1. ¿Apóstol Pabloca siervo ministerialcunamantaca imatataj yuyarca?

 SIERVO ministerialcunaca congregación ucupica sinchitami trabajancuna. Apóstol Pabloca paicunataca achcatami valorarca. Paica Filipos llajtapi causaj Jesusta catijcunaman quillcashpaca ancianocunatapish, siervo ministerialcunatapishmi saludarca (Filipenses 1:1).

2. ¿Huauqui Luisca siervo ministerial shina sirvishpaca ima shinataj sintirin?

² Joven huauquicunapish, mayor huauquicunapish siervo ministerial shina sirvishpaca cushillami sintirincuna. Por ejemplo, huauqui Devantaca 18 huatacunata charijpimi siervo ministerial cachun nombrarcacuna. Cutin huauqui Luistaca 50 huatacuna yallita charijpimi siervo ministerial cachun nombrarcacuna. Huauqui Luisca: “Huauqui panicunaca ñucata cꞌuyashcatami ricuchishcacuna. Cunanca ñucapish paicunata sirvishpa cꞌuyaita ricuchishcamantami cushilla sintirini” nircami. Achca siervo ministerialcunami chashnallataj sintirincuna.

3. ¿Cai yachaipica ima tapuicunatataj ricushun?

³ Huauquicuna, ¿ña bautizarishca cashpaca siervo ministerial casha ninguichijchu? ¿Chai munaita charingapajca imatataj rurana canguichij? ¿Siervo ministerial cangapajca ima cualidadcunatataj ricuchina canguichij? Cai yachaipimi cai quimsa tapuicunata ricushun. Pero puntaca siervo ministerialcuna imata ruraj cashcata ricushun.

¿SIERVO MINISTERIALCUNACA CONGREGACIONPICA IMATATAJ RURANCUNA?

4. ¿Siervo ministerialcunaca imallatataj rurancuna? (Fotomantapish parlapai).

⁴ Siervo ministerialcunataca espíritu santopaj ayudahuanmi agllancuna. Paicunaca congregacionpimi ancianocunata ayudancuna. Maijan siervo ministerialcunaca huillangapaj territorio  tiyachun, publicacioncuna tiyachunmi ricuncuna. Shujtajcunaca Tandanacuna Huasita pꞌichashpa, allichishpami ayudancuna. Cutin shujtaj siervo ministerialcunaca audio y videopimi ayudancuna. Tucui chaicunata rurashpapish cai huauquicunaca ashtahuantajca Jehová Diostami cꞌuyancuna. Pai cushca leycunatapish cazushpami causancuna. Shinallataj huauqui panicunatami achcata cꞌuyancuna (Mateo 22:​37-39). ¿Shuj bautizarishca huauquica imamantataj siervo ministerial cangapaj esforzarina can?

5. ¿Siervo ministerial casha nishpaca imatataj rurana cangui?

⁵ Bibliapica siervo ministerial cangapaj ima requisitocunata pajtachina cashcatami huillan (1 Timoteo 3:​8-10, 12, 13). Siervo ministerial casha nishpaca chai requisitocunatami Bibliapi estudiana cangui. Causaipipishmi pajtachina cangui. Pero imamanta siervo ministerial casha nishcatami alli yuyarinaraj cangui.

¿IMAMANTATAJ SIERVO MINISTERIAL CASHA NINGUI?

6. ¿Imamantataj huauqui panicunata sirvisha ningui? (Mateo 20:28; fotomantapish parlapai).

⁶ Jesucristoca paipaj yayatapish, gentecunatapishmi achcata cꞌuyarca. Chaimantami humilde trabajocunata rurashpa shujtajcunata sirvirca (Mateo 20:​28-ta liyipai; Juan 13:​5, 14, 15). Canpish Jehová Diosta, shujtajcunata cꞌuyashcamanta siervo ministerial shina sirvisha nijpica chai metata pajtachichunmi Diosllataj ayudanga (1 Corintios 16:14; 1 Pedro 5:5).

7. ¿Siervo ministerial casha nijcunaca imamantataj mana jatun tucushcacuna cana can?

⁷ Maijancunaca importante tucushca gentecunatami alli tratancuna. Pero Jehová Diospaj pueblopica mana chaita ruranchijchu. Por ejemplo, Jesús shina shujtajcunata cꞌuyaj huauquica mana shujtajcunata yalli cashcatachu yuyan. Importante cashcata yuyaj huauquita congregacionpi shujtajcunata sirvichun nombrajpica paica jatun tucushca cashcamantami humilde trabajocunataca mana rurasha ninga (Juan 10:12). Jehová Diosca chashna jatun tucushcacunataca mana bendicianchu (1 Corintios 10:​24, 33; 13:​4, 5).

