YACHAI 37
Jehová Diosta cazushunchij
“Causaita cuj jahua pachapi caj Yayatacarin chaita yallitamari cazuna canchij” (HEBREOS 12:9).
CANTO 9 Jehovami ñucanchij Jatun Mandaj
CAITAMI YACHASHUN *
1. ¿Jehová Diostaca imamantataj cazuna canchij?
JEHOVÁ DIOSTACA tucuipimi cazuna * canchij. ¿Imamanta? Paimi ñucanchijta rurarca. Chaimantami imata rurana cashcata mandai tucun (Apocalipsis 4:11). Cai tucui huatacunapica achca gentecunami shujtajcunata mandashpa causashcacuna. Shinapish Jehová Diosllami yachaj, cꞌuyaj mandaj can. Chaimantami paita cazuna canchij (Éxodo 34:6; Romanos 16:27; 1 Juan 4:8).
2. Hebreos 12:9 al 11-pi nishca shinaca ¿imamantataj Jehová Diosta cazuna canchij?
2 Jehová Diosca mana paita respetashcallamantachu cazuchun munan. Ashtahuanpish paita cꞌuyashcamantami cazuchun munan. Apóstol Pabloca judiocunamanca ‘ñucanchij allipaj Jehová Dios yachachishcamantami paita cazuna canchij’ nishpami quillcarca (Hebreos 12:9-11-ta liyipai). *
3. a) ¿Jehová Diosta cazushcataca ima shinataj ricuchinchij? b) ¿Ima tapuicunamantataj yachashun?
3 Mana ñucanchij yuyashca shina imatapish rurashpami Jehová Diosta cazushcata ricuchishun (Proverbios 3:5). Shinallataj Yaya Dios yachaj, cꞌuyaj, llaquij cashcata intindishpaca paitaca jahuallami cazushun (Salmo 145:9). Diosta alli rijsishpaca paitaca ashtahuanmi cꞌuyashun. Diosta cꞌuyashcamantami mana achca mandashcacunata minishtishun. Ashtahuancarin Yaya Dios shina yuyangapaj, rurangapajmi esforzarishun (Salmo 97:10). Pero ¿maipica Diosta cazunaca imamantataj sinchi can? ¿Ancianocuna, yaya mamacunapish Nehemiasmanta, rey Davidmanta, Jesuspaj mamamantaca imatataj yachai tucuncuna? Cai tapuicunatami yachashun.
¿MAIPICA IMAMANTATAJ DIOSTA CAZUNACA SINCHI CAN?
4, 5. Romanos 7:21 al 23-pi nishca shinaca ¿imamantataj maipica Diosta cazunaca sinchi can?
4 Tucuicunami juchayujcuna canchij. Chaimantami maipica Diosta tucuipi cazunaca sinchi ricurin. Adán Evaca Yaya Dios ama micungui nishca frutatami micurcacuna. Chashnami Diosta mana cazurcacuna (Génesis 3:22). Cunan punllacunapish paicuna shinallatajmi achca gentecunaca Diosta mana cazuncuna. Cai gentecunaca imatapish paicuna munashca shinami decidincuna.
5 Diosta cꞌuyashpapish pai munashca shinaca manachari tucuita pajtachinchij. Apóstol Pablohuanpish chaimi tucurca (Romanos 7:21-23-ta liyipai). Pero paica Diosta cazungapajmi esforzarirca. Ñucanchijpish Pablo shinami mana alli yuyaicunata punllanta anchuchingapaj esforzarina canchij.
6, 7. ¿Imamantataj huaquinpica Jehová Diosta cazunaca sinchi can? Shuj ejemplomanta parlai.
6 Ñucanchij huiñashca llajtapi causajcuna shina yuyashcamantami maipica Diosta cazunaca sinchi canga. Diospaj yuyaihuan gentecunapaj yuyaihuanca mana igualchu can. Chaimantami gentecuna shina ama yuyangapaj esforzarina canchij. Shuj ejemplota ricushun.
7 Maijan llajtacunapica jovencuna achca cullquita charinallapi yuyachunmi obligancuna. Mary * shuti panihuanca chaimi tucurca. Paica manaraj Jehová Diosta rijsishpaca paipaj llajtapi tiyaj famoso universidadpimi estudiarca. Paipaj familiaca achca cullquita ganangapajca alli trabajotami charina cangui nishpami obligarcacuna. Shujtajcunapajpish rijsishcami cana cangui nircacunami. Marypish chaitami munarca. Shinapish Jehová Diosta rijsishpaca paipaj yuyaicunatami cambiarca. Paica: “Maipica cullquiyuj tucungapajmi negociocunata churana oportunidadta charini. Pero negociocunata churashpaca Jehová Diostaca mana tanto sirvi tucushachu nishpami yuyani. Ñuca yaya mama cullquillapi yuyashpa causachun huiñachishcamantami maipica Diosta cazunaca sinchi can. Chaimantami Yaya Diostaca canta sirvingapaj cashna trabajocuna ama jarcachun nishpa mañani” ninmi (Mateo 6:24).
