1. ¿Cunan punllacunapica imamantataj gentecunaca mana cꞌuyaita ricuchincuna?

BIBLIAPICA tucuri punllacunapica gentecunaca mana cꞌuyangacunachu ninmi (2 Timoteo 3:1, 3, QC, 1989). Cai shimicunaca cunan punllacunapimi pajtaricun. Por ejemplo, achca cusa huarmicunaca mana alli apanacushcamantami divorciarishcacuna. Chaimi huahuacunapish mana pi paicunata cꞌuyashcata yuyancuna. Cutin maijan familiacunaca huasipi tandalla causashpapish mana rijsishcacuna shinami sintirincuna. Familiacunata ayudaj shuj runaca: “Yaya mamacunapish huahuacunapish computadorapi, tabletpi, celularpi o video juegollapi yallitaj tiempota pasashcamantami paicunapura mana parlanacuncuna” ninmi.

2, 3. a) Romanos 12:10-pi nishca shinaca ¿picunatataj cꞌuyana canchij? b) ¿Cai yachaipica imatataj yachashun?

² Ñucanchijpish Diosta mana sirvij gentecuna shina cꞌuyai illajca mana casha ninchijchu (Romanos 12:2). Chaipaj randica ñucanchij familiacunaman, huauqui panicunamanmi ashtahuan cꞌuyaita ricuchishpa catina canchij (Romanos 12:10-ta liyipai). Ima shinami ñucanchij propio familiata achcata cꞌuyanchij, paicunahuan alli apanacunchij. Chashnallatajmi huauqui panicunatapish cꞌuyana canchij, alli apanacunapish canchij. Caishujmanta chaishujmanta cꞌuyanacushpaca Jehová Diostami tandalla, shuj familia shina sirvishun (Miqueas 2:12).

 ³ Cai yachaipimi cꞌuyaita ima shina ashtahuan ricuchinata yachangapajca Bibliapi huaquin ejemplocunata ricushun.

4. Santiago 5:11-pi nishca shinaca ¿Jehová Diosca ñucanchijta cꞌuyashcataca ima shinataj ricuchin?

⁴ Bibliapica Jehová Dios ima shina cashcatami parlan. 1 Juan 4:8-pica: “Diosca cꞌuyajmari” ninmi. Caita yachashpami Diospaj amigos casha ninchij. Shinallataj Bibliapica Yayitu Diosca yallitaj llaquijmi can ninmi (Santiago 5:11-ta liyipai). Chashnami Jehová Diosca ñucanchijta cꞌuyashcata ricuchin.

5. a) ¿Diosca ima shinataj ñucanchijta llaquishcataca ricuchin? b) ¿Diospaj ejemplotaca ima shinataj catina canchij?

⁵ Santiago 5:11-pica Jehová Diosca yallitaj llaquijmi can ninmi (Éxodo 34:6). Chaimantami Jehová Diosca ñucanchij juchacunata perdonan (Salmo 51:1). Bibliapica llaquij cana nishpaca mana perdonanallamantachu parlacun. Ashtahuanpish Jehová Diosca llaquij cashcamantami ñucanchij llaquicunahuan cajpi tucui shunguhuan ayudasha nin (Salmo 37:39; 1 Corintios 10:13). Bibliapica shuj mama paipaj huahuata ima shinami ayudan, chaitapish yallimi Jehová Diosca ñucanchijtaca ayudasha nin ninmi (Isaías 49:15). Huauqui panicuna pandarijpipish, ñucanchijta llaquichijpipish Jehová Dios shinami perdonana canchij. Resintirishcapish mana saquirinachu canchij (Efesios 4:32). Huauqui panicuna llaquicunahuan cajpicarin paicunata llaquishpami ayudana canchij. Cashna cꞌuyaita ricuchishpa, apoyashpaca Jehová Diospaj alli ejemplotami catinchij (Efesios 5:1).

6. ¿Jonatanpish, Davidpish alli amigocuna cashcataca ima shinataj ricuchircacuna?

⁶ Bibliapica Diosta sirvijcunaca caishujmanta chaishujmanta cꞌuyanacushcatami parlan. Por ejemplo, David y Jonatanca alli amigocunami tucurcacuna. Bibliapica Jonatanca Davidtaca pai quiquinta shinallatajmi  cꞌuyarca ninmi (1 Samuel 18:1). Jehová Diosca Saulpaj randica Davidtami rey cachun agllarca. Chaimi Saulca achcata pꞌiñarishpa Davidtaca huañuchinata yuyarca. Pero Jonatanca paipaj yaya Saúl rey cajpipish Davidtami rey cachun apoyarca. Jonatanpish, Davidpish siempremi amigocuna cashun, ñucanchijpurami apoyanacushun nishpami ari ninacurcacuna (1 Samuel 20:42).

7. ¿Jonatanpish, Davidpish alli amigos cangapajca ima jarcachuntaj mana saquircacuna?

