1. ¿Imamantataj Jehová Diosllata adorana canchij?

JEHOVÁ DIOSMI tucuita rurarca, causaitapish curca. Chaimantami paillata adorana canchij (Apocalipsis 4:11). Pero huaquinpica caita ruranaca sinchimi can. Jehová Diosta cꞌuyashpapish maipica shujtaj cosascunatami punta lugarpi churanchij. Ama chaita rurangapajca cai ishqui tapuicunamantami yachashun. ¿Jehová Diosllata adorashcataca ima shinataj ricuchinchij? ¿Yayitu Diosllata adorangapajca imacunataj jarcai tucun?

2. Mateo 4:10-pi nishca shinaca ¿Jehová Diosllata adorashpaca imatataj mana rurashun?

² Jehová Diosta shungumanta cꞌuyashpaca paillatami adorashun. Paillata adorashpaca shujtaj cosascunataca mana punta lugarpi churashunchu (Mateo 4:10-ta liyipai).

3. ¿Imamantataj Diosllata adoranata munashun?

³ Jehová Diosta alli rijsishpaca paillatami adoranata munashun. Por ejemplo, pai cꞌuyaj, llaquij, allita ruraj cashcatami yachashcanchij. Chashnami pai imata munashcata, imata mana munashcata intindishpa cazunchij. Shinallataj Yaya Dios huiñai causaita cusha nishcatami yachashcanchij. Paipaj amigo cai tucushcata yachashpacarin cushillami sintirinchij (Salmo 25:14). Caicunata yachashpami paipajman ashtahuan cꞌuchuyanchij (Santiago 4:8).

4. a) ¿Diabloca ima shinataj pandachisha nin? b) ¿Cai yachaipica imatataj yachashun?

⁴ Diablomi cai mundota mandacun. Chaimantami paica cai mundopaj cosascunapi yalli ocuparichun, ñucanchij munaicunatapish ama jarcarichun pandachisha nin  (Efesios 2: 1-3; 1 Juan 5:19). Diablo pandachijpica Jehová Diosllataca mana adorashunchu. Cai yachaipimi cullquihuan, ricunacunahuan, uyanacunahuan, pugllanacunahuan Diablo pandachisha nishcata yachashun.

5. ¿Imamantataj cullquita mana cꞌuyana canchij?

⁵ Tucuicunami micunata, ropata, maipi causanata charisha ninchij. Pero cullquita ama cꞌuyangapajmi cuidarina canchij. Cunan punllapi causaj gentecunaca cullquita, achca cosascunatami cꞌuyancuna (2 Timoteo 3:2). Jesusca paita catijcunapish cullquipi yalli sustari tucushcatami yacharca. Chaimantami paica: “Ishqui amopajtaca pi mana rurai tucunchu. Shujtaca pꞌiñanmanmi, caishujtaca cꞌuyanmanmi. Shujtaca alli ninmanmi, caishujtaca yanganchinmanmi. Taita Diostapish, charinacunatapish ishquipajtaca mana rurai tucunchu” nirca (Mateo 6:24). Shuj huauqui o pani cullquiyuj cangapaj tiempota, fuerzata gastashpaca ishqui amota sirvicushca shinami canman. Jehová Diosllata adorana cashcataca mana ricuchinmanchu.

6. ¿Laodicea congregacionman Jesús ima nishcamantaca imatataj yachanchij?

⁶ 100 huata manaraj tucujpimi Laodicea llajtapi tiyaj huauqui panicunaca: “Achcata charijmi canchij. Imata mana minishtinchijchu” nijcuna carca. Pero paicunaca Jehová Diospaj, Jesuspaj ñaupajpica huajchacuna shina, ciegocuna shina, lluchulla llaquinai shinami carcacuna. Jesusca paicuna charij cashcamantaca mana rimarcachu. Ashtahuanpish cullquipi yalli sustarishpa Jehová Diosmanta caruyacushcamantami  rimarca (Apocalipsis 3:14-17). Jehová Diosca paitami tucui shunguhuan cꞌuyachun munan (Marcos 12:30). Chaimantami cullquipi yalli yuyai callarishpaca chai rato chai yuyaita cambiana canchij (1 Timoteo 6:7, 8). Chaita mana rurashpaca cullquita, charinacunatami cꞌuyashun. Diospish ñucanchij adorashcataca mana chasquingachu. Cunanca trabajopi mana yalli ocuparina cashcatami yachashun.

7-9. ¿Huauqui Davidmantaca imatataj yachanchij?

⁷ Cunanca Estados Unidospi causaj David shuti huauquimanta parlashun. Paica ancianomi can. Huauqui Davidca shuj empresapimi trabajaj carca. Alli trabajador cashcamantami chai empresapi ashtahuan alli trabajota curca. Chaimi ashtahuan cullquita ganai callarirca. Alli trabajador cashcamantami paipaj llajtapipish tucuicunapaj rijsishca carca. Huauqui Davidca: “Chai punllacunapica Jehová Diosmi cai trabajota cushpa bendiciashca nishpami yuyaj carcani” ninmi. Pero, ¿Jehová Dioschu chai trabajota cushpa bendiciashcanga?

