1, 2. ¿Ancianocunaca congregacionpica ima trabajotataj rurancuna?

 SIERVO ministerial shina sirvicushpaca anciano shina sirvingapajmi alli cualidadcunata ña charingui. ¿Anciano shina huauqui panicunata sirvinata munanguichu? (1 Timoteo 3:1).

² ¿Ancianocunaca congregacionpica ima trabajotataj rurancuna? Paicunaca huillanaman llujshishpami alli ejemplota churancuna. Shinallataj huauqui panicunata yachachingapaj, cuidangapajmi esforzarincuna. Paicunapaj rimashcacunahuan, rurashcacunahuanmi shujtajcunata sinchiyachincuna. Chaimantami Bibliapica ancianocunataca ‘shuj regalomi’ can nin (Efesios 4:8).

3. ¿Anciano shina sirvingapajca imatataj rurana cangui? (1 Timoteo 3:​1-7; Tito 1:​5-9).

³ Caipi yuyashun. Shuj trabajota charingapajca imatapish alli ruraj canallami minishtirin. Pero ¿anciano cangapajca imatataj rurana cangui? Alli huillaicunata alli huillaj, alli yachachij cashcatami ricuchina cangui. Pero ashtahuantajca Bibliapi nishca cualidadcunatami charina cangui (1 Timoteo 3:​1-7 y Tito 1:​5-9-ta liyipai). Cai yachaipica huauquicuna anciano cangapaj imata rurana cashcatami yachashun. 1) Paicuna alli comportarij cashcatami huauqui panicunapish, mana Testigocunapish ricuna can. 2) Familiatami alli cuidana can. 3) Huauqui panicunata sirvingapajmi listo cana can.

ALLI COMPORTARIJ CASHCATA RICUCHI

4. ¿“Mana juchachipaj” canaca imatataj nisha nin?

⁴ Anciano cangapajca ‘mana juchachipajmi’ cana cangui. ¿Chaica imatataj nisha nin? Can alli comportarijta ricushpaca huauqui panicunaca imatapish mana yangamanta juchachingacunachu. Shinallataj “canllapi caj gentecunapurapica  alli nishcami” cana cangui. Maipica gentecunaca cambaj crishcacunamantami yangamanta juchachingacuna. Pero can alli causacujta ricushpa, can alli comportarijta ricushpami imata mana juchachi tucungacuna (Daniel 6:​4, 5). Chaimanta: “¿Congregación ucupipish, canllapi caj gentecunapaj ñaupajpipish alli comportarij cashcatachu ricuchicuni?” nishpa tapuri.

5. ¿“Allita ruranata cꞌuyaj” canaca imatataj nisha nin?

⁵ ‘Allita ruranata cꞌuyajmi’ cana cangui. ¿Chaitaca ima shinataj ricuchi tucungui? Shujtajcunapaj alli ruraicunata ricushpami felicitana cangui. Pi imata mana mañajpipish shujtajcunapajmi allita rurana cangui (1 Tesalonicenses 2:8). ¿Imamantataj “allita ruranata cꞌuyaj” cana cangui? Chashnami huauqui panicunata ayudacushpa, cambaj asignacioncunata pajtachicushpaca cushilla sintiringui (1 Pedro 5:​1-3). Shujtajcunata ayudangapaj achca sacrificiocunata rurana cashpapish cushillami sintiringui (Hechos 20:35).

6. ¿“Cꞌuyaihuan chasquij” canaca imatataj nisha nin? (Hebreos 13:​2, 16; fotomantapish parlapai).

