1. ¿Jehová Diospaj tucui rurashcacunata ricushpaca maipica imatataj tapurishcanchij?

JEHOVÁ DIOS tucui rurashcacunata ricushpaca ñucanchijpish David shinachari tapurishcanchij. Paica: “Jahua pachata ricushpaca cambaj maquihuan rurashcatami ricuni. Lunata, luzerotapish can rurashcata ricushpami, cashna nini: Runaca ¿imatagari? ¿Ima cajpitaj pai yuyailla canguiyari? Huañujlla runataca ¿ima cajpitaj ricuj shamunguiyari?” nircami (Salmo 8:3, 4). Ñucanchijpish lucerocunata ricushpaca David shinachari uchilla cashcata sintirishcanchij. “¿Jehová Diosca ñucanchijmantaca preocuparingachu?” nishpachari tapurishcanchij. Pero Jehová Diosca Adán y Eva humanocuna cajpipish paicunamantami preocuparirca. Ashtahuancarin paipaj familia ucupi cachunmi saquirca.

2. ¿Jehová Diosca cai Allpapi paipaj punta huahuacuna ima shina causachuntaj munarca?

² Adán y Evami cai Allpapica Diospaj punta huahuacuna carca. Diosca paicunapaj cꞌuyaj Yayami carca. Yayitu Diosca paicunataca cai Allpata cuidashpa, achca huahuacunata charishpa cuidachunmi mandarca (Génesis 1:28). Adán y Eva Jehová Diosta cazushca cashpa, paipaj munaita pajtachishca cashpaca paicunapish, paicunapaj huahua huahuacunapish Diospaj familia ucupimi huiñaita causacunman carca.

3. ¿Jehová Diosca Adán y Evata valorashcataca ima shinataj ricuchirca?

³ Jehová Diosca Adán y Evata paipaj familia ucupi causachun saquishpaca paicunata valorashcatami ricuchirca. Davidca Jehová Dios runacunata rurashcamanta parlashpaca: “Ashallamantami angelcuna shinallatataj mana rurashcangui.  Jatun nishca canata, alli nishca canatami coronata shina churachishcangui” nircami (Salmo 8:5). Diosca runacunataca mana angelcunata shina poderyujta, yachaisapa cajta rurarcachu (Salmo 103:20). Pero cai Allpapi alaja causaita charichunmi rurarca.

4. a) ¿Adán y Eva, Diosta mana cazushcamantaca imataj tucurca? b) ¿Cai yachaipica imatataj yachashun?

 ⁴ Adán y Evaca Diospaj familia ucupi canatami saquircacuna. Chaimantami paicunapaj huahua huahuacunapish llaquicunata charircacuna. Pero Jehová Diosca paita cazuj runacuna paipaj huahuacuna cachunmi munan. Cai yachaipica Jehová Dios ñucanchijta ima shina valorashcatami yachashun. Shinallataj Diospaj familia ucupi cangapaj imallata rurana cashcatami yachashun. Tucuripica Diospaj huahuacuna cai Allpapi ima bendicioncunata charinamantami yachashun.

5. ¿Jehová Dios ñucanchijta paiman rijchajta rurashcamantaca ima shinataj agradicina canchij?

⁵ Jehová Diosca ñucanchijta paiman rijchajta rurashpami valorashcata ricuchirca (Génesis 1:26, 27). Diosman rijchajta rurashca cashcamantami Jehová Dios shina cꞌuyaj, llaquij, cashcata ruraj cai tucunchij (Salmo 86:15; 145:17). Chashna cangapaj esforzarishpaca Jehová Diostami jatunyachishun, paita agradicishcatapishmi ricuchishun (1 Pedro 1:14-16). Jehová Dios munashca shina causashpaca contentosmi sintirishun. Ashtahuancarin Jehová Diosca ñucanchijtaca paipaj familia ucupi cachunmi saquinga.

6. ¿Yayitu Diosca cai Allpata rurashpaca ima shinataj runacunata valorashcata ricuchirca?