8. ¿Jesusca paipaj apostolcunamanca ima consejotataj curca?

⁸ Jesuspaj alli amigocunapishmi maipica importante puestocunata charinata yuyarcacuna. Por ejemplo, Santiagohuan, Juanhuan ima tucushcata ricushun. Paicunaca Jesustaca  paipaj Gobiernopi alli puestocunata cuchunmi mañarca. Pero Jesusca chaita rurana mana alli cashcatami paicunamanca yachachirca. Chaimantami 12 apostolcunamanca: “Maijanpish cancunapuramanta jatun casha nishpaca shujtajcunatami sirvina canguichij. Shinallataj maijanpish cancunapuramanta puntapi casha nishpaca tucuicunata sirvij runa shinami cana canguichij” nircami (Marcos 10:​35-37, 43, 44). Huauqui panicunata cꞌuyashcamanta sirvisha nij huauquicunaca congregacionpica shuj bendicionmi can (1 Tesalonicenses 2:8).

¿SHUJTAJCUNATA SIRVINA MUNAITA CHARINGAPAJCA IMATATAJ RURANA CANGUI?

9. ¿Siervo ministerial shina sirvina munaita charingapajca imatataj rurana cangui?

⁹ Canca Jehová Diostami cꞌuyangui. Shinallataj shujtajcunatapishmi sirvinata munangui. Chashna sirvinata munashpapish maipica siervo ministerialcunapaj trabajo shinata ruranataca manachari munangui. ¿Shujtajcunata sirvina munaita charingapajca imatataj rurana cangui? Huauqui panicunata sirvishpa cushilla cai tucushcatami yuyarina cangui. Jesusca: “Cujmi chasquijtapish yalli cushicun” nircami (Hechos 20:35). Jesusca cai versopi nishca shinami rurashpa causarca. Paica shujtajcunata sirvishpami cushilla sintirirca. Canpishmi chashnallataj rurai tucungui.

10. ¿Jesusca shujtajcunata sirvina munaita charishcataca ima shinataj ricuchirca? (Marcos 6:​31-34).

¹⁰ Shujtajcunata sirvishpa Jesús cushilla cashcatami yuyarina canchij (Marcos 6:​31-34-ta liyipai). Shuj punllaca Jesuspish, paipaj apostolcunapish shaicushcami carcacuna. Chaimantami paicunaca ashata samaringapaj shuj chulunlla pushtuman rircacuna. Pero paicuna manaraj chayajpimi achca gentecunaca Jesús paicunaman yachachichun chaiman chayarcacuna. Jesusca: “Ñucapish, ñuca amigocunapish micungapajllapish tiempota mana charishcanchijchu” nishpami gentecunata tigrachishpa cachanman carca. Mana cashpaca Diosmanta ashata yachachishpami tigrachishpa cachanman carca. Pero paica gentecunata cꞌuyashcamantami chishicama achca yachaicunata yachachirca. Jesusca mana yachachina cashcallamantachu yachachirca. Ashtahuanpish paicunata llaquishcamantami yachachirca (Marcos 6:35). Jesusca shujtajcunata sirvishpami yallitaj cushilla sintirij carca.

11. ¿Jesusca ima shinataj shujtajcunata sirvirca? (Fotomantapish parlapai).

¹¹ Jesusca Diosmanta yachachishpami gentecunata ayudarca. Shinapish shujtaj ruraicunata rurashpapishmi ayudarca. Jesusca milagrocunata rurashpami gentecunaman cararca. Shinallataj paita catijcuna chai micunata gentecunaman carachunpishmi mañarca (Marcos 6:41). Chashna rurashpami Jesusca paita catijcunamanca shujtajcunata sirvina importante cashcata yachachirca. Gentecunaca ‘huijsa pajtata micushpa cushillami sintirircacuna’ (Marcos 6:42). Chaimantami Jesusta catijcunaca Jesushuan igual trabajashcamanta cushilla sintirircacuna. Jesusca mana chai cutinllachu gentecunamanta sustarishcata ricuchirca. Ashtahuanpish paipaj tucui causaipimi gentecunataca sirvirca (Mateo 4:23; 8:16). Jesusca shujtajcunaman yachachishpa, paicuna imalla minishtishcacunata cushpaca cushillami sintirirca. Canpish siervo ministerial shina shujtajcunata sirvishpaca cushillami sintiringui.

