CAIPI yuyashun. Shuj científico runaca shuj maquinapi ricushpami jatun acapana shamucujta cuenta japin. Chaimantami gentecuna quishpirichun chai acapana shamucujta utca huillan.

Cai científico runa shinallatajmi Jehová Diosca jatun llaqui punlla shamucujta huillacun. ¿Ima shinataj huillacun? ¿Gentecuna cambiachunca Jehová Diosca minishtirishca tiempotachu cucun? Caita yachangapajca ñaupa punllacunapi gentecunata Jehová Dios ima shina advertishcata ricushun.

Ñaupa punllacunapica Jehová Diosca paita mana cazujcunata castigana cashcatami achca cutin huillarca (Proverbios 10:25; Jeremías 30:23). Pero manaraj castigashpami gentecuna cambiachun tiempota curca (2 Reyes 17:12-15; Nehemías 9:29, 30). Yaya Diosca gentecuna cambiachunca paita sirvijcunatami ayudachun cacharca. Diosta sirvijcunaca millaicunata Jehová Dios imata ruranatami huillarcacuna. Shinallataj Diosta utca cazuna cashcatami huillarcacuna (Amós 3:7).

Noepaj tiempopi yuyashun. Chai punllacunapica Noé runami Diosta alli sirvij carca. Paica millai gentecunataca Yayitu Diosca yacu juilluhuanmi tucuchigrin nishpami achca huatacunata mana manchashpa huillarca (Génesis 6:9-13, 17). Quishpiringapaj imata rurana cashcatapishmi huillarca. Noeca predicangapajmi achca empeñota churarca. Chaimantami paitaca “cashcata rurashpa causanata huillaj” nishpa rijsircacuna (2 Pedro 2:5).

Noeca huillashpami catirca. Chashna jahuapish gentecunaca Diospi mana crircacunachu. Chaimantami yacu juillu shamujpica tucuicuna chingarircacuna (Mateo 24:39; Hebreos 11:7). Gentecunaca Diosca ñucanchijmanca mana huillashcachu nishpaca mana ni tucurcacunachu.

Maipica Jehová Diosca mana allicunata castigangapajca ashalla faltajpimi huillarca. Pero gentecunaca cazungapajmi tiempota charirca. Por ejemplo, Yaya Diosca Egipto llajtapimi llashaj runduta tamyachigrini nircami. Pero shuj punlla faltajpirajmi Faraonta, paita sirvijcunatapish advertichun Moisesta, Aaronta cacharca. ¿Caya punlla llashaj rundu tamyanata yachashpaca Egiptopi causajcunaca maipi miticungapaj tiempota charircacunachu? Bibliapica: “Faraonpajta rurajcunaca Mandaj Dios rimashcata maijanlla manchajcunaca paicunapajta rurajcunatapish, animalcunatapishmi huasicunaman yaicuchircacuna. Ashtahuanpish Mandaj Dios rimashcata paicunapaj shungupi mana crijcunaca paicunapajta rurajcunatapish, animalcunatapish canllaman saquircallacunami” ninmi (Éxodo 9:18-21). Caipi ricushca shinaca Jehová Diosca rundumanta miticuchunmi tiempota curca. Chaimantami Diosta cazuj gentecunaca quishpirircacuna.

Shinallataj Yaya Diosca manaraj chunga cutin llaquichishpami faraontapish paita sirvijcunatapish advertirca. Pero paicunaca mana cazurcacunachu (Éxodo 4:22, 23). Chaimantami paicunapaj punta huahuacunaca  huañurcacuna. ¡Chaita ricunaca llaqui atrazomi cashcanga! (Éxodo 11:4-10; 12:29). ¿Diosta cazungapajca tiempota charircacunachu? Ari. ¿Imamantataj chashna ninchij? Moisesca israelitacunamanca paicunapaj familiata ima shina quishpichinatami ña huillarca (Éxodo 12:21-28). ¿Mashnacunataj cazurcacuna? Tres millones yalli gentecunami Diosta cazushpa Egiptomanta llujshircacuna. Cai gentecunapurapica mana israelitacunapish, Egiptopi causajcunapishmi carca (Éxodo 12:38).

Cai ejemplocunapi ricushca shinaca gentecuna quishpirichunmi Yayitu Diosca minishtirishca tiempota curca (Deuteronomio 32:4). ¿Imamantataj minishtirishca tiempota curca? Apóstol Pedroca: ‘Jehová Diosca shujllapish ama chingarichun nishpa tucuicuna mana allita ruracushcata saquishpa cutirichunmi munan’ nircami (2 Pedro 3:9). Diosca gentecunamantami preocuparirca. Chaimantami manaraj castigajpi gentecuna arrepintirishpa cazuchun munarca (Isaías 48:17, 18; Romanos 2:4).

Cunan punllacunapish tucui gentecunami Jesús ima nishcata uyana can. Jesús cai Allpapi cashpaca jatun llaqui punllapimi millaicunaca tucuringa nircami (Mateo 24:21). Shinallataj manaraj jatun llaqui punlla shamujpimi Jesusca paita catijcunamanca ima tucunata huillarca. Pai ima nishcacunaca cunan punllacunapimi pajtaricun (Mateo 24:3-12; Lucas 21:10-13).

Chaimantami Yaya Diosca pai advertishcacunata gentecuna cazuchun munan. Shinallataj shamuj punllapi paraíso Allpapi sumaj bendicioncunata chasquichunmi munan (Sofonías 1:14, 15; 2:2, 3; 2 Pedro 3:13). Dios cugrij bendicioncunapi cringapajca pai cushca alli huillaicunatami uyana, cazuna canchij. Chashnami jatun llaqui punllapica quishpirishun. Jesusca: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga” nircami (Mateo 24:14). Diosca paita sirvijcunataca 240 yalli llajtacunapi huillachunmi ayudashca.

Ima shinami ricushcanchij, gentecuna cambiachunca Jehová Diosca minishtirishca tiempotami cun. Pero gentecunaca quishpiringapajca tiempo tiyajpirajmi cambiana can. Diosta sirvijcunapish la mayoría gentecuna quishpirichunmi ayudana canchij.