⁶ Jehová Diosca runacuna causachunmi cai Allpata rurarca. Paica gentecunata manaraj rurashpami achca huatacuna ñaupajman cai Allpata alajata allichirca (Job 38:4-6; Jeremías 10:12). Paica mana mitsashpami tucui cai Allpapi imalla tiyashcacunataca ñucanchijpaj alajata rurarca (Salmo 104:14, 15, 24). Paillatajmi tucui rurashcacunataca alli cashcata ricurca (Génesis 1:10, 12, 31). Chai qꞌuipaca Yayitu Diosca runacunataca cai Allpata, chaipi tucui imalla tiyajcunata cuidachunmi saquirca (Salmo 8:6). Chashnami runacunataca valorashcata ricuchirca. Jehová Diosca ñalla jucha illaj runacuna cai Allpata cuidashpa para siempre cushilla causachunmi saquinga. ¿Yayitu Diostaca cai alaja causaita cusha nishcamanta agradicinata yachanguichu?

7. Josué 24:15-pi nishca shinaca ¿cada uno imatataj decidi tucunchij?

⁷ Jehová Diosca cada uno imata decidichunmi saquishca. Chaimantami ñucanchij causaipi imata ruranata decidi tucunchij (Josué 24:15-ta liyipai). Jehová Diosca ñucanchij causaipi paita sirvingapaj decidijpica cushillami sintirin (Salmo 84:11; Proverbios 27:11). Chaimantami alli decisioncunata agllangapaj esforzarina canchij. Jesuspaj ejemplomanta yachashun.

8. ¿Jesusca shujtajcunata ayudangapajca imatataj decidirca?

⁸ Jesusca shujtajcunamantami preocuparirca. Shuj cutinca paica samaringapajmi paipaj discipulocunahuan shuj chulunlla lugarman ricurcacuna. Chaiman ricujpica achca gentecunaca Jesús yachachishcata uyasha nishpami paicunata catishpa rircacuna. Jesusca paicunata ricushpaca mana pꞌiñarircachu. Ashtahuanpish cꞌuyaihuanmi paicunamanca Yayitu Diosmanta achcata yachachirca (Marcos 6:30-34). Ñucanchijpish shujtajcunata ayudangapajmi ñucanchij tiempo, fuerzasta llujchina canchij. Chashnami Jehová Diosta  jatunyachishun (Mateo 5:14-16). Ashtahuancarin Diospaj familia ucupi casha nishcatami ricuchishun.

9. ¿Jehová Diosca yaya mamacunamanca ima regalotataj cushca?

⁹ Jehová Diosca gentecunataca huahuacunata charichunmi saquishca. Shinallataj yaya mamacunamanca huahuacunaman Jehová Diosta cꞌuyachun, paita sirvichun yachachichunmi mingashca. Cancuna huahuacunata charishpaca chai regalotami valorana canguichij. Caipi yuyashun. Jehová Diosca angelcunamanca podertami curca. Pero paica angelcunamanca huahuacunata charichunca mana chai poderta curcachu. Cutin Jehová Diosca yaya mamacunamanmi huahuacunata corregishpa, Jehová Diospaj mandashcacunata yachachishpa huiñachichun saquishca. Chaimantami yaya mamacunaca agradecidos sintirina can (Efesios 6:4, NWT; Deuteronomio 6:5-7; Salmo 127:3). Shinallataj Yayitu Diosca paipaj organizacionhuanmi yaya mamacuna huahuacunaman Bibliamanta yachachichunca publicacioncunata, videocunata, cantocunata cushca. Chashnami Yayitu Diospish, paipaj Churi Jesuspish huahuacunata cꞌuyashcata ricuchincuna (Lucas 18:15-17). Jehová Diosca yaya mamacuna paicunapaj huahuacunata cuidangapaj tucui pudishcata rurajpica cushillami sintirin. Yaya mamacunaca caita pajtachishpaca paicunapaj huahuacuna Diospaj familia ucupi cachunmi ayudancuna.

10, 11. ¿Jehová Dios paipaj Churita cushcamantaca ima bendiciontataj charishun?

