1, 2. ¿Shuj huauquipaj causaimantaca imatataj yachanchij?

¿CAMBAJ yaya mamaca testigo de Jehovachu can? Ñucanchij yaya mamacuna Diosta sirvijpipish cada unomi Diospaj amigo cangapaj tucui pudishcata rurana canchij.

² Asia llajtamanta shuj huauquica Jehová Diosta sirvij familiapimi huiñarca. Pai joven cashpaca Diosmanta carupi cashcatami sintirca. Paica: “Ñuca familiacuna Jehová Diosta sirvijllapimi ñucapish Diosta sirvij carcani. Pero Diospaj amigo tucungapajca paita alli rijsina cashcatami cuentata curcani” ninmi. Chaimantami Bibliata liyingapaj, liyishcapi yuyangapajpish tiempota surcurca. Diostapish cutin cutinmi mañai callarirca. Chashnami Diospaj amigo tucurca. ¿Ñucanchijpish Jehová Diosta alli rijsingapajca imatataj rurana canchij? ¿Jehová Diosmanta yachanahuan, paita alli rijsinahuanca igualchu can?

3. ¿Jehová Diosmanta yachanahuan, paita alli rijsinahuanca imamantataj mana igual can?

³ Diospaj shutita, pai imata rurashcacunata, pai ima nishcacunata yachashcamantami paita alli rijsishcata yuyanchij. Pero Diosta alli rijsingapajca pai cꞌuyaj, llaquij, tucuita ruraj cashcata yachangapajmi tiempota surcuna canchij. Chaita rurashpaca Jehová imamanta chashna rurashcata, imamanta chaita nishcatami alli intindishun. Ñucanchij yuyaicunapish ruraicunapish Diospaj alli cashcata, mana alli cashcatami cuentata cushun. Shinami  Jehová Dios imata rurachun munashcata yachashpa pajtachishun.

4. ¿Moisesmanta, Davidmantaca imatataj yachashun?

⁴ Jehová Diosta sirvi callarijpi, tandanacuicunaman rijpica shujtajcunami ñucanchijmanta tal vez burlaringacuna. Pero Yaya Diosta alli rijsishpa paipi tucui shunguhuan confiajpica paica manataj saquingachu. Ashtahuancarin Diospaj alli amigocunami tucushun. ¿Jehová Diostaca alli rijsi tucunchijchu? Ari. Moisespish Davidpish juchayujcuna cashpapish Diospaj alli amigocunami tucurca. Cai yachaipimi paicuna Diosta alli rijsingapaj imata rurashcata, paicunapaj causaimantapish imata yachai tucushcata ricushun.

5. ¿Moisesca imata ruranatataj agllarca?

⁵ Moisesca Diosta sirvinatami agllarca. Paica 40 huatacunata charishpaca Faraonpaj ushushipaj churi nishca canatami saquirca. Shinallataj Diosta sirvijcunapaj ladomi tucurca (Hebreos 11:24). Israelitacunaca Egipto llajtapimi esclavo shina causacurcacuna. Egipto llajtapica Faraón jatun mandaj cajpimi paitaca shuj diosta shina ricujcuna carca. Chashnapish Moisesca israelitacunapaj lado tucushpami Faraón llaquichinata mana mancharca. Moisesca sinchi feta charishcamantami Jehová Diospi tucui shunguhuan confiarca. Shinami Diospaj alli amigo tucurca (Proverbios 3:5).

6. ¿Moisesmantaca imatataj yachanchij?

⁶ ¿Moisesmantaca imatataj yachanchij? Moisés shinami tucuicuna Diosta sirvinata agllana canchij. Jehová Diosta sirvingapajca tiempo, fuerzami minishtirin. Huaquinpica Diosta sirvicujta ricushpami gentecunaca jarcasha ningacuna. Pero Jehová Diospi tucui shunguhuan confiajpica paillatajmi ayudanga.

7, 8. ¿Moisesca imatataj Jehová Diosmanta yachashpa catirca?

⁷ Moisesca Diospaj munaita pajtachishpami paitaca alli rijsishpa catirca. Por ejemplo, Jehová Diosca Moisestaca israelitacunata Egiptomanta llujchichunmi mandarca. Pero paica manchaita charishcamantami cutin cutin chaitaca mana pajtachi tucunichu nirca. Chaimi Diosca paita llaquishpa ayudarca (Éxodo 4:10-16). Yaya Dios ayudajpimi Moisesca Faraonmanca Egipto llajtata Dios llaquichigrishcata huillarca. Qꞌuipaca Jehová Diosca diez llaquicunatami Egipto llajtaman cacharca. Shinallataj Faraontapish, paipaj soldadocunatapish puca cucha yacupimi tucuchirca. Chashnami Moisesca Dioslla tucui poderta charishcata ricurca (Éxodo 14:26-31; Salmo 136:15).

⁸ Israelitacunata Moisés Egiptomanta llujchishca qꞌuipaca paicunaca achcatami quejarircacuna. Chashnapish israelitacunataca Jehová Dios pacienciahuan ayudashcatami Moisesca ricurca (Salmo 78:40-43). Moisesca israelitacunata ama llaquichichun nishpami Jehová Diosta mañarca. Moisesta uyashpaca Diosca humilde cashcatami ricuchirca (Éxodo 32:9-14).

