YACHAI 32
Tucuita ruraj Diospi ñucanchij feta sinchiyachishunchij
“Crinaca, imata japisha nicushcata japinataj cashca yuyailla shuyanami. Manapish ricushcata chai shinataj cana cashcata crinami” (HEBREOS 11:1).
CANTO 11 Jehová rurashcacunaca paitami alaban
CAITAMI YACHASHUN *
1. ¿Tucuita ruraj Jehová Diosmantaca imatataj yachangui?
CAN UCHILLARAJ cajpica cambaj familiaca tal vez ñami testigo de Jehová cashcanga. Chaimantachari canca uchillaraj cashpa Jehová Dios tucuita ruraj cashcata yacharcangui. Shinallataj pai cꞌuyaj, llaquij cashcata, shamuj punllapipish paraíso Allpapi sumaj causai tiyanatami yachashcangui (Génesis 1:1; Hechos 17:24-27).
2. ¿Tucuita ruraj Diospi crijcunamantaca huaquincunaca imatataj nincuna?
2 Cutin achca gentecunaca Dios tiyashcapi, pai tucuita rurashcapica mana crincunachu. Paicunaca: “Causaipish, imalla tiyajcunapish ñapish ricurircallami. Animalitocunapish, plantacunapish, imalla tiyajcunapish evolucionmantami tiyan” nincunami. Chaita crij huaquincunaca estudiadosmi cancuna. Paicunaca: “Cienciaca Biblia pandarij cashcatami ricuchishca, mana estudiado gentecunallami Bibliapi, tucuita ruraj Diospi crincuna” nincunachari.
3. ¿Imamantataj cada uno ñucanchij feta sinchiyachina canchij?
3 Dios tucuita rurashcapi mana crijcuna ñucanchijta pandachichunca mana saquinachu canchij. Chaipajca cai catij tapuicunapi yuyashunchij. ¿Jehová Dios tucuita rurashcataca imamantataj crinchij? ¿Shujtajcuna yachachishcallamantachu crinchij o ñucanchijllatajchu Dios tucuita rurashcacunata investigashcanchij? (1 Corintios 3:12-15). Mashna huatacunata Jehová Diosta sirvicushpapish ñucanchij fetami sinchiyachina canchij. Chaita rurashpaca yachaj tucushca gentecuna, panda yachachijcuna ñucanchijta pandachichunca mana saquishunchu (Colosenses 2:8; Hebreos 11:6). Cai yachaipica imamanta huaquin gentecuna Yayitu Dios tucuita rurashcapi mana crishcatami ricushun. Shinallataj ñucanchijpish tucuita ruraj Jehová Diospi ñucanchij feta ima shina sinchiyachinatami yachashun.
¿IMAMANTATAJ ACHCACUNACA DIOS TUCUITA RURASHCAPI MANA CRINCUNA?
4. Hebreos 11:1-pi nishca shinaca ¿imamantataj feta charinchij?
4 Huaquin gentecunaca: “Feta charinaca imatapish mana alli investigashpa crinallami can” nincunami. Pero Bibliaca chaitaca mana yachachinchu (Hebreos 11:1-ta liyipai). Bibliapica mana ricui tucushcacuna tiyashcata cringapajca alli investigana cashcatami yachachin. Por ejemplo, Jehová Dios, Jesús, Diospaj Gobierno tiyashcataca Bibliapica achijtami ricuchin (Hebreos 11:3, NWT ). Shuj cientificoca Testigomi tucurca. Paica: “Testigo de Jehovacunaca ciencia ima nishcata investigashpa, Biblia ima nishcata investigashpami mana ricushcacuna ciertotaj tiyashcata crinchij” ninmi.
5. ¿Imamantataj huaquin gentecunaca Yayitu Dios tucuita rurashcapi mana crincuna?
5 Shinaca ¿huaquin gentecunaca imamantataj Dios tucuita rurashcacunapica mana crincuna? Paicunaca mana investigashcamantami mana crincuna. Robertca cunanca testigo de Jehovami can. Paica: “Ñuca escuelapi cajpica Yayitu Dios tucuita rurashcamantaca nunca mana yachachijcunachu carca. Chaimantami Dios tucuita rurashcataca mana crircani. Pero ñuca 22 huatacunata charijpica testigo de Jehovacunami ñucata visitarcacuna. Paicunaca Yayitu Dios tucuita rurashcata yachachingapajca Bibliapi tiyaj yuyaicunahuanmi achijta yachachircacuna” ninmi. * (“ Yaya mamacuna, caita ruraichij” nishca recuadrota ricui).
