1. ¿Jehová Diosca paita sirvijcunamanta preocuparishcataca ima shinataj ricuchin?

 JEHOVÁ DIOSCA ñucanchijmantami preocuparin. Chaimantami ñucanchijcuna cushilla cajpi, llaquilla cajpica cuentata cun (Salmo 37:18). Shinallataj llaquicunata charishpapish paita tucui shunguhuan sirvingapaj esforzaricujta ricushpaca cushillami sintirin. Ashtahuanpish paica ñucanchijtami animasha, sinchiyachisha nin.

2. a) ¿Jehová Dios shungupi llaquilla cajcunataca ima shinataj ayudan? b) ¿Jehová Dios ñucanchijta ayudachunca imatataj rurana canchij?

² Salmo 147:​3-pi nishca shinaca Jehová Diosca ‘shungu pꞌaquirishcacunapaj chugricunatami jambishpa pilluchin’. Chaita nishpaca Jehová Diosca llaquilla cajcunata cꞌuyaihuan ayudaj cashcatami ricuchin. Pero ¿Jehová Dios ñucanchijta ayudachunca imatataj rurana canchij? Caipi yuyashun. Doctorcunaca chugririshca gentecunatami ayudai tucun. Pero alliyasha nishpaca paicunaca doctor ima nishcatami tucuita cazuna can. Cai yachaipica Jehová Dios shungupi llaquilla cajcunata ima shina animaj cashcata, shinallataj Jehová Dios nishcacunata ima shina pajtachina cashcatami yachashun.

JEHOVÁ DIOSPAJCA VALISHCAMI CANCHIJ

3. ¿Maijancunaca imamantataj imapaj mana valij cashcata yuyancuna?

³ Cai millai mundopica cꞌuyaica ña mana tiyanchu. Chaimantami achca gentecunataca imapaj mana valij cashcata crichishcacuna. Por ejemplo, Helen a shuti panica: “Ñuca yayaca yallitaj colerashpaca ñucanchijtaca dimastijmi maltrataj carca. Shinallataj punllantami ñucataca imapaj mana valij cashcata nij carca” nircami. Ñucanchijtapish pani Helenta shinachari maltratashcangacuna.  Tal vez ñucanchijcunataca sinchitami rimajcuna cashcanga o ñucanchijtaca pi mana cꞌuyashcatachari nircacuna. Chaita uyashcamantachari shujtajcuna ñucanchijmanta sustarij cashcata crinaca cunancama sinchi can.

4. ¿Salmo 34:​18-pica Yayitu Diosmantaca imatataj yachachin?

⁴ Cantaca achca gentecunachari llaquichishcacuna. Shinapish Jehová Dios canta achcata cꞌuyashcata, achcata valorashcataca mana cungarinachu cangui. Paica “shungupi llaquilla cajcunapaj cꞌuchullapimi” can (Salmo 34:​18-ta liyipai). Imapaj mana valishcata yuyashpaca Jehová Dios cambaj alli cualidadcunata ricushpa paipajman pushamushcatami yuyarina cangui (Juan 6:44). Yayitu Diosca canta achcata cꞌuyashcamantami canta ayudangapajca siempre listo can.

5. ¿Llaquichishca gentecunata Jesús cꞌuyaihuan tratashcamantaca imatataj yachanchij?

⁵ Jehová Dios ima shina cashcata yachangapajca Jesusmantami yachana canchij. Jesusca cai Allpapi cashpaca llaquichishca gentecunatami cꞌuyaihuan ayudarca (Mateo 9:​9-12). Por ejemplo, millai ungüita charij huarmica alli tucunata munashpami Jesuspaj churanapi tuparirca. Chaita ricushpaca Jesusca chai huarmi sinchi feta charishcamantami animarca (Marcos 5:​25-34). Jesusca Yaya Jehová Dios ima shina cashcatami ricuchin (Juan 14:9). Chaimantami Jehová Dios cantapish valorashcataca seguro cana cangui. Paica paita mashnata cꞌuyashcata, sinchi feta charishcatapishmi ricun.

6. ¿Imapaj mana valij shina sintirishpaca imatataj rurana cangui?

⁶ ¿Imapaj mana valij shina sintirishpaca imatataj rurana cangui? Bibliapimi animachij versocunata liyina cangui. Chai versocunapi yuyashpami Jehová Diospaj valishca cashcata cuentata cungui (Salmo 94:19). b Cutin, shuj  metata mana pajtachi tucushpa o shujtajcuna shina mana achcata rurai tucushpaca mana llaquirinachu cangui. Jehová Diosca can mana rurai pudishcata rurachunca mana mañanchu (Salmo 103:​13, 14). Shinallataj pi canta llaquichishca cajpica “ñuca culpallamantatajmi llaquichirca” nishpaca mana yuyanachu cangui. Yayitu Diosmi shujtajcunata llaquichijcunataca juzganga. Pero llaquichishca cajcunataca ayudangami. Chaitaca manataj cungarinachu cangui (1 Pedro 3:12). Sandrataca uchillaraj cajpica achcatami maltratarcacuna. Paica: “Imapaj mana valishcata ama yuyangapajca siempremi Yayitu Diosta mañani” ninmi.

