1. ¿Jesusca imatataj ñalla ruranga?

 ÑALLAMI achca profeciacunaca pajtaringa. Por ejemplo, Jesusca ñallami tucui gentecunata juzganga. Pero chai punlla manaraj chayajpimi shujtaj profeciacunapish pajtarina can. Jesusca pai tigramuna punllacuna ña chayamucushcata, cai pachapaj ruraicunapish ñalla tucurina cashcata cuentata cuchunca imalla tucuna cashcatami nirca (Mateo 24:3). Cai profeciacunaca Mateo 24 y 25-pimi can. Shinallataj chai profeciacunataca Marcos capítulo 13 y Lucas capítulo 21-pimi ricui tucunchij.

2. a) ¿Cunanca imatataj yachashun? b) ¿Chaitaca imamantataj yachana canchij?

² Jesusca Diospaj punlla shamuna yuyailla causana cashcata yachachingapajca quimsa chꞌimbapuraicunatami churarca. Chai chꞌimbapuraicunapica ovejacunamanta, chivocunamanta, alli yuyaiyuj solteracunamanta, yuyai illaj solteracunamanta, talento cullquimantapishmi parlarca. Chai chꞌimbapuraicunaca shamuj punllacunapi gentecuna paicunapaj ruraicunamanta juzgashca canatami yachachin. Caicunamanta yachacushpaca ñucanchij causaipi ima shina pajtachi tucushcatami ricuna canchij. Callaringapajca ovejacunamanta, chivocunamanta chꞌimbapuraita ricushun.

OVEJACUNAMANTA CHIVOCUNAMANTA CHꞌIMBAPURAI

3. ¿Jesusca gentecunataca ima horataj juzganga?

³ Jesusca gentecuna alli huillaicunata ima shina chasquishcata ricushpa, shinallataj ungidocunata apoyashcata o mana apoyashcata ricushpami paicunataca juzganga (Mateo 25:​31-46). Jesusca Armagedón manaraj shamujpi, ‘jatun llaqui’ punllacunapimi chaitaca ruranga (Mateo 24:21). Ima shinami michijca ovejacunata chivocunamanta chꞌicanyachin, chashnallatajmi  Jesusca ungidocunata apoyajcunataca ungidocunata mana apoyajcunamanta chꞌicanyachinga.

4. ¿Jesús cashcata rurashpa gentecunata juzganataca imamantataj seguros canchij? (Isaías 11:​3, 4; fotomantapish parlapai).

⁴ Bibliapi nishca shinaca Jehová Diosca Jesustami cashcata rurashpa gentecunata juzgachun churashca (Isaías 11:​3, 4-ta liyipai). Paica gentecuna ima shina comportarijta, ima shina causajta, imacunallata parlajta, ungidocunatapish ima shina tratajtami ricucun (Mateo 12:​36, 37; 25:40). Chaimi Jesusca gentecunata juzgacushpaca picunalla ungidocunata apoyashcata yachanga. a Ovejacuna shina cajcunaca alli huillaicunata huillashpami ungidocunata apoyancuna. Chaita rurashcamantami paicunaca cashcata rurajcunata shina juzgashca cangacuna. Chaimantami cai Allpapi huiñaita causana oportunidadta charingacuna (Mateo 25:46; Apocalipsis 7:​16, 17). Jehová Diosta tucuipi cazujcunaca chai oportunidadta chasquishpaca cushillami sintiringacuna. Jatun llaqui punllacunapi, chai qꞌuipapish tucui shunguhuan Jehová Diosta sirvijllapimi paicunapaj shuticunaca “causaita chasquinapaj libropi” quillcashca canga (Apocalipsis 20:15).

5. a) ¿Ovejacunamanta, chivocunamanta chꞌimbapuraimantaca imatataj yachanchij? b) ¿Chai chꞌimbapuraimantaca picunallataj yachana can?

⁵ Jehová Diosta tucui shunguhuan cazushcata ricuchi. Ovejacunamanta, chivocunamanta Jesús parlashca chꞌimbapuraica cai Allpapi causana esperanzata charijcunapajmi ashtahuantajca can. Paicunaca sinchi feta charishcata ricuchingapajca predicacionpimi ungidocunata apoyana can. Ashtahuanpish alli cazuj, alli yuyaiyuj sirvij nishca ungidocuna cushca instruccioncunatapishmi tucui shunguhuan cazuna can (Mateo 24:45). Pero jahua pachaman rina esperanzata charijcunapishmi cai chꞌimbapuraimanta yachai tucun. ¿Imamanta? Jesusca ungidocunapish ima shina causacujta, ima shina comportaricujta, imacunallata parlacujtami ricucun. Shinallataj paicunapish Jehová Diostami tucuipi cazuna can. Jesusca ishqui chꞌimbapuraicunahuanmi ungidocunamanca huaquin consejocunata curca. Chai chꞌimbapuraicunaca Mateo capítulo 25-pimi can. Callaringapajca alli yuyaiyuj solteracunamanta, yuyai illaj solteracunamanta Jesús churashca chꞌimbapuraita yachashun.