⁶ “Cꞌuyaihuan chasquij” cashcata ricuchi. Mana cambaj amigocunallatachu ayudana cangui. Shujtajcunapajpishmi allicunata rurana cangui (1 Pedro 4:9). Shuj diccionariopica: “Cꞌuyaihuan chasquij runaca paipaj shunguta pascashpami mana rijsishca gentecunataca paipaj huasipi cushicushpa chasquin” ninmi. Shinaca cashna tapuri: “¿Visitaman shamujcunataca alli chasquij cashcatachu ricuchini?” (Hebreos 13:​2, 16-ta liyipai). Cꞌuyaihuan chasquij runaca tucui laya gentecunatami ayudanata munan. Por ejemplo, superintendente de circuito huauquicunata, conferenciata cunaman shamuj huauquicunata, pobre huauquicunatapishmi cushicushpa chasquin (Génesis 18:​2-8; Proverbios 3:27; Lucas 14:​13, 14; Hechos 16:15; Romanos 12:13).

7. ¿‘Mana cullquillapi yuyaj’ cashcataca ima shinataj ricuchingui?

⁷ “Mana cullquillapi yuyajchu” cana cangui. Cullquillata, shujtaj cosascunallata charinataca mana mashcanachu cangui. Charij cashpapish, pobre cashpapish Diospaj Gobiernotami punta lugarpi churana cangui (Mateo 6:33). Cambaj tiempota, cambaj fuerzata, charishca cosascunatapish Jehová Diosta adorangapaj, cambaj familiata cuidangapaj, huauqui  panicunata ayudangapajmi utilizana cangui (Mateo 6:24; 1 Juan 2:​15-17). Chaimanta: “¿Cullquimantaca ñucaca imatataj yuyani? ¿Causangapajca minishtirishca cosascunallahuanchu ña cushilla cani? ¿Mana cashpaca ashtahuan cullquita ganangapaj, ashtahuan cosascunata charingapajchu esforzaricuni?” nishpa tapuri (1 Timoteo 6:​6, 17-19).

8. ¿“Tucuipi jarcarij” canaca imatataj nisha nin?

⁸ ‘Tucuipi jarcarijmi’ cana cangui. Chaitaca tucui cambaj causaipimi ricuchina cangui. Por ejemplo mana yalli micuj, mana yalli ubyajchu cana cangui. Cambaj churarishcapish, cambaj ñajcharishcapish mana maipishcachun cana canchu. Divirtiringapajca alli decisioncunatami agllana cangui. Diosta mana sirvij gentecuna shinapish mana causanachu cangui (Lucas 21:34; Santiago 4:4). Shujtajcuna canta mana alli tratajpipish paicunataca cꞌuyaihuanmi tratana cangui. Shinallataj jarcarij cashcata ricuchingapajca ‘mana machajmi’ cana cangui. Shujtajcunaca cantaca tragota yallitaj ubyanata munaj cashcata shinaca mana ricunachu can. Shinaca: “¿Ñuca causaipica jarcarij cashcatachu ricuchini?” nishpa tapuri.

9. a) ¿“Alli yuyaiyuj” canaca imatataj nisha nin? b) ¿“Mana maipishcachun” causanaca imatataj nisha nin?

⁹ “Alli yuyaiyuj” cashcatami ricuchina cangui. Manaraj imata decidishpami Bibliapi tiyaj consejocunata ricuna cangui. Chashnami tucuita alli intindishpa alli decisioncunata agllangui. Imatapish mana apuradochu rurana cangui. Chaipaj randica allimi investigana cangui (Proverbios 18:13). Chashna rurashpami Jehová Dios munashca shina alli decisioncunata agllangui. Tucuita ordenpi charishpa, a tiempo imata rurashpaca “mana maipishcachun causaj” cashcatami ricuchingui. Instruccioncunata, mandashcacunata, canman mingashcata alli pajtachijpica tucuicunami cantaca alli ningacuna. Cunanca familiata alli pushaj cangapaj imata rurana cashcata ricushun.

CAMBAJ FAMILIATA ALLI PUSHAJ CAI

10. ¿Shuj runaca paipaj ‘familiata alli pushaj’ cashcataca ima shinataj ricuchin?

