YACHAI 41
Jatun llaqui punllapi Diosta sirvishunchij
“Mandaj Diospajlla cajcuna, tucuicuna paita cꞌuyaichij” (SALMO 31:23).
CANTO 129 Llaquicunata ahuantashpa catishunchij
CAITAMI YACHASHUN *
1, 2. a) ¿Gobiernocunaca imatataj ñalla ningacuna? b) ¿Ima tapuicunatataj yachashun?
ÑALLAMI gobiernocunaca “sumajtami causacunchij” ningacuna. Chashna nishpami tucui Allpapi ima problemacunapish ña tucurishcata crichisha ningacuna. Pero paicunaca Dios imata rurasha nishcataca mana jarcai tucungacunachu. Bibliapi nishca shinaca gobiernocuna sumajtami causacunchij nincami jatun llaqui punllaca chai rato callaringa. Chai punllacunapica millaicunaca mana miticui tucungacunachu (1 Tesalonicenses 5:3).
2 ¿Jatun llaqui punllapica imashi tucunga? ¿Chai tiempopica Jehová Diosca paita sirvijcuna imata rurachuntaj shuyanga? ¿Diosmanta ama caruyangapajca imatataj cunanmanta rurana canchij? (Mateo 24:21). Cai tapuicunamantami yachashun.
¿JATUN LLAQUI PUNLLAPICA IMASHI TUCUNGA?
3. Apocalipsis 17:5, 15 al 18-pi nishca shinaca ¿Diosca ima shinataj tucui panda religioncunata tucuchinga?
3 (Apocalipsis 17:5, 15-18-ta liyipai). Apocalipsis 17:16-pi parlashca pucanicuj jatun animalca Organización de las Naciones Unidastami ricuchin. Chai pucanicuj jatun animalpaj chunga gachuca chai organizacionta apoyacuj gobiernocunatami ricuchin (Apocalipsis 17:3, 11-13; 18:8). Jehová Diosca chai gobiernocuna tucui panda religioncunata * tucuchichunmi yuyaita cunga. Chaimantami gobiernocunaca tucui panda religioncunata llaquichi callaringa. Chashnami Dios cushca yuyaita pajtachingacuna. Chaipimi jatun llaqui punllaca callaringa. Ñapish tucui panda religioncuna tucuchishcata yachashpaca gentecunaca mancharishcami saquiringacuna.
4. a) ¿Gobiernocunaca tal vez imata nishpataj panda religioncunata tucuchingacuna? b) ¿Panda religioncunata catijcunaca tal vez imatataj rurangacuna?
4 Gobiernocuna imata nishpa panda religioncunata tucuchinataca mana yachanchijchu. Quizás cai religioncunaca sumaj causaita charichunca mana saquincunachu. Cada ratomi politicapi yaicuncuna ningacunachari. Mana cashpaca achca cullquita, huasicunata, allpacunatami charin ningacunachari (Apocalipsis 18:3, 7). Ashtahuancarin gobiernocuna tucui panda religioncunata tucuchinga nishpaca mana chai tucui religioncunata catijcunata tucuchinatachu ricuchin. Ashtahuanpish cai Allpapi ña ni shuj panda religión tiyanatami ricuchin. Chaimi gentecunaca paicunapaj religioncunata pushajcuna mana imata rurai tucushcata cuenta japingacuna. Chaimantachari paicunaca chai religioncunamanta caruyangacuna.
5. ¿Jehová Diosca imatataj ruranga?
5 Bibliapica gobiernocuna mashna tiempopi tucui panda religioncunata tucuchinataca mana huillanchu. Pero ashalla tiempopi tucuchinataca allimi yachanchij (Apocalipsis 18:10, 21). Jehová Diosca agllashcacunapish, alli religionpish quishpirichunmi jatun llaqui punllataca utca tucuchinga (Marcos 13:19, 20). ¿Jatun llaqui punlla callarijpi, Armagedón macanacuipipish Jehová Diosca ñucanchijcuna imata rurachuntaj shuyanga?
JEHOVÁ DIOSTA SIRVISHPA CATISHUNCHIJ
6. ¿Jehová Diosca paita sirvijcunataca imata rurachuntaj mandan?
6 Pasaj yachaipi ricushca shinaca Jehová Diosca panda religioncunamanta caruyachunmi mandan. Pero mana chaillatachu rurana canchij. Jehová Diostaca tucui shunguhuanmi sirvina canchij. Caita rurangapaj ishqui yuyaicunata ricushun.
Sinchi punllacuna cajpipish tandanacunataca amataj saquishunchij. (Párrafo 7-ta ricui). *
7. a) ¿Diospaj mandashcacunata cazushcataca ima shinataj ricuchinchij? b) Hebreos 10:24, 25-pi nishca shinaca ¿imamantataj siempre tandanacuna canchij?
