1, 2. ¿Cai yachaipica imatataj yachashun?

CAIPI yuyashunchij. Maipica ñucanchij ima randishcata rato cachachunmi munanchij. Pero mana utca chayajpica tal vez preocuparishunmi. Proverbios 13:12-pica: ‘Shuyacushca mana utca pajtajpica, shungu pꞌaquirishpami llaquirincuna’ ninmi. Pero ñucanchij randishca imamanta mana utca shamujta yachashpa, ñalla chayamunata yachashpaca pacienciahuanmi shuyashun.

² Cai yachaipica pacienciahuan shuyangapajmi huaquin yuyaicunata Bibliapi yachashun (Miqueas 7:7). Shinallataj Yayitu Dios ñucanchij mañashcacunata mana utca cutichijpi, ima llaquita apashpaca pacienciahuan shuyanatami yachashun. Tucuripica pacienciahuan shuyashcamanta ima bendicioncunata chasquinatami ricushun.

3. ¿Proverbios 13:11-mantaca imatataj yachanchij?

³ Proverbios 13:11-pica imamanta pacienciata charina cashcatami yachachin. Chaipica: ‘Rato charijyajcunaca, japishcahuanmi rato chingachincuna. Pero asha asha trabajashpa japijcunaca ashtahuanmi mirachincuna’ ninmi (NWT ). ¿Caimantaca imatataj yachanchij? Imapish alli llujshichunca pacienciahuanmi asha asha pajtachina canchij.

4. ¿Proverbios 4:18-mantaca imatataj yachanchij?

⁴  Proverbios 4:18-pica: “Ashtahuanpish cashcata rurajcunapaj causaica, pacarijpi achijlla inti llujshishpa, chaupi punllayajpi  ashtahuan achijlla tucuj shinami” ninmi. Cai shimicunaca Yayitu Jehová Dios paipaj puebloman asha asha paimanta yachachishcatami ricuchin. Shinallataj cai versoca maijan Yayitu Diosmanta yachashpa, paipaj causaipi asha asha cambiocunata rurashpa Diosta sirvishcatami ricuchin. Chaimanta Bibliata estudiashpa, Biblia yachachishcacunata ñucanchij causaipi pajtachishpaca asha ashami Jesuspaj ejemplota alli catishun. Jehová Diostapish allimi rijsishun. Jesusca caita alli intindichingapajca shuj ejemplohuanmi yachachirca. Ricushun.

5. ¿Alli gentecuna Diosta sirvi callarishcataca Jesusca imahuantaj chꞌimbapurarca?

⁵ Jesusca Diospaj Gobiernomanta predicashcataca shuj tarpushca muyuhuanmi chꞌimbapurarca. Alli gentecunaca Diosmanta yachashpaca shuj muyuta tarpujpi huiñaj shinami Diostaca asha asha sirvi callarincuna. Jesusca: “Allpayujca tarpushpaca tutaca dorminmi, punllaca jatarinmi. Chashna cajpipish tarpushcaca tutapish punllapish huiñashpa catinllami. Allpayujca ima shina huiñajtaca mana yachanchu. Allpapica muyuca huiñanllami: Puntaca alcacermi tucun, chai qꞌuipaca caspami tucun. Chai caspapimi granoca jundarin” nircami (Marcos 4:27, 28). Jesús nishca shinallatajmi Bibliamanta yachacujcunaca paicunapaj causaipi asha asha cambiocunata rurancuna (Efesios 4:22-24). Pero yuyarinami canchij. Jehová Diosmi yachacujcunataca paita sirvichun shuj muyuta huiñachij shina ayudan (1 Corintios 3:7).

6, 7. ¿Jehová Dios ima shina cai Allpata rurashcamantaca imatataj yachanchij?

⁶ Jehová Diosca imata rurangapaj, imata pajtachingapajca pacienciahuanmi ruran. Paica paipaj shutita jatunyachingapaj, shujtajcunata beneficiangapajmi chashna ruran. Por ejemplo, Jehová Dios cai Allpata gentecunapaj ima shina allichishcata ricushun.