12. ¿Congregacionpi mana ayudai tucushcataca imamantataj mana yuyana cangui?

¹² Can imata mana tanto ruranata yachashpaca mana yallitaj sustarinachu cangui. Canca alli cualidadcunata charishcamantami congregacionpica  achcata ayudai tucungui. Chaimantami Diosta mañashpa 1 Corintios 12:​12-30-pi ima nishcata liyi tucungui. Apóstol Pablo nishca shinaca canpish shujtaj huauqui panicuna shinallatajmi congregacionpi ayudangapajca valishca cangui. Tal vez canca siervo ministerial shina sirvingapajca huaquin cualidadcunata charinatachari minishtingui. Chaimantachari canca manaraj siervo ministerial cangui. Shinapish Jehová Diosta sirvishpa catingapaj, huauqui panicunata ayudashpa catingapaj esforzari. Quiquin chashna esforzaricujta ricushpaca ancianocunaca can rurai tucushca trabajota rurachunmi minganga (Romanos 12:​4-8).

13. ¿Siervo ministerialcuna charishca cualidadcunata pajtachinaca imamantataj mana sinchi can?

¹³ Siervo ministerial casha nijcunaca huaquin cualidadcunata charingapajmi esforzarina can. Pero cai cualidadcunata charingapajca tucuicunami esforzarinchij. Por ejemplo, tucuicunami Jehová Diospajman cꞌuchuyangapaj esforzarinchij. Shujtajcunata ayudashpami cushilla sintirinchij. Shinallataj ñucanchij causaihuanmi Diosta alli sirvijcuna cashcatapish ricuchinchij. Canpish siervo ministerial cangapaj ñachari achca cualidadcunata charingui. Shinapish ¿imatataj ashtahuan rurashpa catina cangui?

¿SIERVO MINISTERIAL CANGAPAJCA IMALLATATAJ RURANA CANGUI?

14. ¿‘Pajtachij’ canaca imatataj nisha nin? (1 Timoteo 3:​8-10, 12).

¹⁴ Cunanca 1 Timoteo 3:​8-10, 12-pi ima nishcata ricushun (chai versocunata liyipai). Shuj siervo ministerialca ‘alli pajtachijmi’ cana can. Chaitaca “shujtajcuna respetachun alli comportarij”, “serio”, “responsable” nishpapishmi traducishcacuna. Chaica siervo ministerialcuna mana nunca asij, mana cushicuj cashcataca mana nisha ninchu (Eclesiastés 3:​1, 4). Ashtahuanpish tucui imata mingashcata pajtachij cashcatami nisha nin. Canman mingashcata alli pajtachijta ricushpaca huauqui panicunaca canpimi confiangacuna. Cantaca achcatami respetangacuna.

15. a) ¿‘Caita chaita nishpa mana parlanaca’ imatataj nisha nin? b) ¿‘Mana allita rurashpa imata japina munaita mana charinaca’ imatataj nisha nin?

¹⁵ ‘Caita chaita nishpa mana parlajchu’ cana cangui. Chaica shungumanta parlaj, mana llullaj, confiaipajlla cana cashcatami nisha nin. Shinallataj ima nishcata pajtachij,  shujtajcunata mana pandachij cashcatami nisha nin (Proverbios 3:32). ‘Mana allita rurashpa imata japina munaita mana charijchu’ cana cangui. Caica negociocunapi trampata mana rurana cashcatami ricuchin. Shinallataj cullquita alli utilizaj cashcatami ricuchin. Canca cullquita ganana raiculla mana huauqui panicunata umashpa imatapish ruranachu cangui.

16. a) ¿Siervo ministerial casha nishpaca tragota ubyanamantaca imatataj yuyana cangui? b) ¿‘Chuya shungu’ canaca imatataj nisha nin?

¹⁶ ‘Vinotapish mana yalli ubyajmi’ cana cangui. Canca tragota yalli munaj, yallitaj ubyaj cashca shinaca mana rijsishcachu cana cangui. ‘Chuya shunguta’ o limpio concienciatami charina cangui. Tucuicunami Jehová Diospaj mandashcacunata cazushpa causana canchij. Canca juchayuj cashpapish Jehová Dioshuan alli apanacushpaca tranquilomi sintiringui.