9. Hebreos 11:27-pi nishca shinaca ¿Moisesca Dioshuanca ima shinataj apanacuj carca?

⁹ Egiptomanta llujshishca huashaca Moisesca Jehová Diosta ricucuj shinami  paihuanca alli amigo tucurca (Hebreos 11:27-ta liyipai). Bibliapica: “Diosca Moiseshuanca maijan paihuan alli apanacujhuan rimacuj shinami ñahui ñahui rimaj carca” ninmi (Éxodo 33:11).

10. ¿Jehová Diosta alli rijsingapajca imatataj rurana canchij?

¹⁰ ¿Caimantaca imatataj yachanchij? Jehová Dios cꞌuyaj, llaquij, humilde cashcata rijsingapajca paipaj munaitami pajtachina canchij. Bibliapica: “Diosca tucui runacuna quishpirichun, mana llullata yachaj chayachunpishmi munan” ninmi (1 Timoteo 2:3, 4). Diospaj munaita pajtachingapajca shujtajcunamanmi predicana canchij.

11. ¿Gentecunaman predicashpaca ima shinataj Diosta ashtahuan rijsishun?

¹¹ Gentecunaman predicashpaca Yayitu Diostami ashtahuan rijsishun. Por ejemplo, Diosmanta yachana munaita charij gentecunapajman chayashpaca Jehová Dios paicunata llaquishcatami ricunchij (Juan 6:44; Hechos 13:48). Bibliamanta yachacujcunaca paicunapaj ñaupa causaita saquishpami alli causaita charishcacuna. Chashnami Jehová Dios paicunata ayudashcata ricunchij (Colosenses 3:9, 10). Diosca gentecunaman cutin cutin yachachichun cachashpami pacienciata charishcata ricuchin (Romanos 10:13-15, NM ).

12. a) Éxodo 33:13-pica ¿Moisesca Diostaca imatataj mañarca? b) ¿Paica imatataj intindirca?

¹² Moisespajca Jehová Dioshuan alli apanacunami valishca carca. Diospaj shutipi achca milagrocunata rurashpapish Moisesca canta ashtahuan rijsichihuai nishpami Diosta mañarca (Éxodo 33:13-ta liyipai). Moisesca 80 huatacunata charishpapish Diosmanta ashtahuan yachana cashcatami intindirca.

13. ¿Dioshuan alli apanacungapajca imatataj rurana canchij?

¹³ ¿Caimantaca imatataj yachai tucunchij? Achca huatacunata Diosta sirvicushpapish paihuan alli apanacunaca valishca cashcatami mana cungana canchij. Chaimantami paita mañanataca manataj saquina canchij.

14. ¿Diostaca imamantataj mañana canchij?

¹⁴ Maijanta alli rijsingapajca paihuanmi cutin cutin parlanacuna canchij. Shinallataj ñucanchij ima shina sintirishcata Diosman cutin cutin parlashpaca paitami ashtahuan rijsishun (Efesios 6:18). Turquía llajtamanta pani Kristaca: “Ñuca ima shina sintirishcatami Diosman huillani. Shinallataj Yayitu Dios ima shina ayudajta ricushpaca paitami ashtahuan cꞌuyani. Ñuca mañashcacunata cutichijpica paipimi ashtahuan confiani. Cunanca paica ñuca Yaya, ñuca amigomi can” ninmi.

15. ¿Jehová Diosca imatataj Davidmanta nirca?

¹⁵ Rey David huacharijpica paipaj familiapish chai llajtapi causajcunapish Diostami sirvijcuna carca. Pero paipaj yaya mamacuna Jehová Diosta sirvijcuna cashcallamantaca Davidca Diosta mana sirvircachu. Paica Dioshuan alli amigo tucungapajmi achcata esforzarirca. Chaimi Diosca paitaca achcata cꞌuyarca. Chaimantami Yaya Diosca Davidtaca paimi ñuca shungu munashca shina cazuj nirca (Hechos 13:22). ¿Davidca Dioshuan alli apanacungapajca imatataj rurarca?

16. ¿Diospaj rurashcacunata ricushpaca Davidca imatataj paimanta yacharca?

 ¹⁶ Dios rurashcacunata ricushpami Davidca paita ashtahuan rijsirca. Pai huambraraj cashpaca paipaj yayapaj ovejacunata michishpami pasaj carca. Davidca Jehová Dios imallata rurashcata ricushpami chaipi yuyaj cashcanga. Por ejemplo, tutapica jahua pachapi achca estrellacunata ricushpaca Dios cꞌuyaj, llaquij, tucuita rurai tucuj cashcatami intindirca. Chaimantami Davidca: “Cieloca Dios tucuita rurai tucuj cashcatami huillacun. Chaipi imalla tiyajpish paipaj maquihuan rurashcatami huillacun” nishpa quillcarca (Salmo 19:1, 2). Shinallataj gentecunata Jehová Dios ima shina rurashcata ricushpami pai yachaj cashcata intindirca (Salmo 139:14). Tucui imalla rurashcacunapi yuyarishpaca Davidca Jehová Dios tucuimanta yalli jatun cashcatami ricurca (Salmo 139:6).

