1, 2. a) ¿Apóstol Pablo shuj cartata cachajpica Judeamanta huauqui panicunaca ima shinataj causacurcacuna? b) ¿Huauqui panicunaca imamantataj minishtishca tiempopi chai cartata chasquircacuna?

 JESÚS huañushca qꞌuipaca hebreo huauqui panicunaca achca llaquicunahuanmi chꞌimbapurarcacuna. Por ejemplo, Jerusalenpi congregación tiyai callarishca qꞌuipallami paicunataca catirashpa llaquichi callarircacuna (Hechos 8:1). Shinallataj más o menos 20 huatacuna qꞌuipa Judeapi achca pobreza, achca yaricaicuna tiyashcamantami huauqui panicunaca achca llaquicunata charircacuna (Hechos 11:​27-30). Pero más o menos huata 61-pica paicunataca ña mana tanto llaquichircacunachu. Chai punllacunapica paicunaca apóstol Pablo cachashca cartatami chasquircacuna. Chai cartaca minishtishca tiempopimi chayarca. Chai qꞌuipaca paicunaca ashtahuan llaquicunatami apana carcacuna.

² Hebreo huauqui panicuna ñalla apagrishca llaquicunata ahuantachunmi apóstol Pabloca paicunaman cachashca cartapica sumaj consejocunata curca. Jesús huillashca shinami Jerusalentaca ñalla tucuchigrircacuna (Lucas 21:20). Apóstol Pablopish, Judeamanta huauqui panicunapish chai jatun llaquicuna ima hora shamunataca mana yacharcacunachu. Pero paicunaca paicunapaj feta sinchiyachingapaj, llaquicunata ima shina ahuantanata yachangapaj tiempotami aprovechana carcacuna (Hebreos 10:25; 12:​1, 2).

3. ¿Hebreo huauqui panicuna chasquishca cartaca imamantataj ñucanchijpajpish valishca can?

³ Hebreo huauqui panicunaca achca llaquicunahuanmi chꞌimbapurarcacuna. Shinapish ñucanchijcunaca ñallami paicunata yalli llaquicunahuan chꞌimbapurashun (Mateo 24:21; Apocalipsis 16:​14, 16). Chaimantami Jehová Dios paicunaman cushca consejocunaca  ñucanchijpajpish valishca can. ¿Jehová Diosca paicunamanca imallatataj nirca?

“SINCHIYARISHPA ÑAUPAJMAN CATISHUNCHIJ”

4. ¿Judío huauqui panicunaca ima jarcaicunahuantaj chꞌimbapurarcacuna? (Fotomantapish parlapai).

⁴ Pablo cachashca cartata chasquij huauqui panicunaca manaraj Jesusta catishpaca judío religiontami catijcuna carca. Chaimantami huaquin cambiocunata ruranaca paicunapajca sinchi carca. Por ejemplo, judiocunami Jehová Dios agllashca pueblo carcacuna. Shinallataj achca huatacunatami Israelta mandajcunaca Jerusalenmanta mandajcuna carca. Diospaj huasipish Jerusalenpimi carca. Tucui judiocunami Moisesman cushca mandashcacunata, religionta pushajcuna cushca mandashcacunatapish cazujcuna carca. Shinallataj paicunaca micunamanta, circuncisionta ruranamanta, shujtaj llajtacunamanta cajcunata ima shina tratana cashcamantami mandashcacunata chasquircacuna. Shinapish Jesús huañushca qꞌuipaca templopi Diosman sacrificiocunata cunaca ña mana minishtirircachu. Shinallataj shujtaj cambiocunapishmi tiyarca. Chaimantami chai huauqui panicunapajca chai cambiocunata ruranaca sinchi carca (Hebreos 10:​1, 4, 10). Apóstol Pedropajpish, pai shina espiritualmente sinchi caj huauquicunapajpish mana jahuallachu carca (Hechos 10:​9-14; Gálatas 2:​11-14). Shinallataj huauqui panicuna judío religionta saquishcamantami chai religionta pushajcunaca paicunata catirashpa llaquichi callarircacuna.

5. ¿Picunallataj hebreo huauqui panicunapaj contra tucurcacuna?

⁵ Huaquin gentecunaca hebreo huauqui panicunapaj contracunami tucurcacuna. Por ejemplo, chai huauqui panicuna judío religionta saquishcata ricushpaca chai religionta pushajcunaca achcatami pꞌiñarircacuna. Shinallataj huaquin huauqui panicunaca Moisesman cushca leyta cazushpa catina cashcatami nijcuna carca. Paicunaca paicunata ama catirashpa llaquichichun munashcamantami chashna nijcuna cashcanga (Gálatas 6:12).  ¿Shinapish judío huauqui panicuna Jehová Diosmanta ama caruyangapajca imatataj rurana carcacuna?