7 Puntapica, Diospaj mandashcacunatami cazuna canchij. Cai mundopi causajcunaca mapa ruraicunapimi ocuparincuna. Paicunaca cꞌaricunapura, huarmicunapurami cazarashpa causancuna. Pero Diosta sirvijcunaca cai laya mapa ruraicunataca manataj ricunayachinachu canchij (Mateo 19:4, 5; Romanos 1:26, 27). Ishquipica, huauqui panicunahuanmi Jehová Diosllata adorashpa catina canchij. Tandanacuna huasipi, huauqui panicunapaj huasipi, mana cashpaca pacalla lugarcunapimi Diosta adoranchij. Jehovapaj punlla chayamucushcamantami maipi cashpapish siempre tandanacuna canchij (Hebreos 10:24, 25-ta liyipai). *
8. ¿Jatun llaqui punllapica tal vez imatataj huillashun?
8 Cien huatacuna yallitami alli huillaicunata predicashpa gentecuna Jesusta catichun ayudacushcanchij. ¿Pero jatun llaqui punllapica cunan punllacunapi huillacuj shinallatajchu huillashun? Jatun llaqui punllapica alli huillaicunataca ña mana huillashunchu. Ashtahuancarin Diablopaj ruraicuna, millai gentecunapish ñalla tucurina cashcatachari mana manchashpa huillashun. Bibliapica cai huillaicunaca jatun rundu gentecunapi urmacuj shinami canga ninmi (Apocalipsis 16:21). Tiempohuanmi imata huillana cashcata, ima shina huillana cashcatapish alli yachashun (Ezequiel 2:3-5).
9. a) ¿Llaquichij huillaita huillai callarijpica gobiernocunaca imatataj rurasha ningacuna? b) ¿Imatataj tucui shunguhuan crinchij?
9 Llaquichij huillaita huillai callarijpica gobiernocunaca ama huillachunmi jarcasha ningacuna. Pero ima shinami cunan punllacunapi Jehová Diosca predicacionpi ayudan, chashnallatajmi chai punllacunapipish ayudanga. Chaitami tucui shunguhuan crinchij (Miqueas 3:8).
JEHOVAPAJ PUEBLOTA LLAQUISHA NIJPI ALLICHIRISHCA CASHUNCHIJ
10. Lucas 21:25 al 28-pi nishca shinaca ¿jatun llaqui punlla chayamujpica gentecunaca ima shinataj sintiringacuna?
10 (Lucas 21:25-28-ta liyipai). Cunan punllacunapica gentecunaca gobiernocunapi, negociocunapimi confiancuna. Chaimantami jatun llaqui punllacunapi gobiernocuna, negociocuna, cai mundopi tiyaj tucui cosascuna tucuricushcata ricushpaca gentecunaca achcata mancharingacuna. Paicunapaj causaihuan ima tucunatapishmi manchangacuna (Sofonías 1:14, 15). Chai punllacunapica Diosta sirvijcunapajpish causaica sinchimi canga. Cai mundopaj ruraicunapi mana chagrurishcamantachari minishtirishca cosascunata mana charishun.
11. a) ¿Diablopish gobiernocunapish imamantataj Diosta sirvijcunata llaquichisha ningacuna? b) ¿Jatun llaqui punllataca imamantataj mana manchana canchij?
11 Gentecunaca paicunapaj religión chingarishca qꞌuipa testigo de Jehovacunalla Diosta adorashpa caticushcatami ricungacuna. Chaimantami paicunaca achcata pꞌiñarishpa tucui ladocunapi, internetpipish alborotota rurangacuna. Gobiernocuna, Diablopish testigo de Jehovacunalla saquirijta ricushpami pꞌiñaringacuna. Chaimantami Mandaj Gogca * Diosta sirvijcunata llaquichisha ninga (Ezequiel 38: 2, 14-16). Diosta sirvijcunaca chai punllacunapi imalla tucunata mana alli yachashcamantami maipica ashata preocuparinchij. Shinapish jatun llaqui punlla chayamunataca mana manchanachu canchij. Jehová Diosmi ñucanchij quishpirichunca imata ruranata huillanga (Salmo 34:19). Ashtahuancarin jatun llaqui punllapica quishpirina punlla cꞌuchuyamucushcamantami cushilla sintirishun. *
12. ¿“Alli cazuj alli yuyaiyuj” sirvij huauquicunaca jatun llaqui punllapajca ima shinataj ñucanchijta ayudacushcacuna?
12 Jatun llaqui punllapi Diosmanta ama caruyachunmi “alli cazuj alli yuyaiyuj” sirvij huauquicunaca ñucanchijta ayudashpa catincuna (Mateo 24:45, QC, 1989). Cai huauquicunaca tucui layami ayudashcacuna. Por ejemplo, 2016 huatamanta 2018 huatacamaca sumaj jatun tandanacuicunami tiyarca. Chai tandanacuicunapica Jehová Diospaj punlla cꞌuchuyamucushcamanta Diosta sirvishpa catingapaj imata rurana cashcatami yachachircacuna. Chai tandanacuicunapi imallata yachashcata yuyarishunchij.