17. ¿Dios rurashcacunapi yuyashpaca imatataj yachai tucunchij?

¹⁷ ¿Caimantaca imatataj yachanchij? Jehová Dios rurashcacunatami alli rijsina canchij. Cai Allpapi Dios tucui imalla rurashcacunata ricushpa cushicushunchij. Cada punlla imata ruracushpapish plantacunata, animalitocunata, gentecunata Dios ima shina rurashcapi yuyashunchij. Chashnami cada punlla Diostaca ashtahuan rijsishpa cꞌuyashun (Romanos 1:20).

18. Salmo 18-pi nishca shinaca ¿Davidca imatataj intindirca?

¹⁸ Davidca Jehová Dios ayudashcatami intindirca. Por ejemplo, David paipaj yayapaj ovejacunata michicujpimi osopish, leonpish ovejacunata micusha nirca. Chaimantami paica chai animalcunata huañuchirca. Chai animalcunata huañuchishpaca Jehová Dios paita ayudashcatami yachaj chayarca. Shinallataj Jehová Dios ayudajpimi Goliatta mishashcata cuentata curca (1 Samuel 17:37). Rey Saúl Davidta huañuchisha nijpipish Jehová Diosmi miticushpa richun ayudarca (Salmo 18). Davidca jatun tucushca cashpaca ñucallami caicunata rurarcani nishpami yuyanman carca. Pero paica humilde cashcamantami Dios ayudashcata intindirca (Salmo 138:6).

19. ¿Davidmantaca imatataj yachai tucunchij?

¹⁹ ¿Davidmantaca imatataj yachai tucunchij? Ñucanchij mañashcacunata Jehová Dios ima shina cutichijtami ricuna canchij. Humildecuna cashpaca tucuitami rurai tucuni nishpaca mana yuyashunchu. Ashtahuanpish Jehová ayudajllapi imatapish rurai tucushcatami yuyashun. Dios tucuipi ayudajta ricushpaca paihuanmi ashtahuan apanacushun. Fiyi llajtamanta huauqui Isaacca achca huatacunatami Diosta sirvicun. Paica: “Bibliamanta yachai callarishca punllamanta, cunan punllacama Jehová Dios ima shina ayudashcata yuyashpaca, paitami ashtahuan alli rijsishcani” ninmi.

20. a) ¿Davidca imamantataj Jehová Dioshuan alli apanacurca? b) ¿Paipaj ejemplomantaca imatataj yachai tucunchij?

²⁰ Davidca Dios shinami cꞌuyaj, humilde carca. Chaimantami paihuan alli apanacurca. Jehová Diosca ñucanchijtaca paiman rijchajtami rurashca (Génesis 1:26). Diosta ashtahuan rijsishpaca  ñucanchijpish pai laya cꞌuyaj, llaquij cashcatami ricuchishun. Davidca Diosta alli rijsishcamantami shujtajcunataca cꞌuyaihuan, llaquishpa alli tratarca. Shuj cutinca Davidca Betsabé huarmihuanmi juchapi urmashpa Betsabepaj cusatapish huañuchirca. Shinapish Diosca paita llaquishcamantami perdonarca (2 Samuel 11:1-4, 15). Israelitacunaca Davidtaca Dioshuan alli apanacuj cashcamantami achcata cꞌuyarcacuna. Shinallataj Diosca shujtaj mandajcunapish David shina cachunmi munarca (1 Reyes 15:11; 2 Reyes 14:1-3).

21. Efesios 4:24 y 5:1-pi nishcataca ¿imamantataj pajtachina canchij?

²¹ Ñucanchijpish Dios shina cꞌuyaj, llaquij cashunchij. Chaita rurashpaca Diostami ashtahuan rijsishun. Shinallataj Diospaj huahuacuna cashcatami ricuchishun (Efesios 4:24; 5:1-ta liyipai).

22, 23. ¿Yachashcacunataca imamantataj pajtachina canchij?

²² Jehová Diosca paita rijsichunca tucuitami rurashca. Por ejemplo, pai rurashcacunata ricushpa, Bibliata estudiashpami Diosta alli rijsi tucunchij. Bibliapica Moisespaj, Davidpaj, shujtajcunapaj causaimantapishmi yachai tucunchij. Chaimanta Diosta alli rijsingapajca tucui pudishcata rurashunchij.

²³ Diosmantaca tucui vidami yachashpa catishun (Eclesiastés 3:11). Pero Diosmantaca mana yachashpallachu saquirina canchij. Ashtahuanpish yachashcacunataca ñucanchij causaipimi pajtachina canchij. Shinallataj Yayitu Dios shinami cꞌuyaj, llaquij cana canchij. Chaita rurashpaca Diospaj amigocunami tucushun (Santiago 4:8). Bibliapica Diosca paita mashcajcunataca manataj saquingachu ninmi.