6. ¿Pabloca hebreo huauqui panicunataca imata rurachuntaj animarca? (Hebreos 5:​14–6:1).

⁶ Apóstol Pabloca hebreo huauqui panicunataca Diosmanta ashtahuan yachashpa catichunmi animarca (Hebreos 5:​14–6:​1-ta liyipai). Shinallataj paica Ñaupa Testamentopi nishcacunatami yuyachirca. Chashnami Jesús yachachishcacuna judiocuna yachachishcacunata yalli valishca cashcata intindichirca. a Pabloca hebreo huauqui panicuna ima verdad cashcata, ima llulla cashcata cuentata cungapaj Diosmanta yachashpa catina cashcatami yacharca. Paicunaca panda yachachishcacunapi ama cringapaj, Diosmanta ama caruyangapajmi paimanta yachashpa catina carcacuna.

7. ¿Cunan punllacunapica ima jarcaicunahuantaj chꞌimbapurana canchij?

⁷ Cunan punllacunapipish achca gentecunaca panda yuyaicunahuanmi ñucanchijta pandachisha nin. Por ejemplo, maijan gentecunaca chayarinamanta Bibliapi ima nishcata cazushcamantami ñucanchijta rimancuna. Caipi ricushca shinaca gentecunaca Jehová Diosmanta ashtahuan ashtahuan caruyashcamantami pai shina yuyanata saquishcacuna (Proverbios 17:15). Chaimantami ima alli cashcata, ima mana alli cashcata cuentata cungapaj esforzarishpa catina canchij. Chashnami Diospaj enemigocunaca paimantaca mana caruyachi tucungacuna (Hebreos 13:9).

8. ¿Sinchiyarishpa ñaupajman catingapajca imatataj rurana canchij?

⁸ Apóstol Pabloca hebreo huauqui panicunataca sinchiyarishpa ñaupajman catichunmi animarca. Ñucanchijpish chaitami rurana canchij. Chaipajca Diosmanta ashtahuan yachangapaj, pai yuyashca shina yuyangapajmi esforzarishpa catina canchij. Jehová Diosman mingarishpa, bautizarishca qꞌuipapish chaitami rurana canchij. Tucuicunami Jehová Diosta asha huatacunata o achca huatacunata sirvicushpapish punllanta Bibliata liyina canchij (Salmo 1:2). Chashnami apóstol Pablo nishca shina sinchi feta charishun (Hebreos 11:​1, 6).

‘QUISHPIRINGAPAJCA FETAMI CHARINA CANCHIJ’

9. ¿Hebreo huauqui panicunaca imamantataj sinchi feta ricuchina carcacuna?

⁹ Judeapi ñalla tiyagrishca llaquicunata ahuantangapajca huauqui panicunaca sinchi fetami charina carcacuna (Hebreos 10:​37-39). Jesusca Jerusalén llajta muyundijpi soldadocuna shayacujta ricushpaca urcucunapi miticugrichunmi mandashca carca. Chai mandashcataca Jerusalenpi causajcuna, campopi causajcunapishmi cazuna carcacuna (Lucas 21:​20-24). Ñaupa punllacunapica contra soldadocuna shamucujta yachaj chayashpaca gentecunaca muyundijta pircashca llajtapimi miticunaman rijcuna carca. Jerusalenca chashna laya llajtami carca. Chaimantami chaita ruranapaj randi urcucunapi miticunaman rinaca huaquin judiocunapajca mana alli laya ricurishcanga. Pero chai mandashcata cazungapajca paicunaca sinchi fetami ricuchina carcacuna.

10. ¿Hebreo huauqui panicunaca imamantataj pushaj huauquicunata cazuna carca? (Hebreos 13:17).

¹⁰ Hebreo huauqui panicunaca congregacionta pushachun Jesús churashca huauquicunapimi  confiana carcacuna. Pushaj huauquicunami Jerusalenmanta ima hora, ima shina miticunata huillashcangacuna (Hebreos 13:​17-ta liyipai). Shinapish apóstol Pabloca pushaj huauquicunata cazuna cashcallamanta cazuchunca mana nircachu. Ashtahuanpish paicunapi confiashcamanta cazuna cashcatami nirca. Jatun llaqui punllacunapipish pushaj huauquicunapi confiashpa catingapajca judío huauqui panicunaca llaquicuna manaraj shamujpimi paicunapi confianata yachana carcacuna.

11. ¿Imamantataj sinchi feta charina canchij?