ALLI YUYAIYUJ SOLTERACUNA, YUYAI ILLAJ SOLTERACUNA

6. ¿Pichca solteracunaca alli yuyaiyujcuna cashcataca ima shinataj ricuchircacuna? (Mateo 25:​6-10).

⁶ Jesusca paipaj catij chꞌimbapuraipica chunga solteracuna noviota tupanaman llujshishcatami nirca (Mateo 25:​1-4). Tucui solteracunami bodapi noviota compañasha nircacuna. Paicunamantaca pichcaca alli yuyaiyujcuna, pichcaca yuyai illajcunami carca. Alli yuyaiyuj solteracunaca noviotaca allichirishcami chapacurcacuna. Noviota tuta horascama shuyana cajpipish paicunaca shuyarcacunallami. Tutapi achijyachingapajca paicunaca lamparacunatami apashcacuna carca. Shinallataj chai lamparacunapi churangapajmi ashtahuan aceiteta apashcacuna carca. Chaimantami paicunapaj lamparacunahuan achijyachishpa catingapaj allichirishca carcacuna (Mateo 25:​6-10-ta liyipai). Novio chayamujpica alli yuyaiyuj solteracunaca paihuanmi bodaman yaicurcacuna. Chashna layallatajmi espiritualmente rijcharishca, tucuipi Jehová Diosta cazuj ungidocunaca Jesús shamujpica jahua pachapi paihuan tandanacungacuna (Apocalipsis  7:​1-3). b Pero ¿yuyai illaj solteracunahuanca imataj tucurca?

7. a) ¿Yuyai illaj solteracunahuanca imataj tucurca? b) ¿Yuyai illaj solteracunaca imamantataj bodaman mana yaicui tucurcacuna?

⁷ Yuyai illaj solteracunapaj lamparacunaca ñallami huañugrirca. Pero ashtahuan aceitetaca mana apamushcacunachu carca. Chaimantami novio ñalla chayamugrijta uyashpaca ashtahuan aceiteta randinaman rircacuna. Shinapish novio chayanapajca paicunaca manaraj tigramushcacunachu carca. Chaimi ‘alli yuyaiyuj solteracunalla allichirishca cashcamanta boda huasiman noviohuan yaicurcacuna. Paicuna yaicushca qꞌuipami pungutaca huichcarcacuna’ (Mateo 25:10). Yuyai illaj solteracunaca chaiman chayashpaca boda huasimanmi yaicusha nircacuna. Shinapish novioca paicunataca: “Cancunataca mana rijsinichu” nircami (Mateo 25:​11, 12). Chai solteracunaca novio shamungacama paita shuyangapajca mana allichirishcacunachu carca. ¿Cai chꞌimbapuraimantaca ungidocunaca imatataj yachai tucuncuna?

8, 9. ¿Chunga solteracunamantaca ungidocunaca imatataj yachai tucuncuna? (Fotomantapish parlapai).

⁸ Allichirishca shuyacushcata ricuchi. Jesusca huaquin ungidocuna cai pachapaj ruraicuna tucuringacama pacienciahuan shuyagrishcata, pero shujtaj ungidocuna mana pacienciahuan shuyagrishcataca mana nicurcachu. Ashtahuanpish ungidocuna cai pachapaj ruraicuna tucuringacama ahuantangapaj mana allichirishca cashpaca jahua pachapi causana oportunidadta mana charigrishcatami nicurca (Juan 14:​3, 4). Cai Allpapi o jahua pachapi causana esperanzata charishpapish tucuicunami cai chꞌimbapuraimantaca achcata yachai tucunchij. Cada unomi tucuringacama chaparashpa catingapaj, ahuantashpa catingapaj esforzarina canchij (Mateo 24:13).

⁹ Jesusca chai chunga solteracunamanta parlashpami allichirishca cana cashcata, chaparashpa shuyana cashcata yachachisha nirca. Chai huashaca talento nishca cullquimantami shuj chꞌimbapuraita churarca. Chai chꞌimbapuraihuanmi  Jesusca alli trabajadorcuna cana cashcata yachachirca.

TALENTO CULLQUIMANTA CHꞋIMBAPURAI

10. ¿Ishqui esclavocunaca amota alli sirvijcuna cashcataca ima shinataj ricuchircacuna? (Mateo 25:​19-23).

