1. a) ¿Apóstol Pedroca Jesuspaj discipulocunamanca ima consejotataj curca? b) ¿Cai consejota pajtachinaca maipica imamantataj sinchi laya ricurin?

APÓSTOL Pedro jahua pachaman rina esperanzata charijcunaman cushca consejomantami jahua pachapi causana esperanzata charijcunapish, cai Allpapi causana esperanzata charijcunapish beneficiari tucunchij. Pedroca: ‘Ashtahuanpish cancunata agllajca, ima jucha illajllami. Shinallataj cancunapish tucui causaipi ima jucha illajlla caichij. Quillcachishcapica: “Ñucaca ima jucha illajmi cani, cancunapish ima jucha illajlla caichij” ninmi’ nircami (1 Pedro 1:15, 16). ¿Cai shimicunamantaca imatataj yachai tucunchij? Jehová Diosca jucha illajmi can. Pai shinami ñucanchijpish ruraicunapi, yuyaicunapi jucha illaj cai tucunchij. Pero maipica juchayuj cashcamantami chaita pajtachinaca sinchi laya ricurin. Apóstol Pedroca maipica pandarishpapish paipaj alli ruraicunahuan, alli ejemplohuanmi jucha illaj cai tucushcata ricuchirca.

2. ¿Cai yachaipica ima tapuicunatataj yachashun?

² Cai yachaipica cai tapuicunatami yachashun. ¿Jucha illaj canaca imataj can? ¿Bibliapica Jehová Dios jucha illaj cashcamantaca imatataj yachachin? ¿Ima shinataj ñucanchij yuyaipipish, ruraipipish jucha illaj cai tucunchij? ¿Jucha illaj canahuan, Jehová Diospaj amigo canahuanca imapitaj igual can?

3. a) ¿Gentecunaca jucha illaj can nijta uyashpaca imatataj yuyancuna? b) ¿Pero jucha illaj cana ima nisha nishcata intindingapajca maipitaj yachai tucunchij?

³ Jucha illaj can nijta uyashpaca gentecunaca chai persona mana asirij, upalla saquirij, alaja churarishca cajtami yuyancuna. Pero jucha illaj canaca mana chashnachu can. Bibliapica: ‘Jehová Diosca jucha illaj, paica cushi Diosmi’ can ninmi (1 Timoteo 1:11, NWT ). Shinallataj Jehová Diosta adorajcunapish  cushilla sintirishcatami nin (Salmo 144:15). Jesusca: ‘Runacunapi alli ricuringa raiculla pambata pꞌichajta churarijcunata, allita ruraj tucujcunataca mana chashna canachu canguichij’ nishpami rimarca (Mateo 6:1; Marcos 12:38). Diosta sirvijcunaca Bibliata liyishpami Jehová Dios jucha illaj cashcataca alli yachanchij. Diosca jucha illaj, cꞌuyaj Diosmi can. Paica ñucanchij mana rurai tucushcata rurachunca mana mañanchu. Pero Jehová Dios jucha illajmi cai tucunguichij nijpica chaitami pajtachi tucunchij. Chaimantami ñucanchij yuyaipi, ruraicunapi jucha illaj cangapajca jucha illaj cana shimi imata nisha nishcata alli intindina canchij.

4. ¿Jucha illaj canaca imataj can?

⁴ ¿Jucha illaj canaca imatataj nisha nin? Bibliapica tucuipi chuya cana, Jehová Diospajlla chꞌicanyachishca cana nisha ninmi. Jucha illaj cashcataca ñucanchij yuyaipi, ruraipi chuya cashpa, Jehová Dios munashca shina paita adorashpa, paihuan alli apanacushpami chaita pajtachi tucunchij. Juchayujcuna cashpapish jucha illaj Jehová Diospaj amigos canata yachashpaca cushillami sintirinchij.

5. ¿Diosta alli sirvij angelcunaca Jehová Diosmantaca imatataj yachachin?

