1, 2. ¿Bibliapi nishcacunata alli intindingapajca imatataj rurana canchij? (Shuj ejemplota churai).

 SHUJ huasita randisha nishcata yuyai. ¿Chai huasita randinata o mana randinataca ima shinataj decidingui? ¿Shuj fotota ricushpallachu decidinguiman? ¿O mana cashpaca chai huasi ima shina cashcata ricunamanchu ringuiman? Seguramente chaiman chayashpaca canlla ladocunata, ucuman yaicushpa cada ucucuna ima shina cashcatami ricunguiman. Tal vez chai huasi ima shina cashcata yachangapajca planocunatapishmi ricunguiman ¿nachu? Chaita rurashpami chai huasi ima shina cashcata alli yachangui.

² Bibliata liyicushpa, estudiacushpaca chaillatatajmi rurana canchij. Bibliamanta parlashpaca shuj libropica “Bibliapi yachachishcacunaca sinchi cimiento jahuapi alli huasichishca jatun huasi shinami can” ninmi. ¿Ñucanchijca ima shinataj Bibliata alli rijsi tucunchij? Bibliata apurado, jahua jahualla liyishpaca punta yachachishcacunallatami intindishun (Hebreos 5:12). Chaipaj randica chai huasita alli rijsicuj layami Bibliapi nishcacunata alli rijsingapaj, alli intindingapaj esforzarina canchij. Chaipajca shuj versopi imalla nishcacuna shujtaj versocunata alli intindingapaj ima shina ayudashcatami ricuna canchij. Ñucanchij crishcacuna imacunalla cashcata yachanaca allimi can. Pero chaicunapi imamanta crishcatapishmi alli intindina canchij.

3. a) ¿Pabloca huauqui panicunataca imata rurachuntaj animarca? (Efesios 3:​14-19). b) ¿Punta siglopi causaj huauqui panicunaca Diospaj nishcacunataca imamantataj alli estudiana carca?

³ Bibliapi tucui imalla nishcacunata alli intindingapajca jahualla yachaicunallataca mana estudianachu canchij. Ashtahuanpish sinchi yachaicunatapishmi estudiana canchij. Apóstol Pabloca Jesusta catijcunatami chaita rurachun animarca. Paica:  ‘Chaita rurashpaca mana llulla yachaicunataca anchota, largota, jahuata, ucujtami alli intindi tucunguichij. Chashnami crishcapi sapiyashca shina, cimiento jahuapi alli huasichishca shina canguichij’ nircami (Efesios 3:​14-19-ta liyipai). Ñucanchijpish chaitami rurana canchij. Cunanca Diospaj Shimi yachachishcacunata tucuita alli intindingapaj imata rurana cashcatami yachashun.

4. ¿Jehová Diospajman ashtahuan cꞌuchuyangapajca imatataj rurana canchij? Huaquin ejemplocunata churai.

⁴ Diosta sirvijcunaca jahualla yachaicunata yachashpallaca mana saquirinachu canchij. Espíritu santopaj ayudahuanca “pi mana yachai tucushca Diospaj yuyaicunatapishmi” intindi tucunchij (1 Corintios 2:​9, 10). Chaimanta sinchi yachaicunata estudiangapaj esforzarishunchij. Chashnami Diospajman ashtahuan cꞌuchuyashun. Por ejemplo, Jehová Dios ñaupa tiempopi paita sirvijcunata cꞌuyaita ricuchishcamanta ñucanchijtapish cꞌuyashcatami yachai tucunchij. Shinallataj ñaupa tiempopi Jehová Dios israelitacuna paita ima shina adorachun munashcata, cunan punllacunapi ñucanchijpish paita ima shina adorana cashcatapishmi yachai tucunchij. Ashtahuanpish Jesús cai Allpapi cashpa maijan profeciacunallata pajtachishcatami yachai tucunchij.

5. ¿Ima sinchi yachaicunatataj yachanata munanguiman?

⁵ ¿Bibliapica ima sinchi yachaicunatataj yachanata munanguiman? “ ¿Imacunallatataj estudiai tucungui?” nishca recuadropimi huaquin sinchi yachaicuna tiyan. Huaquin huauqui panicunaca chai temacunata yachachunmi animashcacuna. Chai temacunamanta ashtahuan yachangapajca Índice de las publicaciones Watch Tower y Guía de estudio para los testigos de Jehová nishca publicacioncunapimi investigai tucungui. Chashnami cambaj feca sinchiyanga. Ashtahuancarin ‘Diosmanta alli yachaitami japingui’ (Proverbios 2:​4, 5). Cunanca maijan sinchi yachaicunata yachai tucushcatami ricushun.