⁸ Davidca paipaj trabajomanta Jehová Diosta adoranata saquicushcatami cuentata curca. Paica: “Tandanacuicunapi cashpa, predicacushpaca trabajopi ima problemacuna tiyashcapimi yuyaj carcani. Achca cullquita ganaj cashpapish shaicushcami sintirircani. Ñuca huarmihuanpish problemacunatami chari callarircani” ninmi.

⁹ Davidca imata punta lugarpi churana cashcatami cuenta japirca. Chaimantami paica jefemanca: “Ña mana achcata trabajashachu” nirca. Pero jefeca chaita mana munashpami trabajomanta llujchirca. ¿Trabajo illaj saquirishpapish cai huauquica imatataj  rurarca? Paica: “Cayandij punllaca precursor auxiliar tucungapajmi shuj solicitudta curcani” ninmi. Davidpish paipaj huarmipish mantiniringapajca edificiocunata limpiashpami trabajai callarircacuna. Qꞌuipaca huauqui Davidca precursor regularmi tucurca. Paipaj huarmipish asha tiempo qꞌuipaca precursorami tucurca. Achcacunaca limpiashpa trabajanataca mana munancunachu. Pero Davidpish paipaj huarmipish Jehová Diosta punta lugarpi churasha nishpami chai trabajota agllarcacuna. Mana tanto ganashpapish minishtishca cosascunata charingapajllami trabajarcacuna. Chashnami Jehová Dios paicunata cuidacushcata ricurcacuna (Mateo 6:31-33).

10. ¿Ñucanchij shungutaca ima shinataj cuidai tucunchij?

¹⁰ Charijcuna o huajchacuna cashpapish ñucanchij shungutami cuidana canchij. ¿Ima shinataj cuidashun? Cullquita mana cꞌuyanachu canchij. Trabajopipish mana yalli ocuparinachu canchij. Cullquita cꞌuyaj cashcata yachangapajca cashna tapurishunchij. “¿Tandanacuipi cashpa, predicacushpaca ñuca trabajopichu yalli yuyani? Shamuj punllacunapish alli causangapajca cunanmi achcata trabajana cani ¿nishpachu sustarini? ¿Cullquimanta, charina cosascunamantachu familiahuan problemacunata charini? ¿Jehová Diosta ashtahuan sirvingapajca shujtajcuna mana munashca trabajotachu chasquini?” (1 Timoteo 6:9-12). Cai tapuicunapi yuyacushpaca Jehová Dios ñucanchijta cꞌuyashcatami yuyarina canchij. Diosca paita tucui shunguhuan sirvijcunataca: “Cantaca manataj shitashachu, manataj cungarishachu” ninmi. Chaita yachashpami apóstol Pablopish: “Cancunaca quiquinpajlla ashtahuan charij canataca ama munaichijchu” nirca (Hebreos 13:5, 6).

11. ¿Mana alli ricunacunapi, mana alli pugllanacunapi ocuparishpaca imatataj yuyai callarishun?

¹¹ Jehová Diosca cushilla causachunmi munan. Bibliapica: “Quiquin trabajomantaca micushpa, ubyashpa cushicunamari alli” ninmi (Eclesiastés 2:24). Shinapish achca ricunacuna, uyanacuna, pugllanacunaca mana allicunami can. Chaicunapi ocuparishpaca Dios millashca cosascuna alli cashcata shinami yuyai callarishun.

12. 1 Corintios 10:21, 22-pi nishca shinaca ¿imamantataj ricunacunata, uyanacunatapish alli agllana canchij?

 ¹² Caipi yuyashun. Pi yanushpachari ñucanchijtaca paihuan micuchun invitan. Paihuan micushpaca paipaj amigo cashcatami ricuchinchij. Diospaj contracunapish yanuj shinami brujeriahuan, macanacuihuan, huainayanahuan chagrushca peliculacunata, musicacunata rurashca. Paicunaca chaicunata ricuchun, uyachunmi ñucanchijta invitancuna. Chai mana alli peliculacunata, musicacunata ricushpa, uyashpaca Diospaj contracunahuan micucuj shinami canman. Pero ñucanchijca Jehová Diosllata adorashcata ricuchingapajca supaicunapaj mesamantaca mana micunachu canchij (1 Corintios 10:21, 22-ta liyipai). * Caita mana cazushpaca Yaya Diosmantami caruyashun.

13, 14. Santiago 1:14, 15-pi nishca shinaca ¿imamantataj ricunacunahuan, pugllanacunahuan cuidadota charina canchij? Shuj ejemplomanta parlai.

¹³ Ricunacuna, uyanacuna, pugllanacunaca micuna shinami can. Caipi yuyashun. Ñucanchijca imata micunatami agllai tucunchij. Pero micushca qꞌuipaca chai micuna ñucanchij cuerpopi imata rurajta mana jarcai tucunchijchu. Alli micunata micushpaca sanomi causashun. Pero mana alli micunata micushpa alli sintirishpapish qꞌuipaca ungushunmi.