⁵ Jehová Diosca tucuipi jucha illaj Diosmi can. Pai tiyacun trono ladopi tiyaj angelcunaca Jehová Diostaca: ‘Jucha illaj, jucha illaj, jucha illaj Diosmari cangui’ nircacunami (Isaías 6:3). Cai angelcunaca Dioshuan alli apanacungapajca paicunallatajmi jucha illajcuna can. Chaimantami Diospaj shuj ángel cai Allpaman shamujpica chai lugarca jucha illaj o Diospajlla chꞌicanyachishca lugar carca. Por ejemplo, Moisés zarza yura chaupiman cꞌuchuyacujpimi Jehovapaj angelca: ‘Caimanca ama cꞌuchuyamuichu. Can shayacun cai allpaca ñucapajllami chꞌicanyachishca’ nirca (Éxodo 3:2-5; Josué 5:15).

6, 7. a) ¿Éxodo 15:1, 11-pica Moisesca ima shinataj Jehová Dios jucha illaj cashcata ricuchirca? b) ¿Israelitacunaca ima shinataj Jehová Dios jucha illaj cashcataca yacharcacuna? (Página 1-pi tiyaj fotota ricui).

⁶ Israelitacuna puca cuchata chꞌimbashca qꞌuipaca Moisesca: ‘Jehová Diosca jucha illajmi can’ nircami (Éxodo 15:1, 11-ta liyipai). Pero Egipto llajtapi yanga dioscunata adorajcunaca juchayujcunami carca. Canaán llajtapipish yanga diosta adorangapaj huahuacunata rupachishpa, huainayashpa causashpapish paicunaca juchayuj cashcatami ricuchircacuna (Levítico 18:3, 4, 21-24; Deuteronomio 18:9, 10). Jehová Diosca tucuipi jucha illaj cashcamantami paica mana chai yanga dioscuna shina can. Chaimantami paica ñucanchij mana alli ruraicunata rurachunca mana mañan. Israelitacuna causan punllacunapica sacerdotecunata mandajcunapaj frentepi churana fierropica ‘Mandaj Diosca jucha illajmi can’ nishca sellotami churajcuna carca. Chashnami Jehová Dios tucuipi jucha illaj cashcata ricuchircacuna (Éxodo 28:36-38).

⁷ Israelitacunapaj punllacunapica sacerdotecunata mandajpaj frentepi tiyaj fierropi Jehová Diosca jucha illajmi can nishca shimita yachashpami pai tucuipi jucha illaj cashcataca alli yachai tucurcacuna. ¿Pero shuj israelita sacerdotecunata mandajpaj frentepi ima quillcashcata mana ricui tucushpaca, Jehová Dios jucha illaj cashcataca yachai tucurcachu? Ari. Ñaupa punllacunapica Diospaj leycunataca cꞌaricunaman, huarmicunaman, huahuacunaman, tucuicunamanmi voz altapi liyijcuna carca (Deuteronomio 31:9-12). Ñucanchijpish chaipi cashca cashpaca cai shimicunatami uyanchijman carca. Bibliapica: ‘Ñucaca Mandaj cancunapaj Diosmi cani. Ñuca jucha illaj caj shinallataj cancunapish ima jucha illajlla cana canguichij’ ninmi (Levítico 11:44, 45; 20:7, 26).

8. ¿Levítico 19:2-manta, 1 Pedro 1:14 al 16-mantaca imatataj yachai tucunchij?

⁸ Israelitacunaman Levítico 19:2-pi tiyaj versota liyishcapi yuyashun.JehováDiosca  Moisesmanca: “Tandanacushca tucui israelcunamanca cashna nishpa huillai: Mandaj ñuca cancunapaj Diosca ima jucha illaj cashcamanta, cancunapish ima jucha illajlla caichij” nircami. Tal vez apóstol Pedropish Jesusta catijcunata consejangapajca Levítico 19:2-pi ‘cancunapish ima jucha illajlla caichij’ nishca shimicunata yuyarishpami consejashcanga (1 Pedro 1:14-16-ta liyipai). Cunan punllacunapica mana Moisesman cushca ley ucupi causanchijchu. Pero Levítico 19:2-mantami yachai tucunchij. Jehová Diosca jucha illajmi can. Ñucanchijpish paita cꞌuyashcamantaca chashnallataj jucha illaj cangapajmi esforzari tucunchij. Chaitaca jahua pachapi causanaman rinata shuyajcunapish, cai Allpa paraíso tucujpi causanata shuyajcunapishmi pajtachina canchij (1 Pedro 1:4; 2 Pedro 3:13).

