1, 2. ¿Diosta sirvijcunaca imamantataj cushilla causanchij? (Santiago 1:​22-25).

 JEHOVÁ DIOSPISH, paipaj cꞌuyashca Churi Jesuspish ñucanchijcuna cushilla causachunmi munancuna. Salmo 119:​2-ta quillcaj runaca: “Ima shina causanata pai yachachishcata huaquichijcunaca cushijllacunami. Tucui shunguhuan chaita mashcajcunaca cushijllacunami” nircami. Jesuspish: “¡Diospaj shimita uyashpa cazujcunami cushicuncuna!” nircami (Lucas 11:28).

² Diosta sirvijcunaca achca bendicioncunata chasquishcamantami cushilla causanchij. Pero ashtahuantajca Diospaj Shimita punllanta liyijcuna cashcamanta, chaipi nishcacunata pajtachijcuna cashcamantami cushilla causanchij (Santiago 1:​22-25-ta liyipai).

3. ¿Diospaj Shimita pajtachijcuna cashpaca ima shinataj beneficiarishun?

³ Diospaj Shimita pajtachijcuna cashpaca achcatami beneficiarishun. Por ejemplo, Jehová Diospaj ñaupajpimi alli ricurishun. Chashnami cushilla causashun (Eclesiastés 12:13). Shinallataj Bibliapi imata liyishcata pajtachishpaca ñucanchij familiacunahuan, huauqui panicunahuanpishmi alli apanacushun. Seguramente canca ñachari chashna causacungui. Ashtahuanpish gentecuna Jehová Diosta mana cazushcamanta apashca llaquicunataca mana charishunchu. Rey Davidca Jehová Diospaj mandashcacunamanta, leycunamanta shuj cantota cantashca qꞌuipaca: “Chaicunata cazujpajca, sumaj japinami tiyan” nircami (Salmo 19:​7-11). Chai nishcacunaca ciertomi can.

4. ¿Diospaj Shimita pajtachinaca imamantataj maipica sinchi can?

⁴ Diospaj Shimita uyashpa pajtachinaca maipica sinchimi can. Pero ocupados cashpapish tucuicunami Bibliata liyingapaj,  estudiangapaj tiempota llujchina canchij. Chashnami Jehová Diospaj munai maijan cashcata intindishun. Cai yachaipica Bibliata punllanta liyingapaj imata rurai tucushcatami yachashun. Shinallataj imalla liyishcapi yuyangapaj, chaicunata ñucanchij causaipi pajtachingapajpish imata rurai tucushcatami ricushun.

DIOSPAJ SHIMITA LIYINGAPAJ TIEMPOTA SURCUSHUNCHIJ

5. ¿Imamantataj ocupados pasanchij?

⁵ Diosta sirvijcunaca la mayoriami ocupados pasanchij. Bibliapi nishcacunata pajtachingapajpishmi tiempo minishtirin. Por ejemplo, la mayoriami ñucanchijllataj mantiniringapaj o ñucanchij familiata mantiningapaj trabajana canchij (1 Timoteo 5:8). Huaquin huauqui panicunaca ungushca o yuyajlla familiacunatapishmi cuidana can. Shinallataj tucuicunami ñucanchij saludta cuidangapaj tiempota minishtinchij. Congregacionpi ayudashpapishmi ocupados pasanchij. Por ejemplo, tucui shunguhuan huillashpa catingapajmi esforzarinchij. Cai tucuita rurana cashcamantami tal vez: “¿Bibliata liyingapaj, liyishcapi yuyangapaj, causaipipish pajtachingapaj tiempotaca ima shinataj surcui tucuni?” nishpa tapurinchij.

6. ¿Bibliata liyina importante cashcamantaca imatataj rurana cangui? (Fotomantapish parlapai).

⁶ Diosta sirvijcunapajca Bibliata liyinami achca importante can. Chaimantami chaita rurangapaj esforzarina canchij (Filipenses 1:10). Cushilla causaj runamanta parlashpaca Salmo 1-pica: ‘Paica tutapish punllapish Mandaj Dios mandashca ima nisha nishcata umanarina yuyaillami, chai mandashcata pajtachina yuyaillami causan’ ninmi (Salmo 1:​1, 2). Shinashpaca Bibliata liyingapajmi tiempota surcuna canchij. Pero ¿Bibliataca ima horastaj liyina canchij? Chaitaca cada unomi agllana canchij. Pero cada punlla chai horasllataj Bibliata liyingapajmi shuj alli horariota agllana canchij. Huauqui Victorca: “Bibliataca tutamanta ladomi liyinata munani. Ñucapajca tutamanta utca jatarinaca sinchimi can. Pero tutamanta lado ima bulla mana tiyashcamantami Bibliataca atencionhuan liyi tucuni” nircami. ¿Canpish chaita rurai tucunguichu?  Cada unomi “¿ñucaca Bibliataca ima horastaj liyi tucuni?” nishpa tapurina canchij.

IMATA LIYISHCAPI YUYAI

7, 8. ¿Imamantataj huaquinpica Bibliapi imallata liyishcataca mana yuyarinchij? Shuj ejemplota churashpa parlai.

