1. ¿Apóstol Juanca ima llaquicunatataj chꞌimbapuracurca?

JESÚS huacharishca qꞌuipa manaraj 100 huatacuna pajtarijpimi Apóstol Juanca sinchi llaquicunata chꞌimbapuracurca. Paica mayorlla cashpami Patmos islapi prezu carca. Shinallataj último apostolmi cashcanga (Apocalipsis 1:9). Apóstol Juanca panda yachachijcuna huauqui panicunata pandachishpa chꞌicanyachicushcatami yacharca. Chaimantami Diosta alli sirvijcunaca ña chingaricuj laya carca (Judas 4; Apocalipsis 2:15, 20; 3:1, 17).

2. Apocalipsis 7:9 al 14-pi nishca shinaca ¿imatataj Juanca shuj muscuipi ricurca? Página 1-pi tiyaj fotota ricui.

² Cai llaquicunata chꞌimbapuracuj horasmi Juanca shuj muscuita charirca. Chai muscuipica shuj angelca chuscu angelcunataca: ‘Ñucanchij Diospajta rurajcunata frentepi sellota churangacama, cai pachata ama ima llaquita ruraichijchu’ nircami (Apocalipsis 7:1-3). Diospajta rurajcunaca Jesushuan jahua pachapi mandagrij 144 mil agllashcacunami can (Lucas 12:32; Apocalipsis 7:4). Chai qꞌuipaca Juanca: “Pi mana yupaipaj yallitaj achcacunatami ricurcani. Paicunaca tucui llajtacunamanta, chꞌican chꞌican aillucunamanta, chꞌican chꞌican pueblocunamanta, chꞌican chꞌican rimaicunamantami jatun tiyarinapi tiyacujpaj ñaupajpi, Ovejapaj ñaupajpipish shayacurcacuna” nircami (Apocalipsis 7:9-14-ta liyipai). Juanca shamuj punllapi achca gentecuna Diosta adorana cashcata ricushpami cushilla sintirirca.

3. a) ¿Juanpaj muscuica imamantataj ñucanchij feta sinchiyachin? b) ¿Cai yachaipica imatataj yachashun?

³ Chai muscuita ricushpami Juanpaj feca ashtahuan sinchiyarca.  Juanpaj muscuica cunan punllacunapimi pajtaricun. Achca gentecunaca Diospaj pueblomanmi yaicucuncuna. Paicunaca jatun llaqui punllamanta quishpirishpa, cai Allpapi huiñai huiñaita causanatami shuyacuncuna. Chaita ricushpami ñucanchij feca ashtahuan sinchiyan. Cai yachaipimi Jehová Diosca 80 huatacuna huashaman picuna yallitaj achcacuna cashcata intindichishcata yachashun. Shinallataj yallitaj achcacuna huaranga huaranga gentecuna cashcata, chꞌican chꞌican llajtacunamanta cashcatami yachashun.

4. a) ¿Jesusta catinchij nij religioncunaca imatataj yachachincuna? b) ¿Bibliamanta yachacujcunaca imatataj crircacuna?

⁴ Bibliapica cazuj gentecunaca cai Allpapimi huiñaita causangacuna ninmi. Pero Jesusta catinchij nij religioncunaca allita rurajcunaca huañushca qꞌuipaca cielomanmi rinchij nishpami yachachincuna (2 Corintios 4:3, 4). Cutin Bibliamanta yachacujcunaca * 100 yalli huatacuna huashamanca mana chaita crircacunachu. Paicunaca 1879 huatamantami Watch Tower nishca revistata rurarcacuna. Cunanca chai revistataca Huillaj revista nishpami rijsinchij. Bibliamanta yachacujcunaca, achca cazuj gentecuna mana jahua pachapi causagrina cashcata, ashtahuanpish cai Allpapi huiñaita causana cashcatami crircacuna. Chaita crishpapish achca cazuj gentecuna picuna cashcataca mana yacharcacunachu (Mateo 6:10).

5. ¿Bibliamanta yachacujcunaca imatataj intindircacuna?

⁵ Bibliamanta yachacujcunaca huaquincuna Jesushuan jahua pachapi mandangapaj agllashcacuna cashcatami intindircacuna (Apocalipsis 14:3). Cai agllashcacunaca 144 mil gentecunami can. Paicunaca cai Allpapi cashparajmi Diosta alli sirvijcuna cashcata ricuchincuna. Pero ¿yallitaj achcacunaca picunataj can?