8. ¿Picunamantataj yachagrinchij?
8 Jehová Diosta cazunaca ñucanchijpajllatajmi alli can. Ancianocuna, yaya mamacunapish Diosta cazushpaca shujtajcunatami ayudai tucuncuna. Chaimantami cunanca ñaupa punllacunapi Diosta sirvijcunamanta yachashun.
ANCIANOCUNA NEHEMÍAS SHINA CAICHIJ
Ancianocunaca Nehemías shinami Tandanacuna Huasita allichincuna. (Párrafos 9 al 11-ta ricui). *
9. ¿Nehemiasca imatataj yachaj chayarca?
9 Jehová Diosca paita sirvijcunata alli cuidachunmi ancianocunaman mingashca 1 Pedro 5:2). Ancianocunaca alli cuidangapajca mandaj Nehemías Diospaj pueblota ima shina tratashcamantami yachai tucuncuna. Nehemiasca Judá llajtata mandaj cashcamantami achca autoridadta charirca (Nehemías 1:11; 2:7, 8; 5:14). Paica judiocuna Diospaj huasita mapayachishcata, levitacunamanpish leypi mandashca shina contribucioncunata mana cushcatami yachaj chayarca. Shinallataj judiocuna sábado punllata mana respetajcuna cashcata, huaquincunacarin shujtaj llajtamanta caj huarmicunahuan cazarajcuna cashcatami yachaj chayarca (Nehemías 13:4-30).
(10. ¿Judiocuna Diosta mana cazujpica Nehemiasca imatataj rurarca?
10 Nehemiasca mandaj cashpapish judiocuna paita cazuchunca mana obligarcachu. Chaipaj randica paicunata Jehová Dios ayudachunmi tucui shunguhuan mañarca. Shinallataj Diospaj mandashcacunatami yachachirca (Nehemías 1:4-10; 13:1-3). Nehemiasca humilde runami carca. Chaimantami Jerusalén pircacunata cutinllataj shayachishpa ayudarca (Nehemías 4:15).
11. 1 Tesalonicenses 2:7, 8-pi nishca shinaca ¿ancianocunaca ima shinataj huauqui panicunata tratana can?
11 Ancianocunaca manachari Nehemías charishca problemacunata charincuna. Pero paimantami achcata yachai tucuncuna. Por ejemplo, ancianocunaca huauqui panicunata ayudangapajmi achcata trabajancuna. Autoridadta charishpapish mana jatun tucushpami tucuicunaman cꞌuyaita ricuchincuna (1 Tesalonicenses 2:7, 8-ta liyipai). Shinallataj sumaj shimicunahuan parlashpami humilde cashcata ricuchincuna. Andrew shuti huauquica achca huatacunatami anciano can. Paica: “Huauqui panicunaca ancianocuna cꞌuyaihuan, alli tratajpica cushillami sintirincuna. Chashna cꞌuyaita ricuchijpica ancianocunataca jahuallami cazuncuna” ninmi. Tony shuti huauquipish achca huatacunatami anciano can. Paica: “Ñucaca Filipenses 2:3-pi ima nishcata cazushpami shujtajcunata yalli cashcata ama yuyangapaj esforzarini. Chaimantami shujtajcuna ñucata cazuchunca mana obligani” ninmi.
12. ¿Ancianocunaca imamantataj humildes cana can?
12 Jehová Diosca tucuita mandaj cashpapish cumurij shinami humildecunataca ñutu allpamanta jatarichin (Salmo 18:35; 113:6, 7). Pero jatun tucushcacunataca manataj ricunachinchu (Proverbios 16:5). Chaimantami ancianocunaca Jehová Dios shina humildes cana can.
13. ¿Ancianocunaca imamantataj alli yuyashpa parlana can?