¹⁰ Cusacuna, anciano cangapaj esforzaricushpaca cancunapaj familia shujtajcunapaj ñaupajpi alli ejemplo cachunmi ayudana canguichij. ‘Familiata alli pushajcunaca’ cꞌuyaj, responsable cashcatami ricuchina canguichij. Familiahuan tandalla Diosta adoranataca mana saquinachu canguichij. Paicuna tandanacuicunaman richun, huillanaman llujshichunmi ayudana canguichij. ¿Chaica imamantataj importante can? Apóstol Pabloca: “Shuj runa paipaj quiquin familiata mana pushanata yachashpaca, ¿ima shinataj Diospaj congregaciontacarin cuidangayari?” nircami (1 Timoteo 3:5).

11, 12. ¿Anciano casha nij huauquipaj huahuacunaca imamantataj alli comportarina can? (Fotomantapish parlapai).

¹¹ Anciano casha nij yayacuna, “cazuj huahuacunata, alli comportarij huahuacunatami” charina canguichij. Paicunataca cꞌuyaihuanmi yachachina canguichij. Huahuacunaca pugllanata, asinatami munancuna. Chashna cajpipish alli cazuj cachun, respetuoso cachun, alli comportarichunmi yachachina canguichij. Shinallataj Jehová Dioshuan alli amigo tucuchun, Bibliapi yachachishca shina causachun, Jehová Diosman mingarishpa bautizarichunpishmi ayudana canguichij.

¹² Anciano casha nij huauquipaj “huahuacunapish Jesusta catijcuna cachun, maipishcachun purij , mana cazujcunami can nishpa ama juchachishca cachun”. Bautizarishca huahua shuj jatun juchata rurajpica ancianocunami  chai huahuapaj yaya anciano shina o siervo ministerial shina congregacionpi sirvi tucushcata o mana sirvi tucushcata ricungacuna. Chai yaya paipaj huahuata mana yachachishca cajpi, mana disciplinashca cajpica mana anciano shina sirvi tucungachu (La Atalaya del 15 de octubre de 1996 revistapi, página 21, párrafos 6 y 7-ta ricui).

HUAUQUI PANICUNATA SIRVINGAPAJ LISTO CAI

13. ¿‘Intindij’, “mana rumi shungu” cashcataca ima shinataj ricuchi tucungui?

¹³ Congregacionpica sumaj cualidadcunata charij huauquicunaca valishcami can. ‘Intindij’ huauquica shujtajcuna ima nishcata uyashpami tucuicunahuan sumajta causan. Shinallataj shujtajcuna imata yuyashcata intindingapajmi esforzarin. Caipi yuyai. Can ancianocunahuan shuj tandanacuipi cashpaca Bibliapi ricushpachari shuj decisionta agllana canguichij. ¿Shujtaj ancianocunahuan mana de acuerdo cashpapish paicuna ima decidishcataca apoyanguimanchu? Can “mana rumi shungu” cashpaca can munashcata shujtajcuna rurachun obliganapaj randica paicuna ima nishcatami valichinguiman ¿nachu? (Génesis 13:​8, 9; Proverbios 15:22). ‘Mana shujtajcunahuan pꞌiñanacunachu’ cangui. Shujtajcunata sinchita rimanapaj randica cꞌuyaihuan, sumajtami parlana cangui. Shujtajcuna llaquichijpipish chaita allichingapajmi esforzarina cangui (Santiago 3:​17, 18). Cꞌuyaihuan parlajpica canta llaquichij gentecunapishmi tranquilo sintiringacuna (Jueces 8:​1-3; Proverbios 20:3; 25:15; Mateo 5:​23, 24).

14. a) ¿Imamantataj “Cristota cunanlla cati callarijca” mana anciano cai tucun? b) ¿Shuj huauquica “Diosta tucui shunguhuan” sirvij cashcataca ima shinataj ricuchina can?

¹⁴ ‘Cristota cunanlla cati callarij’ huauquica mana anciano cai tucunchu. Paica achca huatacunata mana bautizarishca cashpapish Jehová Dioshuan alli amigo tucungapajmi tiempota minishtin. Manaraj anciano cashpaca paica Jesús shina humilde cashcatami ricuchina can. Shinallataj shuj asignacionta Jehová Dios cungacamami pacienciahuan shuyana  can (Mateo 20:23; Filipenses 2:​5-8). Jehová Dios mandashca shina causashpa, paipaj organización ima nishcata catishpami “Diosta tucui shunguhuan sirvij” cashcata ricuchinga (1 Timoteo 4:15).