⁷ Maipica achcata liyishpapish imata liyishcataca manachari tucuita intindishcanchij. Mana cashpaca imata liyishcataca ratomi cungarishcanchij. Mana cuidadota charishpaca Bibliata liyicushpapish chashnallatajmi canga. Tal vez cada punlla huaquin capitulocunata liyinatami decidishcanchij. Chaita ruranaca allimi can. Tucuicunami ñucanchij metacunata pajtachingapaj esforzarina canchij (1 Corintios 9:26). Shinapish Bibliapi nishcacuna ñucanchij shunguman chayachunca Bibliata liyinallaca mana minishtirinchu.

⁸ Cai ejemplopi yuyashun. Tamya yacucunaca plantitacuna alli huiñachunmi ayudan. Pero shuj ratollapi mana jahuallata tamyajpica allpaca chai tucui yacucunataca mana chupai tucungachu. Chaimi tamya yacucunaca pozayashpa saquiringa. Pero tamya yacucuna pozayashpa saquirijpica plantitacunaca chai yacutaca mana chupai tucungachu. Cutin, ashito ashito tamyajpica allpaca nuyujyashpami catinga. Plantitacunapish chai yacuta chupashpami sumajta huiñangacuna. Ñucanchijpish Bibliataca mana apuradochu liyina canchij. Shuj ratollapi achca versocunata liyishpaca ima liyishcacunaca ñucanchij shungu ucumanca mana chayangachu. Chaimi imata liyishcata mana yuyari tucushpa causaipica mana pajtachi tucushun (Santiago 1:24).

9. ¿Bibliata apurado liyij cashcata cuentata cushpaca imatataj rurana cangui?

⁹ ¿Bibliata apurado liyij cashcatachu cuentata cushcangui? Chashna liyij cashpaca imata liyicushcata alli intindingapaj o liyishca qꞌuipa chaipi yuyangapajmi ashtahuan tiempota surcuna cangui. Mana cashpaca achca versocunata liyinapaj randica ashalla versocunatami liyi tucungui. Chashnami imata liyishcapi yuyangapaj tiempota charingui. Huauqui Victorca: “Ashalla versocunata o shuj capitulollatami liyini. Tutamanta lado Bibliata liyij cashcamantami punlla enterota imata liyishcapi  yuyai tucuni” nircami. Achca versocunata liyinaca mana minishtirinchu. Ashtahuanpish chai versocunapi ima nishcata alli intindinami importante can (Salmo 119:97; “ Cai tapuicunapi yuyai” nishca recuadrota ricui).

10. ¿Imallata liyishcataca ima shinataj pajtachi tucunchij? (Shuj ejemplota churashpa parlai; 1 Tesalonicenses 5:​17, 18).

¹⁰ Bibliata liyicushpaca chaipi nishcacunata ima shina pajtachinatami yuyana cangui. Chaipajca: “¿Caitaca cunan punllacunapi, shamuj punllacunapica ima shinataj pajtachi tucuni?” nishpami tapurina cangui. Cai ejemplopi yuyashun. 1 Tesalonicenses 5:​17, 18-tachari liyingui (chai versota liyipai). Chai ishqui versocunata liyishca qꞌuipaca cashna nishpami tapurina cangui: “¿Yayitu Diostaca tucui shunguhuanchu mañani? ¿Punllapica mashna cutintaj mañani? ¿Ñuca mañaicunapica imacunallamantataj agradicini?”. Chashna tapurishca qꞌuipaca Jehová Diostaca quimsa cosascunamantachari agradicinata decidingui. Bibliata liyishca qꞌuipaca cashna laya tapuicunata ruraringapaj asha tiempollatapish surcushpaca Diospaj Shimita alli uyaj, alli pajtachijmi tucungui. Tiempohuancarin Diostaca ashtahuan allimi sirvingui. Pero ¿Bibliata liyishca qꞌuipa achca cosascunapi mejorana cashcata ricushpaca imatataj rurana cangui?

PAJTACHI TUCUSHCA METACUNALLATA CHURARI

11. ¿Bibliata liyicushpaca imamantataj huaquinpica llaquilla sintirinchij? Shuj ejemplota churashpa parlai.

¹¹ Bibliata liyicushpaca cambaj causaipi achca cambiocunata rurana cashcata cuentata cushpaca maipica llaquillami sintiringui. Cai ejemplopi yuyai. Santiago librota liyicushpaca tal vez mana ñahuita ricushpalla shujtajcunata tratana cashcatami yachangui (Santiago 2:​1-8). Chaita liyishpaca shujtajcunata alli tratangapaj huaquin cambiocunata rurana cashcatami cuentata cungui. Chaica allimi can. Cutin cayandij punllaca manaraj imata nishpa alli yuyanaraj cashcatami liyingui (Santiago 3:​1-12). Chaita liyishca qꞌuipaca huaquinpica desanimachij yuyaicunata o mana alli yuyashpa parlaj cashcatachari cuentata cungui. Chaimantami animachij yuyaicunata parlangapaj ashtahuan esforzarinata decidingui. Cutin cayandij punllaca cai mundopaj ruraicunapi mana chagrurina cashcatami liyingui (Santiago 4:​4-12). Chaita liyishpami diversioncunata alli yuyashpa agllana cashcata cuentata cungui. Cayandij punlla Bibliata liyisha nishpapish cambaj causaipi achca cambiocunata rurana cashcata yuyarishpaca llaquillachari sintiringui.