6. ¿Bibliamanta yachacujcunaca yallitaj achcacunamantaca imatataj yuyarcacuna?

⁶ Juanca yallitaj achcacuna jatun tiyarinapaj ñaupajpi, Ovejapaj ñaupajpipish shayacujtami ricurca (Apocalipsis 7:9). Cai shimicunata liyishpami Bibliamanta yachacujcunaca yallitaj achcacunapish, 144 milcunapish cielopi causana cashcata yuyarcacuna. Bibliamanta yachacujcunapajca cai ishqui grupocunaca ¿imapitaj chꞌican carca? Paicunaca: “Yallitaj achcacunaca cai Allpapi cashpa Diosta mana tucuipi cazushcamanta, panda religioncunahuan chagrurishcamantapish Jesushuan jahua pachapi mana mandai tucungachu” nishpami yuyarcacuna. “Shinallataj yallitaj achcacunaca Diosta mana tucui shunguhuan cꞌuyashcamanta jatun tiyarinacunapica mana tiyaringacunachu, ashtahuanpish jatun tiyarinapaj ñaupajllapimi shayaringacuna” nishpami yuyarcacuna.

7. a) ¿Bibliamanta yachacujcunaca Jesús mil huatata mandacujpica picuna cai Allpapi causanatataj yuyarcacuna? b) ¿Jesús manaraj shamujpi Diosta alli sirvijcuna maiman rinatataj yuyajcuna carca?

⁷ Bibliamanta yachacujcunaca “144 mil agllashcacunapish yallitaj achcacunapish cieloman rishca qꞌuipami achca gentecunaca cai Allpapi saquiringacuna. Shinallataj chai gentecunaca Jesús cai pachata mil huatata mandacujpimi achca bendicioncunata chasquina oportunidadta charinga” nishpami yuyajcuna carca. “Cai Allpapi saquirij achca gentecunaca Jesús cai pachata  manaraj mandacujpica Diosta mana sirvingacunachu. Ashtahuanpish Jesús mandacujpimi Diosmanta yachangacuna. Shinapish Diosta cazujcunallami cai Allpapi huiñaita causangacuna. Pero mana allicunaca tucuringami” nijcunami carca. “Cutin Jesús mil huatata mandashca qꞌuipaca ‘mandajcunaca’ jahua pachapimi causanaman ringacuna. Chai mandajcunapurapica Jesús manaraj shamujpi Diosta alli sirvijcunami canga” nishpami yuyajcuna carca (Salmo 45:16).

8. ¿Bibliamanta yachacujcunaca ima quimsa grupo tiyashcatataj yuyarcacuna?

⁸ Bibliamanta yachacujcunaca quimsa grupo tiyashcatami yuyarcacuna. Paicunaca: “144 mil agllashcacunaca jahua pachapimi Jesushuan mandangacuna. Cutin yallitaj achcacunaca Diosta mana tucui shunguhuan sirvishcamantami jahua cielopi jatun tiyarinapaj ñaupajpi, Ovejapaj ñaupajpi shayaringacuna. Cutin achca gentecunaca Jesús mil huatata mandacujpimi cai Allpapi Diosmanta yachangacuna” nishpami yuyarcacuna. * Pero Jehová Diosca caicunata alli intindichunmi ayudarca (Proverbios 4:18).

9. a) ¿Yallitaj achcacunaca ima shinataj jatun tiyarinapaj ñaupajpi, Ovejapaj ñaupajpi shayarishcata ricuchincuna? b) Mateo 25:31, 32-pi nishca shinaca ¿yallitaj achcacuna mana jahua pachaman rina cashcataca imamantataj crinchij?

⁹ ¿1935 huatapica testigo de Jehovacunaca imatataj intindircanchij? Yallitaj achcacuna cai Allpapi causashpapish Jehová Dios tucuita mandaj cashcata crishpa, paita cazushpaca jatun tiyarinapaj ñaupajpi shayaricushcatami cuenta japircanchij (Isaías 66:1). Shinallataj Jesús huañushcapi feta charishpaca Ovejapaj ñaupajpi shayaricushcatami cuenta japircanchij. Chaimantami yallitaj achcacuna jahua cieloman mana rina cashcata intindircanchij. Mateo 25:31, 32-pipish yallitaj achcacuna mana jahua pachaman rina cashcatami intindichin. Chai versocunapica ‘tucui mama llajtacuna’, mana alli gentecunapish Jesuspaj ñaupajpimi tandanacungacuna ninmi. Cai llajtacuna, mana alli gentecunapish mana jahua pachapichu tandanacunga, cai Allpapimi tandanacunga. Chaimantami 1935 huatapi testigo de Jehovacunaca 144 mil agllashcacunalla Jesushuan cielopi mandana cashcata intindircanchij (Apocalipsis 5:10).