¹⁰ Jehová Diosca ñucanchijta cꞌuyashcamantami paipaj cꞌuyashca Churi Jesusta curca. Chaimantami cutin tigra paipaj huahuacuna cai tucunchij.  Párrafo 4-pi ricushca shinaca Adanpish Evapish paicunallataj juchata ruranata decidishcamantami Yayitu Diospaj familia canata saquircacuna. Chashnami paicunapaj huahuacunatapish Jehová Diosmanta caruyachircacuna (Romanos 5:12). Pero Yayitu Diosca cazuj gentecunata cꞌuyashcamantami paipaj cꞌuyashca Churi Jesusta curca (Juan 3:16; Romanos 5:19). Jesusmantami 144 mil gentecunataca Yayitu Diosca paipaj huahuacuna cutin tigra cachun agllashca (Romanos 8:15-17; Apocalipsis 14:1).

¹¹ Achca gentecunami Yayitu Diosta cazushpa, paipaj munaita pajtachishpa causacuncuna. Paicunaca Jesús cai Allpata mil huatacunata mandashca qꞌuipa cutin Diospaj familia canatami shuyacuncuna (Salmo 25:14; Romanos 8:20, 21). Chai esperanzata charishcamanta, Jehová rurashcamantami paitaca Yaya ni tucuncuna (Mateo 6:9). Causarij gentecunapish Yayitu Diosta rijsina oportunidadtami charingacuna. Paicunaca Jehová Diosta cazunata decidishpaca tiempohuanca Diospaj huahuacunami cangacuna.

12. ¿Ima tapuitataj cutichishun?

¹² Jehová Diosca ñucanchijta valorashcatami ricuchishca. Paica jahua pachapi causana esperanzata charijcunataca ñami paipaj huahuacuna cachun saquishca. Cutin cai Allpapi causana esperanzata charijcunataca paraíso Allpapimi Diosca paipaj huahuacuna cachun saquinga (Apocalipsis 7:9). ¿Cada uno Diospaj familia ucupi para siempre cangapajca cunanmanta imatataj rurana canchij?

13. ¿Diospaj familia ucupi cangapajca imatataj rurana canchij? (Marcos 12:30).

¹³ Jehová Diosta shungumanta sirvishunchij (Marcos 12:30-ta liyipai). Jehová Diosca paita adorana regalotami cushca. Paipaj mandashcacunata cazushpaca Yayitu Diosta  cꞌuyashcatami ricuchishun (1 Juan 5:3). Por ejemplo, Jesusca paipaj discipulocunata rurachun, bautizachunmi mandarca (Mateo 28:19). Shinallataj caishujmanta chaishujmanta cꞌuyaita ricuchinacushpa causachunmi mandarca (Juan 13:35). Jehová Diosta tucuipi cazujpica paica paipaj familia ucupi cachunmi saquinga (Salmo 15:1, 2).

14. ¿Ima shinataj shujtajcunata cꞌuyashcata ricuchinchij? (Mateo 9:36-38; Romanos 12:10).

¹⁴ Shujtajcunata cꞌuyashunchij. Jehová Diosca tucuimanta yalli cꞌuyajmi can (1 Juan 4:8). Ñucanchij Yayitu Diosta manaraj rijsijpica paimi ñucanchijta ña cꞌuyarca (1 Juan 4:9, 10). Shujtajcunata cꞌuyashpaca paipaj ejemplota caticushcatami ricuchishun (Efesios 5:1). ¿Ima shinataj shujtajcunaman cꞌuyaita ricuchina canchij? Tiempo tiyajpirajmi gentecunamanca Jehová Diosta rijsichun ayudana canchij (Mateo 9:36-38-ta liyipai). Chashnami tiempohuanca paicunapish Diospaj familia parte tucungacuna. Maijan bautizarijpica paicunataca cꞌuyashpa, respetashpami catina canchij. Chaita ricuchingapajca ñucanchij huauqui panicunapimi siempre confiana canchij (1 Juan 4:20, 21). Paicuna de veras Jehová Diosta, huauqui panicunata cꞌuyaj cashcataca mana dudanachu canchij. Ashtahuanpish paicunata valorashpa ñucanchijta yalli cashcatami yuyana canchij (Romanos 12:10-ta liyipai; Filipenses 2:3).

15. ¿Picunallamantaj cꞌuyaita ricuchina canchij?