⁷ Bibliapica Jehová Diosca cai pacha mashna medina cashcataca allimi ricurca. Cai pachapi callari rumicunataca allimi churarca ninmi (Job 38:5, 6). Shinallataj Jehová  Diosca pai rurashcacuna alaja cashcata ricungapajmi tiempota surcurca (Génesis 1:10, 12). Angelcunaca Jehová Dios tucui cosascunata alajata ruracujta ricushpaca cushillami sintirishcangacuna. Chaimantami paicunaca Yayitu Diostaca cushicushpa alabarcacuna (Job 38:7). ¿Caimantaca imatataj yachanchij? Jehová Diosca jahua pachata, cai pachata, tucui imalla tiyajcunataca achca huaranga huatacunatami pacienciahuan rurarca. Yayitu Diosca pai tucui rurashcacunata ricushpaca tucui chaicuna yallitaj sumaj, alli cashcatami ricurca (Génesis 1:31).

8. ¿Cunanca imatataj yachagrinchij?

⁸ Ña ricushca shinaca Bibliapica pacienciahuan shuyanatami yachachin. Cunanca Jehová Dios ayudangacama imallapi pacienciata charina cashcata yachashun.

9. ¿Yayitu Diosta mañashpaca imamantataj maipica pacienciahuan shuyana canchij?

⁹ Ñucanchij mañashcacunata Jehová Dios mana utca cutichijpimi pacienciata charina canchij. Maipica ima problemata charishpaca fuerzasta cuchun o imapi mejorangapaj ayudachunmi Jehová Diosta mañanchij. Pero, ¿Jehová Diosca imamantataj maipica ñucanchij mañashcacunataca mana rato cutichin?

10. ¿Yayitu Dios ñucanchij mañashcacunata cutichichunca imamantataj pacienciahuan shuyana canchij?

¹⁰ Jehová Diosta mañashpaca paipi feta charishcatami ricuchinchij (Hebreos 11:6). Chaimantami paica ñucanchij mañashcacunata uyan (Salmo 65:2). Pero Jehová Diosca paita mañajpica paipaj munaita pajtachingapaj esforzaricushcata o mana esforzaricushcatami alli ricun (1 Juan 3:22). Chaimantami imapi mejorangapaj Yayitu Diosta ayudachun mañashpaca chaipi mejorangapaj esforzarina canchij. Shinallataj Jehová Diosta cutin cutin mañashpaca pai cutichingacamami shuyana canchij. Jesusca caimanta parlashpaca: “Mañashpa catichij Diosca cungallami, mashcashpa catichij japinguichijmi, punguta huajtashpa catichij Diosca pascangallami. Mañajpish chasquinmi, mashcajpish japinmi, punguta huajtajpajpish punguca pascashcami canga” nircami (Mateo 7:7, 8, NWT ). Caipi nishca shinaca Jehová Diosta mañanata manataj saquijpica paica cutichingami (Colosenses 4:2).

11. ¿Hebreos 4:16-mantaca imatataj yachanchij?

¹¹ Maipica Yayitu Diosta mañashca qꞌuipaca ñucanchij mañashcacunata mana rato cutichishcatami yuyanchij. Pero Jehová Diosca ñucanchij minishticun horasmi cutichinga (Hebreos 4:16-ta liyipai). * Chaimanta Jehová Dios ñucanchij mañashcacunata ñucanchij munashca horaspi mana cutichijpica Diosca pandaricunmi nishpaca mana yuyanachu canchij. Por ejemplo, achca huauqui panicunami Diospaj Gobierno cai millai mundota tucuchichun Diosta mañashpa caticuncuna. Jesusllatajmi chashna mañachun yachachirca (Mateo 6:10). Pero ñucanchij munashca horaspi Yayitu Dios cai millai mundota mana utca tucuchijpi paimanta caruyanaca llaquimi canman (Habacuc 2:3; Mateo 24:44). Chaita ruranapaj randica Jehová Dios cai mana alli mundota tucuchingacamami mañashpa catina canchij. Jehová Diosca cai mana alli mundota tucuchingapajca ñami shuj punllata agllashcata charicun. Chai punlla pajtaringacama shuyanaca tucuicunapaj allimi canga (Mateo 24:36; 2 Pedro 3:15).