10. ¿Yallitaj achcacunaca imamantataj Jesús manaraj mandacujpi Diosta cazuna can?

¹⁰ 1935 huatamantami testigo de Jehovacunaca: “Juan muscuipi ricushca yallitaj achcacunaca Diosta alli sirvijcunami can. Paicunami cai Allpapi huiñaicama causanata shuyacuncuna” nishpa crinchij. Yallitaj achcacunaca jatun llaqui punllapi quishpiringapajca Jesús cai pachata manaraj mandacujpimi Jehová Diosta cazushpa, sinchi feta charishpa causana can (Lucas 21:34-36).

11. ¿Bibliamanta yachacujcunaca imamantataj Diosta alli sirvijcunaca jahua pachamanmi ringacuna nishpa yuyajcuna carca?

¹¹ Párrafo 7-pi ricushca shinaca Bibliamanta yachacujcunaca: “Jesús mil huatata mandashca qꞌuipami ñaupa tiempopi Diosta alli sirvijcunaca cieloman ringacuna” nishpami yuyajcuna carca. ¿Imamantataj chashna yuyajcuna carca? 15 de febrero de 1913 Watch Tower revistapi nishca shinami yuyajcuna carca. Chai revistapica: “Yallitaj achcacuna Diosta mana tucui shunguhuan cazujpipish jahua cieloman rina cajpica ¿imamantataj ñaupa tiempopi Diosta alli sirvijcunaca  mana jahua pachaman ringacuna?” nircami. Pero chashna yuyanaca mana allichu carca. Bibliamanta yachacujcunaca yallitaj achcacuna Diosta mana tucui shunguhuan cꞌuyashpapish jahua pachapi causana cashcata crishcamantami chashna panda yuyaita charircacuna.

12, 13. ¿144 mil agllashcacunapish, yallitaj achcacunapish imatataj intindinchij?

¹² 1935 huatamantami testigo de Jehovacunaca yallitaj achcacuna Armagedón macanacuipi quishpirina cashcata intindircanchij. Chai yallitaj achcacunaca cai Allpallapitaj jatun llaqui punllamanta quishpirishpami: “¡Jatun tiyarinapi tiyacuj ñucanchij Diospish, Ovejapish paicunallami quishpichijca!” nishpa caparingacuna (Apocalipsis 7:10, 14). Shinallataj Bibliapica jahua pachapi causarijcunaca ñaupa tiempopi Diosta sirvijcunatapish yallimi ashtahuan allita chasquingacuna ninmi (Hebreos 11:40). Cai yuyaicunata alli intindishpami gentecunapish Jehová Diosta sirvichun, cai Allpapi huiñai causaita charichun cushilla predicacunchij.

¹³ Yallitaj achcacunaca cai Allpapi causanata yachashpami cushilla sintirincuna. Shinallataj picuna jahua cielopi causanata, picuna cai Allpapi causanata Jehová Dioslla agllaj cashcatami yachancuna. Ashtahuancarin 144 mil agllashcacunapish, yallitaj achcacunapish Dios paipaj Churita cushcamanta bendicioncunata chasquina cashcatami intindinchij (Romanos 3:24).

14. a) ¿Huaquin testigocunaca imatataj tapurircacuna? b) ¿Imamantataj chashna tapurircacuna? Shuj ejemplomanta parlai.

¹⁴ 1935 huata qꞌuipaca huaquin testigocunaca ¿cai Allpapi causagrijcunaca ima shinashi achcacuna tucunga? nishpami tapurircacuna. Por ejemplo, 1935-pica huauqui Ronald Parkinca 12 huatacunatami charirca. Paica: “1935-pica muyundij Allpapimi 56 mil testigo de Jehovacuna tiyarca. La mayoriaca 144 mil agllashcacunamantami carca. Chaimantami yallitaj achcacunaca mana achca ricurirca” nircami.