6. a) ¿Diosca paipaj munaita pajtachingapajca imatataj rurashca? Shuj ejemplomanta parlapai. b) Efesios 3:​11-pi nishcacunaca ¿imatataj nisha nin?

⁶ ¿Bibliapi nishca shinaca Diospaj munaica ima shinataj pajtaringa? Caita alli intindingapajca cai ejemplopi yuyashun. ¿Shuj lugarman chayasha nishpaca imatataj rurai tucunchij? Chaiman  chayangapajca shujlla ñantami agllai tucunchij. Pero chai ñanpi jarcaicuna ricurijpica maiman chayasha nishcamanca ña manachari chayai tucushun. Chaimi shujlla ñanta agllanapaj randica chꞌican chꞌican ñancunata agllai tucunchij. Chashnami jarcaicuna ricurijpipish shujtaj ñanta japishpa ñucanchij chayasha nishcaman chayashun. ¿Caimantaca imatataj yachanchij? Jehová Diosca chꞌican chꞌican ñancunata japij shinami paipaj munaita pajtachingapajca tucuita rurashca. Bibliapi nishca shinaca ‘Diosca pai imata rurasha nishcataca huiñaimantami yuyarishca’ (Efesios 3:11). Chaica ¿imatataj nisha nin? Yaya Dios tucui pai imata rurasha nishcacuna pajtarichun achca tiempo pasachun saquishcatami nisha nin. Shinallataj Diospaj munai pajtarijpica huiñai huiñaipajmi bendicioncunata charishun. Bibliapi paipaj munai ima shina pajtarinata asha asha yachachishcamantami paitaca achcata agradicinchij. ‘Jehová Diosca tucuitami imapaj cashpapish shuj yuyaihuan rurashca’ (Proverbios 16:4). Chaimantami pai nishcacunaca siempre pajtarin. Pero ¿Diospaj munaica maijantaj can? ¿Paipaj munaita pajtachingapajca imallatataj rurashca?

7. ¿Adán y Eva Diospaj contra tucujpica Diosca paipaj munaita pajtachingapajca imatataj rurarca? (Mateo 25:34).

⁷ Jehová Diosca punta cꞌariman, punta huarmimanmi paipaj munai maijan cashcata huillarca. Paica: ‘Achca huahuacunata charishpa, mirarishpa allpapi jundarichij. Cai allpatapish cuidaichij. Allpapi causaj tucui animalcunatapish mandaichij’ nircami (Génesis 1:28). Adán y Eva Diospaj contra tucujpimi cai pachapica juchaca tiyai callarirca. Shina cajpipish Jehová Diosca paipaj munaita pajtachingapajca shujtaj decisiontami japirca. Cai Allpapi paipaj munai pajtarichunca jahua pachapi shuj Gobiernota churanatami chai rato decidirca (Mateo 25:​34-ta liyipai). Paica cꞌuyaj cashcamantami pai agllashca horas paipaj shujlla Churita cai Allpaman cacharca. Jesusca Diospaj Gobiernomantami gentecunaman parlarca. Ashtahuanpish ñucanchijcunata juchamanta, huañuimanta quishpichingapajmi paipaj causaita curca. Chai qꞌuipaca jahua pachapi causarishpami Diospaj Gobiernopi mandaj tucurca. Pero ¿paipaj munaita pajtachingapajca Jehová Diosca imatataj ashtahuan rurarca? Chaicunapipishmi yuyana canchij.

8. a) ¿Bibliaca imamantataj ashtahuan parlan? b) Efesios 1:8 al 11-pi nishca shinaca ¿Diospaj munaica ima shinataj pajtaringa? (Página 1-pi tiyaj dibujota ricui).