13 Ancianocunaca alli yuyashpami parlana can. Chaita mana rurashpaca shujtajcuna paicunata mana respetajpica pꞌiñarishpami rimai tucuncuna (Santiago 1:26; Gálatas 5:14, 15). Párrafo 11-pi parlashca huauqui Andrewca: “Maipica shuj huauqui ñucata mana alli tratajpica paitapish chashnallataj tratana mirasmi yuyaiman shamun. Pero ñaupa punllacunapi Diosta sirvijcunamanta yachashpaca humilde, mana utca pꞌiñarij cana importante cashcatami yuyarini” ninmi. Ancianocunaca huauqui panicunata, shujtaj ancianocunatapish sumaj shimicunahuanmi parlana can. Chaita rurashpaca Jehová Diosta cazushcatami ricuchincuna (Colosenses 4:6).
YAYACUNA REY DAVID SHINA CAICHIJ
14. ¿Jehová Diosca yayacunamanca imatataj mingashca?
14 Jehová Diosca yayacunatami familiata pushachun churashca. Shinallataj huahuacunata cuidachun, alli huiñachichunmi mingashca (1 Corintios 11:3; Efesios 6:4, NM). Pero caica mana nisha ninchu yayaca pai munashca shina mandana cashcata. Diosmi familiacunata callarichirca. Chaimantami familiata ima shina cuidashcata yayacunaca Jehová Diospaj ñaupajpi ricuchingacuna (Efesios 3:14, 15, NM). Yayacunaca Dios munashca shina familiata cuidashpaca Diosta cazushcatami ricuchincuna. Rey Davidpaj causaimantapishmi yachai tucuncuna.
Diosta sirvij yayaca Diosta mañacushpaca humilde cashcatami ricuchina can. (Párrafos 15 y 16-ta ricui). *
15. ¿Yayacunapajca Davidca imamantataj alli ejemplo can?
15 Jehová Diosca Davidtaca paipaj familiata, Israel llajtatapish mandachunmi churarca. Rey cashcamantami achca autoridadta charirca. Pero huaquinpica imatapish mana alli decidishcamantami jatun juchacunapi urmarca (2 Samuel 11:14, 15). Shinapish Jehová Dios paita corregijpica cazurcami. Chaimantami shungumanta arrepintirishpa Jehová Diosta ayudahuai nishpa mañarca (Salmo 51:1-4). Huarmicunapish consejota cujpica humilde cashcamantami chasquirca (1 Samuel 19:11, 12; 25:32, 33). Ashtahuancarin juchacunapi ña mana urmashpami Jehová Diosta sirvishpa catirca.
16. ¿Rey Davidmantaca yayacunaca imatataj yachacunguichij?
16 ¿Yayacunaca Davidmantaca imatataj yachacunguichij? Jehová Dios familiata pushachun churajpipish mana maipish cachun mandanachu canguichij. Imapi pandarishcamanta pi consejocunata cujpica allimi chasquina canguichij. Chaita rurajpica huarmi, huahuacunapish respetangacunami. Shinallataj familiahuan Diosta mañacushpaca ima shina sintirishcatami huillana canguichij. Chaimi cancunapaj familiaca Diospaj ayudata minishtishcata yachangacuna. Pero tucuimanta yallica Diosta sirvina yuyaillami causana canguichij (Deuteronomio 6:6-9). Yayacunapaj alli ejemploca familiapajca achca valishcami can.
MAMACUNA JESUSPAJ MAMA SHINA CAICHIJ
17. ¿Jehová Diosca mamacunamanca imatataj cushca?
17 Jehová Diosca mamacunapish huahuacunata alli huiñachichunmi huaquin responsabilidadcunata cushca (Proverbios 6:20). Por ejemplo, mamacunaca paicunapaj rimaicunahuan, ruraicunahuanmi yachachi tucuncuna. Chaitaca huahuacunaca toda la vidami yuyaringacuna (Proverbios 22:6). Cunanca Jesuspaj mama Mariamanta yachashun.
18, 19. ¿Mariamantaca mamacunaca imatataj yachacunguichij?
18 Mariaca Dios yachachishcacunataca allimi rijsirca. Shinallataj Yaya Diostaca shungumantami respetaj carca. Chaimantami paipaj alli amiga carca. Ashtahuancarin Dios mandashcata pajtachingapajmi paipaj causaipi cambiocunata rurarca (Lucas 1:35-38, 46-55).