¹⁵ Tucuicunata llaquishpa alli tratashunchij. Diospaj familia parte cangapajca Biblia yachachishca shinami causana canchij. Por ejemplo, Jesusca shujtajcunata llaquishpa alli tratachunmi mandarca. Ñucanchijta pꞌiñajcunatapish cꞌuyachunmi mandarca (Lucas 6:32-36). Caita pajtachinaca maipica sinchichari ricuringa. Sinchi cajpica Jesuspaj ejemplomantami yachana canchij. Jehová Diostapish tucuipi cazungapajmi esforzarina canchij. Chashnami Yayitu Diospaj familia parte casha nishcata ricuchishun.

16. ¿Diospaj familiata ama malpi quedachingapajca imatataj rurana canchij?

¹⁶ Diospaj familiata ama malpi quedachishunchij. Caipi yuyashun. Uchilla huahuacunaca paicunapaj jatun huauquicuna imata rurajtami catincuna. Jatun huauquicuna Dios mandashca shina causashpaca uchilla huahuacunamanmi alli ejemplota cuncuna. Pero jatun huauquicuna mana allita rurajpica uchilla huauquicunapish paicunapaj ejemplotami catingacuna. Diospaj familia ucupipish maijan huauqui o pani apostatacuna tucujpi, huainayashpa causajpi, shuhua tucujpica caishuj huauqui panicunapish paicuna shinachari causasha ningacuna. Mana allicunata rurajcunaca Diospaj familiatami malpi quedachin (1 Tesalonicenses 4:3-8). Chaimanta cai mana alli ejemplocunataca ama catishunchij. Jehová Diosmanta pi caruyachichunpish amataj saquishunchij.

17. ¿Imacunapitaj mana yallitaj confiana canchij?

¹⁷ Charishca cosascunapi confianapaj randica Jehová Diospi confiashunchij. Jehová Diosca paipaj Gobiernota punta lugarpi churajpi, paipaj mandashcacunata cazujpica ñucanchijmanca micunata, ropitata, maipi causanatami cunga (Salmo 55:22; Mateo 6:33). Chaimanta ima charishca cosascuna ñucanchijman cushi causaita cunata, cuidanataca ama yuyashunchij. Ñucanchijca Jehová Diosta sirvishpallami tranquilo, cushilla sintirishun (Filipenses 4:6, 7). Cullquita charishpapish ima cosascunata randishpaca: “¿Chaipi ocuparingapaj tiempota, fuerzasta charinichu?” nishpami tapurina canchij. Jehová Diosca paipaj familia ucupi huaquin  mingashcacunata pajtachichunmi shuyan. Chaimanta Diosta sirvingapaj imapish jarcachunca mana saquinachu canchij. Shuj charij runaca Jesús paita catichun nijpica paipaj yallitaj charishca cosascunapi ocuparishcamantami Jesustaca mana catirca. Shinallataj Diospaj huahua cana oportunidadtami pirdirca. Pero ñucanchijca mana chashna casha ninchijchu. Chaimanta ima charishca cosascunallapi ama confiashunchij (Marcos 10:17-22).

18. ¿Diosta cazuj gentecunaca ima bendicioncunatataj charishun?

¹⁸ Diosta cazujcunaca huiñaipaj Diosta cꞌuyana, adorana valishca regalotami chasquingacuna. Cai Allpapi causana esperanzata charijcunapish cai Allpata cuidashpa, allichishpami cushilla causangacuna. Jehová Diosca paipaj Gobiernohuanmi cai Allpataca shuj alaja, sumaj paraisota cutin ruranga. Jesuspish Adán Evamanta charishca llaquicunatami tucui tucuchinga. Jehová Diosca huañushcacunata causachishpaca cai paraíso Allpapi huiñaita causana oportunidadtami cunga (Lucas 23:42, 43). Cai paraíso Allpapi causaj gentecunaca jucha illaj tucushpaca Dios munashca shinami maravilla causaita charingacuna (Salmo 8:5).

19. ¿Imatataj siempre yuyailla cana canchij?

¹⁹ Jehová Diosca cantaca achcatami cꞌuyan. Paica paraíso Allpapi causana esperanzata charijcuna paipaj familia cachunmi munan. Chaimanta Jehová Dios munashca shina causangapaj esforzarishpa catishunchij. Dios cusha nishcacuna yuyailla cada punlla causashunchij. Chashnami Yayitu Diosta huiñaita sirvina oportunidadta charishun.