7. ¿Ñucanchijcuna llaquicunata apashcamantaca llaquilla cajcunataca ima shinataj ayudai tucunchij?

⁷ Jehová Diosca shujtajcunata ayudana yuyaitami canmanpish cui tucun. Gentecunaman predicashpa Jehová Diosta ayudanaca sumaj bendicionmi can (1 Corintios 3:9). Llaquicunata apashcamantami llaquilla cajcunata intindinaca cambajca ashtahuan jahualla canga. Chaimantami paicunataca ayudai tucungui. Huauqui panicuna pani Helenta ayudashca qꞌuipaca paica tranquilami sintirirca. Cunanca paica shujtajcunatapishmi ayudai tucun. Pani Helenca: “Imapaj mana valij shinami sintirij carcani. Pero Jehová Diosmi valishca cashcata cuentata cuchun ñucataca ayudashca. Ashtahuancarin cunanca llaquilla cajcunatami ayudai tucuni” nircami. Pani Helenca cunanca cushillami precursora regular shina sirvicun.

DIOSCA ÑUCANCHIJTA PERDONASHCATA SEGUROS CACHUNMI MUNAN

8. ¿Isaías 1:​18-pica imatataj yachachin?

⁸ Maijancunaca manaraj bautizarishpa o bautizarishca huasha imapi pandarishcamantami yallitaj llaquilla sintirincuna. Shinapish Jehová Dios ñucanchijta cꞌuyashcamanta paipaj Churita ñucanchijmanta huañuchun cachashcatami yuyarina canchij. Chaica shuj sumaj regalo shinami can. Jehová Diosca chai regalota chasquichunmi munan. Chaimantami paica: ‘Cunanca cancuna pandarishcacunata allichingapaj ñucapajman shamuichij’ nin (Isaías 1:​18, Biblia en Quichua Chimborazo, 1989). Shinashpaca Jehová Dioshuan ñucanchij pandarishcacunata allichishca qꞌuipaca paica chaicunataca ña mana yuyachicungallachu. c Chaita rurashpami Yayitu Diosca yallitaj cꞌuyaj cashcata ricuchin. Ashtahuanpish Yayitu Diosca ñucanchij alli ruraicunataca manataj cungaringachu (Salmo 103:​9, 12; Hebreos 6:10).

9. ¿Ñaupa punllacunapi ima shina pandarishcataca imamantataj mana yuyarishpalla causana canchij?

⁹ ¿Can pandarishcacunata yuyarishpa llaquilla sintirishpaca imatataj rurana cangui? Ñaupa punllacunapi ima tucushcata yuyacunapaj randica cunan punllacunapi imata ruracushcata, shamuj punllacunapi imata ruragrishcatami yuyana cangui. Por ejemplo, apóstol Pabloca Jesusta catijcunata catirashpa llaquichishcamantami shungumanta arrepintirirca. Jehová Dios paita perdonashcataca paica seguromi carca (1 Timoteo 1:​12-15). Shinapish ¿Pabloca ima shina pandarishcata yuyarishpallachu causarca? Mana. Paica chaitaca mana rurarcachu. Shinallataj rijsishca fariseo cashpa imallata rurashcata yuyarishpaca mana pasajchu carca (Filipenses 3:​4-8, 13-15). Chaita ruranapaj randica Pabloca Jehová Diospajta rurangapajmi esforzarishpa catirca. Shamuj punllacunapi Jehová Dios cusha nishcacunata chasquina yuyaillapishmi causarca. Ñucanchijpish ñaupa punllacunapi imata rurashcataca mana cambiai tucunchijchu. Pero cunan punllacunapi allicunata rurashpami Jehová Diosta jatunyachi tucunchij. Shinallataj shamuj punllacunapi  bendicioncunata chasquina yuyaillami causana canchij.

10. ¿Shujtajcunata llaquichishcamanta llaquilla sintirishpaca imatataj rurana canchij?

¹⁰ Shinallataj shujtajcunata llaquichishcamantachari maipica llaquilla sintirishun. Chashna sintirishpaca paicunahuan alli tucungapajmi esforzarina canchij. Chaipajca shungumantami perdonta mañana canchij (2 Corintios 7:11). Shinallataj Yayitu Jehová Diostami “ñuca llaquichishca gentecunata ayudapangui” nishpa mañana canchij. Chashna mañajpimi paica ñaupajman catichun, tranquilo sintirichunpish ñucanchijta, paicunatapish ayudanga.