15. Yallitaj achcacuna ima shina mirarishcata parlai.

¹⁵ Catij huatacunapica achca misionerocunatami shujtaj llajtacunapi predicachun cacharcacuna. Chaimantami achca gentecunaca testigo de Jehovacuna tucurca. 1968-pica La verdad que lleva a vida eterna nishca librohuanmi yachachi callarircacuna. Chai libropi jahualla yuyaicuna  tiyashcamantami gentecunaca Bibliamanta yachanata munarcacuna. Cuatro huatacuna huashallami 500 mil yalli gentecunaca bautizarircacuna. Shinallataj América llajtacunapi, shujtaj llajtacunapipish gobiernocuna Iglesia católicata ña mana tanto apoyajpimi Diosta sirvijcunaca ashtahuan mirarircacuna. Europa, África llajtacunapipish gobiernocuna huillachun saquijpimi Diosmanta yachashpa achcacunaca bautizarircacuna (Isaías 60:22). Cai huatacunapipish Jehová Diosca gentecuna Bibliata yachachunmi achca ayudacunata cushca. Paimi achca gentecunata tandachicun. Chaimantami cunan punllacunaca 8 millones yalli canchij.

16. ¿Yallitaj achcacunaca maillamantataj shamuncuna?

¹⁶ Juanca paipaj muscuipica yallitaj achcacuna “tucui llajtacunamanta, chꞌican chꞌican aillucunamanta, chꞌican chꞌican pueblocunamanta” cajtami ricurca. Profeta Zacariaspish: “Chai punllacunapica cashnami tucunga: Tucui llajtacunamanta shujtaj shujtaj rimaita rimaj chunga runacunami Judá llajtapi causaj runapaj churanapi charirashpa: Ñucanchijpish cancunahuan rishun nipanchijmi ningacuna” nircami (Zacarías 8:23).

17. ¿Testigo de Jehovacunaca tucuicunata ayudangapajca imatataj ruracunchij?

 ¹⁷ Testigo de Jehovacunaca tucui laya shimita rimajcuna tandanacuchunca paicunamanmi predicana canchij. Chaimantami publicacioncunataca 130 yalli huatacunata traducishpa catinchij. Cunan punllacunapicarin 900 yalli shimicunapimi traducicunchij. Chashnami Jehová Diosca tucui llajtacunamanta yallitaj achcacunata tandachicun. Diospaj yachachishcacuna achca shimicunapi tiyashcamantami Yaya Diosta tandalla sirvicunchij. Shinallataj cushilla predicajcuna cashcamanta, caishuj chaishuj cꞌuyanacujcuna cashcamantami rijsishca canchij. Caicunata yachashpami ñucanchij feta sinchiyachinchij (Mateo 24:14; Juan 13:35).

18. a) Isaías 46:10, 11-pi nishca shinaca ¿Juanpaj muscuita Dios pajtachishcata ricushpaca imamantataj mana mancharinchij? b) ¿Cai Allpapi causagrijcunaca imamantataj mana llaquirincuna?

¹⁸ Juan imata muscushcata intindishpaca cushillami sintirinchij. Shinallataj chai muscuita Jehová Dios ima shina pajtachishcata ricushpaca mana mancharinchijchu (Isaías 46:10, 11-ta liyipai). Yallitaj achcacunaca paicunata Jesushuan jahua pachapi mandangapaj mana agllashcamantaca mana llaquirincunachu. Chaipaj randica cai Allpapi huiñaita causanata yachashcamantami cushilla sintirincuna. Bibliapica Diosta alli sirvijcunamantami parlan. Por ejemplo, Bautizaj Juan, rey Davidca 144 milpurapi mana cashpapish Diospaj espirituta chasquishpami Diosta alli sirvijcuna carca (Mateo 11:11; Hechos 2:34). Bautizaj Juan, rey David, shujtajcunapish paraíso Allpapimi causaringacuna. Jesús cai pachata mandacujpica causarijcunapish, yallitaj achcacunapish Diosllata cazushpa, paipaj gobiernota apoyashcatami ricuchingacuna.

19. ¿Juanpaj muscui pajtaricushcata yachashcamantaca imatataj rurana canchij?

¹⁹ Jehová Diosca tucui llajtacunamanta achca gentecuna paita adorachunmi tandachishca. Caitaca mana nunca chashna rurashcachu. Jahua pachapi causanata shuyajcunapish, cai Allpapi causanata shuyajcunapish, gentecuna yallitaj achcacunapurapi cachunmi ayudana canchij (Juan 10:16). Ñallami Jehová Diosca jatun llaqui punllata cachanga. Chaipica gobiernocunata, panda religioncunatami tucuchinga. Chai huashaca yallitaj achcacunaca Diosta sirvicushcamantami cai Allpapi huiñai huiñaicama cushilla causangacuna (Apocalipsis 7:14).