Betelmanta huauquicunaca Nueva York llajtapimi WBBR nishca radiopaj shuj jatun huasita shayachi callarircacuna. Paicunaca shuj huata yallimi chaipi trabajarcacuna. Allpata allichishca qꞌuipaca chai proyectopi trabajajcunapajmi shuj jatun huasita shayachircacuna. Shinallataj chai radiopaj imalla minishtirishcacunata churangapajpish shuj jatun edificiotami rurarcacuna. Chaita ruranata tucuchishca qꞌuipaca huauquicunaca minishtirishca aparatocunatami mashcai callarircacuna. Pero huaquin jarcaicunahuanmi chꞌimbapurarcacuna.

Huauquicunaca 91 metrosta charij antenatami shayachina carcacuna. Pero chaita ruranaca sinchimi carca. Antenataca ishqui jatun caspicunapaj chaupipimi shayachina carcacuna. Punta cutin chaita rurasha nishpaca mana pudircacunachu. Pero Jehová Diospaj ayudahuanmi chaitaca rurai tucurcacuna. Chaita rurashpa ayudaj huauqui Calvin Prosserca: “Punta cutin ñucanchijlla antenata shayachi tucushca cashpaca, ñucanchijcuna sinchicuna cashcamanta chaita rurai tucushcatami yuyanchijman carca” nircami. Pero chai huauquicunaca jatun tucunapaj randica Jehová Diospaj ayudahuan chaita rurai tucushcatami intindircacuna. Shinapish shujtaj jarcaicunahuanpishmi chꞌimbapurana carcacuna.

Recienlla radiocuna tiyai callarishcamantami chai radiopaj aparatocunata randinaca sinchi carca. Chaimantami huauquicunaca shuj usashca transmisorta randircacuna. Chai transmisortaca shuj runami rurashca carca. Shinallataj mushuj microfonota randinapaj randica shuj telefonopaj microfonollatami utilizarcacuna. Tucui chai aparatocuna funcionashcata ricungapajmi probarcacuna. Chaimi huauquicunaca cantana libropaj huaquin cantocunata  radiopi cantarcacuna. Huauqui Ernest Loweca chai tuta ima tucushcatami yuyarin. Paica: “Huauquicuna cantacushcataca juez Rutherfordpishmi uyacushca carca b. Paica Brooklyn llajtapimi cashcarca” nircami.

Huauqui Rutherfordca paicunata telefonopi cayashpaca: “Cantanata saquichij. Misicuna huacaricuj shinami cantacunguichij” nishpami asichirca. Huauquicunaca ashata pingarishpami cantanata saquircacuna. Pero chai radiota utilizangapaj ña tucui listo cashcata ricushpaca achcatami cushicurcacuna.

24 de febrero de 1924-taca huauqui Rutherfordca: “Cai radioca Mandaj Jesús ñucanchijman mingashca trabajota pajtachingapajmi sirvinga. Cai radiota uyashpami gentecunaca ima religionta charishpapish Bibliapi nishcacunata, ima punllacunapi causacushcatapish intindi tucungacuna” nircami.

Chai punta conferenciataca achcacunami uyarcacuna. Chaimantami Jehová Diosmanta yachachishpa catingapajca WBBR radiotaca 33 huatacunata utilizarcacuna.

Julio de 1924 huatapica Diosta sirvijcunaca shuj jatun tandanacuitami Columbus llajtapi charircacuna. Chai jatun tandanacuimanca chꞌican chꞌican llajtacunamantami rircacuna. Chaipi cajcunaca árabe, inglés, francés, alemán, griego, húngaro, italiano, lituano, polaco, ruso, escandinavo y ucraniano shimicunapimi conferenciacunata uyarcacuna. Chai jatun tandanacuipi cushca huaquin conferenciacunataca radiopipishmi pasachircacuna. Shinallataj huauquicunaca periodicopipish jatun tandanacuipi imalla yachachishcata huillachunmi mañarcacuna.

Jueves 24 de juliotaca, 5.000 yalli huauqui panicunami predicacionman llujshircacuna. Paicunaca casi 30.000 librocunatami saquircacuna. Achca gentecunahuanpish Bibliamantami estudiai callarircacuna. La Atalaya revistapica “predicashpaca tucuicunami cushilla sintirircanchij” nircami.