9. ¿Imamantataj Levítico 19-pi tiyaj versocunata yachanaca importante can?

⁹ Jucha illaj Jehová Diostami jatunyachisha ninchij. Chaimantami ñucanchijpish ima shina jucha illaj canata yachana canchij. Chaita pajtachingapajca Jehová Diosca Levítico 19-pimi sumaj consejocunata cushca. Hebreo shimimanta yachaj Marcus Kalisch shuti runaca: ‘Levítico 19-pi tiyaj versocunaca, Leviticopi tiyaj caishuj capitulocunamanta yalli valishcami can. Shinallataj Génesis, Éxodo, Números, Deuteronomio librocunamantapish ashtahuan valishcami can’ nircami. Cai capitulomantaca ñucanchij causaipi pajtachingapajca huaquin yuyaicunatami yachashun. Caimanta yachashpa callaringapajca Levítico 19 callaripi: ‘Cancunapish ima jucha illajlla caichij’ nishcapimi yuyarina canchij.

10, 11. a) ¿Levítico 19:3-pica imatataj rurana canchij nin? b) ¿Cai mandashcata pajtachinaca imamantataj importante can?

¹⁰ Jehová Diosca israelitacunata jucha illaj canguichij nishca qꞌuipaca caitapishmi nirca. Paica: ‘Tucuicuna cancunapaj quiquin yayata, mamata cazuichij. Ñucami cancunata Mandaj Dios cani’ nircami (Levítico 19:2, 3, QC, 1989).

¹¹ Yaya, mamata cazunguichij nishca mandashcatami pajtachina canchij. Shuj cutinca Jesustaca shuj runaca: ‘Huiñai causaita charingapajca ¿imatataj rurana cani?’ nishpami tapurca. Chaimi Jesusca: ‘Cambaj yaya mamatami cazuna cangui’ nirca (Mateo 19:16-19). Jesús causacun punllacunapica fariseocuna, escribacunaca  cai mandashcataca mana pajtachijcunachu carca. Chaimi Jesusca: ‘Cancunapaj yuyaimanta yachachinata chashna yachachishpami, Dios mandashcataca yangata ruranguichij’ nirca (Mateo 15:3-6). Diospaj mandashcacunamanta nishpaca Levítico 19:3-pi tiyaj mandashcatami nisha nicushcanga (Éxodo 20:12). Levítico 19:2-pica: ‘Diosca ima jucha illajlla cashcamanta, cancunapish ima jucha illajlla caichij’ ninmi. Cutin verso 3-pica: ‘Yaya mamata cazuichij’ ninmi. Cai nishcacunatami siempre yuyarina canchij.

12. ¿Levítico 19:3-pi mandashcataca ima shinataj pajtachina canchij?

¹² “¿Jehová Diosta sirvijcunaca ‘yaya mamata cazunguichij’ nishca mandashcata pajtachicunchijchu?” nishpami tapurina canchij. Tal vez ñaupa punllacunapi yaya mamacunata ayudangapaj mana esforzarishca cashpaca paicunata ashtahuan ayudangapajmi metacunata churana canchij. Por ejemplo, yaya mamahuan imalla cosascunata rurashpa pasangapajmi tiempota surcui tucunchij. Shinallataj minishtirishca cosascunahuan o Jehová Diosta ashtahuan sirvichun, paita rijsichunmi ayudai tucunchij. Caita rurashpaca Levítico 19:3-pi yaya mamata cazunguichij nishcatami pajtachishun.

13. a) ¿Levítico 19:3-pica imata ashtahuan rurachuntaj animan? b) ¿Lucas 4:16 al 18-pi tiyaj yuyaicunata pajtachingapajca ima shinataj Jesuspaj ejemplota cati tucunchij?

