1. a) ¿Shuj angelca imatataj huillacun? b) ¿Diospaj ángel huillashcata uyashpaca imatataj rurana canchij?

 ¿SHUJ ángel canhuan parlajpica paita uyanguimanchu? Bibliapi nishca shinaca cunan punllacunapica ‘shuj angelca tucui llajtacunaman, tucui familiacunaman, tucui rimaicunaman, tucui pueblocunamanmi shuj huillaita huillacun’. Paica: ‘Diosta manchaichij. Paita jatunyachichij. Jahua pachata, allpa pachata rurajta adoraichij’ ninmi (Apocalipsis 14:​6, 7). Shinashpaca tucuicunami Jehová Diosta adorana canchij. Paica paipaj huasipi paita adorachunmi munan. Chaipi Jehová Diosta adoranaca valishcami can.

2. ¿Diospaj huasica imataj can? (“ ¿Diospaj huasica imataj mana can?” nishca recuadrotapish ricui).

² ¿Diospaj huasica imataj can? ¿Bibliapica chai huasimantaca ima versocunapitaj parlan? Diospaj huasica jahua pachapi, cai allpapi shayachishca huasica mana canchu. Ashtahuanpish Diospaj huasica Jehová Dios pai munashca shina paita adorachun tucui pai imalla rurashcacunami can. Jesús huañushcallamantami Jehová Diostaca chashna adorai tucunchij. Apóstol Pabloca Judeapi causaj hebreo huauqui panicunamanmi Diospaj huasipi imalla tiyashcata parlarca. b

3, 4. a) ¿Pabloca imamantataj hebreo huauqui panicunamantaca sustarishca carca? b) ¿Pabloca hebreo huauqui panicunataca ima shinataj ayudarca?

³ ¿Pabloca Judeapi causaj hebreo huauqui panicunamanca imamantataj shuj cartata quillcashcanga? Paicunaman animota cungapajmi quillcashcanga. Chai huauqui panicunaca Jesusta manaraj catishpaca la mayoriami judaísmo nishca religionta catijcuna carca. Chaimantami paicuna Jesusta cati callarijpica paicunapaj ñaupa religionta pushajcunaca achcata burlarishcangacuna. Judiocunaca  Diosta adorangapajca jatun templotami charircacuna. Shinallataj Diosman sacrificiocunata cungapajca altarta, sacerdotecunatapishmi charircacuna. Pero Jesusta catijcunaca Diosta adorangapajca chaicunataca mana charircacunachu. Chaimantachari huaquin huauqui panicunaca desanimarishcangacuna (Hebreos 2:1; 3:​12, 14). Huaquincunacarin judaísmo religionta cutin catinatami yuyashcangacuna.

⁴ Shinallataj Pabloca hebreo huauqui panicuna Diospaj Shimipi tiyaj sinchi yachaicunata intindingapaj mana esforzaricushcatami nirca. Chai sinchi yachaicunaca “sinchi micuna” shinami carca (Hebreos 5:​11-14). Maijan huauqui panicunaca todaviarajmi Moisesman cushca leyta cazucurcacuna. Shinapish Pabloca, ‘chai Leypi mandashca shina cushca sacrificiocunaca Jehová Dios juchacunata completamente perdonachunca mana ayudanchu’ nircami. Chaimantami Diosca chai Leyta anchuchishca carca. Shinallataj Pabloca hebreo huauqui panicunamanca huaquin sinchi yachaicunatami yachachisha nirca. Chashnami Jesús huañushcamanta Yaya Dios ‘shuj ashtahuan alli esperanzata’ paicunaman cushcata yuyachirca. Chaimantami paicunaca Jehová Diosman cꞌuchuyai tucurcacuna (Hebreos 7:​18, 19).

5. ¿Imatataj alli intindina canchij?

