Canca cada semana shuj horata estudianatachu munangui? ¿O semanapi huaquin punllacunatachu asha minutocunallata estudianata munangui? Canllatajmi ima shina estudianata munashcata ricushpa decidina cangui. Pero ña estudiana horas chayajpi chaita ruranata mana tanto munashpaca diez minutocunallatapishmi estudiai tucungui. Chai diez minutocunallapica achcatami yachai tucungui. Asha minutocunallata estudiai callarishpaca tal vez ashtahuan tiempotami estudianata munangui (Filipenses 2:13).

• Imata estudiasha nishcataca tiempohuan agllai. Estudiana horas chayajpi chai rato imata estudianata ricushpaca tiempotami pirdingui (Efesios 5:16). Manaraj estudiai callarishpaca ima yachasha nishcatami shuj listapi anotai tucungui. Shinallataj Bibliamanta shuj tapuita yachasha nishpaca chai listapimi anotai tucungui. Estudiacushpa shujtaj yuyaicunamanta ashtahuan yachasha nishpaca chaitapishmi anotai tucungui.

• Cambiocunata rurana cajpica cambiocunata rurai. Cada semana estudiangapajmi esforzarina cangui. Can agllashca punlla mana estudiai tucushpaca shujtaj punllami estudiai tucungui. Minishtirijpica mashnata estudianata, imata estudianatapishmi cambianalla cangui.

Cada semana Bibliata estudiashpaca achcatami beneficiaringui. Jehová Diospajmanpishmi ashtahuan cꞌuchuyangui. Alli decisioncunatapishmi japingui. Ashtahuancarin ñaupajman catingapajmi fuerzata charingui (Josué 1:8).