⁷ Jonatanpish, Davidpish alli amigos cangapajca imapish jarcachunca mana saquircacunachu. Por ejemplo, Jonatanca 30 huatacunahuan ñaupami Davidpajca carca. Chashna cashpapish Jonatanca: “Davidca jovenrajmi can, ima experienciata mana charinchu, paipaj amigopish mana cashachu” nishpaca mana yuyarcachu. Chashna yuyanapaj randica Davidtami achcata respetarca.

8. ¿Jonatanca Davidpaj alli amigo cashcataca ima shinataj ricuchirca?

⁸ Jonatanca Saulpaj churi cashpapish Davidpaj randica ñucami mandana derechota charini nishpaca mana yuyarcachu (1 Samuel 20:31). Paica humilde cashcamantami Jehová Dios Davidta rey cachun agllashcataca shungumanta apoyarca. Saúl pꞌiñarijpipish Jonatanca Davidtaca apoyashpa, cꞌuyaita ricuchishpami catirca (1 Samuel 20:32-34).

9. ¿Jonatanca Davidta mana envidiashcataca ima shinataj ricuchirca?

⁹ Jonatanca quiquin huauquita shina Davidta cꞌuyashcamantami paitaca shuj enemigota shinaca mana ricurca. Jonatanca macanacungapajpish alli entrenashcami carca. Bibliapica paita, paipaj yayataca: ‘Aguilacunata yalli callpajcunami can. Leoncunata yalli fuerzayujcunami can’ ninmi (2 Samuel 1:22, 23). Shinapish Jonatanca alli macanacujmi cani nishpaca mana jatun tucurcachu. Paica Davidpaj alli ruraicunata ricushpaca mana envidiarcachu. Ashtahuanpish David mana manchaj Jehová Diospi confiashcata yachashpami cushilla sintirirca. David Goliatta huañuchishca horasmantami Jonatanca paita ashtahuan cꞌuyai callarirca. ¿Ñucanchijpish ima shinataj huauqui panicunaman cꞌuyaita ricuchinchij?

10. ¿Shungumanta huauqui panicunata cꞌuyashcataca ima shinataj ricuchinchij?

¹⁰ Bibliapica: ‘Caishuj chaishuj tucui shunguhuan cꞌuyanacuichij’ ninmi (1 Pedro 1:22). Jehová Diosca ñucanchijta achcata cꞌuyashcamantami paita tucuipi sirvijpica mana saquisha nin (Romanos 8:38, 39). 1 Pedro 1:22-pica tucui shunguhuan cꞌuyana nishpaca huauqui panicunaman cꞌuyaita ricuchingapaj esforzarinatami nisha nin. Maijancuna ñucanchijta pꞌiñachijpica cꞌuyaimantami caishujmanta chaishujmanta mana pꞌiñarishpa llaquicunata apana canchij. Chashnami ñucanchij huauqui panicunahuan tandalla, alli causashun (Efesios 4:1-3). Huauqui panicunahuan sumajta causangapajca paicuna pandarishcallataca mana ricunachu canchij. Chaipaj randica ima shinami Jehová Dios paicunata ricun, chashnallatajmi ñucanchijpish paicunata ricuna canchij (1 Samuel 16:7; Salmo 130:3).

11. ¿Maipica huauqui panicunaman cꞌuyaita ricuchinaca imamantataj sinchi can?

¹¹ Huauqui panicuna pandarishcallata ricushpaca paicunaman cꞌuyaita ricuchinaca sinchimi canga. Apostolcuna causashca punllacunapimi chashna tucurca. Por ejemplo, Evodia y Sintiqueca apóstol Pablohuanca  tandallami trabajajcuna carca. Pero paicunapura alli apanacunaca sinchimi carca. Chaimantami apóstol Pabloca paicunataca: “Apunchij Jesusmantaca ñañandij shina shuj yuyailla tucuchun” nishpa aconsejarca (Filipenses 4:2, 3, QC, 1989).

12. ¿Huauqui panicunaman shungumanta cꞌuyaita ricuchingapajca imatataj rurana canchij?

¹² ¿Huauqui panicunaman shungumanta cꞌuyaita ricuchingapajca imatataj rurana canchij? Paicunataca allimi rijsina canchij. Chashnami paicunataca alli intindishun, ashtahuan cꞌuyashun. Mashna huatata charijpipish, ima culturamanta cajpipish paicunahuanmi alli apanacui tucunchij. Jonatanca Davidpaj 30 huatacunahuan yalli cashpapish paihuanmi alli apanacurca. Chaimantami ñucanchijpish congregacionpi mayorlla huauqui panicunahuanpish, jovenlla huauqui panicunahuanpish amigos tucungapaj esforzarina canchij. Chashna rurashpaca tucui huauqui panicunata cꞌuyashcatami ricuchishun (1 Pedro 2:17).

13. ¿Maipica imamantataj maijan huauqui panicunahuan ashtahuan alli apanacunchij?