12. ¿Imamantataj maipica pacienciata charinaca mana jahualla can?

 ¹² Maipica ñucanchijta shujtajcuna mana alli tratajpimi pacienciata charina canchij. Cunan punllacunapica gentecunaca shujtaj razamanta cajta, shujtaj culturamanta cajta, ima discapacidadta charijtaca mana allimi tratancuna. Yayitu Diosta sirvijcunatapish Biblia yachachishcacunata cazushcamantami mana alli tratancuna. Ñucanchijta chashna mana alli tratajpica Jesús ima nishcatami yuyarina canchij. Paica: ‘Tucuringacama ahuantajllami quishpirishca canga’ nircami (Mateo 24:13). Pero ¿congregacionpi shuj huauqui o pani jatun juchata rurajpi ancianocuna juzgangacama pacienciata charishunchu? ¿Ancianocuna Jehová Dios munashca shina juzganapichu confiashun?

13. ¿Shuj huauqui o pani jatun juchata rurajpica Jehová Diosca ancianocunataca imata rurachuntaj mandan?

¹³ Ancianocunaca shuj huauqui o pani congregacionpi jatun juchata rurajpimi paicunata ayudangapaj Jehová Diospaj ayudata mashcancuna (Santiago 3:17). Shinallataj paicunaca juchata ruraj huauqui panicuna Diospajman cutin tigrachunmi ayudancuna (Santiago 5:19, 20). Congregacionpi cajcunapish tucui chuya cachunmi ricuncuna. Llaquichishca huauqui panicunatapishmi ayudancuna (2 Corintios 1:3, 4). Ancianocunaca congregacionpi maijan huauqui o pani jatun juchata rurajpica ima tucushcatami alli yachanaraj can. Chaita rurangapajca tiempomi minishtirin. Qꞌuipaca Yayitu Diostami ayudachun mañana can. Biblia yachachishca shinami juchata rurajtaca aconsejana can. Juchata rurajmanca minishtishca disciplinatapishmi cuna can (Jeremías 30:11). Ancianocunaca pita juzgangapajca mana demoranachu can. Juzgashpapish mana ucui jahua juzganachu can. Ancianocuna Jehová Dios munashca shina juzgajpica huauqui panicunaca achcatami beneficiaringacuna. Pero maipica juchata rurajcunata ancianocuna juzgashca qꞌuipapish maijan huauqui panicunaca llaquilla cashpami catincuna. ¿Ñucanchijcunapish chashna sintirishpaca imatataj rurana canchij?

14. ¿Maijan huauqui pani ñucanchijta llaquichijpica Josemantaca imatataj yachai tucunchij?

¹⁴ Tal vez maipica Diosta mana sirvij gentecuna o huauqui panicunami ñucanchijta llaquichishca. Chashna cajpica Bibliapimi  Yayitu Dios chai llaquicunata allichingacama shuyana cashcata yachai tucunchij. Por ejemplo, Joseca paipaj huauquicuna paita llaquichijpica chai llaquicunallapi yuyashpaca mana saquirircachu. Ashtahuanpish Yayitu Diosta sirvina yuyaillami carca. Chashna José pacienciahuan shuyashcamantami Jehová Diosca paita bendiciarca (Génesis 39:21). Tiempo huashaca Joseca paipaj huauquicunatami perdonarca. Jehová Dios paita ima shina bendiciashcatapishmi cuentata curca (Génesis 45:5). Ñucanchijpish José shinallataj Yayitu Diospajman cꞌuchuyashpa, Dios llaquicunata tucuchingacama ahuantashpaca cushillami sintirishun (Salmo 7:17; 73:28).