¹⁰ Talento cullquimanta chꞌimbapuraipica Jesusca ishqui esclavocuna paicunapaj amota alli sirvishcata, pero shuj esclavo paita mana alli sirvishcatami nirca (Mateo 25:​14-18). Ishqui esclavocunaca paipaj amopaj cullquita mirachingapajmi sinchita trabajarcacuna. Chashnami alli sirvijcuna cashcata ricuchircacuna. Amoca shujtaj llajtaman manaraj rishpaca paicunamanca achca cullquitami mingarca. Chai ishqui esclavocunaca alli trabajajcuna cashcamantami cullquitaca alli yuyashpa utilizarcacuna. Chaimantami amo tigramujpica paicunaman cushca cullquitaca ishqui cutinhuan mirachishcacuna carca. Chaimi amoca paicunataca: ‘Cancunapaj amohuan cushicuichij’ nirca (Mateo 25:​19-23-liyipai). Pero ¿caishuj esclavohuanca imataj tucurca? ¿Paiman mingashca cullquihuanca imatataj rurarca?

11. ¿Qꞌuilla esclavohuanca imataj tucurca?

¹¹ Shuj talentota chasquij esclavoca qꞌuillami carca. Paipaj amoca sinchita trabajashpa chai talento cullquita ashtahuan mirachichunmi munarca. Pero chaita ruranapaj randica talento cullquitaca allpapimi pacarca. Chaimi amo tigramujpica paiman cungapajca mana ashtahuan cullquita charirca. Chai esclavoca mana allimi carca. Chaimantami amopaj cullquita mana mirachishcamanta perdonta mañanapaj randica amotaca: ‘Canca imatapish alli rurachun munashpami pꞌiñarijlla cangui’ nishpa juchachirca. Chai esclavoca paipaj amopaj ñaupajpica mana allimi ricurirca. Chaimantami amoca paiman mingashca cullquita quichushpa, paipaj huasimanta llujshichishpa cacharca (Mateo 25:​24, 26-30).

12. ¿Jehová Diosta alli sirvij ishqui esclavocunaca picunatataj ricuchincuna?

¹² Amota alli sirvij ishqui esclavocunaca Jehová Diosta alli sirvij ungidocunatami ricuchin. Jesusca paihuan cushicuchunmi paicunata invitan. Chaimi paicunaca jahua pachapi causangapaj punta causarijcuna can (Mateo 25:​21, 23; Apocalipsis 20:5b). Pero,  ¿ungidocunaca qꞌuilla esclavomantaca imatataj yachai tucuncuna?

13, 14. ¿Talento cullquimanta Jesús parlashca chꞌimbapuraimantaca ungidocunaca imatataj yachai tucuncuna? (Fotomantapish parlapai).

¹³ Alli trabajador cashcata ricuchi. Talento cullquimanta chꞌimbapuraipi, shinallataj chunga solteracunamanta chꞌimbapuraipica Jesusca ungidocuna qꞌuillacuna tucugrishcataca mana nicurcachu. Ashtahuanpish Jehová Diosta tucui shunguhuan mana sirvijpi ima tucunatami nicurca. Paicunaca Dios ‘agllashcacunapurapi cangapajmi ashtahuan esforzarishpa catina’ can. Chaita rurashpallami jahua pacha Gobiernoman yaicungacuna (2 Pedro 1:10).

¹⁴ Jesusca chunga solteracunamanta, talento cullquimanta parlashpaca ungidocuna allichirishca chaparana cashcata, sinchita trabajana cashcatami yachachisha nirca. Pero Jesusca ungidocunamanca shujtaj consejocunatapishmi curca. Chaitaca Mateo 24:40 y 41-pimi ricui tucunchij.

¿PICUNATAJ ‘APASHCA CANGACUNA’?

15, 16. ¿Mateo 24:​40, 41-pica ungidocunamanca imatataj yachachin?

¹⁵ Cunan yachashca quimsa chꞌimbapuraicunamanta manaraj parlashpa Jesús imata nishcata ricushun. Paica ungidocuna Diospaj ñaupajpi ima shina ricurishcata yachangapajmi juzgashca canata nirca. Paica: ‘Ishqui runacunami chagrapi trabajacungacuna. Shinallataj ishqui huarmicunami cutana rumipi cutacungacuna’ nircami. Paicunaca chai trabajollatatajmi ruracurcacuna. Shinapish Jesusca: “Shujca apashcami canga, caishujca saquishcami canga” nircami (Mateo 24:​40, 41-ta liyipai). Chaita nishca qꞌuipaca Jesusca paita catijcunataca: “Chaparacuichij, cancunapaj Amo ima punlla shamunataca mana yachanguichijchu” nircami (Mateo 24:42). Chunga solteracunamanta parlashca qꞌuipapish Jesusca chaparashpa catichunmi paita catijcunata animarca (Mateo 25:13). Shinashpaca ¿Jesusca paipaj catijcunataca imatataj yachachisha nishcanga? Jehová Diosta cazuj ungidocunallami jahua pachapi Jesushuan mandangapaj ‘apashca cangacuna’ (Juan 14:3).