⁵ Pabloca hebreo huauqui panicunamanca judío religionta saquishpa Jesusta catij tucushcamanta Jehová Diosta ashtahuan alli adorai tucushcatami intindichirca. Caipi yuyashun. Llanduta ricushpami huaquin cosascuna ima shina cashcata ashata yachai tucunchij ¿nachu? ¿Caimantaca imatataj yachanchij? Judiocunaca Moisesman cushca leypi mandashca shinami Jehová Diosta adorajcuna carca. Pero Jehová Diosta chashna adoranaca ‘ima shamuna cashcata ricuchij llandu shinallami’ carca. Chaimi Jehová Diosta alli adorangapajca cunanca Jesús yachachishca shina Diostaca adorana carcacuna (Colosenses 2:17). Shinashpaca Jehová Dios munashca shina paita adorangapajca ñucanchij juchacunata perdonangapaj pai imallata rurashcatami alli intindina canchij. Cunanca judiocuna Jehová Diosta ima shina adorajcuna cashcata, cutin ñucanchijcuna Jehová Diosta ima shina adorana cashcatami yachashun. Chaipajca Hebreos libromantami yachagrinchij. Chashnami Diospaj huasi ima cashcata y chai huasi tiyashcamanta cada uno ima shina beneficiarishcata intindishun.

6. ¿Israelitacunaca Diospaj carpa huasitaca imapajtaj utilizajcuna carca?

⁶ ¿Judiocunaca ima shinataj adorarcacuna? Pabloca Jesús manaraj huacharijpi 1512 huatapi Moisés rurashca carpa huasimantami parlarca. (“¿Israelitacunaca ima shinataj adorarcacuna?  ¿Jesusta catijcunaca ima shinataj adoranchij?” nishca recuadrota ricui). Chaitaca Diospaj carpa huasi, Dioshuan tupanacuna carpa huasi nishpami rijsijcuna carca. Israelitacunaca chai carpa huasipimi Jehová Diosta adorangapaj, paiman sacrificiocunata cungapaj tandanacujcuna carca (Éxodo 29:​43-46). Shinallataj paicunaca chaquishca pambapi puricushpaca chai carpa huasitami apajcuna carca (Éxodo 25:​8, 9; Números 9:22). Israelitacunaca chai carpa huasita 500 huatacunata utilizashca qꞌuipaca Jerusalenpimi Jehová Diosta adorangapaj shuj templota shayachircacuna. Pero Moisés rurashca carpa huasimi Jesusta catijcuna Jehová Diosta ashtahuan alli adoranata ricuchirca.

7. ¿Diospaj huasica ima horataj tiyai callarirca?

⁷ ¿Jesusta catijcunaca ima shinataj adoranchij? Diospaj carpa huasica “jahua pachapi imalla tiyajcunata ricuchij llandullami” carca. Chai carpa huasica Jehová Diospaj huasitami ricuchin. Pabloca: “Cai carpa huasica cunan punllacunapi ima tiyashcatami ricuchin” nircami (Hebreos 8:5; 9:9). Shinashpaca Pablo Hebreos librota quillcashca horasca Diospaj huasica ñami tiyarca. Chai huasica huata 29-pimi tiyai callarirca. Chai huatapimi Jesusca bautizarishpa Diospaj huasipi jatun mandaj sacerdote cangapaj agllashca carca. Paica chai huatallapitajmi Diospaj huasipi sacerdote shina sirvi callarirca (Hebreos 4:14; Hechos 10:​37, 38). c

8, 9. Hebreos 7:​23-27-pi nishca shinaca ¿ñaupa jatun mandaj sacerdotecunaca jatun mandaj sacerdote Jesushuanca imapitaj chꞌican can?

⁸ ¿Judiocunaca ima shinataj adorarcacuna? Jatun mandaj sacerdoteca tucui israelitacunamantami Jehová Diospaj ñaupajpi ricurij carca. Punta jatun mandaj sacerdoteca Aaronmi carca. Israelitacuna Diospaj carpa huasita Jehová Diosman mingajpimi paica Aaronta jatun mandaj sacerdote cachun agllarca. Shinapish Pabloca: “Sacerdotecunaca huañushpami paicunaman mingashcataca mana pajtachishpa cati tucurcacuna. Chaimantami paicunaman mingashcataca catij caishuj sacerdotecuna pajtachishpa catina carcacuna” nircami (Hebreos 7:​23-27-ta liyipai). d Ashtahuanpish jatun mandaj sacerdotecunaca juchayujcuna cashcamantami paicunapaj juchacunamantapish sacrificiocunata cujcuna carca. Pero jatun mandaj sacerdote Jesucristoca jucha illaj cashcamantami chaitaca mana rurana can.