15. ¿Shuj panica pacienciahuan ahuantangapajca imatataj rurarca?

¹⁵ Tal vez ñucanchijca José shinaca llaquicunataca mana charinchijchu. Pero shujtajcuna mana alli tratajpica llaquillami sintirinchij. Chashna mana alli tratajpipish Bibliapi tiyaj consejocunatami pajtachina canchij (Filipenses 2:3, 4). Shuj panipaj ejemplopi yuyashunchij. Cai panica trabajopi paipaj compañera paimanta huashalla llullacunata nicushcatami yachaj chayarca. Pero panica llaquilla, pꞌiñarishca saquirinapaj randica Jesuspaj ejemplotami catirca. Jesusca paita llaquichijpipish mana tigra llaquichircachu (1 Pedro 2:21, 23). Chaimantami panica paipaj compañera paita mana alli tratajpipish chaita cungarinata decidirca. Qꞌuipaca paipaj compañera sinchi ungüita charishcata, chaimanta llaquilla sintirij cashcatami yachaj chayarca. Chaimi panica paipaj compañera mana llaquichina munaihuan llaquichishcata intindirca. Cai panica paita mana alli tratashca horas pacienciata ricuchishcamantami cushilla sintirirca.

16. 1 Pedro 3:12-pi nishca shinaca ¿llaquicunahuan cajpica Yayitu Diosca imatataj ruran?

¹⁶ Pi ñucanchijta llaquichijpi, ima sinchi problemata charishpaca Jehová Dios shungupi llaquilla cajcunapaj cꞌuchullapi cashcatami yuyarina canchij (Salmo 34:18). Paica ñucanchij pacienciahuan shuyajpi, ñucanchij ima shina sintirishcata paiman huillajpica achcatami cꞌuyan (Salmo 55:22). Jehová Diosca tucuicunapaj Juezmi can. Paica imalla pasacujtaca allimi yachan (1 Pedro  3:12-ta liyipai). Chaimanta sinchi llaquicunata mana allichi tucushpapish Yayitu Dios allichingacama pacienciahuan shuyashpa catishunchij.

17. Isaías 30:18-pi nishca shinaca ¿Yaya Diosca imatataj pajtachinga?

¹⁷ Yayitu Diosca ñallami achca bendicioncunata cunga. Isaías 30:18-pica: “Mandaj Diosca cancunata llaquingapaj shuyacunmi. Paica cancunata chashna llaquishpaca cꞌuyaj cashcatami ricuchinga. Mandaj Diosca cashcata ruraj Diosmi. Paipi shunguta churajcunaca tucuicunami cushichishca canga” ninmi. Jehová Dios llaquicunata tucuchingacama pacienciahuan shuyashpaca cunan punllapish, shamuj punllapish achca bendicioncunatami charishun.

18. ¿Ima bendicioncunatataj charishun?

¹⁸ Cunan punllacunapica minishtirishca cosascunamantami maipica achcata preocuparinchij. Pero paraíso Allpapica minishtishca cosascunata yallimi tucuita charishun (Salmo 72:16; Isaías 54:13). Shinallataj llaquicunata, problemacunataca manataj charishunchu (Apocalipsis 21:4). Caita yachashpaca dimastij cushillami sintirinchij.

19. ¿Yayitu Diosca imapajtaj allicunata rurashpa catichun cunanmanta ayudacun?

¹⁹ Jehová Diosca paraíso Allpapi causangapajca cunanmantami mana allicunata saquishpa, alli cosascunata rurashpa catichun ayudacun. Chaimanta amataj desanimarishpa ñaupajman catishunchij. Yayitu Diosca ñallami maravilla causaita cunga. Jehová Dios paipaj munaita pajtachingacama pacienciahuan shuyashpa catishunchij.