Ñuca yaya mamaca Suiza llajtata saquishpami Canadá llajtapi causanaman rircacuna. Chaimi ñucaca 1934 huatapi Canadá llajtapi huacharircani. Más o menos 1939 huatapica ñuca mamitaca Huillaj revistacunatami liyi callarirca. Shinallataj testigo de Jehovacunapaj tandanacuicunamanmi ri callarirca. Ñucatapish, ñuca huauqui panicunatapishmi chai tandanacuicunaman apaj carca. Chai qꞌuipallami ñuca mamitaca testigo de Jehová tucurca.

Ñuca papitoca ñuca mamita testigo de Jehová cachunca mana munarcachu. Pero ñuca mamitaca Jehová Diosta cꞌuyashcamantami paita sirvishpa catirca. 1940 huatapica Canadapica testigo de Jehovacuna libremente huillachunca mana saquircacunachu. Shinapish ñuca mamitaca huillashpami catirca. Ñuca papito ñuca mamitata sinchita rimajpipish paica cꞌuyaihuanmi siempre trataj carca. Chaita ricushpami ñucapish, ñuca huauqui panicunapish Jehová Diosta sirvi callarircanchij. Tiempohuanca ñuca papitoca ñucanchijcunataca cꞌuyaihuanmi tratai callarirca.

1950 huatapimi Nueva York llajtaman jatun asambleaman rircani. Chai asambleaca “Aumento de la Teocracia” nishcami carca. Chaipica tucui muyundij allpamanta huauqui panicunatami rijsircani. Shinallataj Escuela de Galaadpi graduarishca huauqui panicunapaj alaja entrevistacunatami uyarcani. Chaimi ñucapish tiempo completota sirvinata munarcani. Huasiman tigrashca huashaca solicitud de precursores nishcatami Canadá sucursalman cacharcani. Pero paicunaca puntapica bautizarichun nishpami cutichirca. Chaimi 1 de octubre de 1950 huatapi bautizarircani. Bautizarishca shuj quilla huashallami precursor shina sirvi callarircani. Chaimi ñucataca Kapuskasing llajtaman sirvichun cacharcacuna. Chaica ñuca causacushcamantaca carupimi saquirirca.

 Huata 1951-pica sucursalmanta huauquicunaca Quebec nishca provinciapi sirvinaman richunmi francés shimita parlaj huauqui panicunata invitarcacuna. Chaipica achca gentecunami Diosmanta yachana munaita charircacuna. Ñucaca francestapish, inglestapishmi uchillamantapacha parlaj carcani. Chaimantami chai invitacionta aceptarcani. Rouyn nishca pueblomanmi ñucataca cacharcacuna. Chaipica pitapish mana rijsircanichu. Chaiman chayashpaca shuj huasiman rina cashcallatami yacharcani. Marcelpish, ñucapish alli amigocunami tucurcanchij. Quebecpica chuscu huatacunatami sirvircani. Qꞌuipacarin precursor especial cachunmi ñucataca nombrarcacuna.

Quebec llajtapi cajpica ñucataca Escuela de Galaad clase número 26-man richunmi invitarcacuna. Chai escuelaca Nueva York llajtapi saquirij South Lansingpimi carca. 12 de febrero de 1956 huatapimi graduarircani. Chaipica Africapi saquirij Ghana llajtaman rina cashcatami huillarcacuna. b Pero chaiman manaraj rishpaca Canadá llajtamanmi tigrarcani. Chaipica viajangapajmi minishtirishca documentocunata llujchina carcani. Ishqui o quimsa semanacunalla chaipi saquirinatami yuyarcani. Pero ashtahuanmi shuyana tucurca.

Ñuca documentocuna llujshingacamami siete quillacunata Torontopi saquirircani. Chaipica shuj familiapaj huasipimi saquirircani. Paicunaca Sheila nishca ushushitami charircacuna. Ishquindijcunami enamorarircanchij. Pero ñucahuan cazarachun nigrijpimi viajangapaj papelcunaca llujshirca. Chaimantami imata rurana cashcata yachangapaj Jehová Diosta mañarcanchij. Chaimi Ghana llajtaman rinata decidircani. Chaita decidinaca mana jahuallachu carca. Pero qꞌuipaca shuj alli decisión cashcatami cuentata curcanchij. Ishquindijcuna parlanacushpa catingapajmi cartacunata cachanata decidircanchij. Chashnami cazaranata o mana cazaranata decidingapaj tiempota charircanchij.

Trenpi, barcopi, avionpipishmi shuj quillata viajarcani. Chashnami Ghana llajtaman chayarcani. Chaipica superintendente de distrito shina sirvichunmi nombrarcacuna. Ghana, Costa de Marfil, Togo llajtacunatami visitana carcani. Sucursal cushca  carropimi ñucalla viajaj carcani. Chashna sirvinaca sumajmi carca.

