1. ¿Mayorlla huauqui panicunamantaca imamantataj yachana canchij?

 TUCUICUNAMI alli decisioncunata agllangapajca ayudachun minishtinchij. Ñucanchijtaca huauqui ancianocuna, experienciata charij huauqui panicunami ayudai tucun. Pero ñucanchijta yalli mayorcuna cajpipish paicunapaj consejoca mana ayudai tucunchu nishpaca mana yuyanachu canchij. Ashtahuanpish Jehová Diosca mayorlla huauqui panicunamanta yachachunmi munan. Paicunaca achca tiempota causashcamantami experienciatapish, alli yachaitapish charincuna (Job 12:12).

2. ¿Cai yachaipica imatataj yachashun?

² Ñaupa punllacunapica Jehová Diosca paipaj pueblota animachun, ñaupajman pushachunca alli sirvij mayorlla runacunatami agllarca. Por ejemplo, Moisesta, Davidta, apóstol Juantami paica agllarca. Paicunaca chꞌican chꞌican tiempopimi causarcacuna. Ña mayorlla cashpapish ashtahuan jovencunatami Jehová Diosta cazuna importante cashcata intindichircacuna. Jovencunapish, mayorcunapishmi paicuna cushca consejocunamantaca yachai tucunchij. Chaimantami Jehová Diosca paicuna ima nishcataca Bibliapi quillcachirca (Romanos 15:4; 2 Timoteo 3:16). Cai yachaipica cai quimsa mayorlla runacunapaj tucuri shimicunamantami yachashun.

‘UNITAMI CAUSANGUICHIJ’

3. ¿Moisesca imallatataj rurarca?

³ Moisesca tucui vidami Diosta sirvirca. Paica profeta, juez, soldadocunata pushaj, quillcajmi carca. Moisesca achca experienciatami charirca. Paica Egipto llajtamantami israelitacunata llujshichirca. Shinallataj Jehová Dios achca milagrocunata  rurajtami ricurca. Jehová Diosca Moisesmanca Bibliapi tiyaj callari pichca librocunata escribichunmi yuyaita curca. Moisesca Salmo 90, Salmo 91, Job librotapishmi escribishca yuyachin.

4. a) ¿Moisesca picunatataj animarca? b) ¿Imamantataj chashna animarca?

⁴ Moisesca 120 huatacunata charishpami ñalla huañugrirca. Chaimi paica tucui israelitacunata tandachishpa Jehová Dios imallata rurashcata yuyachirca. Huaquin israelitacunaca jovenraj cashpaca Jehová Dios achca milagrocunata rurashcatami ricurcacuna. Shinallataj egipciocunata castigashcatami ricurcacuna (Éxodo 7:4). Paicunaca Jehová Dios Puca mama cuchata chaupijpimi chaita pasarcacuna. Faraonpaj soldadocunata tucuchijtapishmi ricurcacuna (Éxodo 14:​29-31). Shinallataj chaquishca pambapi cashpaca Jehová Dios paicunata ima shina cuidajtami ricurcacuna (Deuteronomio. 8:​3, 4). Cunanca israelitacunaca ñallami Dios cusha nishca allpaman yaicugrircacuna. Chaipimi Moisesca tucuri shimicunata nishpa paicunata animarca. a

5. ¿Deuteronomio 30:​19, 20-pica Moisesca israelitacunamanca imatataj nirca?

⁵ ¿Moisesca imatataj nirca? (Deuteronomio 30:​19, 20-ta liyipai). Moisesca israelitacunamanca shamuj punllacunapi sumaj causaita charigrishcatami yuyachirca. Paicunaca Jehová Dios bendiciajpimi pai cusha nishca allpapica achca tiempota causana carcacuna. Chai allpamanta parlashpaca Moisesca: ‘Cancuna manapish shayachishca jatun alli pueblocunatami japinguichij. Huasicunapish cancuna mana jundachishca alli charinacunahuan jundatami japinguichij. Tanquecunatapish manapish cancuna allashpa rurashcacunatami japinguichij. Olivos yuracunatapish, uva chagracunatapishmi japinguichij’ nircami (Deuteronomio 6:​10, 11).

6. ¿Diosca imamantataj israelitacunataca prezuta shina apachun saquirca?