6. ¿Huaquin gentecunaca imamantataj Dios tiyashcataca mana crincuna?
6 Huaquin gentecunaca Diosta mana ricushcamantami Diospi mana crincuna. Pero chashnapish paicunaca mana ricushcacunapimi crincuna. Por ejemplo, huaira tiyashcataca huaquin pruebacunata ricushpami crincuna. Bibliapipish mana ricushcacunamantami parlan. Pero Bibliata alli investigashpaca chaicuna tiyashcatami cuentata cunchij (Hebreos 11:1). Mana ricushcacuna tiyashcata investigangapajca achca tiempo, esfuerzomi minishtirin. Gentecunaca investigangapaj mana esfuerzota rurashcamantami Dios tiyashcataca mana crincuna.
7. ¿Universidadpi estudiajcunaca imata rurashpataj Yaya Dios tucuita rurashcapi crishcacuna?
7 Universidadcunapi Dios tucuita rurashcata mana yachachishcamantami párrafo 5-pi parlashca huauqui Robert shina huaquincunaca Dios mana tiyashcapi crincuna. Pero achca cientificocunaca achcata investigashpami Dios tucuita rurashcata yachashpa paita cꞌuyai callarishcacuna. * Chaimanta ñucanchijpish estudiado cashpapish, mana estudiado cashpapish Yayitu Dios tucuita rurashcata investigangapajmi tiempota llujchina canchij. Chashnami ñucanchij fetaca Jehová Diospi sinchiyachishun.
TUCUITA RURAJ DIOSPI ÑUCANCHIJ FETA SINCHIYACHISHUNCHIJ
8, 9. a) ¿Cunanca imatataj yachagrinchij? b) ¿Imamantataj Dios tucuita rurashcacunamantaca estudiana canchij?
8 ¿Tucuita ruraj Diospi ñucanchij feta sinchiyachingapajca imatataj rurana canchij? Chuscu yuyaicunata ricushun.
9 Yayitu Dios tucuita rurashcamanta yachashunchij. Dios rurashca animalitocunamanta, plantacunamanta, estrellacunamanta yachashpaca Yayitu Diospimi ñucanchij feta ashtahuan sinchiyachishun (Salmo 19:1; Isaías 40:26). Ñucanchij publicacioncunapipish imalla tiyashcacunamantami chꞌican chꞌican yuyaicunata yachachin. Caicunata intindina sinchi cajpipish estudiangapajmi tiempota, esfuerzota llujchina canchij. Shinallataj pasaj jatun tandanacuicunapimi Yayitu Dios imacunallata rurashcata videocunapi ricurcanchij. Cai videocunataca jw.org paginapimi cutin ricui tucunchij.
10. ¿Tucuita ruraj Dios tiyashcataca ima ejemplohuantaj intindichinguiman? (Romanos 1:20).
10 Dios rurashcacunamanta yachashpaca Dios ima shina cashcatami yachashun (Romanos 1:20-ta liyipai). Por ejemplo, cai Allpapi causai tiyachunca intica achijyachin, rupaitami cun. Pero inti cai Allpata ama yallitaj rupajyachichunca ozono nishca gasmi muyundij Allpapi tiyan. Cai gasca shuj escudo shinami inti cai Allpata ama yallitaj rupajyachichun jarcan. Inti cai Allpata ashtahuan rupajyachijpica ozono nishca gaspish ashtahuanmi mirarin. Caita intindishpaca tucuita ruraj Dios yachaj, cꞌuyaj cashcatami cuentata cunchij.
11. ¿Dios rurashcacunamantaca maipitaj yachai tucunchij? (“ Ñucanchij feta sinchiyachingapaj ayudacuna” nishca recuadrota ricui).
11 JW.ORG paginapica achca informacioncuna, videocunami tiyan. Chaipimi Yayitu Dios imalla rurashcacunamanta, animalitocunamanta, plantacunamanta yachachin. Shinallataj cientificocuna animalitocunamanta, plantacunamanta yachashpa chai laya cosascunata rurashcatami ricuchin. Cai informacioncunamanta, videocunamanta yachashpaca ñucanchij fetami ashtahuan sinchiyachishun.
12. ¿Bibliata estudiacushpaca imata yachangapajtaj esforzarina canchij?