Viernes 25 de juliotaca, huauqui Rutherfordca panda religioncunata rimangapajmi shuj cartata liyirca. Chai cartapica: “Politicocuna, religionta pushajcuna, jatun negociota charijcunaca Diospaj gobierno cugrishca bendicioncunamanta ama yachachunmi jarcacuncuna. Paicunaca: ‘Sociedad de Naciones organizaciontami Yaya Diosca cai allpapi mandachun churashca’ nishpami llullancuna” nircami. Chai cartapi ima nishcata gentecunaman  huillangapajmi Diosta sirvijcunaca mana manchashpa predicana carcacuna.

La Atalaya revistapica chai jatun tandanacuiman rij huauqui panicuna chaiman rishcamanta paicunapaj feta sinchiyachishcatami nirca. Shinallataj paicunaca gentecuna jarcasha nijpipish mana manchashpa huillashpa catingapaj allichirishca cashcatami nirca. Chai jatun tandanacuiman rij huauqui Leo Clausca: “Chai jatun tandanacui tucurijpica huauqui Rutherford liyishca cartata gentecunaman cungapajmi ñucanchijpish allichirishca carcanchij” nircami.

Octubre quillapica huauqui panicunaca Eclesiásticos denunciados nishca tratadotami saqui callarircacuna. Chaipica huauqui Rutherford nishcacunami quillcashca carca. Cleveland pueblopimi huaquin huauqui panicunaca chai tratadota saquinaman rishcacuna carca. Pero huauqui Frank Johnsonca chai tratadocunata saquinata utca tucuchishcamantami caishuj huauqui panicunataca 20 minutoscunata shuyana carca. Chai pueblopi causajcunaca huauqui panicuna huillacushcamantami yallitaj pꞌiñarishca carcacuna. Chaimantami huauqui Johnsonca shuj iglesiapi paca tucunaman rirca. Chai iglesiapi mana pi tiyajpimi chai iglesiata pushajpaj Bibliapi, tucui asientocunapipish tratadocunata utca saquishpa rirca. Huauqui panicuna mana shamujta ricushpami huauqui Johnsonca shujtaj ishqui iglesiacunapipish chaillatataj rurarca.

Chai qꞌuipaca huauqui Johnsonca utcashpami huauqui panicunahuan tupanaman rirca. Paicuna chayangacamaca shuj gasolinera huashapimi miticurca. Contracuna chaita pasajpica huauqui Johnsontaca mana ricurcacunachu. Huauqui panicuna ña chayajpica paicunahuanmi chaimanta rirca.

Shuj huauquica: “Pueblomanta llujshicushpaca chai quimsa iglesiacunatami pasarcanchij. Cada iglesiapaj ñaupajpica casi 50 gentecunami shayacushca carca. Huaquincunaca tratadotami liyicurcacuna. Shujtajcunaca chai tratadotaca iglesiata pushajmanmi ricuchicurcacuna. Jehová Diospaj ayudahuanmi chai tratadotaca achcacunaman cui tucurcanchij. Pai ayudashcamantami contracunapish mana llaquichircacuna” nircami.

Por ejemplo, Francia llajtapimi huauqui Józef Krettca, Polonia llajtamanta shamushcacunaman huillarca. Paicunaca minacunapimi trabajajcuna carca. Huauqui Krettca “Huañushcacunaca ñallami causaringa” nishca conferenciatami cugrirca. Shinapish invitacioncunata cucujpimi shuj curaca paipaj iglesiaman rijcunamanca chai conferenciata ama uyagrichun nishpa advertirca. Pero, chaita nijpipish 5.000 gentecunami chai conferenciata uyangapaj tandanacurcacuna. Curapishmi conferenciata uyanaman rishca carca. Chaimi huauqui Krettca ñaupajman pasashpa paipaj crishcacunata difindichun chai curata invitarca. Pero paica mana munarcachu. Huauqui Krettca tucui pai charishca publicacioncunatami gentecunaman curca. Paica: “Chai gentecunaca Diosmantami yachanata munarcacuna” nircami (Amós 8:11).