Mamacunaca shaicushca cashpapish, colerahuan cashpapish huahuacunaman cꞌuyaita ricuchingapajmi esforzarina can. (Párrafo 19-ta ricui). *
19 ¿Mariamantaca mamacunaca imatataj yachacunguichij? María shinami Bibliata estudiashpa, Yaya Diostapish mañana canguichij. Chashnami paipaj alli amiga canguichij. Shinallataj Diosta cushichingapaj cancunapaj causaipi cambiocunata rurana cajpica ruranami canguichij. Por ejemplo, cancunapaj yaya mamacunaca rato colerashpachari cancunata sinchita rimaj carca. Chaimantachari cancunapish huahuacunataca chashna shina rimashpami huiñachina canchij nishpa yuyanguichij. Tal vez huahuacunata ima shina huiñachinatami Bibliapi yachashcanguichij. Pero shaicushca Efesios 4:31). Chashna sintirishpaca chai ratomi Jehová Diosta mañana canguichij. Lydia shuti mamaca: “Ñuca churi mana cazujpi ama sinchita rimangapajmi Jehová Diostaca shungu ucupi mañani” ninmi (Salmo 37:5).
rato huahuacuna mana cazujpica pacienciata ricuchinaca sinchichari can (20. a) ¿Huaquin mamacunapajca imataj sinchi can? b) ¿Cꞌuyaita ricuchingapajca mamacunaca imatataj rurana canguichij?
20 Huaquin mamacunapaj yaya mamacunaca paicuna uchilla cajpimi mana cꞌuyaita ricuchishcacuna. Chaimantami huaquin mamacunapajca huahuacunaman cꞌuyaita ricuchinaca sinchi can (Tito 2:3, 4). Pero cai mamacunaca mana paicunapaj yaya mamacuna shinachu cana can. Diosta cazuj mamacunaca huahuacunaman ima shina cꞌuyaita ricuchinatami yachana canguichij. Chaipajca cancunapaj yuyaitami cambiana canguichij. Sinchi cajpipish pudinguichijmi. Cꞌuyaita ricuchingapaj esforzarishpaca familiahuanmi cushilla causanguichij.
DIOSTA CAZUSHPA CATISHUNCHIJ
21, 22. Isaías 65:13, 14-pi nishca shinaca ¿Jehová Diosta cazushpaca ima shinataj causashun?
21 Rey Davidca: “Mandaj Dios mandashcacunaca mana pandachu. Ashtahuanpish shunguta cushichijmi. Mandaj Dios ima shina causachun nishcacunaca chuyami, ñahuicunatapish achijyachijmi. Cambajta rurajca chai shimicunahuan cunashcapishmi cani. Chaicunata cazujpajca, sumaj japinami tiyan” nircami (Salmo 19:8, 11). Cunan punllacunapish Diosta cazujcunallami cushilla causancuna (Isaías 65:13, 14-ta liyipai).
22 Ancianocuna, yaya mamacunapish Jehová Diosta cazushpaca alli causaitami charingacuna. Familiahuanpish huauqui panicunahuanpish tandallami causangacuna. Ashtahuancarin Jehová Diospaj shungutami cushichingacuna (Proverbios 27:11).
CANTO 123 Diospaj organizacionta tucuipi cazushunchij
^ par. 5 Cai yachaipica Jehová Diosta imamanta cazuna cashcatami yachashun. Shinallataj Nehemiasmanta, rey Davidmanta, Jesuspaj mamamantami yachashun. Paicunamanta ancianocunapish, yaya mamacunapish imata yachai tucushcatami ricushun.
^ par. 1 ALLI INTINDISHUNCHIJ: Gentecunaca shujtajcunata cazunataca mana munancunachu. Pero Diosta sirvijcunaca mana paicuna shinachu canchij. Chaimantami Diosta cazunata agllashcanchij.
^ par. 2 Hebreos 12:9-11, NM: “Ashtahuanpish ñucanchij yayacuna corregijpica allimi uyajcuna carcanchij. ¿Manachu causaita cuj ñucanchij Yayatacarin cazushpa causana canchij? Ñucanchij yayacunaca asha tiempollatami paicuna yuyashca shina corregij carca. Shinapish Diosca ñucanchij allipaj, paipaj ñaupajpi jucha illaj ricurichunmi corregin. Corregij ratoca mana cushilla sintirinchijchu. Pero corregishcacunata alli chasquishpaca allita rurajmi tucunchij”.
^ par. 7 Huaquin shuticunatami cambiashcanchij.
^ par. 63 FOTOCUNAMANTA: Nehemiasca Jerusalén pircacunata shayachishpami ayudacun. Pai shinami shuj ancianopish paipaj churindij Tandanacuna Huasita allichicun.
^ par. 65 FOTOCUNAMANTA: Shuj yayaca paipaj familiahuan Diosta mañashpami pai ima shina sintirishcata parlacun.
^ par. 67 FOTOCUNAMANTA: Shuj huahuaca videojuegospi pugllashcamantami deberta mana rurashca. Chaimantami paipaj mamaca shaicushca cashpapish mana pꞌiñarishpa rimacun.