¿CUNANMANTACA IMATATAJ RURANA CANCHIJ?
Jatun llaqui punllapi quishpiringapajca cunanmanta allichirishunchij. (Párrafos 13 al 16-ta ricui). *
13. a) ¿Jehová Diosmanta ama caruyangapajca imatataj rurana canchij? b) ¿Imamantataj chaitaca cunanmanta rurana canchij?
13 Diosmanta amataj caruyashunchij. 2016-pica “Jehová Diosmanta amataj caruyashunchijchu” nishca jatun tandanacuitami charircanchij. Chai tandanacuipica Jehová Diospaj amigo cashpallami paimanta mana caruyashun. Shinallataj Diosta mañashpa, paipaj Shimita punllanta estudiashpami Yaya Diospajman cꞌuchuyashun nishpami yachachirca. Caicunata pajtachishpami ima llaquicuna ricurijpipish ñaupajman catishun. Diablopaj ruraicunaca ñallami tucuringa. Chai punlla ña cꞌuchuyamucushcamantami llaquicunapish ashtahuan miraringa. Shinallataj politicapi mana chagrurishcamantami gentecunaca ñucanchijmanta burlaringacuna (2 Pedro 3:3, 4). Chaimantami cunanmanta Diosta cazushcata, paipaj gobiernota apoyashcata ricuchina canchij. Chashnami Diosmanta manataj caruyashun.
14. a) ¿Cai Allpapi pushaj huauquicunahuanca ima cambiotaj tiyanga? b) ¿Imamantataj cai huauquicunata cazuna canchij?
14 Jatun llaqui punllapica cai Allpapi pushaj huauquicunahuanmi shuj cambio tiyanga. Cai Allpapi saquirij tucui agllashcacunami jahua cieloman rishpa Armagedonpi macanacungacuna (Mateo 24:31; Apocalipsis 2:26, 27). Agllashcacuna jahua cieloman rijpica Cuerpo Gobernanteca cai Allpapica ña mana tiyangachu. Paicuna ña mana caipi cajpipish shujtaj ovejacunamanta huaquin huauquicunami Diospaj pueblota ñaupajman pushangacuna. Chaimi Diospaj puebloca organizado catinga. Ñucanchijca cai huauquicuna ima nishcatami cazuna canchij. Chaita rurashpallami jatun llaqui punllapica quishpirishun.
15. a) ¿Llaquicunata ahuantangapajca imatataj rurana canchij? b) ¿Llaquicunataca imamantataj cunamanta ahuantana canchij?
15 Ama shaicushpa Diosta sirvishunchij. 2017-pica “¡Ama shaicuichu!” nishca jatun tandanacuitami charircanchij. Chai tandanacuipica alli causaita charishpalla ahuantana cashcataca mana yachachircachu. Ashtahuanpish ima llaquicunata ahuantangapajca Diospi confiana cashcatami yachachirca (Romanos 12:12). Jesús nishcatapish amataj cungarishunchijchu. Paica: ‘Tucuringacama ahuantajmi quishpiringa’ nircami (Mateo 24:13). Jesús chashna nishpaca ima llaquicuna ricurijpipish Diosta sirvishpa catinatami nisha nicurca. Cunan punllacunapi llaquicunata ahuantashpaca jatun llaqui punllapipishmi ahuantashun.
16. a) ¿Ama manchaj cangapajca imatataj rurana canchij? b) ¿Cunanmanta Diospi confiangapajca imatataj rurana canchij?
16 Ama manchashpa Diosta sirvishunchij. 2018-pica “¡Ama manchaichu!” nishca jatun tandanacuitami charircanchij. Chai tandanacuipica ama manchangapaj Jehová Diospi confiana cashcatami yachachirca. Jatun llaqui punllapi gobiernocuna ñucanchijta llaquichisha nijpica mana manchaj canami minishtiringa. Yaya Diospipish confianami minishtiringa (Salmo 112:7, 8; Hebreos 13:6). Diospi cunanmanta confiangapajca Bibliatami punllanta liyina canchij. Shinallataj ñaupa punllacunapi Yaya Dios paita sirvijcunata ima shina quishpichishcatami yuyarina canchij (Salmo 68:20; 2 Pedro 2:9). Chashnami Mandaj Gog llaquichisha nijpica mana manchashun. *
QUISHPICHICHUN SHUYASHUNCHIJ
Ñallami Jesuspish angelcunapish Armagedón macanacuipi contracunata tucuchingacuna. (Párrafo 17-ta ricui).