¹³ Congregacionpi tucui huauqui panicunata cꞌuyashpapish maipica shujtajcunahuanmi ashtahuan alli apanacunchij. Maijan huauqui panicuna ñucanchij shina yuyashcamanta o ñucanchij munashca shina imatapish rurashcamantami paicunahuan ashtahuan alli apanacunchij. Jesuspish paipaj tucui apostolcunahuan alli apanacushpapish Juantami ashtahuan cꞌuyarca (Juan 13:23; 15:15; 20:2). Jesusca Juanta ashtahuan cꞌuyashpapish tucui apostolcunatami igual tratarca. Por ejemplo, shuj cutinca Juanpish paipaj huauqui Santiagopish Jesustaca can Diospaj Gobiernopi mandacushpaca shuj importante puestota cungui nishpami mañarcacuna. Chaimi Jesusca: “Ñuca alli ladoman, lluqui ladoman maijanta tiyachinaca mana ñucapajchu” nirca (Marcos 10:35-40). Ñucanchijpish maijan huauqui panicunahuan ashtahuan alli apanacushpapish Jesús shinami tucuicunata alli tratana  canchij (Santiago 2:3, 4). Chaita rurashpaca congregacionpica tucuicunahuanmi alli apanacushun (Judas 17-19).

14. Filipenses 2:3-pi nishca shinaca ¿huauqui panicunata ama envidiangapajca imatataj rurana canchij?

¹⁴ Huauqui panicunata cꞌuyashpaca paicunata yalli canataca mana mashcashunchu. Jonatanca Davidtaca mana envidiarcachu. Davidpaj randi rey canatapish mana mashcarcachu. Ñucanchijpish huauqui panicunapaj alli ruraicunataca mana envidianachu canchij. Ashtahuanpish Pablo nishcatami pajtachina canchij. Paica: “Ama jatun tucushpa caishujcunaca canta yalli cashcata yuyashpa, caishuj chaishuj cꞌuyanacuichij” nircami (Filipenses 2:3-ta liyipai). Congregacionpica tucuicunami imatapish rurashpa ayudai tucushcata yuyarina canchij. Humildes cashpaca ñucanchij huauqui panicunapaj alli ruraicunatami ricushun. Shinallataj paicunapaj alli ejemplotapishmi catishun (1 Corintios 12:21-25).

15. ¿Tanyapaj experienciamantaca imatataj yachanchij?

¹⁵ Ñucanchij llaquicunahuan cai horasmi huauqui panicunaca cꞌuyaihuan ayudancuna. Chashnami Jehová Diosca cꞌuyashcata ricuchin. Por ejemplo, 2019 huatapica Estados Unidos llajtapimi “Cꞌuyaica manataj tucuringachu” nishca jatun tandanacui tiyarca. Sábado punlla tandanacui qꞌuipami Tanya paipaj quimsa huahuacunapish cutin hotelmanca carropi tigracurcacuna. Pero ñanpish shujtaj carroca paicunapaj carrohuanmi chocarca. Pani Tanyaca chai accidentepica mana ima chugrirircanchijchu. Pero carromanta llujshishpami ñan ladopi imata ruranata mana yachashpa shuyacurcanchij. Chaimi chꞌimba ladomantaca shuj turica paipaj carromanta  señasta rurashpa shamuichij nishpa ayudarca. Cai turipish jatun tandanacuimantami shamucushca carca. Mana paillachu ayudarca. Ashtahuanpish Suecia llajtamanta shamuj 5 Testigocunapishmi ayudarca. Ñañacunaca ñucata, ñuca ushushitapish ugllashpami cꞌuyashcata ricuchircacuna. Allillami canchij nijpipish paicunaca ñucanchijhuanmi saquirircacuna. Ambulancia shamujpipish cai turi ñañacunaca ñucanchijta ayudashpami saquirircacuna. Chashnami Jehová Dios ñucanchijta cꞌuyashcata ricurcanchij. Cashna llaqui horaspi turi ñañacuna ayudashcamantami paicunata, Jehová Diostapish ashtahuan cꞌuyarcanchij. Chaimantami Jehová Diostaca achcata agradicini ninmi. ¿Shuj huauqui o pani can ayudachun minishticun horaspi ayudashcata yuyaringuichu?

16. ¿Imamantataj caishujmanta chaishujmanta cꞌuyaita ricuchina canchij?

¹⁶ ¿Imamantataj huauqui panicunamanca cꞌuyaita ricuchina canchij? Huauqui panicunata cꞌuyashpami paicuna llaquicunahuan cai horas ayudashun. Chashnami ñucanchij huauqui panicunahuan tandalla, cushilla Diosta sirvishun. Shinallataj Jesuspaj discipulocuna cashcatami ricuchishun. Cashna cꞌuyaita ricuchijpica shujtajcunapishmi Jehová Diosta sirvisha ningacuna. Ashtahuancarin cꞌuyaita ricuchishpaca Jehová Diostami jatunyachishun. “Paica llaquij Yayami, tucuipi cushichij Diosmi” can (2 Corintios 1:3). Chaimanta caishujmanta chaishujmanta cꞌuyaita ricuchinacushpa catishunchij.