¹³ Levítico 19:3-pica jucha illaj canamantami ashtahuan yachai tucunchij. Levítico 19:3-pica: “Samana punllata huaquichinguichij” ninmi. Pero cunan punllapica Diosta sirvijcunaca chai samana punllataca mana huaquichinchijchu. Pero israelitacuna chai punllapi imata rurashcatami yachai tucunchij. Shinallataj chai punllata huaquichishcamanta ima bendicioncunata chasquishcatapishmi ricui tucunchij. Chai punllapica israelitacunaca ima ruranacunata ladoman saquishpami Jehová Diosta adorajcuna carca. Chaimantami Jesusca cai Allpapi cashpaca sinagogacunapi sábado punllapi Diospaj Shimita liyij carca (Éxodo 31:12-15; Lucas 4:16-18-ta liyipai). Levítico 19:3-pi “samana punllata huaquichinguichij” nishcamanta yachashpaca ñucanchijpish huaquin ruraicunata ladoman saquishpa Jehová Diosmanta ashtahuan yachangapaj, paita adorangapaj tiempota surcunatami ricunchij. Diosta adorangapaj, paipaj Shimimanta ashtahuan yachangapaj tiempota surcushpaca paihuanmi alli amigos tucushun. Chashnami jucha illaj cai tucushcata ricuchishun. *

14. ¿Levítico capítulo 19-pica ima shimicunataj cutin cutin ricurin?

¹⁴ Levítico 19-pimi paita sirvijcuna jucha illaj cangapaj imallata rurana cashcata yachachin. Verso 4-pica: ‘Ñucaca Mandaj Dios cancunapaj Diosmi cani’ ninmi. Chai layallataj shimicunaca capítulo 19-pica 16 cutinmi ricurin. Tal vez cai shimicunata liyishpaca Jehová Dios, Moisesman cushca punta mandashcatami yuyaringui. Chaipica: ‘Ñucaca Mandaj Dios cancunapaj Diosmi cani. Ñucapaj randi shujtaj dioscunata ama charinguichij’ ninmi (Éxodo 20:2, 3, NWT ). Diosta sirvijcunaca jucha illaj cangapajca Jehová Dioshuan apanacuna tucuimanta yalli valishca cashcatami ricuchina canchij. Ñucanchijca testigos de Jehová cashcamanta, Diospaj jucha illaj shutita charishcamantami paipaj shutitaca mana mapayachisha ninchij (Levítico 19:12; Isaías 57:15).

15. ¿Levítico 19-pica Diosman cuna sacrificiomantaca imatataj yachachin?

¹⁵ Israelitacunaca Jehová Diospaj mandashcacunata cazushpami paicunapaj Dios cashcata ricuchircacuna. Levítico 18:4-pica: “Ñuca mandashcacunata chaitataj pajtachina yuyailla ruranguichij. Ñuca chaitataj pajtachichun  nishcacunata huaquichishpa, chaipi nishca shinataj puringuichij. Ñucami Mandaj Dios cancunapaj Taita Dios cani” ninmi. Capítulo 19-pipish Jehová Dios israelitacunaman imalla mandashcacunatami ricuchin. Por ejemplo, versículos 5 al 8, 21, 22-pica israelitacuna Jehová Diosman animalcunata cungapaj imallata rurashcatami ricuchin. Cai sacrificiocunamantaca Diospajlla chꞌicanyachishcata ama yangapi churangapajmi cuidadota charina carcacuna. Ñucanchijpish cai versocunata liyishpaca Jehová Diosta jatunyachina importante cashcatami yachashun. Shinallataj Dios ñucanchij sirvishcacunata chasquichunca Hebreos 13:15-pi ima nishcatami pajtachina canchij.

16. Levítico 19:19-pi nishca shinaca ¿ima shinataj Diosta mana sirvijcunamanta chꞌican cashcata ricuchinchij?

¹⁶ Diosta sirvijcunaca shujtaj gentecunamanta chꞌican cashpami jucha illaj cashcata ricuchishun. Pero maipica escuelapi, trabajopi compañerocuna o Diosta mana sirvij familiacunami Jehová Diosta ama sirvichunca jarcasha nincuna. Chaimantami maipica jucha illaj canaca sinchi can. Shinapish ¿Diosta alli sirvishpa catichun jarcaicunata churajpica ima alli decisioncunatataj agllana canchij? Chaipajca Levítico 19:19-pi tiyaj yuyaicunatami yuyarina canchij. Chaipica: ‘Chꞌican chꞌican puchcacunahuan rurashca churanatapish ama churanguichij’ ninmi. Israelitacunaca cai mandashcata pajtachishpaca Diosta mana sirvijcunamanta chꞌican cashcatami ricuchircacuna. Cunan punllacunapica algodonmanta, poliestermanta o chꞌican chꞌican materialmanta rurashca ropacunataca churai tucunchijmi. Pero Diosta mana sirvijcuna shina mana comportarishpaca ima jucha illajlla cashcatami ricuchishun. Familiacunata, shujtajcunataca achcatami cꞌuyanchij. Pero ñucanchij ruraicunahuan, ima decidishcacunahuanmi Diospajlla chꞌicanyachishca cashcata ricuchina canchij. Chaimanta jucha illaj cangapaj esforzarishunchij (2 Corintios 6:14-16; 1 Pedro 4:3, 4).