Sabadocunata, domingocunataca jatun tandanacuicunapimi conferenciacunata cuj carcani. Chai tiempoca Tandanacuna Huasicunaca mana tiyarcachu. Chaimantami huauqui panicunaca intimanta jarcaringapaj cañacunahuan, palmeracunahuan ujsha huasicunata shina rurajcuna carca. Shinallataj tucui tandanacushcacunaman carangapajmi yanujcuna carca. Pero yanugrishca aichacunata huaquichingapajca refrigeradoracunaca mana tiyarcachu. Chaimantami chaipica causaj animalcunata charijcuna carca. Ña yanugrishpaca chai ratomi animalcunataca huañuchishpa pelajcuna carca.

Shuj jatun tandanacuipi ima tucushcatami parlasha nini. Shuj misionero conferenciata cucujpica shuj huagrami cocinamanta llujshishpa paipaj ñaupajpi shayarirca. c Chai huagrata ricushpami chai misioneroca upalla saquirirca. Pero chuscu sinchi huauquicunami huagrata japishpa cocinaman cutin aparcacuna. Chaita ricushpami huauqui panicunaca de contento maquicunapi huajtarcacuna.

Asamblea mana tiyai punllacunaca ñuca cꞌuchullapi causan gentecunamanmi La Sociedad del Nuevo Mundo en acción nishca peliculata ricuchij carcani. Peliculataca shuj jatun yuraj telapimi ricuchij carcani. Chai telataca ishqui postecunapi o ishqui yuracunapimi huataj carcani. Gentecunaca peliculata ricushpaca achcatami cushicujcuna carca. Maijancunaca chashna laya peliculataca por primera vezmi ricurcacuna. Chai peliculapi huaquin gentecuna bautizarijta ricushpacarin paicunaca cushicushpami maquicunapi huajtajcuna carca. Shinallataj chai peliculata ricushpami muyundij Allpapi huauqui panicuna tandalla cashcata cuentata curcacuna.

1958 huatapi Africapi ishqui huatacunata sirvishca qꞌuipami Nueva York llajtapi tiyaj jatun tandanacuiman rircani. Chaipimi Sheilahuan tupanacurcanchij. Paica Quebec llajtapimi precursora especial shina sirvicushcarca. Cartacunatami cachanacuj carcanchij. Pero paita ñahui ñahui ricushpaca ñucahuan cazarachunmi mañarcani. Pai ari nijpimi huauqui Knorrman shuj cartata cacharcani. d Chai cartapica Sheilata Escuela de Galaadman invitachun, shinallataj chai escuelaman rishca qꞌuipa Africapi ñucahuan sirvigrichunmi mañarcani. Huauqui Knorr ari nijpimi Sheilaca Ghana llajtapi sirvinaman shamurca. 3 de octubre de 1959-pimi cazararcanchij. Jehová Diospajta ruranata punta lugarpi  churashcamantami achca bendicioncunata chasquircanchij.

1961 huatapica Camerún llajtapi sirvinaman richunmi mingarcacuna. Chaipica mushuj sucursal tiyachunmi ayudarcani. Chaipi ayudashpami ocupado pasaj carcani. Shinallataj Camerún llajtapi Diospaj obra ñaupajman catichunmi ricurashpa ayudaj carcani. 1965 huatapica Sheila huijsayuj cashcatami yachaj chayarcanchij. Yaya mama tucunata yachaj chayashpaca ashatami mancharircanchij. Pero qꞌuipaca cushillami sintirircanchij. Shinapish Canadá llajtaman tigrangapaj arreglosta ruracujpimi jatun llaqui japirca.

Ñucanchij huahuitoca manaraj huacharishpami huañurca. Doctorcunaca ñucanchij huahua cꞌari huahua cashcatami huillarcacuna. Llaquillami carcanchij. Pero ñucanchij asignacionta valorashcamantami chaipi sirvishpa catircanchij. Chai tucushcamantaca ñami 50 huatacuna yalli pasashca. Pero ñucanchij huahuitota yuyarishca horasca achcatami llaquirijcuna carcanchij.

Politicapi mana chagrurishcamantami Camerún llajtapica huauqui panicunataca catirashpa llaquichijcuna carca. Presidenteta agllai punllacunaca ashtahuanmi llaquichijcuna carca. Gobiernoca 13 de marzo de 1970 huatapimi testigo de Jehovacuna huillashpa catichun prohibircacuna. Mushuj sucursaltapishmi dueñoyarcacuna. Chai sucursaltaca pichca quillacunallatami ocuparcanchij. Shinallataj shuj semanallapimi tucui misionerocunata, ñucatapish, Sheilatapish chai llajtamanta llujchishpa cacharcacuna. Chaimi huauqui panicunata chai llajtapi saquishpa rinaca achca sinchi carca. Chai qꞌuipa ima tucunataca mana yacharcanchijchu.

Seis quillacunatami Francia sucursalpi saquirircanchij. Chaipi cashpapish Camerunpi caj huauqui panicunata ayudashpa catingapajmi esforzarircani. Diciembre de 1970 huatapica Nigeria sucursalmanmi cacharcacuna. Chai sucursalmantami huauqui panicuna Camerún llajtapi huillashpa catichun ayudai callarircanchij. Nigeriamanta huauqui panicunaca ñucanchijtaca allimi chasquircacuna. Chaipica huaquin huatacunatami cushilla sirvircanchij.