⁸ Jesús Diospaj Gobiernopi mandacushpa Diospaj munaita cai Allpapi pajtachijpica Diospaj shutica ima mapa illaj, ima juchachina illajmi saquiringa. Bibliaca chai yuyaimantami ashtahuan parlan. Diospaj munai pajtarishpa catichunca pi mana jarcai tucunchu. Paica ‘ñuca munaica ñuca nishca shinallatajmi pajtaringa’ ninmi (Isaías 46:​10, 11; Hebreos 6:​17, 18). Cai Allpa shuj Paraíso tucujpimi Adán y Evapaj huahua huahuacunaca jucha illajcuna tucushpa huiñai huiñaita causangacuna (Salmo 22:26). Pero ¿Diospaj munai pajtarichunca ima ashtahuantaj tucuna can? Jahua pachapi, cai Allpapi causajcunaca shujlla familia shina tucushpami Jehová Dioslla mandana cashcata reconocina can (Efesios 1:​8-11-ta liyipai). ¿Diospaj munai ima shina pajtarinata yachashpaca manachu cushilla sintirinchij?

9. ¿Bibliapi nishca shinaca shamuj punllacunapica imallatataj tucuna can?

⁹ Génesis 3:​15-pica Jehová Dios Edén huertapi huillashca profeciamantami parlan. b Shinallataj chaipica achca huatacuna qꞌuipa Diospaj munai ima shina pajtarishpa catinatami parlan. Puntapica Abrahanpaj huahua huahuacunamantami Jesusca huacharina carca (Génesis  22:​15-18). Chai qꞌuipaca Jesusca talonpimi chugrichishca cana carca. Chaica huata 33-pi Jesús huañujpimi pajtarirca (Hechos 3:​13-15). Jesús Diablopaj umata sarujpimi cai profeciaca tucui pajtaringa. Chai pajtarichunca 1.000 yalli huatacunami faltan (Apocalipsis 20:​7-10). Bibliapi nishca shinaca Diablota catijcuna Jehová Diosta sirvijcunahuanca shuj pꞌiñanacuipimi can. Chai pꞌiñanacui manaraj tucurijpica Bibliaca imalla tucuna cashcatami huillan.

10. a) ¿Imacunallataj ñalla tucuna can? b) ¿Ñucanchij shunguta, ñucanchij yuyaitaca ima shinataj allichina canchij? (Notata ricui).

¹⁰ ¿Bibliapi nishca shinaca shamuj punllacunapica imataj tucunga? Callaringapajca llajtacunaca: “¡Sumajta, mana manchashpami causacunchij!” ningacunami (1 Tesalonicenses 5:​2, 3). Shinallataj llajtacunaca ñapishmi panda religioncunata llaquichingacuna. Chashnami jatun llaqui punllacunaca callaringa (Apocalipsis 17:16). Chai qꞌuipaca ‘Runapaj Churi jahua pachamanta pꞌuyu jahuapi poderhuan, dimastij achijnicuj shamujpimi’ jahua pachapica tal vez jatun mancharinacuna ricuringa (Mateo 24:30). Shinallataj Jesusca tucui gentecunatami juzganga. Oveja shina cajcunataca chivocuna shina cajcunamantami chꞌicanyachinga (Mateo 25:​31-33, 46). Shinapish Diabloca maqui cruzashcaca mana saquiringachu. Paica yallitaj pꞌiñarishca cashcamantami llajtacunamanca Diospaj pueblota llaquichina yuyaita cunga. Chai tandalla llajtacunataca Bibliapica Magog llajtata mandaj Gog nishpami shutichin (Ezequiel 38:​2, 10, 11). Shinallataj cai Allpapi saquirij ungidocunaca jahua pachamanmi ringacuna. Chaipimi paicunaca Jesushuan, angelcunahuan Armagedón jatun macanacuipi macanacungapaj tandanacungacuna. Chashnami jatun llaqui punllacunaca tucuringa (Mateo 24:31; Apocalipsis 16:​14, 16). c Chai qꞌuipami Jesusca 1.000 huatacunata cai Allpata mandai callaringa (Apocalipsis 20:6).

11. ¿Paraisopi causanaca ima layataj canga? (Fotomantapish parlapai).

¹¹ Jesús 1.000 huatacunata mandashca qꞌuipa ima tucunata yuyashun. Bibliapi nishca shinaca Jehová Diosca ñucanchij shungucunapica huiñai huiñaita causana yuyaitami churashca (Eclesiastés 3:11). ¿Huiñai huiñaita causanaca ima  layataj canga? ¿Chashna causashpaca Jehová Diostaca mashnataj rijsi tucushun? Acerquémonos a Jehová nishca libropi página 319-pica shuj sumaj yuyaitami yachachin. Chaipica: “Huaranga huaranga huatacunata causashca qꞌuipaca Jehová Diosmantaca cunan yachashcata yallimi yachashun. Pero mashna huatacuna pasajpipish paimanta yachanataca manataj saquishunchu. Paraíso Allpapi huiñai huiñaita causanaca maravillami canga. Chaipica tucui laya ruraicunata rurashpami cushicushun. Pero tucuimanta yallica Jehová Diosmanta yachanami ñucanchijmanca cushicuita cunga” ninmi. ¿Chai punlla chayangacamaca Bibliapica ima shujtaj yuyaicunatataj yachai tucunchij?