17, 18. ¿Levítico 19:23-manta 25-camaca ima valishca yuyaicunatataj yachanchij?

¹⁷ Israelitacunaca “Ñucami Mandaj Dios cancunapaj Taita Dios cani” nishca shimita uyashpaca paicunaca Dioshuan apanacuna valishca cashcatami yachashcangacuna. Chaita pajtachingapaj imata rurashcataca Levítico 19:23-manta 25-cama ricushun (Levítico 19:23-25-ta liyipai). Israelitacunaca Dios cusha nishca allpaman chayashpami cai shimicuna pajtarishcataca ricushcangacuna. Dios cusha nishca allpapi israelitacuna mishqui micuita pꞌucuj tucui laya yuracunata tarpushpaca callari quimsa huatacunataca mana japinachu carca. Cutin chuscu huatapi pꞌucujpica chai granotaca Diospajlla chꞌicanyachishca templomanmi apana carcacuna. Ña pichca huatapi granujpimi chai granotaca dueñoca micuna carca. Ashtahuanpish  Jehová Diosta punta lugarpi churajpi paillataj minishtirishca cosascunata cunapimi confiana carcacuna. Chaimi Diosca israelitacunaman ima micuna ama faltachunca cushpa catisha nirca. Chashnami Diosca israelitacunataca paicunapaj cullquihuan o ima granocunahuan paipaj carpa huasipi sirvijcunata ayudachun animarca.

¹⁸ Levítico 19:23 al 25-pi ima nishcata yachashpaca Sermón del Montepi Jesús ima nishcatami yuyarinchij. Chaipica Jesusca: ‘Cancunapaj causaipi, ¿imatataj micushun?, ¿imatataj ubyashun? nishpa ama chai yuyailla huañuricuichijchu. Ashtahuanpish jahua pachapi caj cancunapaj Yayaca, cancunapaj tucui imalla illashcataca ñami yachan’ nircami. Jehová Diosca ima shinami pajaritocunaman minishtirishca cosascunata cun. Chashnallatajmi ñucanchijmanpish minishtirishca cosascunata cunga (Mateo 6:25, 26, 32). Chaimanta Jehová Dios cuidanapi tucui shunguhuan confiashunchij. Ashtahuancarin ayudata minishtijcunata ima cosascunahuan ayudashunchij. Shinallataj congregacionpipish contribucionta cushpa apoyashunchij. Jehová Diosca generosos cajpica ñucanchijmanmi tigra imalla illashcata cunga (Mateo 6:2-4). Generosos cashcata ricuchishpaca Levítico 19:23 al 25-pi mandashcata intindishcatami ricuchishun.

19. ¿Levítico 19-pi tiyaj huaquin versocunamantaca imatataj yachashcangui?

¹⁹ Levítico 19-pi tiyaj huaquin versocunata yachashpami Jehová Dios shina jucha illaj cangapaj imallata rurana cashcata yachashcanchij. Jehová Diospaj ejemplota catishpaca ñucanchijpish ruraicunapi, yuyaicunapi jucha illaj cangapaj esforzaricushcatami ricuchinchij (1 Pedro 1:15). Diosta mana sirvij gentecunaca Diosta sirvijcunapaj alli ruraicunata ricushpami Jehová Diostaca jatunyachishcacuna (1 Pedro 2:12). Capítulo 19-pi tiyaj versocunapica ashtahuanmi ñucanchijca huaquin yuyaicunata yachai tucunchij. Apóstol Pedropish jucha illaj cangapaj imata rurana cashcatami animarca. Catij yachaipimi paipaj ejemplota catingapaj, imacunallapi jucha illaj cangapaj ashtahuan yachashun.