⁹ ¿Jesusta catijcunaca ima shinataj adoranchij? Ñucanchij jatun mandaj sacerdote Jesucristoca “Dios shayachishca carpa huasipi, Diospajlla ashtahuan chꞌicanyachishca ucupi sirvijmi can. Cai carpa huasitaca mana runacunachu shayachishca” (Hebreos 8:​1, 2). Shinallataj Pabloca: ‘Jesusca huiñai huiñaitami causashpa catin. Chaimantami paipaj randica shujtaj sacerdotecunaca mana tiyanga. Paica ima mapa illaj, juchayujcuna shina mana cajmi can’ nircami. Shinaca Jesusca jucha illaj cashcamantami paipaj juchacunamanta sacrificiocunataca cada punlla mana cuna can. Cutin ¿Diospaj huasipi tiyaj altarcunamanta, sacrificiocunamantaca imatataj yachanchij? Chaicuna imapi chꞌican cashcatami cunanca ricushun.

10. ¿Cobremanta rurashca altarpi cushca sacrificiocunaca imatataj ricuchircacuna?

¹⁰ ¿Judiocunaca ima shinataj adorarcacuna? Diospaj carpa huasipaj canlla ladopica cobremanta rurashca shuj altarmi tiyarca. Chaipica animalcunatami Jehová Diosman sacrificiota shina cujcuna carca (Éxodo 27:​1, 2; 40:29). Shinapish Israelitacunaca chai sacrificiocunata cujpipish paicunapaj juchacunamantaca mana por completo perdonashcacunachu carca (Hebreos 10:​1-4). Punllanta cushca sacrificiocunaca qꞌuipa  punllacuna ashtahuan valishca sacrificiota cunatami ricuchirca. Chai sacrificiomantami gentecunaca paicunapaj juchacunamanta quishpichishca cana carca.

11. ¿Jesusca ima altarpitaj sacrificio shina curirca? (Hebreos 10:​5-7, 10).

¹¹ ¿Jesusta catijcunaca ima shinataj adoranchij? Jehová Diosca Jesustami ñucanchijmanta huañushpa, ñucanchijta quishpichichun cai Allpaman cacharca (Mateo 20:28). Chaimantami bautizarishpaca Jesusca: “Ñucata cachaj Yayapaj munaita rurangapajmi shamurcani” nirca (Juan 6:38; Gálatas 1:4). Chaita rurashpami Jesusca altarpi sacrificio shina curirca. Chai altarca Diospaj munaitami ricuchin. Diospaj munaica paipaj Churi paipaj jucha illaj causaita sacrificio shina cuchunmi carca. Jesusca “shuj cutinllami huiñaipaj curirca”. Chaita rurashcamantami paipi feta charijcunapaj juchacunaca huiñaipaj perdonashca cai tucun (Hebreos 10:​5-7, 10-ta liyipai). Cunanca Diospaj carpa huasipaj ucupi imalla tiyashcata, chaicuna imata ricuchishcatami yachashun.

12. a) ¿Diospajlla chꞌicanyachishca ucumanca picunallataj yaicui tucurcacuna? b) ¿Diospajlla ashtahuan chꞌicanyachishca ucumanca picunallataj yaicui tucurcacuna?