⁶ Moisesca israelitacunataca chai sumaj allpapi causashpa catingapajca Jehová Diospaj mandamientocunata cazuchunmi mandarca. Paicunataca: “Causaitami agllana canguichij” nircami. Chaipajca Jehová Diosta uyashpa paimanta ama caruyachunmi animarca. Chashnapish israelitacunaca Jehová Diostaca mana cazurcacunachu. Chaimantami tiempohuanca Diosca asiriocuna, babiloniocuna israelitacunata paicunapaj allpamanta prezuta shina apachun saquirca (2 Reyes 17:​6-8, 13, 14; 2 Crónicas 36:​15-17, 20).

7. ¿Moisés nishca shimicunamantaca imatataj yachanchij? (Fotomantapish parlapai).

⁷ ¿Ñucanchijpish imatataj yachanchij? Jehová Diosta cazushpaca huiñai huiñaitami causashun. Ima shinami israelitacunaca Jehová Dios cusha nishca allpaman ñalla yaicugrirca, chashnallatajmi ñucanchijpish Dios cusha nishca Paraisomanca ñalla yaicugrinchij (Isaías 35:1; Lucas 23:43). Chaipica Diablopish, demoniocunapish mana tiyangachu (Apocalipsis 20:​2, 3). Panda religioncunapish Diosmantaca gentecunataca mana caruyachingachu (Apocalipsis 17:16). Gobiernocunapish gentecunataca mana llaquichingachu (Apocalipsis 19:​19, 20). Millai gentecunapish ña mana tiyangachu (Salmo 37:​10, 11). Tucui gentecunami Jehová Diospaj leycunata cazungacuna. Chashnami tandalla,  sumajta causangacuna. Caishuj chaishujmi cꞌuyanacungacuna (Isaías 11:9). Chai punlla chayachunmi cushicuihuan shuyacunchij. Jehová Diosta cazushpaca Paraisopimi huiñai huiñaita causashun (Salmo 37:29; Juan 3:16).

8. ¿Shuj misionero huauquitaca huiñaita causana esperanzapi yuyanaca ima shinataj ayudarca? (Judas 20, 21).

⁸ Huiñai causaita Dios cusha nishcata yuyarishpaca ima pruebata charishpapish paita cazushpami catishun (Judas 20, 21-ta liyipai). Diospaj promesacunapi yuyashpaca mana alli munaicunamantami jarcarishun. Africapi achca huatacunata sirvij shuj misioneroca mana alli munaita mishangapajmi esforzarirca. Paica: “Jehová Diosta mana cazushpaca Paraisopi mana causai tucushcatami cuentata curcani. Chaimantami ima mana allita ama rurangapaj achcata esforzarircani. Jehová Diostapishmi tucui shunguhuan mañarcani. Dios ayudajllapimi chai mana alli munaitaca misharcani” ninmi.

‘TUCUIMI ALLI LLUJSHINGA’

9. ¿Davidca ima llaquicunallatataj charirca?

⁹ Davidca alli reymi carca. Paica músico, poeta, macanacuj, profetami carca. Paica achca llaquicunatami charirca. Achca huatacunatami rey Saúl huañuchisha nishcamanta miticushpa purirca. Davidca ña rey cashpapish paipaj churi Absalón rey tucusha nishpa huañuchisha nijpimi cutinllataj miticurca. Achca llaquicunata charishpapish Davidca Diostami tucui shunguhuan sirvishpa catirca. Chaimantami Jehová Diosca: “Davidmi ñuca shunguta cushichin” nirca. Davidpaj consejocunata uyanaca allimi can (Hechos 13:22; 1 Reyes 15:5).

10. ¿Davidca Salomón rey tucugrijpica imamantataj aconsejarca?

¹⁰ Paipaj churi Salomón rey tucugrijpi David ima nishcata ricushun. Salomontaca Jehová Diosmi paipaj huasita shayachichun agllarca. Chai huasipimi gentecunaca Diosta adorana carca (1 Crónicas 22:5). Salomonca tucui chaita pajtachingapaj, israelitacunata pushangapajca Jehová Diospaj ayudatami minishtirca. ¿Davidca Salomonmanca imatataj nirca?

11. a) ¿1 Reyes 2:​2, 3-pica Davidca paipaj churi Salomonmanca ima consejotataj curca? b) ¿Salomonca Davidpaj consejota cazushpaca ima shinataj causarca? (Fotomantapish parlai).