¹¹ Pablo cachashca cartata chasquij huauqui panicuna shinami ñucanchijpish sinchi feta charina canchij. Cunan punllacunapica Diospaj punlla ñalla shamuna cashcataca casi ni pi mana crinchu. Pero ñucanchijcuna chaita crishcamantami burlarincuna (2 Pedro 3:​3, 4). Bibliaca jatun llaqui punllacunapi imalla tucuna cashcataca mana tucuita huillanchu. Pero chai punllacuna Jehová Dios agllashca punllapi shamunataj cashcata cringapajca sinchi fetami charina canchij. Ashtahuanpish chai punllacunapi Jehová Dios ñucanchijta cuidanatami seguros cana canchij (Habacuc 2:3).

12. ¿Jatun llaqui punllacunapi ama huañungapajca imatataj rurana canchij?

¹² Jehová Diosca paipaj pueblota pushachunca “alli cazuj, alli yuyaiyuj sirvij” nishca huauquicunatami churashca. Chaimantami paicunapi confianata yachana canchij (Mateo 24:45). Romano soldadocuna Jerusalén muyundijta shayarijta ricushpaca pushaj huauquicunaca huauqui panicunamanmi instruccioncunata cushcangacuna. Jatun llaqui punllacuna shamujpipish pushaj huauquicunaca de seguromi ñucanchijcunamanca instruccioncunata cungacuna. Chai instruccioncunata cazushpami quishpiri tucushun. Chaimantami Diospaj organizacionta pushaj huauquicunapi cunanmanta confianata yachana canchij. Cunan punllacunapi paicunapi mana confiajpi, mana cazujpica jatun llaqui punllacuna shamujpipish paicunapi confianaca ashtahuan sinchimi canga.

13. ¿Hebreos 13:​5-pi nishcacunaca imamantataj ñucanchijpajca valishca can?

¹³ Urcucunapi miticuna horas chayangacamaca hebreo huauqui panicunaca ‘imalla charishcacunallahuan’ causanatami yachana carca (Hebreos 13:​5-ta liyipai). Maijancunaca ñaupamanca cullqui illaj, micuna illajmi saquirishcacuna carca (Hebreos 10:​32-34). Paicunaca alli huillaicunamantami chai llaquicunataca cushicushpa ahuantarcacuna. Shinapish maijancunaca tranquilo causanata yuyashpami ashtahuan cullquita charinapi ocupari callarircacuna. Pero Jerusalén tucuchishca cajpica chai cullquica imapaj mana valircachu (Santiago 5:3). Ashtahuan charina yuyailla causajcunapajca paicuna imalla charishcacunata huashaman saquishpa Jerusalenmanta miticushpa rinaca sinchimi cagrirca.

14. ¿Sinchi feta charishcataca ima shinataj ricuchinchij?

¹⁴ Diospaj punlla ñalla shamunata yuyaipi charishpaca ashtahuan charina yuyaillaca mana causashunchu. Bibliapi nishca shinaca ‘Dios jatunta pꞌiñari punllapica paicunapaj cullquipish, oropish mana quishpichi tucushcata ricushpaca gentecunaca chaicunataca ñancunapimi shitangacuna’ (Ezequiel 7:19). Chaimantami ashtahuan charinallapi ocuparinapaj randica minishtirishcacunallahuan causangapaj imatapish alli yuyashpa decidina canchij. Shinallataj yangamanta ama dibiyangapajpishmi esforzarina canchij. Achca cosascunata charishpaca chaicunata cuidanallapimi ocuparishun. Chaimantami ama chashna causangapaj cuidadota charina canchij. Shinallataj ñucanchij charishca cosascunata ama yallitaj cꞌuyangapajpishmi esforzarina  canchij (Mateo 6:​19, 24). Diospaj punlla chayamucushcamantami Jehová Diospi confiashcata o chai cosascunapi confiashcataca ñucanchij ruraicunahuan ricuchina canchij.

“AHUANTANATAMI MINISHTINGUICHIJ”

15. ¿Hebreo huauqui panicunaca ima llaquicunallatataj aparcacuna?