12 Bibliata estudiashunchij. Párrafo 4-pi parlashca científico huauquica: “Ñuca feta sinchiyachingapajca mana cienciallamanta estudianichu. Bibliamantapishmi ashtahuan yachani” ninmi. Ñucanchijpish tal vez Bibliamantaca achcatachari yachanchij. Chashna yachashpapish ñucanchij feta tucuita ruraj Diospi sinchiyachishpa catingapajmi Bibliata estudiashpa catina canchij (Josué 1:8; Salmo 119:97). Bibliata estudiacushpaca Biblia mana pandarij cashcata, chaipi tiyaj profeciacuna tucui pajtarishcata yachashunchij. Chaita rurashpaca ñucanchijta ruraj, yachaj, cꞌuyaj Jehová Diospimi ñucanchij feta sinchiyachishun. Shinallataj Yayitu Dios paipaj Shimita quillcachishcapimi confiashun (2 Timoteo 3:14; 2 Pedro 1:21). *
13. ¿Bibliapaj consejocunaca ima shinataj ñucanchijta ayudashca?
13 Bibliata estudiashpaca Bibliapi tiyaj consejocuna ñucanchijpaj valishca cashcatami cuentata cuna canchij. Por ejemplo, Bibliapica: ‘Cullquita ashtahuan charinata munashpaca achca llaquicunatami charishun’ nishpami yachachishca (1 Timoteo 6:9, 10; Proverbios 28:20; Mateo 6:24). ¿Cunancamachu cai consejoca valishca can? Ari. Shuj libropica cunan tiempomanta parlashpaca: “Achca cosascunata charinata munajcunaca llaquillami causancuna. Shinallataj paicunapaj saludpipish achca ungüicunatami charincuna” ninmi. Bibliapi nishca shinaca cullqui solopi yuyashpaca mana causanachu canchij. Pero Bibliapi tiyaj shujtaj consejocunapish ñucanchijta ima shina ayudashcapimi yuyana canchij. Bibliapaj consejocunata valorashpaca tucuita ruraj Jehová Diospimi ñucanchijca ashtahuan confiashpa catishun. Shinallataj cushillami causashun (Isaías 48:17, 18; Santiago 1:5).
14. ¿Bibliata estudiashpaca Jehová Diosmantaca imacunallatataj yachashun?
14 Diosta ashtahuan rijsingapajca Bibliatami estudiana canchij (Juan 17:3). Bibliata estudiashpaca Jehová Dios cꞌuyaj, llaquij, perdonaj cashcatami yachashun. Shinallataj pai ima shina cajtaca pai rurashcacunata ricushpami yachai tucunchij. Yayitu Diosta alli rijsishpaca pai de verdadtaj tiyashcatami crishun (Éxodo 34:6, 7; Salmo 145:8, 9). Jehová Diosmanta ashtahuan yachashpaca ñucanchij fetami sinchiyachishun, paitami cꞌuyashun, paipaj amigospishmi tucushun.
15. ¿Gentecunaman Jehová Diosmanta predicashpaca ima beneficiocunatataj charishun?
15 Gentecunaman Jehová Diosmanta yachachishpaca ñucanchij fetami ashtahuan sinchiyachishun. Pero huillacujpi maijancuna ‘¿Diosca tiyanchu?’ nishpa tapujpi chaita mana cutichi tucushpaca ¿imatataj rurana canchij? Alli cutichingapajca ñucanchijllatajmi publicacioncunapi investigana canchij (1 Pedro 3:15). Shinallataj shuj huauqui o pani cai tapuita cutichingapaj ayudachunmi mañana canchij. Gentecuna Biblia yachachishcacunata chasquijpi o mana chasquijpipish ñucanchijllataj investigashcamantami ñucanchij fetaca ashtahuan Jehová Diospi sinchiyachishun. Estudiado gentecuna Diosca mana tiyanchu nijpipish chaitaca mana crishunchu.
ÑUCANCHIJ FETA SINCHIYACHISHPA CATISHUNCHIJ
16. ¿Ñucanchij feta mana sinchiyachishpaca imataj tucushun?
16 Jehová Diosta, Jesusta, Diospaj Gobiernota mana ricushpapish chaicunamanta alli investigashpami chaicuna tiyashcata crinchij. Pero mana ricushcacunapi ñucanchij feta mana sinchiyachijpica ñucanchij feca chiriyangami. Apóstol Pabloca feta chiriyachinataca jahualla urmachij juchami can nircami (Hebreos 12:1). Chaimanta ashalla tiempota, achca tiempota Diosta sirvicushpapish ñucanchij feta sinchiyachishpa catingapajmi esforzarina canchij. ¿Ñucanchij feta sinchiyachingapajca imatataj rurana canchij? (2 Tesalonicenses 1:3).