15. ¿Shuj ancianoca sumaj discursocunata mana cui tucushpapish imatataj rurana can?

¹⁵ Bibliapica ancianocuna “alli yachachij” cana cashcatami nin. Mana tucui ancianocunachu sumaj discursocunata cun. Chashnapish predicashpa, huauqui panicunata visitashpaca Bibliahuanmi sumajta animancuna (1 Corintios 12:​28, 29 y Efesios 4:​11-tapish ricui). Sumaj discursocunata mana cui tucushpapish alli yachachingapajmi esforzarishpa catina can.

16. ¿Alli yachachij cangapajca imatataj rurana cangui? (Fotomantapish parlapai).

¹⁶ ‘Diospaj mana llulla shimipi nishcatami catina cangui’. Alli yachachij cangapajca can ima nicushca Bibliamanta cashcatami ricuchina cangui. Chaipajca Bibliatapish, publicacioncunatapishmi alli estudiana cangui (Proverbios 15:28; 16:23). Bibliata estudiashpaca ñucanchij publicacioncunapi chai versocunamanta imata nishcatami intindina cangui. Chashnami chai versocunataca alli intindichi tucungui. Yachachicushpaca canta uyajcunapaj shunguman chayangapaj esforzari. Alli yachachij cangapajca experienciata charij ancianocunatami ayudachun mañana cangui (1 Timoteo 5:17). Ancianocunaca ‘alli yachaihuan shujtajcunata animajmi’ cana can. Shinapish maipica huauqui panicunatami ‘sinchita cunana’ can. Chaita rurana cashpapish paicunataca cꞌuyaihuanmi tratana can. Cꞌuyaihuan tratashpa, Diospaj Shimimanta yachachishpaca ñucanchij alli yachachij Jesuspaj ejemplota caticushcatami ricuchingui (Mateo 11:​28-30; 2 Timoteo 2:24).

ANCIANO CANGAPAJ ESFORZARISHPA CATI

17. a) ¿Siervo ministerialcunataca anciano cangapajca imataj ayudanga? b) ¿Ancianocunaca shujtaj huauquicunata nombrangapajca imatataj ricuna can? (“ ¿Shuj huauquita anciano cachun nombrangapajca imatataj ricuna can?” nishca recuadrotapish ricui).

¹⁷ Huaquin siervo ministerialcunaca anciano shinaca mana nunca sirvi tucushachu.  Chaipajca achca cualidadcunata charinami minishtirin nishpachari yuyancuna. Pero Jehová Diospish, paipaj organizacionpish tucuita alli pajtachichunca mana shuyanchu (1 Pedro 2:21). Cunan yachashca requisitocunata pajtachichunca Jehová Diospaj espiritullatajmi ayudanga (Filipenses 2:13). ¿Imapitaj mejoranata munangui? Shuj cualidadpi ashtahuan mejorasha nishpaca Jehová Dios canta ayudachunmi mañana cangui. Shinallataj chai cualidadmantami ashtahuan estudiana cangui. Shujtaj ancianocunatapish ayudachunmi mañana cangui.

18. ¿Tucui siervo ministerialcunaca imatataj rurana can?

¹⁸ Anciano canata munajcunapish, anciano shina sirvijcunapish tucuicunami cai yachaipi ricushca requisitocunata pajtachishpa catina canchij (Filipenses 3:16). ¿Canca siervo ministerialchu cangui? Anciano cangapaj esforzarishpa cati. Jehová Diostaca paita sirvingapaj, congregacionpi ayudangapaj imata rurana cashcata yachachichun mañai (Isaías 64:8). Jehová Diosca anciano cangapaj can esforzaricujta ricushpaca bendiciangami.