¹⁵ Judeapi llaquicuna ashtahuan ashtahuan mirashpa catijpimi huauqui panicunaca chai llaquicunata ahuantashpa sinchi feta charishcata ricuchina carca (Hebreos 10:36). Maijancunataca ñami catirashpa llaquichishcacuna carca. Pero la mayoriami llaquicuna, jarcaicuna mana tiyai horas Jesusta cati callarishcacuna carca. Shinapish apóstol Pabloca millai gentecuna paicunata catirashpa ashtahuan llaquichinata yachashcamantami, Jesús shina huañungacama ahuantangapaj allichirishca caichij nirca (Hebreos 12:4). Jehová Diosta mana sirvij judiocunaca Jesusta catijcuna ashtahuan ashtahuan mirarijta ricushpaca achcatami pꞌiñarircacuna. Por ejemplo, huaquin huatacuna huashamanca apóstol Pablo Jerusalenpi huillacujta ricushpaca gentecunaca paitami llaquichircacuna. Shinallataj 40 yalli judiocunaca: “Pablota huañuchingacama manataj micushunchu, manataj ubyashunchu” nishpami ari ninacushcacuna carca (Hechos 22:22; 23:​12-14). Pero gentecuna paicunata pꞌiñajpipish huauqui panicunaca tandanacunata, Diosmanta huillanata, sinchi feta charinataca manataj saquinachu carca.

16. ¿Llaquicunata cushicushpa ahuantashpa catingapajca imamantataj Hebreos libropi ima nishcata yuyarina canchij? (Hebreos 12:7).

¹⁶ ¿Hebreo huauqui panicunaca llaquicunata ahuantangapajca imatataj rurana carca? Pabloca chai llaquicunata imamanta ahuantana cashcata yuyachunmi animarca. Jehová Diosca paicunapaj crishcacunata sinchiyachichunmi munarca. Chaimantami llaquicunahuan chꞌimbapurachun saquirca (Hebreos 12:​7-ta liyipai). Hebreo huauqui panicunaca alli cualidadcunata charingapaj, shinallataj espiritualmente mejorashpa catingapajmi llaquicunata  apana carcacuna. Chaita yuyaipi charishpami llaquicunataca cushilla ahuantai tucurcacuna (Hebreos 12:11).

17. ¿Apóstol Pablo hebreo huauqui panicunaman cushca consejocunaca imamantataj valishca carca?

¹⁷ Apóstol Pabloca hebreo huauqui panicunataca mana shaicushpa llaquicunata ahuantashpa catichunmi animarca. Paipaj nishcacunaca valishcami carca. ¿Imamanta? Jehová Diosta manaraj rijsishpaca Pabloca huauqui panicunatami catirashpa llaquichishca carca. Chaimantami paica huauqui panicuna ima llaquicunallata apacushcataca alli yacharca. Shinallataj Jesusta cati callarijpica apóstol Pablotapishmi tucui laya catirashpa llaquichishcacuna carca (2 Corintios 11:​23-25). Shinaca Pabloca llaquicunata ahuantangapaj imata rurana cashcataca allimi yacharca. Chaimantami paicunallapi confianapaj randi Jehová Diospi confiachun huauqui panicunataca animarca. Shinallataj: “‘Jehová Diosmi ñucata ayudajca. Mana manchashachu’ nishunchij” nishpami animarca (Hebreos 13:6).

18. ¿Imamantataj cunanmanta allichirina canchij?

¹⁸ Cunan punllacunapica achca huauqui panicunatami catirashpa llaquichicuncuna. Paicunata cꞌuyashcata ricuchingapajca paicunamantami mañana canchij. Shinallataj pudishpaca paicunatami ayudana canchij (Hebreos 10:33). Bibliapica: “Cristo Jesusta catijcuna shina Diosta tucui shunguhuan adorashpa causasha nijcunataca tucuicunatami catirashpa llaquichingacuna” ninmi (2 Timoteo 3:12). Shinashpaca tucuicunami llaquicunata ahuantangapaj allichirina canchij. Shinallataj ima llaquicuna shamujpipish Jehová Dios ñucanchijta ayudanatami confiana canchij. Paica minishtishca horasmi ñucanchijta ayudanga (2 Tesalonicenses 1:​7, 8).

19. ¿Jatun llaqui punllacunapaj allichirishca cangapajca imatataj rurana canchij? (Fotomantapish parlapai).

¹⁹ Hebreo huauqui panicunaca Pablo cachashca cartata liyishcamantami jatun llaquicunata ahuantangapaj allichirishca carcacuna. Pabloca Diospaj Shimita ashtahuan yachashpa, intindishpa catichunmi animarca. Chashnami paicunaca panda yachachishcacuna maijancuna cashcata yachangapaj, chaicunamanta caruyangapajpish allichiri tucurcacuna. Shinallataj Jesús cushca instruccioncunata, Diospaj organizacionta pushajcunatapish cazungapajca paicunapaj crishcacunata sinchiyachina cashcatami intindichirca. Ashtahuanpish Yaya Dios paicuna mejorashpa catichun llaquicunata apachun saquishcatami intindichirca. Ñucanchijpish Pablo cushca consejocunata pajtachishpaca tucuringacamami ahuantashpa catishun (Hebreos 3:14).