17. ¿Sinchi feta charingapajca imatataj rurana canchij?
17 Jehová Diosta paipaj espíritu santota cuchun cutin cutin mañashunchij. Espíritu santota chasquishpaca ñucanchij fetami tucuita ruraj Jehová Diospi ashtahuan sinchiyachishpa catishun (Gálatas 5:22, 23). Chaimanta Jehová Dios ñucanchijman espíritu santota cuchun, ñucanchij feta sinchiyachishpa ayudachun mañashpa catishunchij. Chashna mañajpica paica ayudangallami (Lucas 11:13; 17:5).
18. Salmo 1:2, 3-pi nishca shinaca ¿ima valishca regalotataj charinchij?
18 Diospaj Shimita punllanta estudiashunchij (Salmo 1:2, 3-ta liyipai). Salmo 1-ta quillcashca tiempopica ashalla israelitacunaca Diospaj leymantaca shuj copiallatami charircacuna. Pero mandajcuna, sacerdotecunaca Diospaj leymanta copiacunatami charijcuna carca. Shinallataj cada 7 huatapimi cꞌaricunapish, huarmicunapish, huahuacunapish, shujtaj llajtamanta gentecunapish Diospaj leyta uyangapajca tandanacujcuna carca (Deuteronomio 31:10-12). Jesús cai Allpapi causashca punllacunapipish asha gentecunallami Dios Quillcachishcacunataca charircacuna. Chai tiempopica Dios Quillcachishcacunaca casi la mayoriami tandanacuna huasicunapi tiyaj carca. Pero cunan punllacunapica Bibliataca completota o partellatami casi tucuicuna charinchij. ¿Cai valishca regalota valorashcataca ima shinataj ricuchina canchij?
19. ¿Ñucanchij feta sinchiyachingapajca imatataj rurana canchij?
19 Diospaj Shimita valorashcata ricuchingapajca cada punllami Bibliata estudiana canchij. Chaipajca shuj horariota rurashpami pajtachinataj canchij. Chaita rurashpaca ñucanchij fetami ashtahuan sinchiyachishun.
20. ¿Imata rurashpataj catina canchij?
20 Cai Allpapi tiyaj huaquin estudiadocunaca Diospica mana feta charincunachu. Pero ñucanchijca Bibliata alli estudiashcamantami Jehová Diospi feta charinchij (Mateo 11:25, 26). Chashna Bibliata estudiashcamantami imamanta llaquicuna tiyashcata, ñalla Jehová Dios imata ruranata yachashcanchij. Chaimanta ñucanchij feta sinchiyachishpa catishunchij. Shinallataj gentecunatapish tucuita ruraj Diospi feta charichun ayudashunchij (1 Timoteo 2:3, 4). Ñallami paraíso Allpapi causaj tucui gentecunaca Jehová Diosllata adorangacuna. Paicunaca: Jehová Dios ‘canca jatunmari cangui, allimari cangui. Can munashpa rurashcamantami tucui imapish tiyan’ ningacunami (Apocalipsis 4:11).
CANTO 2 Jehová shutimi cangui
^ párr. 5 Bibliapica Jehová Dios tucuita rurashcatami yachachin. Pero huaquin gentecunaca: “Cai Allpapi tucui ima tiyashcacunataca pi mana rurashcachu. Ñapish ricurishcallami” nishpami yuyancuna. Chai gentecuna ñucanchijta ama pandachichunca Jehová Diospi, Bibliapimi ñucanchij feta sinchiyachina canchij. Cai yachaipimi ñucanchij feta ima shina sinchiyachinata yachashun.
^ párr. 5 Achca escuelacunapica profesorcunaca yachacujcunamanca Yayitu Dios tucuita rurashcataca mana yachachincunachu. Paicunaca: “Chaita rurashpaca yachacujcunata Diospi crichun obligacushca shinami canman” nincunami.
^ párr. 7 Iréne Hof Laurenceau: Shuj doctorami imamanta Diospi crishcata parlan nishca videota ricui. 2018-pi llujshishca Rijchari revista Número 1, página 12-pi Huabi Yin nishca científica imamanta Diospi crishcata ricui.
^ párr. 12 2018 huatapi llujshishca Huillaj número 1 revistapi “¿Bibliaca pandarinchu?” nishcata ricui. Shinallataj mayo del 2011-pi llujshishca Huillaj revistapi página 3 a página 9-ta ricui.