11. ¿Jonasmantaca imatataj yachanchij? ( fotomantapish parlapai).

¹¹ Cutin ama chaillapitaj pandaringapajmi esforzarishpa catina cangui. Shinallataj Jehová Dios imata rurachun mandajpipish tucui shunguhuan chaita pajtachingapajmi esforzarina cangui. Jonastaca Yayitu Diosca Nínive llajtaman richunmi mandarca. Pero Jonasca shujtaj ladomanmi rirca. Chaita rurashcamanta Jehová Dios disciplinajpica Jonasca shungumantami arrepintirirca (Jonás 1:​1-4, 15-17; 2:​7-10). Pero ¿Jehová Diosca paita sirvishpa catichun Jonasmanca shujtaj oportunidadtachu curca? Ari. Chaimi Jehová Dios Nínive llajtaman cutin richun mandajpica Jonasca rato chaitaca rurarca. Jonasca ñaupa punllacunapi pandarishca cashpapish cushicushpami Jehová Dios paiman mingashcata rurarca (Jonás 3:​1-3).

JEHOVÁ DIOSCA ESPÍRITU SANTOTA CUSHPAMI ÑUCANCHIJTA SINCHIYACHIN

12. ¿Ñucanchijta llaquichijpi o ñucanchij familiacuna huañujpica Yayitu Jehová Diosca ima shinataj ñucanchijta animan? (Filipenses 4:​6, 7).

¹² Ñucanchijta achcata llaquichishca cajpi o ñucanchij familiacuna huañujpica Yayitu Diosca espíritu santota cushpami ayudan. Huauqui Ron y pani Carolpaj churi paillataj huañujpi ima shina sintirishcata ricushun. Paicunaca: “Llaquicunahuanmi chꞌimbapurashca carcanchij. Pero cashna jatun llaquitaca mana nunca apashcachu carcanchij. Yallitaj sinchimi carca. Mana dormi tucushpaca Yayitu Diostami mañaj carcanchij. Chashna mañashpami tranquilo sintirij carcanchij” nircacunami (Filipenses 4:​6, 7-ta liyipai). Canpish jatun llaquicunahuan chꞌimbapuracushpaca Yayitu Diostami cutin cutin rogarishpa mañana cangui (Salmo 86:3; 88:1). Shinallataj cutin cutinmi Yayitu Diostaca espíritu santota cuchun mañana cangui. Paica can imalla mañashcataca cutichingatajmi (Lucas 11:​9-13).

13. ¿Jehová Diosca paipaj espirituhuanca ima shinataj ñucanchijtaca ayudai tucun? (Efesios 3:16).

¹³ ¿Ima jatun llaquita apashcamantaca shaicushca, fuerza illajchu sintirishcangui? Jehová Diosmi espíritu santota cushpa paita sirvishpa catichun ayudai tucun (Efesios 3:​16-ta liyipai). Pani Floraca paipaj cusahuanmi misionerocuna shina sirvij carca. Shinapish paipaj cusa shujtajhuan traicionajpimi divorciarircacuna. Pani Floraca: “Shaicushca, fuerzas illajmi sintirircani. Pero ñaupajman catingapajca Yayitu Diostami espíritu santota cuchun mañarcani. Chai llaquita apana yallitaj sinchi laya ricurijpipish Jehovami ahuantashpa catichun ayudarca” nircami. Pani Floraca Jehová Dios paita siempre ayudanatami segura can. Chaimi paica cashna nirca: “Salmo 119:​32-pi nishcacunaca ñuca causaipimi pajtarishca. Chaipica: ‘Quiquin mandashcacunapimi callpashpa purisha. Ñuca shunguta quiquin cushichijpimi chashna purisha’ ninmi”.

14. ¿Jehová Dios espíritu santota cushpa ñucanchijta ayudachunca imatataj rurana canchij?

¹⁴ ¿Espíritu santota cuchun Yaya Diosta mañashca qꞌuipaca imatataj rurana cangui? Tandanacuicunaman ringapaj, predicacionman llujshingapajpishmi esforzarina cangui. Shinallataj  Jehová Diospaj yuyaicunata yachangapajca Bibliatami liyina cangui. Caicunata rurashpami espíritu santota chasquingui (Filipenses 4:​8, 9). Shinallataj Bibliata liyicushpaca Diosta sirvijcuna ima llaquicunallata apashcata, Jehová Diospish paicunata ima shina ayudashcatapish yuyai. Párrafo 6-pi nishca shinaca pani Sandraca achca llaquicunatami ahuantana carca. Paica: “Josepaj ejemplomantami achcata yachai tucushcani. Paica achca llaquicunata apashca cashpapish Jehová Diosmantaca manataj caruyarcachu” nircami (Génesis 39:​21-23).