¹⁶ Rijcharishca cashcata ricuchi. Espiritualmente mana rijcharishca caj ungidocunaca jahua pachaman ringapaj agllashcacunahuanca mana tandachishcacunachu canga (Mateo 24:31). Pero jahua pachaman rina esperanzata mana charishpapish tucuicunami rijcharishca cangapaj, Diosmanta ama caruyangapaj esforzarishpa catina canchij.

17. ¿Jehová Dios cunan punllacunapi jahua pachaman richun huaquin gentecunata agllajpipish imamantataj mana mancharina canchij?

¹⁷ Jehová Diosta alli rijsishcamantami pai alli juzgaj cashcata seguros canchij. Chaimantami jahua pachaman richun cunan punllacunapiraj huaquin gentecunata agllajpipish mana mancharinchij. c Jesusca shuj chꞌimbapuraipica casi las cinco de la tardeta maijancuna trabajanaman yaicushcatami nirca (Mateo 20:​1-16). Chai horas trabajanaman yaicujcunapish, punlla enterota trabajajcunapish chai pagollatatajmi chasquircacuna. ¿Caimantaca imatataj yachanchij? Ungidocunaca ima hora agllashca cashpapish tucuicunami jahua pachaman rishpaca chai bendicionllatataj chasquingacuna. Pero chai bendicionta chasquingapajca Jehová Diostami tucuipi cazuna can.

JESÚS NISHCACUNATA AMA CUNGARICHU

18, 19. ¿Cai yachaipica imatataj yachashcanchij?

¹⁸ ¿Cai yachaipica imatataj yachashcanchij? Ovejacunamanta, chivocunamanta chꞌimbapuraipica cai Allpapi huiñaita causana esperanzata charijcunaca Jehová Diosmanta manataj  caruyana cashcatami yachashcacuna. Chaitaca cunan punllacunapipish, jatun llaqui punllacuna shamujpipishmi rurana can. Shamuj punllacunapica Jesusca gentecunata juzgacushpaca Jehová Diosta tucui shunguhuan sirvijcunalla huiñaita causana oportunidadta charinatami decidinga (Mateo 25:46).

¹⁹ Shinallataj ungidocunamanta parlaj ishqui chꞌimbapuraicunatami yacharcanchij. Jesús parlashca chunga solteracunamantaca pichca solteracunallami alli yuyaita charishcata ricuchircacuna. Paicunaca noviotaca allichirishcami shuyacurcacuna. Novio chaupi tuta chayana cajpipish paicunaca shuyashpami caticurcalla. Pero yuyai illaj solteracunaca mana allichirishcacunachu carca. Chaimantami novioca paipaj bodaman yaicuchunca mana saquirca. Ñucanchijpish Jesús tucui millai ruraicunata tucuchingacamami allichirishca shuyashpa catina canchij. Shinallataj talento cullquimanta chꞌimbapuraipica ishqui esclavocuna alli trabajadorcuna cashcatami yacharcanchij. Paicunaca paicunapaj amopajta mana shaicushpa rurashcamantami paipaj ñaupajpica alli ricurircacuna. Shinapish shuj esclavoca qꞌuilla cashcamantami paipaj amopaj ñaupajpica mana alli ricurirca. Ñucanchijpish tucuringacamami Jehová Diospajta ruranataca manataj saquina canchij. Shinallataj ungidocuna chaparashpa catina cashcatami yacharcanchij. Chaita rurashpami paicunaca jahua pachapi causana bendicionta chasquingacuna. Paicunaca chai bendicionta chasquina yuyaillami causancuna. Armagedón qꞌuipaca paicunaca ‘Malta Ovejapaj jatun micui bodapimi’ participangacuna (2 Tesalonicenses 2:1; Apocalipsis 19:9).

20. ¿Jesús nishcacunata uyajcunaca ima bendicioncunatataj chasquingacuna?

²⁰ Jesús juzgana punlla ñalla chayamugrijpipish mana mancharinachu canchij. Jehová Diosmi paita sirvishpa catichun ñucanchijman fuerzasta cunga. Chashnami ‘Runapaj Churipaj ñaupajpi shayarina’ tucushpaca cashcata rurajcunata shina juzgashca cashun (2 Corintios 4:7; Lucas 21:36). Jahua pachapi o cai Allpapi causana esperanzata charishpapish Jesús yachachishca chꞌimbapuraicunamantami yachana canchij. Chashnami Jehová Diospaj ñaupajpica alli ricurishun. Ashtahuancarin Jehová Dios cꞌuyaj cashcamantami ñucanchij shuticunaca ‘causaita chasquinapaj libropi’ quillcashca cangacuna (Daniel 12:1; Apocalipsis 3:5).