17. ¿Shuj huauquica ima shinataj paiman mingashca ‘trabajota alli pajtachij’ cashcata ricuchi tucun? (1 Timoteo 3:10; fotomantapish parlapai).

¹⁷ ‘Shuj trabajota alli pajtachi tucushcata’ ricuchi. Ancianocunaca cambaj responsabilidadcunata alli pajtachijta ricushpami canpi confiangacuna. Chaimantami paicuna imata rurachun mingajpica alli pajtachina cangui. Chaipajca Diospaj organización cushca instruccioncunatami catina cangui. Shinallataj canman mingashca trabajota ima shina ruranata, ima horas tucuchinatami alli intindina cangui. Canman mingashca trabajota alli pajtachijta ricushpaca huauqui panicunaca responsable huauqui tucucujtami ricungacuna. Ancianocuna, cancunapish bautizarishca huauquicunataca yachachingapajmi atentos cana canguichij (1 Timoteo 3:​10-ta liyipai). ¿Cancunapaj congregacionpica jovencito huauquicuna tiyanchu? ¿Paicunaca Bibliamanta alli yachajcunachu can? ¿Tandanacuicunapipish comentancunachu? ¿Huillanamanpish llujshincunachu? Chashna cajpica paicunapaj edadta ricushpami paicuna rurai tucushca trabajota mingai tucunguichij. Chashnami cai huauquicunaca paicunaman mingashca ‘trabajota alli pajtachij’ cashcata ricuchingacuna. Qꞌuipaca ña siervo ministerialmi cai tucungacuna.

18. ¿‘Mana juchachipaj cashcataca’ ima shinataj ricuchingui?

¹⁸ ‘Mana juchachipaj cashcata’ ricuchi. Cantaca ima mana allita rurashcamantaca pi mana juchachinachu can. Pero Jesusta catijcunataca maipica yangamantami juchachincuna.  Jesustapish yangamantami juchachircacuna. Paica paita catijcunapish chashnallataj juchachishca cana cashcatami nirca (Juan 15:20). Shinapish can Jesús shina cambaj causaipi tucuita alli rurajpica huauqui panicunaca cantaca achcatami respetangacuna (Mateo 11:19).

19. ¿Bibliapica imamantataj cꞌaricunataca ‘shujlla huarmipaj cusami cana can’ nin?

¹⁹ ‘Shujlla huarmipaj cusami’ cana cangui. Jehová Diosmi matrimoniotaca callarichirca. Paica shuj cꞌari, shuj huarmi cazarana cashcatami nirca. Chaitami Diosta sirvijcunaca cazunchij (Mateo 19:​3-9). Cazarashca cꞌarica mana nunca huainayanachu can (Hebreos 13:4). Shinallataj paipaj huarmitaca achcatami cꞌuyana can. Mana alli munaihuanca shujtaj huarmicunataca mana ricunachu can (Job 31:1).

20. ¿Shuj cusaca ima shinataj familiata alli pushaj cashcata ricuchin?

²⁰ ‘Cambaj huahuacunatapish, cambaj familiatapish alli pushajmi cana cangui’. Familiata pushaj cashpaca cambaj familiata allimi cuidana cangui. Chaipajca cambaj familiahuanmi Diosta adorana tandanacuita siempre charina cangui. Cambaj huarmihuan, cambaj huahuacunahuanmi siempre huillanaman llujshina cangui. Shinallataj cambaj huahuacunataca Jehová Dioshuan alli amigo tucuchunmi ayudana cangui (Efesios 6:4). Shuj cusa paipaj familiata alli cuidanata yachashpaca huauqui panicunatapish allimi cuidanga (1 Timoteo 3:​5-tapish ricui).

21. ¿Manaraj siervo ministerial cashpaca imatataj rurana cangui?

²¹ Huauquicuna, manaraj siervo ministerial cashpaca siervo ministerial cangapaj ima requisitocuna minishtirishcata estudiai. Chaita pajtachingapajpish esforzari. Jehová Diostapish, huauqui panicunatapish ashtahuan cꞌuyai. Shinallataj imamanta siervo ministerial casha nishcata yuyai (1 Pedro 4:​8, 10). Siervo ministerial cangapaj esforzarishpaca huauqui panicunata sirvishpami achcata cushicungui. Jehová Diosmi siervo ministerial shina sirvichunca canta ayudanga (Filipenses 2:13).