¹⁴ Chashnallatajmi ñucanchijpish imata ricunata, imata uyanata, imata pugllanata agllai tucunchij. Pero ña agllashca qꞌuipaca chai ima ricushca, uyashcami tiempohuanca ñucanchij yuyaita allipaj o mana allipaj cambianga (Santiago 1:14, 15-ta liyipai). Bibliapica: “Ama umarichijchu. Diostaca pi mana chanzata rurai tucunchu. Maijan imata tarpujca, chaillatatajmi tandanga. Maijanpish quiquin aichapaj tarpujca, aichamantaca ismujllatami tandanga” ninmi (Gálatas 6:7, 8). Chaimantami mana allicunahuan chagrurishca peliculacunata, musicacunataca mana ricuna, mana uyana canchij. Shinallataj mana alli pugllaicunapica mana ocuparinachu canchij (Salmo 97:10).

15. ¿Jehová Diosca ima regalotataj cushca?

¹⁵ Achca huauqui panicunami JW Broadcastingta^® ricunata munancuna. Pani Marilynca: “JW Broadcastingpica allicunatami ricuchin. Ñuca llaquilla cashpa, desanimada cashpaca chaipi tiyaj conferenciacunata uyashpami cushilla sintirini. Chaimantami Jehová Diospajmanpish, paipaj organizacionmanpish ashtahuan cꞌuchuyani. JW Broadcastingca ñuca causaitami cambiashca” ninmi. Ñucanchijpish cada quilla llujshishca JW Broadcastingtami ricuna canchij. Shinallataj JW Broadcasting paginapica achca videocuna, cancioncunapishmi tiyan. Chaicunatami mai horapish ricunalla canchij. Chashnami Dios cushca regalota valorashun.

16, 17. a) ¿Ricunacunapi, pugllanacunapi ama yalli tiempota pasangapajca imamantataj cuidarina canchij? b) ¿Ricunacunapi, pugllanacunapi ama yalli tiempota pasangapajca imatataj rurana canchij?

¹⁶ Alli ricunacunata, alli pugllanacunata agllashpapish mashna tiempota chaipi ocuparishcatami yuyarina canchij. Mana cuidadota charishpaca Diosta sirvinapaj randica chaicunapimi yalli ocuparishun. Por ejemplo, 18 huatata charij pani Abigailca: “Punllapi tucuita rurashca qꞌuipaca ashata samarisha nishpami televisionta ricuni. Pero  mana cuidadota charishpaca televisionta ricushpami achca horascunata pasai tucuni” ninmi. Samuel shuti jovenpish: “Huaquinpica internetpimi uchilla videocunata ricushpa pasani. Shuj videota ricui callarishpaca ñapish tres o cuatro horas pasashcataca mana cuentata cushcanichu” ninmi.

¹⁷ ¿Ricunacunapi, pugllanacunapi mana yalli tiempota pasangapajca imatataj rurana canchij? Puntapica televisionpi, Internetpi mashna horascunata pasaj cashcata, pugllaicunapipish mashna tiempota dedicarishcata shuj hojapi anotashunchij. Chaicunapi yalli ocuparicushcata cuentata cushpaca shuj horariotami rurana canchij. Chai horariopica Diospajta ruranacunataraj anotashunchij. Chai qꞌuipaca ricunacunapi, pugllaicunapi mashna tiempota pasasha nishcata anotashunchij. Chai huashaca Jehová Diosta chai horariota pajtachingapaj ayudahuai nishpa mañashunchij. Chai horariota pajtachishpaca Bibliata estudiangapaj, familiahuan Diosta adorangapaj, tandanacuicunaman ringapaj, huillanaman llujshingapaj, gentecunaman Bibliamanta yachachingapajmi tiempota, fuerzasta charishun. Diosta punta lugarpi churashcamantami ricunacunapi, uyanacunapi, pugllanacunapi ashata pasashpapish tranquilo sintirishun.

18, 19. ¿Jehová Diosllata adoracushcataca ima shinataj ricuchinchij?

¹⁸ Apóstol Pedroca Diablopaj ruraicuna tucurinamanta, cai Allpapi ima laya causai tiyanamantami escribirca. Chai huashami Pedroca: “Cꞌuyashcacuna, chashna canata shuyacushpaca, ima mapa illaj, pi mana juchachipaj, alli sumajta causacujta Dios japichun tucui imatapish allita rurana yuyailla ruraichij” nirca (2 Pedro 3:14). Apóstol Pedro nishca shina Jehová Dios munashcata rurashpaca paillata adoracushcatami ricuchinchij.

¹⁹ Diablopish paita catijcunapish shujtaj cosascunata punta lugarpi churachunmi pandachishpa catisha ningacuna (Lucas 4:13). Pero Jehová Diosta punta lugarpi churangapajca ima jarcachunca mana saquinachu canchij. Shinashpaca Jehová Diosllata adorashpa causashunchij.