12. ¿Bibliapica jahua pachamantaca imatataj yachachin?

¹² Bibliata liyishpami Jehová Dios jahua pachapi ima shina mandacushcata yachai tucunchij (Isaías 33:5). Shinallataj Bibliapica Jehová Dios, Jesús, ungidocuna, angelcunapish jahua pachapi imallata ruracushcatami intindichin (Isaías 6:​1-4; Daniel 7:​9, 10; Apocalipsis 4:​1-6). Por ejemplo, Ezequiel libropimi “jahua pacha pascarijpi” muscuipi shina Jehová Dios Ezequielman imallata ricuchishcata yachai tucunchij (Ezequiel 1:1).

13. ¿Jesús jahua pachapi mandacushcamantaca ima shinataj sintiringui? (Hebreos 4:​14-16).

¹³ Jesús jahua pachapi jatun mandaj, llaquij sacerdote cashcamanta imata ruracushcata yuyashunchij. Jesusmantami ñucanchij minishticuj horas Jehová Dios ñucanchijta ayudachun mañai tucunchij. Chashna mañanaca Diospaj jatun tiyarinaman cꞌuchuyacushca shinami can (Hebreos 4:​14-16-ta liyipai). Jehová Diospish, Jesuspish jahua pachamanta ñucanchijta ayudacushcatami punllanta yuyarina canchij. Paicuna ñucanchijta cꞌuyashcamantami Jehová Diosta tucui shunguhuan sirvingapaj esforzarina canchij (2 Corintios 5:​14, 15).

14. ¿Jehová Diosta, Jesusta agradicishcata ricuchingapajca imatataj rurana canchij? (Fotocunamantapish parlapai).

 ¹⁴ Ñucanchijcunaca gentecunataca Jehová Diosta rijsichun, Jesusta catijcuna tucuchunmi ayudana canchij. Chashnami Jehová Diosta, Jesusta ñucanchijta ayudashcamanta pagui nicushcata ricuchishun (Mateo 28:​19, 20). Apóstol Pabloca Jehová Diosta, Jesusta pagui ningapajmi chaitaca rurarca. Paica Jehová Dios ‘tucui laya gentecuna quishpirichun, mana llullata alli yachaj chayachun munashcataca’ allimi yacharca (1 Timoteo 2:​3, 4). Chaimantami ‘shujllatapish quishpichingapaj tucui gentecunaman alli huillaicunata huillangapaj’ esforzarirca (1 Corintios 9:​22, 23).

15. Salmo 1:​2-pi nishca shinaca ¿cushilla causangapajca imatataj rurana canchij?

¹⁵ Salmota quillcaj runa nishca shinaca Diospaj Shimita tutapish punllapish liyijcuna, chaipi nishcacunapi yuyajcunami cushilla causancuna (Salmo 1:​1-3). Chai Salmopi nishcacunamanta parlashpami Bibliata traducij shuj runaca: “Diospaj Shimita liyijcunaca chaipi sumaj yuyaicunata taringapaj, alli intindingapaj, causaipi ima shina pajtachinata yuyangapajmi esforzarincuna. Paicunapajca shuj punlla Diospaj Shimita mana liyishpaca, chai punllaca imapaj mana valishca shinami can” nirca (Studies in the Psalms, Joseph Rotherham). Ñucanchijpish Diospaj Shimita cushilla estudiangapajca cada verso imallata nisha nishcata, shinallataj shujtaj versocunata alli intindingapaj ima shina ayudashcatami ricuna canchij. Bibliata chashna estudianaca sumajmi can.

16. ¿Catij yachaipica imatataj yachashun?

¹⁶ Jehová Dios paipaj Shimipi yachachishcacunataca tucuicunami intindi tucunchij. Catij yachaipica Diospaj huasimantami yachashun. Apóstol Pabloca Hebreos libropimi chai huasimanta parlarca. Chaimanta yachanaca sumajmi canga.