¹² ¿Judiocunaca ima shinataj adorarcacuna? Diospaj carpa huasipaj ucuca qꞌuipata rurashca templocunapaj ucucuna shinami carca. Chaipica ishqui cuartocunami tiyarca. Shujca ‘Diospajlla chꞌicanyachishca ucu’, caishujca ‘Diospajlla ashtahuan chꞌicanyachishca ucu’ nishcacunami carca. Chai ishqui cuartocunapaj chaupipica shuj racu telami tiyarca (Hebreos 9:​2-5; Éxodo 26:​31-33). Diospajlla chꞌicanyachishca ucupica oromanta  rurashca shuj candelero, inciensota rupachingapaj shuj altar, Diosman cushca tandapajpish shuj mesami tiyarca. Chai ucumanca Dios agllashca sacerdotecunallami paicunaman mingashcacunata pajtachingapaj yaicui tucurcacuna (Números 3:​3, 7, 10). Cutin Diospajlla ashtahuan chꞌicanyachishca ucupica oromanta rurashca ari ninacushca arcami tiyarca. Chai arcaca Jehová Dios chaipi cashcatami ricuchij carca (Éxodo 25:​21, 22). Chai ucumanca jatun mandaj sacerdotellami juchacunata quishpichina punllapi yaicui tucurca. Chaitaca huatapica shuj cutinllatami rurajcuna carca. Paica animalcunapaj yahuarhuan chaiman yaicushpami paipaj juchacunamanta, israelitacunapaj juchacunamanta perdonta mañaj carca (Levítico 16:​2, 17). Qꞌuipaca Jehová Diosca paipaj espíritu santota utilizashpami Diospaj carpa huasipaj ucupi imalla tiyashcacuna imata nisha nishcata intindichirca (Hebreos 9:​6-8). e

13. a) ¿Diospajlla chꞌicanyachishca ucuca imatataj ricuchin? b) ¿Diospajlla ashtahuan chꞌicanyachishca ucuca imatataj ricuchin?

¹³ ¿Jesusta catijcunaca ima shinataj adoranchij? Jehová Diosca paipaj espirituhuanmi 144.000 gentecunata paipaj huahuacuna cachun agllashca. Paicunaca jahua pachapica Jesushuanmi sacerdotecuna canga (Apocalipsis 1:6; 14:1). Diospaj carpa huasipi tiyashca Diospajlla chꞌicanyachishca ucuca ungidocuna cai Allpapi cajpiraj Jehová Dios paicunapaj huahuacuna cachun ña agllashcatami ricuchin (Romanos 8:​15-17). Cutin Diospaj carpa huasipi tiyashca Diospajlla ashtahuan chꞌicanyachishca ucuca jahua pachatami ricuchin. Jehová Diosca chaipimi causan. Shinallataj chai ishqui ucucunapaj chaupipi tiyaj racu telaca Jesuspaj aicha cuerpotami ricuchin. Jesusca aichayuj, tulluyuj cashpaca Diospaj huasipi jatun mandaj sacerdote shina sirvingapaj jahua pachamanca mana ri tucurcachu. Pero paipaj jucha illaj cuerpota tucui gentecunamanta sacrificio shina cujpica tucui ungidocunamanmi jahua pachaman rina oportunidadta curca. Ungidocunapish jahua pachaman ringapajca paicunapaj aicha cuerpotami saquina can (Hebreos 10:​19, 20; 1 Corintios 15:50). Jesusca causarishca qꞌuipaca Diospaj huasipi tiyaj Diospajlla ashtahuan chꞌicanyachishca ucumanmi yaicurca. Chai qꞌuipaca tucui ungidocunapishmi chaimanca yaicuncuna.

14. Hebreos 9:​12, 24 al 26-pi nishca shinaca ¿Diospaj huasica imamantataj Diospaj carpa huasita yalli valishca can?

¹⁴ Jehová Diosca paita alli adorachun munashpami paipaj Churita ñucanchijmanta huañuchun cacharca. Shinallataj paitaca sacerdote cachunpishmi churarca. Chaitami Diospaj huasi ninchij. Chai huasica Diospaj carpa huasita yalli valishca can. Diospaj carpa huasipi tiyashca Diospajlla ashtahuan chꞌicanyachishca ucutaca juchayuj gentecunami rurashca carca. Chaimanca jatun mandaj sacerdoteca animalcunapaj yahuarhuanmi yaicuj carca. Shinapish Jesusca chai ucumanca mana yaicurcachu. Paica ‘jahua pachamantaj’ yaicushpami Diospaj ñaupajpi ricurirca. Paica paipaj jucha illaj causaita sacrificio shina cushcata ricuchishpami juchacunata anchuchirca (Hebreos 9:​12, 24-26-ta liyipai). Jesuspaj sacrificioca shujtaj sacrificiocunata yalli valishcami can. Paipaj sacrificiollami tucui juchacunata libre anchuchi tucun. Cunanca cai Allpapi o jahua pachapi causana esperanzata charishpapish tucuicuna Jehová Diospaj huasipi paita adorai tucushcatami ricushun.