¹¹ ¿Davidca imatataj nirca? (1 Reyes 2:​2, 3-ta liyipai). Davidca paipaj churitaca: ‘Jehová Diosta cazujpica tucui can imalla rurashcami alli llujshinga’ nircami. Achca huatacunatami Jehová Diosca Salomonta ayudarca (1 Crónicas 29:​23-25). Paica Diospaj sumaj huasitami shayachirca. Bibliapi tiyaj huaquin librocunatapishmi quillcarca. Salomonca alli yachaj, charij cashcamantami rijsishca carca (1 Reyes 4:34). Pero tiempohuanca  Salomonca paipaj yaya David cushca consejotaca ña mana cazurcachu. Chaimantami ña yuyajyashpaca shujtaj dioscunata adorarca. Chashna rurajpimi Jehová Diosca cashcata rurashpa, allita rurashpa paipaj pueblota mandachunca ña mana ayudarca (1 Reyes 11:​9, 10; 12:4).

12. ¿David nishca shimicunamantaca imatataj yachai tucunchij?

¹² ¿Ñucanchijpish imatataj yachanchij? Jehová Diosta cazushpaca cushillami causashun (Salmo 1:​1-3). Jehová Diosca Salomón shina achcata charij cachun, rijsishca cachunca mana ayudangachu. Pero paita tucuipi cazujpica alli decisioncunata agllachunmi ayudanga (Proverbios 2:​6, 7; Santiago 1:5). Jehová Dios cushca consejocunaca trabajomanta, estudianamanta, cullquimanta, divirtirinamanta alli decisioncunata agllachunmi ayudan. Chai consejocunata cazushpaca paipaj alli amigomi cashun. Huiñai causaitapishmi charishun (Proverbios 2:​10, 11). Shinallataj alli amigocunatami charishun. Familia ucupipish cushillami causashun.

13. ¿Pani Carmenca paipaj causaipi cushilla cangapajca imatataj rurarca?

¹³ Mozambique llajtapi causaj pani Carmenmanta parlashun. Paica alli causaita charisha nishpami universidadpi arquitecturata estudiarca. Paica: “Imata yachacushcataca achcatami munarcani. Pero siete y media de la mañanamanta las seis de la tardecama estudiana cashcamantami shaicushca sintirircani. Chaimantami tandanacuicunaman rina, Jehová Diospajman ashtahuan cꞌuchuyanaca ñucapajca sinchi carca. Ishqui amocunata sirvicushca layami sintirircani” ninmi (Mateo 6:24). Pani Carmenca Jehová Diostami mañarca. Publicacioncunapipishmi imata ruranata yachangapaj investigarca. Paica: “Ancianocunapaj consejota uyashpa, ñuca mamita cushca consejota uyashpami Jehová Diosta ashtahuan sirvingapaj universidadpi estudianata saquircani. Chaita rurashcamantami cushilla sintirini” ninmi.

14. ¿Moisespish, Davidpish imatataj nircacuna?

¹⁴ Moisespish, Davidpish Jehová Diosta cꞌuyashcamantami paita cazuna importante cashcata yacharcacuna. Paicuna ñalla  huañugrishpaca paicunapaj ejemplota catichun, Jehová Diosta tucui shunguhuan sirvichunmi animarcacuna. Shinallataj Diosta mana cazushpaca paipaj amigocuna ña mana cai tucushcata, paipaj bendiciontapish ña mana chasquina cashcatami intindichircacuna. Cai consejocunaca ñucanchijpajpish valishcami can. Cunanca Diosta alli sirvij shujtaj runamanta parlashun.

‘ÑUCACA YALLITAJMI CUSHICUNI’

15. ¿Apóstol Juanca imallatataj ricurca?

¹⁵ Apóstol Juanca Jesuspaj cꞌuyashca amigomi carca (Mateo 10:2; Juan 19:26). Juanca Jesushuanmi achca tiempota huillarca. Jesús rurashca milagrocunatapishmi ricurca. Jesús achca llaquicunata apacujpica Juanca paihuanmi carca. Jesús ima shina huañujta, ima shina causarijtapishmi ricurca. Shinallataj Juanca punta siglopi Jesusta catijcuna mirarishpa ‘alli huillaicunata tucui muyundij allpapi huillacujtapishmi’ ricurca (Colosenses 1:23).

16. ¿Apóstol Juan quillcashca cartacunaca picunallatataj ayudashca?