1973 huatapica shuj sinchi decisiontami agllana carcanchij. Sheilaca huaquin ungüicunahuanmi chꞌimbapuracushcarca. Nueva York llajtapi shuj jatun tandanacuipi cashpaca Sheilaca: “Ña mana avanzanichu. Shaicushcami cani. Casi siempremi ungushcalla pasani” nircami. Paica 14 huatacunata yallimi Africapi ñucahuan sirvicushcarca. Sheila Yaya Diosta tucui shunguhuan sirvicushcata ricushpaca cushillami sintirij carcani. Pero huaquin cambiocunatami rurana carcanchij. Ishquindij parlanacushca qꞌuipa, Yaya Diosta tucui shunguhuan mañashca qꞌuipaca paita alli cuidangapajmi Canadá llajtaman tigranata decidircanchij. Tiempo completota Diosta sirvinata saquinaca ñucanchijpajca sinchimi carca.

Canadá llajtapica shuj amigohuanmi trabajai callarircani. Paica carrocunata cꞌatushpami trabajaj carca. Ama dibiyangapajmi Canadapica shuj uchilla huasipi causarcanchij. Shinallataj usashca  cosascunatami randircanchij. Cutin tiempo completota sirvinata munashpami minishtirishca cosascunallahuan causarcanchij. Pero casi enseguidami cutin tiempo completota sirvi callarircanchij. Chaitaca mana yuyarcanchijllapishchu.

Sábado punllacunatami Salón de Asambleaspi voluntario shina sirvi callarircani. Chaica Norval llajtapimi saquirirca. Chai qꞌuipaca Salón de Asambleaspi superintendente shina sirvichunmi mañarcacuna. Shinallataj Sheilapish ñami asha asha alli tucushpa caticurca. Chaimi chai asignacionta aceptanata decidircanchij. Junio de 1974-tami Salón de Asambleaspi causanaman pasarcanchij. Cutinllataj tiempo completopi sirvi callarishcamantami achcata cushicurcanchij.

Sheilaca alli tucushpami catirca. Chaimi ishqui huatacuna qꞌuipa superintendente shina sirvichun mañajpica aceptarcanchij. Manitoba llajtapi caj congregacioncunatami visitana carcanchij. Chai llajtaca dimastij chiri llajtami can. Shinapish chaipi causaj huauqui panicunahuanca allimi pasaj carcanchij. Chashna pasashcamantami maipi cashpapish Jehová Diosta sirvishpa catina cashcata yacharcanchij.

Huaquin huatacunatami superintendente shina sirvicurcani. Pero 1978 huatapica Canadá sucursalpi sirvichunmi ñucanchijta invitarcacuna. Chai qꞌuipallami Montrealpi shuj especial tandanacuipi conferenciata cuchun invitarcacuna. Pero Departamento de Serviciopi ayudaj shuj huauquica ñuca yachachishcacuna huauqui panicunapaj shunguman mana chayacushcatami cuentata cushca carca. Chaimi ñucata aconsejarca. Ñucaca alli yachachij cangapaj ashtahuan mejorana cashcataca mana cuentata cushca carcanichu. Chaimantami chai huauqui consejota cujpica achcata pꞌiñarircani. Chai huauqui ñucata felicitanapaj randi yangamanta rimacushcatami yuyarcani. Ñucahuan mana alli apanacushcamanta sinchita aconsejashcata yuyashpami chai consejotaca mana chasquisha nircani.

Comité de Sucursalpi sirvij huauquipishmi chaita yachaj chayashcarca. Chaimantami paica ñucahuan parlarca. Paihuan parlashpami Departamento de Serviciopi ayudaj huauqui aconsejashcata mana alli chasquishcata cuentata curcani. Chaimantami mana alli sintirircani. Chai huauqui ñucata perdonachunmi paihuan parlanaman rircani. Paica cꞌuyaihuanmi ñucataca chasquirca. Chashnami humilde cana importante cashcata yacharcani (Proverbios 16:18). Ñucata pi aconsejajpi alli chasquingapaj ayudachunmi Jehová Diostaca siempre mañani.

40 huatacuna yallitami Canadá Betelpi sirvini. 1985-mantami Comité de Sucursalpi sirvina privilegiota charishcani. Febrero de 2021-pimi ñuca cꞌuyashca huarmi Sheilaca huañurca. Chaimi achca llaquilla sintirircani. Ñuca charishca ungüicunahuanpishmi chꞌimbapurana cashcani. Pero Jehová Diosta sirvishpami ocupado pasani. Chashnami punllacuna pasajtapish mana cuentata cuni (Eclesiastés 5:20). Achca llaquicunata charishpapish cushicuihuanmi Jehová Diosta sirvishpa catishcani. Ñuca causaipi Jehová Diosta punta lugarpi churashcamantami 70 huatacunata tiempo completota cushilla sirvishcani. Joven huauqui panicunapish paicunapaj causaipi Jehová Diosta punta lugarpi churachunmi mañani. Chaita rurashpallami paicunaca cushilla causangacuna.