JEHOVÁ DIOSCA HUAUQUI PANICUNAHUANMI ÑUCANCHIJTA CUSHICHIN

15. a) ¿Picunataj ñucanchijta animai tucuncuna? b) ¿Huauqui panicunaca ima shinataj ayudancuna? (Fotomantapish parlapai).

¹⁵ Llaquilla cai horasca huauqui panicunami ñucanchijta ayudai tucuncuna (Colosenses 4:11). Paicuna cushichijpimi Jehová Dios ñucanchijta cꞌuyaj cashcata cuentata cushun. Shinallataj huauqui panicunaca ñucanchijcuna ima shina sintirishcata uyashpa o ñucanchij ladopi cashpami animai tucuncuna. Huaquinpica shuj versopi ima nishcata yuyachishpa o ñucanchijhuan mañashpami cꞌuyaita ricuchingacuna (Romanos 15:4). d Cutin, maijan ratoca huauqui panicunaca Jehová Dios yuyashca shina yuyachunmi animangacuna. Shinallataj huaquinpica micunitata, imalla minishtishcata cushpami ayudangacuna.

16. ¿Shujtajcuna ñucanchijta ayudachunca imatataj rurana canchij?

¹⁶ Shujtajcuna ñucanchijta ayudachunca huaquinpica paicunapaj ayudata mañanami minishtiringa. Huauqui panicunaca ñucanchijta cꞌuyashcamantami ayudasha nincuna (Proverbios 17:17). Pero ñucanchijcuna ima shina sintirishcata, imata minishtishcataca manachari cuentata cungacuna (Proverbios 14:10). Shungupi llaquilla sintirishpaca experienciata charij huauqui panicunamanmi ima shina sintirishcata parlana cangui. Imata minishtishcatapishmi  paicunamanca huillana cangui. Tal vez canhuan alli apanacuj shuj o ishqui ancianocunahuanmi parlai tucungui. Huaquin panicunaca experienciata charij panicunahuan parlashpami tranquilo sintirishcacuna.

17. a) ¿Huaquinpica imamantataj huauqui panicunamanta caruyanata munashun? b) ¿Huauqui panicunamanta ama caruyangapajca imatataj rurana canchij?

¹⁷ Shujtajcunamanta ama caruyaichu. Llaquilla sintirishpaca maipica ñucanchijllami canata munashun. Huaquinpicarin huauqui panicunaca ñucanchijcuna ima shina sintirishcataca mana intindingacunachu. O tal vez mana alli yuyashpami imatapish ningacuna (Santiago 3:2). Pero chashna tucujpipish huauqui panicuna ñucanchijta ayudachunmi saquina canchij. Huauqui Gavinca congregacionta pushaj ancianomi can. Paica depresión nishca ungüitami charin. Huauqui Gavinca: “Llaquilla cai horasca huauqui panicunahuan canataca mana munanichu” nircami. Pero chashna sintirishpapish paica huauqui panicunamantaca mana caruyanchu. Ashtahuanpish paicunahuan cushilla pasangapajmi esforzarin. Cutin Amy shuti panica: “Achca llaquicunata charishcamantami shujtajcunapi confianaca ñucapajca sinchi can. Pero Jehová Dios shina turi ñañacunata cꞌuyangapaj, paicunapi confiangapajmi esforzaricuni. Chaita rurashpa Jehová Diospaj shunguta cushichishcamantami ñucapish cushilla sintirini” nircami.

TRANQUILO SINTIRINGAPAJ JEHOVÁ DIOS CUSHA NISHCACUNAPI YUYAI

18. a) ¿Shamuj punllacunapica ima shinataj causashun? b) ¿Cunan punllapica imatataj rurana canchij?

¹⁸ Jehová Diosca ñallami llaquicunata, nanaicunata tucuchinga. Chaita yuyanami tranquilo sintirichun ayudan (Apocalipsis 21:​3, 4). Chai punllacunapica ñaupa tiempopi, cunan tiempopi charishca llaquicunataca ña mana yuyarishunchu (Isaías 65:17). Ima shinami ricushcanchij Jehová Diosca chugricunata jambij shinami llaquicunata ahuantachun ayudan. Paica ñucanchijcuna tranquilo sintirichunca achca ayudacunatami cushca. Chai ayudacunata aprovechashunchij. Yayitu Dios ñucanchijmanta preocuparishcatapish amataj cungarishunchij (1 Pedro 5:7).