¿2019 huatamanta Huillaj revistacunapi yachachishcacunata yuyaringuichu?

Isaías 54:17-pi ‘canta tucuchingapajca imata mana rurai tucungachu’ nishcaca ¿imatataj nisha nin?

Jehová Diosca llaquichijcunamantami quishpichinga (Isaías 25:4, 5). Chaimanta ñucanchijta pꞌiñajcunaca mana tucui vidachu llaquichinga (w19.01 páginas 6, 7).

¿Jehová Diosca allita ruraj cashcataca cananeocunaman, mana cazuj israelitacunamanca ima shinataj ricuchirca?

Huarmicunata, huahuacunata mana alli tratajcunatami Diosca castigarca. Shinallataj huainayajcunatapishmi castigarca. Pero cashcata rurajcunataca Diosca bendiciarcami (w19.02 páginas 22, 23).

¿Mana testigo de Jehová caj gentecuna Yayitu Diosta mañajpica imatataj rurashun?

Mañaita tucuchingacamami mana imata nishpa shuyanalla canchij. Pero “chashna cachun” nishpaca mana ninachu canchij. Shinallataj mañacujpica maquicunata mana japinachu canchij. Ñucanchij shungu ucullapimi Diosta mañana canchij (w19.03 página 31).

¿Huahuacunata violanaca imamantataj jatun jucha can?

Huahuata violajca huahuatapish, congregacionpi caj huauqui panicunatapishmi llaquichin. Shinallataj Diostapish, autoridadcunatapish mana cazushcatami ricuchin. Maijan llajtacunapi autoridadcunaca violajtaca denunciachunmi mandan. Autoridadcuna chashna mandajpica ancianocunaca cazuncunami (w19.05 páginas 9, 10).

¿Yuyaita cambiangapajca imatataj rurana canchij?

Diostami mañana canchij. Bibliata liyishcapimi yuyarina canchij. Alli amigocunatami agllana canchij (w19.06 página 11).

¿Llaqui punllacunapajca ima shinataj allichirina canchij?

Diospajmanmi cꞌuchuyana canchij. Jehová Dios cꞌuyaj cashcata, ñucanchijta manataj cungarinatami tucui shunguhuan crina canchij. Bibliatapish cada punllami liyina canchij. Yayitu Diostapish punllantami mañana canchij. Dios cusha nishca bendicioncunapish pajtarinataj cashcatami crina canchij. Munashca versocunata, cantocunatapishmi yuyaipi charina canchij (w19.07 páginas 2-4).

¿Familiacunata ayudangapajca imatataj rurana canchij?

Familiacuna ima shina sintirishcapimi yuyana canchij. Shinallataj alli ejemplota, pacienciata, cꞌuyaitami ricuchina canchij (w19.08 páginas 15-17).

Mateo 11:28-pi nishca shinaca ¿Jesusca ima shinataj samachin?

Alli pushajcunata, alli amigocunata, alli trabajota cushpami samachin (w19.09 página 23).

¿Jehová Diosca ima shinataj ashtahuan sirvina munaita charichun, paipaj mingashcatapish pajtachichun ayudan? (Filipenses 2:13).

Bibliata liyishpa, imata liyishcapipish yuyajpica Diosca paita ashtahuan sirvina munaita charichunmi ayudan. Shinallataj espíritu santota cushpami pai mingashcata pajtachichun ayudan (w19.10 página 21).

¿Manaraj imata decidishpaca imatataj rurana canchij?

Manaraj decidishpami Bibliata, publicacioncunata alli estudiana canchij. Shinallataj Dios yachaita cuchunmi mañana canchij. Diosta cꞌuyashcamantami alli decidina canchij. Imata decidishcata pajtachingapajmi alli yuyana canchij. Imata mana rurai tucushcatapish mana agllanachu canchij (w19.11 páginas 27-29).

¿Diabloca Evamanca alma mana huañuna cashcatachu nicurca?

Mana chaita nicurcachu. Diabloca cambaj cuerpollami huañunga nishpaca Evataca mana nircachu. Chaipaj randica canca nunca mana huañunguichu nircami. Yaya Dios yacu juilluta cachajpimi tucui panda religioncunaca tucurirca. Shinapish almaca causashpami catin nishca panda yuyaica Babel pueblopi causaj gentecunapaj rimaita Dios manaraj chꞌicanyachijpimi ricurishca canga (w19.12 página 15).