12. ¿Bibliata liyicushpaca huaquin cambiocunata rurana cashcata cuentata cushpaca imatataj rurana cangui? (Notamantapish parlapai).

¹² Cambaj causaipi achca cambiocunata  rurana cashcata cuentata cushpaca mana desanimarinachu cangui. Ashtahuanpish humilde cashcamanta, allita ruranata munashcamantami chashna sintiringui. Humilde cajcunaca paicunapaj causaipi ima cambiocunallata rurana cashcata yachangapajmi Bibliata liyincuna. a Shinallataj “mushuj churanata churarij shina Dios cushca mushuj causaita” churaringapajca tiempomi minishtirin (Colosenses 3:10). Pero ¿Diospaj Shimipi nishcacunata pajtachishpa catingapajca imatataj rurana cangui?

13. ¿Cambaj causaipi ima cambiocunallata rurana cashcata agllangapajca imatataj rurai tucungui? (Fotomantapish parlapai).

¹³ Bibliapi tucui imata liyishcata chai rato pajtachingapaj esforzarinapaj randica asha asha cambiocunata rurashpa catingapajmi esforzarina cangui (Proverbios 11:2). Tal vez ima cambiocunallata rurasha nishcataca shuj listapimi anotashpa chari tucungui. Chai huashaca chai listamantaca shuj o ishqui cambiocunallatami agllai tucungui. Chai cambiocunata rurashca qꞌuipaca chai listamanta shujtaj cambiocunata rurangapajmi agllai tucungui. Pero ¿ima cambiocunallatataj puntaca rurana cangui?

14. ¿Ima cambiocunallatataj puntapica rurana canchij?

¹⁴ Puntapica pajtachinalla metacunatami churari tucungui. Mana cashpaca canllataj imapi mejorana cashcata ricushpami shuj metata churari tucungui. Chaita rurashca qꞌuipaca chai metata pajtachingapaj imallata rurana cashcatami investigana cangui. Chaipajca Índice de publicaciones de la Watch Tower o Guía de estudio para los testigos de Jehová nishca publicacioncunatami utilizai tucungui. Shinallataj chai metata pajtachina munaita,  fuerzatapish charingapajca Yaya Diostami mañana cangui (Filipenses 2:13). Chai huashaca imallata investigashcata pajtachingapajmi esforzarina cangui. Shuj metata ña pajtachishcata ricushpaca shujtaj metacunatapish pajtachinatami munangui. Ashtahuanpish imapi ña mejorashca cashpaca shujtaj cambiocunatapish ruranaca ashtahuan jahuallami canga.

DIOSPAJ SHIMI CANTA AYUDACHUN SAQUI

15. ¿Diosta sirvijcunaca Diosta mana sirvijcunahuanca imapitaj chꞌican canchij? (1 Tesalonicenses 2:13).

¹⁵ Maijan gentecunaca: “Ñucaca achca cutincunami Bibliata liyishcani” nincunami. Shinapish ¿chai gentecunaca Bibliapi nishcacunapica crincunachu? ¿Chaipi nishcacunataca paicunapaj causaipi pajtachishcacunachu? La mayoría gentecunaca chaitaca mana rurashcacunachu. Pero Diosta sirvijcunaca mana chai gentecuna shinachu canchij. Ashtahuanpish punta siglopi causashca huauqui panicuna shinami ñucanchijpish Bibliaca Diospaj Shimitaj cashcata crinchij. Shinallataj Diospaj Shimipi nishcacunata ñucanchij causaipi pajtachingapajmi esforzarinchij (1 Tesalonicenses 2:​13-ta liyipai).

16. ¿Diospaj Shimita pajtachijcuna cangapajca imatataj rurana canchij?

¹⁶ Diospaj Shimita liyina, chaipi imalla nishcacunata pajtachinaca mana facilchu can. Bibliata liyingapaj tiempota surcunapish maipica sinchimi can. Cutin huaquinpica Bibliata rato liyishcamantami mana tucuita intindinchij. Shinallataj achca cambiocunata rurana cashcata cuentata cushcamantami huaquinpica llaquilla sintirinchij. Pero Yayitu Jehová Diospaj ayudahuanmi chai tucui jarcaicunata chꞌimbapurai tucushun. Chaimanta Diospaj Shimita uyajllacuna canapaj randica Diospaj Shimita pajtachijcuna cangapaj esforzarishunchij. Jehová Diosmi chaita rurachun ayudanga. Diospaj Shimita liyingapaj, ñucanchij causaipipish pajtachingapaj esforzarishpaca cushillami causashun (Santiago 1:25).