Huauqui Claude Brownca Costa de Oro llajtapimi predicanaman rirca. Costa de Oroca cunanca Ghana nishca llajtami can. Huauqui Brownca conferenciacunata, publicacioncunata cushpami chaipi causajcunata Bibliamanta yachachun ayudarca. Shuj cutinca John Blankson runami huauqui Brownpaj conferenciata uyanaman rirca. Paica jambicunata ima shina ruranata yachangapajmi estudiacushcarca. Chai conferenciata uyashpaca huauqui Brownpaj yachachishcacuna la verdad cashcatami cuentata curca. Chaimantami Johnca paipaj compañerocunaman imata yachashcata parlarca.

Johnca Bibliapi trinidadmanta mana yachachishcatami intindirca. Chaimantami shuj punllaca shuj  curata trinidadmanta tapungapaj iglesiaman rirca. John chaita tapujpica curaca: “Caimanta llujshi. Canca Diospaj huahuaca mana canguichu. Diablopaj partemi cangui” nircami.

Huasiman chayashpaca Johnca curamanmi shuj cartata escribirca. Chai cartapica curataca tucuicunapaj ñaupajpi trinidadpi imamanta crishcata parlachunmi nirca. Chaimi curaca Johntaca pai estudiacushca universidadpaj directorhuan parlanaman richun nirca. Chai universidadpaj directorca: “¿Ciertochu curamanca escribircangui?” nishpami tapurca.

Johnca: “Ari, escribircanimi” nircami.

Directorca Johntaca: “Curata disculpata mañangapajmi shuj cartata escribina cangui” nircami. Chaimi Johnca cashna nishpa escribirca:

“Ñuca directorca ñucata disculpachunmi quiquinman shuj cartata escribichun nirca. Pero quiquin llullacunata yachachishcata reconocijllapimi disculpata mañasha”.

Directorca John quillcashcata liyishpaca mancharishpami: “John, ¿segurochu cai cartata cachasha ningui?” nirca.

Johnca: “Ari” nircami.

Directorca Johntaca caitami nirca: “Disculpata mana mañajpica cantaca universidadmantami llujchingacuna. Gobiernoca chai curatami apoyan”.

Johnca directortaca: “Can yachachishcata mana intindishpaca tapuicunatami ruranchij ¿nachu?” nircami.

Directorca: “Ari” nircami.

Director chashna cutichijpimi Johnca: “Ima tucushcatami parlagrini. Curaca Bibliamantami yachachicurca. Chaimi ñucaca shuj tapuita rurarcani. Pero paica mana cutichi pudircachu. ¿Chaimantachu disculpata mañana cani?” nishpa tapurca.

Johntaca escuelamantaca mana llujshichircacunachu. Disculpata mañachunpish mana obligarcacunachu.

1924 huatamanta parlashpaca La Atalaya revistaca caitami nirca: “Cunanca ñucanchijcunapishmi David nishcata ni tucunchij. Paica: ‘Jatun macanacuipi macanacuchunpish fuerzatami cushcangui’ nircami (Salmo 18:39). Cai huataca Jehová Diosta sirvijcunaca cushillami alli huillaicunata huillashcanchij. Jehová Dios ayudashcamantami achcata agradicinchij”.

Huata 1924 ña tucuricujpica ashtahuan huillangapajmi pushaj huauquicunaca shujtaj radiota ruranata decidircacuna. Chai radiopi Bibliamanta yachachigrishcamantami chai radiotaca “LA PALABRA” nishpa shutichircacuna. Caru ladocunapi causaj gentecunapish uyachunmi chai radiotaca ashtahuan alli aparatocunahuan rurarcacuna. Chai radiotaca Canadapi causajcunapishmi uyai tucurcacuna.

1925 huatapica Jehová Diosca huauqui panicuna Apocalipsis 12-pi ima nishcata alli intindichunmi ayudarca. Achca huauqui panicunami jahua pachapi ima tucushcata yachashpa, shinallataj Diosta sirvijcunahuan cai allpapi ima tucugrishcata yachashpaca cushilla sintirircacuna. Pero huaquincunaca chaita yachashpaca Diosmantami caruyarcacuna.