Caitami tapushcacuna
¿Israelitacunaca chaquishca pambapi cashpaca maná micunata, codornicescunallatachu micurcacuna?
Israelitacunaca chaquishca pambapi 40 huatacunata puricushpaca maná micunatami ashtahuan micurcacuna (Éxodo16:35). Shinallataj Jehová Diosca ishqui cutincunami paicunamanca codornicescunata curca (Éxodo 16:12, 13; Números 11:31). Shinapish israelitacunaca shujtaj micunacunatapishmi ashata micujcuna carca.
Por ejemplo, Jehová Diosca paicunataca sumaj pushtucunaman pushashpami samachij carca. Chaipimi paicunaca yacuta ubyai tucurcacuna, shujtaj micunacunatapishmi micui tucurcacuna (Números 10:33). Por ejemplo, Jehová Diosca paicunataca “chunga ishqui pugyucunamanta achca yacucuna llujshicun, canchis chunga palmeracuna tiyan Elim pambaman” paicunataca aparca. Chai palmeracunaca “palmera datilera” nishcacunami cashcanga (Éxodo 15:27). Plants of the Bible nishca libropica “chai palmeracunaca achca ladocunapimi tiyan. Gentecunaca chai palmerapaj frutocunata micushpa, aceiteta rurashpami causancuna. Huaquinpicarin chai palmera ucupimi miticuncuna” ninmi.
Shinallataj Jehová Diosca israelitacunataca Farán nishca pugru pambamanmi pushashcanga. a Discovering the World of the Bible nishca libropica “chai pugru pambaca 130 kilómetros largotami charin. Cashna jatun, alaja pugru pambacunaca Sinaí llajtapica ashacunallami tiyan” ninmi. Shinallataj chai libropica “45 kilometroscunata purishpaca 4.8 kilometrosta charij jatun cuchami tiyan. Chai cuchaca 610 metros sobre el nivel del marpimi can. Chaipi achca palmeracuna tiyashcamantami achca gentecuna chaimanca rincuna. Edén huerta layami sumajmi can” ninmi.
Farán ladopi tiyaj palmeracuna
Israelitacunaca Egiptomanta llujshishpaca tandata rurangapaj masata asha granocunata, aceitetami aparcacuna. Shinapish chai micunacunaca ratomi tucurishcanga. Shinallataj paicunaca achca ovejacunata, achca huagracunatami aparcacuna (Éxodo 12:34-39). Pero chaquishca pambapica achca animalcunami huañushcanga. Shinallataj israelitacunaca huaquin animalcunatami micushcangacuna. Mana cashpaca chai animalcunata huañuchishpami Jehová Diosman o hasta yanga dioscunaman sacrificio shina cushcangacuna (Hechos 7:39-43) b. Chashnapish israelitacunaca chaquishca pambacunapica ovejacunata, huagracunatami huiñachircacuna. Chashnami Jehová Diospaj nishcacuna pajtarirca. Paica “cancunapaj huahuacunaca cai shitashca pambapimi chuscu chunga huatacunata michishpa puringacuna” nircami (Números 14:33). Shinaca israelitacunaca asha lecheta, asha aichatami charishcangacuna. Pero 40 huatacunata 3 millones gentecunaman chaita carangapajca mana suficienteta charishcangacunachu. c
¿Israelitacunaca animalcunaman yacuta, micunata cungapajca imatataj rurarcacuna? d Chai tiempopica chaquishca pambapica ashtahuanmi tamyaj cashcanga. Chaimantami ashtahuan qꞌuihuacuna tiyashcanga. Perspicacia para comprender las Escrituras, volúmen 1, nishca libropi nishca shinaca 3.500 huatacuna huashamanca Arabia ladocunapica ashtahuan yacumi tiyarca. Shinallataj cunanca chai chaquishca pambacunapica chaquishca cuchacuna, riocunami tiyan. Chaicunata ricushpami ñaupa punllacunapi achcata tamyaj cashcata intindinchij. Shinapish chai punllacunapi chaquishca pambapi causanaca sinchimi cashcanga (Deuteronomio 8:14-16). Jehová Dios shuj milagrota rurashpa israelitacunaman yacuta mana cushca cajpica paicunapish, paicunapaj animalcunapishmi huañuiman carcacuna (Éxodo 15:22-25; 17:1-6; Números 20:2, 11).
¿Diosca israelitacunamanca imamantataj maná micunata curca? Moisesca “chaita runaca mana tandallahuan causana cashcata, ashtahuanpish Mandaj Diospaj shimimanta llujshishca shimicunahuan causana cashcata yachachingapajmi chashna rurarca” nircami (Deuteronomio 8:3).
a La Atalaya del 1 de mayo de 1992-pi páginas 24 y 25-ta ricui.
b Bibliapica ishqui cutinmi israelitacuna chaquishca pambapi cashpa Jehová Diosman animalcunata huañuchishpa sacrificio shina cushcata parlan. Puntapica sacerdotecuna tiyai callarijpimi chaitaca rurarcacuna. Chai qꞌuipaca pascua fiestapimi chaitaca rurarcacuna. Chaica Jesús manaraj huacharijpi 1512 huatapimi carca. Chaipajca israelitacunaca mas o menos shuj huatatami chaquishca pambapi ña causashcacuna carca (Levítico 8:14–9:24; Números 9:1-5).
c Israelitacunaca casi 40 huatacunata chaquishca pambapi causashca qꞌuipaca paicunapaj enemigocunapaj animalcunatami dueñoyarcacuna (Números 31:32-34). Chashnapish paicunaca Jehová Dios cusha nishca allpaman chayangacamami maná nishca micunata micushpa catircacuna (Josué 5:10-12).
d Bibliapica animalcunapish maná nishca micunata micuj cashcataca mana huillanchu. Ashtahuanpish Jehová Diosca israelitacunataca cada punlla cada uno mashnata micui tucushcallata tandachichunmi mandashca carca (Éxodo 16:15, 16).