¹⁶ Apóstol Juanca ña mayorlla cashpami Jesús imata ricuchishcata Apocalipsis libropi escribirca (Apocalipsis 1:1). Shinallataj paica Juan librota, quimsa cartacunatapishmi escribirca. Tucuri cartataca Diosta alli sirvij Gayo shuti huauquimanmi escribirca. Gayotaca paipaj propio huahuata shinami cꞌuyaj carca (3 Juan 1). Apóstol Juanca chai tiempopica achcacunatami chashnallataj cꞌuyashcanga. Juan quillcashca shimicunaca Jesusta catijcunataca cunancamami ayudashca.

17. ¿3 Juan 4-pi nishca shinaca imamantataj yallitaj cushicunchij?

¹⁷ ¿Juanca imatataj escribirca? (3 Juan 4-ta liyipai). Apóstol Juanca huauqui panicuna Diosta cazushpa causacujta ricushpaca achcatami cushicurca. Chaitami paipaj tucuri cartapica quillcarca. Chai tiempopica achcacunami llullacunata nishpa huauqui panicunata chꞌicanyachicurcacuna. Chashnapish shujtajcunaca Diospaj mandashcacunata cazushpami ‘mana llullapi purishpa’ catircacuna (2 Juan 4, 6). Chashnami paicunaca Jehová Diostapish, Juantapish cushichircacuna (Proverbios 27:11).

18. ¿Juan nishca shimicunamantaca imatataj yachai tucunchij?

¹⁸ ¿Ñucanchijpish imatataj yachanchij? Jehová Diosmanta mana caruyashpaca cushillami sintirishun (1 Juan 5:3). Jehová Diosca ñucanchijcuna mana allicunamanta caruyashpa  paita cazujpica cushillami sintirin. Chaita yachashpami ñucanchijpish cushicunchij (Proverbios 23:15). Ñucanchij allita rurajpica jahua pacha angelcunapishmi cushicun (Lucas 15:10). Ñucanchij huauqui panicunapish llaquicuna, tentacioncuna ricurijpi Diosmanta mana caruyajta ricushpaca cushillami sintirinchij (2 Tesalonicenses 1:4). Satanaspaj mundo ña tucurijpi Jehová Diosmanta mana caruyashcamantami ñucanchijca cushilla sintirishun.

19. ¿Pani Rachelca shujtajcunaman yachachinamantaca imatataj nirca? (Fotomantapish parlapai).

¹⁹ Jehová Diosmanta shujtajcunaman yachachishpaca cushillami sintirinchij. República Dominicana llajtamanta pani Rachelmanta parlashun. Paica Jehová Diosmanta shujtajcunaman yachachinataca achcatami munan. Chaimantami achca gentecunata Diosta sirvichun ayudashca. Pani Rachelca: “Bibliamanta shujtajcunaman yachachingapajca achca sacrificiocunatami rurana cani. Shinapish paicuna Jehová Diosta cꞌuyai callarijpi, paipi confiai callarijpi, paicunapaj causaipi cambiocunata rurajpica achcatami cushicuni” ninmi.

DIOSTA ALLI SIRVIJ RUNACUNAPAJ TUCURI SHIMICUNATA CAZUSHUNCHIJ

20. ¿Moisespish, Davidpish, Juanpish ñucanchij shinallataj imatataj rurarcacuna?

²⁰ Moisespish, Davidpish, Juanpish ñaupa punllacunapimi causarcacuna. Pero ñucanchij shinallatajmi paicunaca Diosta sirvircacuna. Paicuna shinallatajmi Jehová Diosta mañanchij, paipi confianchij, paipaj ayudata mashcanchij. Jehová Dios paita cazujcunata bendiciaj cashcatapishmi yachanchij.

21. ¿Moisés, David, apóstol Juan cushca consejocunata uyashpaca ima bendicioncunatataj japishun?

²¹ Cai mayorlla runacuna cushca consejocunata catishpa Jehová Diospaj mandashcacunata cazushunchij. Chashna rurajpimi Diosca ñucanchijtaca tucuipi ayudanga, ‘huiñai causaitapish cunga’ (Deuteronomio 30:20). Yaya Diosta cushichishpaca ñucanchijllatajmi cushilla sintirishun. Paica ñucanchijmanca achca bendicioncunatami cunga (Efesios 3:20).