15. ¿Diospaj carpa huasipi tiyashca patiopica picunataj Diospajta rurajcuna carca?

¹⁵ ¿Judiocunaca ima shinataj adorarcacuna? Diospaj carpa huasipica shuj patiomi tiyarca. Chai patiopaj muyundijtaca telacunahuanmi tapashcacuna carca. Chai ucupimi sacerdotecunaca Diospajta rurajcuna carca. Shinallataj chai patiopica cobremanta rurashca jatun altarmi tiyarca. Chaipimi rupachishca sacrificiocunata cujcuna carca. Patiopica cobremanta rurashca tanquepishmi tiyarca. Chai tanquepimi sacerdotecunaca manaraj  Diospajta rurashpaca maillarijcuna carca (Éxodo 30:​17-20; 40:​6-8). Chai qꞌuipa shayachishca templocunapica canlla patiopishmi tiyarca. Chai patiopimi mana sacerdote cajcunaca Diosta adorai tucurcacuna.

16. ¿Diospaj huasipi tiyaj patiocunapica picunallataj sirvincuna?

¹⁶ ¿Jesusta catijcunaca ima shinataj adoranchij? Jesushuan sacerdotecuna cangapaj manaraj jahua pachaman rij ungidocunaca Diospaj huasipi tiyaj ucu patiopimi sirvincuna. Cutin, ¿Diospaj carpa huasipi, templopi tiyashca tanquemantaca imatataj yachanchij? Cai Allpapi o jahua pachapi causana esperanzata charishpapish tucuicunami shungupi, yuyaipi, espiritualmente chuya cangapaj esforzarina canchij. Cutin, ¿ungidocunata apoyaj achca gentecuna nishca grupoca maipitaj Jehová Diosta adorancuna? Juanca muscuipi shinami chai grupopi cajcuna jatun tiyarinapaj ñaupajpi tutapish, punllapish Diospajta ruracushcatami ricurca. Cai grupopi cajcunaca Diospaj huasipi tiyaj canlla patiopimi paita sirvincuna. Chai patioca cai Allpa pachatami ricuchin (Apocalipsis 7:​9, 13-15). ¿Tucuicuna Diospaj huasipi paita adorangapaj shuj lugarta charishcamantaca manachu cushilla sintirinchij?

17. ¿Jehová Diosmanca ima sacrificiocunallatataj cui tucunchij?

¹⁷ ¿Ñucanchijcunaca Jehová Diosmanca ima shinataj sacrificiocunata cui tucunchij? Diospaj obra ñaupajman catichunmi ñucanchij tiempohuan, fuerzahuan, imalla charishcacunahuan apoyana canchij. Apóstol Pablo hebreo huauqui panicunaman nishcatapishmi rurana canchij. Paica: “Shuj sacrificiota cuj shina Diosta siempre alabashunchij. Chai sacrificioca paipaj shutita ñucanchij shimihuan tucuicunapaj ñaupajpi huillanami” nircami (Hebreos 13:15). Jehová Diosta tucui shunguhuan sirvingapaj esforzarishpaca paita adorana oportunidadta charishcamanta agradicishcatami ricuchishun.

18. Hebreos 10:​22-25-pi nishca shinaca ¿imatataj rurashpa catina canchij?

¹⁸ Hebreos 10:​22-25-ta liyipai. Pabloca hebreocunaman cachashca cartapaj tucuri partepica imacunallapi ocuparina cashcatami nirca. Por ejemplo, paica Diospaj punlla quichquiyamucushcamanta Jehová Diosta mañanata, ñucanchij esperanzamanta shujtajcunaman huillanata, huauqui panicunahuan tandanacunata, animanacunata manataj saquina cashcatami nirca. Shinallataj Apocalipsis libropaj tucuri capitulocunapica Jehová Diospaj angelca Diosta adorachunmi animan. Paica ishqui cutincuna chaita nishpami chaita rurana importante cashcata ricuchirca (Apocalipsis 19:10; 22:9). Cai yachaipica Diospaj huasi ima cashcata, paita adorana valishca cashcataca alajatami yachashcanchij. ¡Chai yachaicunata amataj cungarishunchij!