17. ¿Armagedón macanacuitaca imamantataj mana manchana canchij? Página 1-pi tiyaj fotota ricui.
17 Pasaj yachaipi ricushca shinaca, ñucanchijca tucuri punllacunapimi causacunchij. Pero jatun llaqui punllapi quishpirinatami shuyacunchij. Armagedón macanacuipimi cai shina causaica tucuringa. Shinapish Armagedón macanacuitaca mana manchanachu canchij (Proverbios 1:33; Ezequiel 38:18-20; Zacarías 14:3). ¿Imamantataj mana manchana canchij? Jehová Diosca Diablohuan, demoniocunahuan, cai Allpapi tiyaj soldadocunahuan macanacuchunmi Jesusta, ungidocunata, huaranga huaranga angelcunatapish cachanga. Chashnami Diosca contracunata mishanga (Daniel 12:1; Apocalipsis 6:2; 17:14).
18. a) Isaías 54:17-pica ¿Jehová Diosca imatataj nin? b) Apocalipsis 7:9, 13 al 17-pi nishca shinaca ¿imamantataj shamuj punllacunapi quishpirinata crina canchij?
18 Isaías 54:17-pica Diosca: “Canta tucuchingapaj ashtahuan ima macanacunacunata rurajpipish, cantaca chaicunaca imata mana rurai tucungachu” ninmi. “Paillapi shunguta churajcunataca Mandaj Diosmi huaquichin” (Salmo 31:23). Chaimantami “yallitaj achcacunaca” jatun llaqui punllamanta quishpirishun. Shinallataj Diosta sirvishpami catishun (Apocalipsis 7:9, 13-17-ta liyipai). Jehová Diosta cꞌuyajcunaca paipaj shutita jatunyachijpica cushillami sintirishun (Ezequiel 38:23).
19. ¿Ima shina causaitaj ñalla tiyanga?
19 2 Timoteo 3:2 al 5-pi millai gentecunamanta parlanapaj randica, alli gentecunamanta parlacushcapi yuyai (“ ¿Paraíso Allpapica gentecunaca ima shinashi cangacuna?” nishca recuadrota ricui). Chaipi yuyashpami Cuerpo Gobernantemanta huauqui George Gangasca: * “¡Tucuicuna Diosta sirvijpica paraíso Allpapica maravilla causaimi tiyanga! Ñallami Jehová Dios shina huiñai huiñaita causashun” nircami. Chaita shuyanaca dimastij alajami can.
CANTO 122 ¡Tucuri punllacama amataj shaicurishunchij!
^ par. 5 Ñallami jatun llaqui punlla chayamunga. ¿Diosta sirvijcunahuanca imataj tucunga? ¿Chai tiempopica Jehová Diosca paita sirvijcuna imata rurachuntaj shuyanga? ¿Diosmanta ama caruyangapajca imatataj cunanmanta rurana canchij? Cai yachaipimi cai tapuicunamanta yachashun.
^ par. 3 ALLI INTINDISHUNCHIJ: Cai panda religioncunapica Jesusta catinchij nij religioncunami tiyan. Jesusta catinchij nij religioncunaca paicuna munashca shinami Diosta adoranata yachachincuna.
^ par. 7 Hebreos 10:24, 25, NM : “Cꞌuyajcuna cangapaj, allita rurangapaj caishuj chaishuj animanacunata ama cungarishunchijchu. Tandanacuicunaman rinata saquijcuna shina ama cashunchijchu, ashtahuanpish Diospaj punlla quichquiyamucushcata yachashpacarin caishuj chaishuj animanacushunchij”.
^ par. 11 ALLI INTINDISHUNCHIJ: Mandaj Gog nishpaca tauca gobiernocuna shujlla tucushpa Diospaj pueblota llaquichisha nishcatami nicun.
^ par. 11 Manaraj Armagedón macanacui callarijpi imalla tucunata ashtahuan yachasha nishpaca El Reino de Dios ya está gobernando nishca libropi capítulo 21-ta españolpi ricui. Cutin Mandaj Gog Diospaj pueblota ima shina llaquichi callarigrishcata, shinallataj Jehová Dios paipaj pueblota ima shina quishpichinata yachasha nishpaca La Atalaya del 15 de julio de 2013, páginas 3 al 8-ta españolpi ricui. Shinallataj La Atalaya del 15 de julio de 2015, páginas 14 al 19-ta españolpi ricui.
^ par. 16 2019-pica “Cꞌuyaica manataj tucuringachu” nishca jatun tandanacuimi tiyan. Chai tandanacuipica Jehová ñucanchijta cuidanatami yachachin (1 Corintios 13:8).
^ par. 19 Caimanta ashtahuan yachangapajca La Atalaya del 1 de diciembre de 1994-pi “Sus obras lo siguen” nishcata españolpi ricui.
