ÑAUPA tiempopi causaj israelitacunapajca cantocunata cantana, musicata uyanaca achca valishcami carca. Bibliapica cantajcunamanta, instrumentocunata tocajcunamantami parlan. Por ejemplo, Salmos, El Cantar de los Cantares y Lamentaciones nishca librocunataca cantangapajmi escribircacuna. Musicamanta parlaj shuj libroca israelitacuna huaquin ruraicunata ruracushpa musicata tocacujta uyajcuna cashcata, cantocunata cantajcuna cashcatami nin.

Israelitacunaca casi siempremi musicata uyajcuna o cantajcuna carca. Israelitacunaca ima shina sintirishcata ricuchingapajmi cantajcuna carca (Isaías 30:29). Por ejemplo, mushuj rey tiyajpi, soldadocuna macanacuipi ganajpi o Diosta adorangapaj fiestacuna tiyajpica huarmicunaca panderetacunahuanmi cantajcuna, bailajcuna carca (Jueces 11:34; 1 Samuel 18:​6, 7; 1 Reyes 1:​39, 40). Shinallataj israelitacunaca pi huañushcamanta llaquilla cashcata ricuchingapajmi cantajcuna carca (2 Crónicas 35:25). Shinashpaca israelitacunapajca musicata uyanapish, cantanapish achca valishcami carca.

Israelta llajtata mandajcunaca musicata uyanatami achcata munajcuna carca. Por ejemplo rey Saulca arpapi tocashcata uyangapajmi Davidtaca paipaj palacioman cayarca (1 Samuel 16:​18, 23). Shinallataj David ña rey tucushpaca cantangapaj huaquin instrumentocunatami rurarca. Sumaj cantocunatapishmi escribirca. Ashtahuanpish Diospaj huasipica cantajcunatami churarca (2 Crónicas 7:6; Amós 6:5). Rey Salomonpish paipaj palaciopica cantaj huarmicunata, cantaj cꞌaricunatami charirca (Eclesiastés 2:8).

Israelitacunaca Jehová Diosta adorangapajmi cantajcuna carca. Por ejemplo, Diospaj huasipica instrumentocunata tocaj 4.000 cꞌaricunami tiyarca (1 Crónicas 23:5). Paicunaca cimbalocunata, arpacunata, trompetacunata, shujtaj instrumentocunatapishmi tocajcuna carca (2 Crónicas 5:12). Pero mana paicunallachu Jehová Diostaca musicahuan adorajcuna carca. Achca israelitacunapish Jerusalenpi tiyaj fiestacunaman ricushpaca Salmo cancioncunatami cantajcuna carca. Chai cantocunataca Canciones de la Subidas nishca shutihuanmi rijsijcuna carca (Salmos 120-134). Judiocuna quillcashcacunapi nishca shinaca israelitacunaca Pascua fiestapica huaquin salmocunatami cantajcuna carca. a

Cunan punllacunapipish Jehová Diosta sirvijcunapajca musicaca valishcami can (Santiago 5:13). Ñucanchijca Jehová Diosta adorangapajmi cantocunata cantanchij (Efesios 5:19). Ñucanchij huauqui panicunahuan Jehová Diosta tandalla cantashpaca cushillami sintirinchij (Colosenses 3:16). Shinallataj llaquicunata charishpaca Jehová Diosta cantashpami animarinchij. Chashnami ñaupajman catingapaj fuerzasta japinchij (Hechos 16:25). Jehová Diospi tucui shunguhuan confiashcata, paita achcata cꞌuyashcata ricuchingapajca tucui shunguhuanmi cantana canchij.