1. ¿Yayitu Dios cꞌuyaj cashcamantaca ima shinataj sintirinchij?

APÓSTOL Juanca Diosca cꞌuyajmari nishpami quillcarca (1 Juan 4:8). Diosmi causaita cuj can. Paimi cꞌuyaitapish cuj can. Jehová Diosmi ñucanchijtaca cꞌuyan. Chaimantami tranquilos, cushilla sintirinchij.

2. a) Mateo 22:37 al 40-pi nishca shinaca ¿ima ishqui mandashcacunata pajtachinataj valishca can? b) ¿Shujtajcunaman cꞌuyaita ricuchinaca imamantataj maipica sinchi can?

² Diosta sirvijcunapajca cꞌuyaita ricuchinaca shuj mandatomi can (Mateo 22:37-40-ta liyipai). Yayitu Diosta ashtahuan rijsishpaca paita tucui shunguhuan cꞌuyangui nishcataca jahuallami pajtachishun. Jehová Diosca jucha illajmi can. Chaimantami ñucanchijtaca cꞌuyaihuan tratan. Shinallataj ñucanchijmantapish preocuparishcatami ricuchin. Shinapish huaquinpica shujtajcunata cꞌuyangui nishca mandashcata cazunaca sinchichari ricuringa. ¿Imamanta? Ñucanchij huauqui panicunaca juchayuj cashcamantami paicunapaj ruraicunahuan, nishcacunahuan huaquinpica ñucanchijta llaquichinga. Chaimantami Jehová Diosca ima shina, imamanta cꞌuyaita ricuchinata yachachingapajca Bibliapi quillcachirca. Juanmi caimanta parlarca (1 Juan 3:11, 12).

3. ¿Juanca imatataj ashtahuantajca yachachirca?

³ Juanca Diosta sirvijcuna cꞌuyaita ricuchinamantami yachachirca. Mateo, Marcos, Lucas librocunamanta yallica Juan libropimi cꞌuyaimanta parlan. Juanca Juan librota quillcacushpa, caishuj quimsa cartacunata quillcacushpaca casi 100 huatacunatami charishcanga. Cai librocunapica Diosta sirvijcuna imata ruracushpapish cꞌuyaimanta rurana  cashcatami ricuchin (1 Juan 4:10, 11). Juanpish cꞌuyaita ricuchinatami yachana carca.

4. ¿Juanca imacunallapitaj cꞌuyaita mana ricuchirca?

⁴ Juanca jovenraj cashpaca mana siempre cꞌuyaita ricuchircachu. Por ejemplo, shuj cutinca Jesuspish, paita catijcunapish Samariata pasashpami Jerusalenman rina carcacuna. Pero Samariapica Jesustapish, paita catijcunatapish mana puzachisha nircacunachu. ¿Caita yachaj chayashpaca Juanca imatataj nirca? Juanca Jesustaca cai tucuicunata chingachingapaj jahua pachamanta ninata cachachun mañashun nirca (Lucas 9:52-56). Shuj cutincarin caishuj apostolcunamanca cꞌuyaitaca mana ricuchircachu. Juanca paipaj huauquihuanmi paicunapaj mamataca Jesús mandacujpi shujtaca alli ladoman, caishujtaca lluqui ladoman tiyachingui nishpa mañachun cacharcacuna. Shujtaj apostolcunaca cashna nishcata yachaj chayashpaca achcatami pꞌiñarircacuna (Mateo 20:20, 21, 24). Juan chashna pandarijpipish Jesusca paitaca cꞌuyashpami catirca (Juan 21:7).

5. ¿Cai yachaipica imacunatataj yachashun?

⁵ Cai yachaipica Juanpaj ejemplomantami yachashun. Shinallataj huauqui panicunaman ima shina cꞌuyaita ricuchinamanta, familiata pushajcunapish paicunapaj familiaman ima shina cꞌuyaita ricuchinamantami yachashun.

6. ¿Jehová Diosca ima shinataj ñucanchijta cꞌuyashcata ricuchishca?

⁶ Cꞌuyanimi nishpallaca mana saquirinachu canchij. Ashtahuanpish ruraicunahuanmi cꞌuyashcataca ricuchina canchij (Santiago 2:17, 26-ta ricui). Jehová Diosca ñucanchijtaca achcatami cꞌuyan (1 Juan 4:19). Bibliapi sumaj shimicunata quillcashpami ñucanchijta cꞌuyashcata ricuchin (Salmo 25:10; Romanos 8:38, 39). Pero Jehová Diosca pai nishcacunallahuanca cꞌuyaitaca mana ricuchinchu. Ashtahuanpish ruraicunahuanmi cꞌuyashcata ricuchin. Juanca: “Diosca paipaj shujlla Churimanta ñucanchij quishpirichunmi cai pachaman cacharca. Chashnami pai cꞌuyaj cashcata ricuchirca” nircami (1 Juan 4:9). Jehová Diosca paipaj Churi llaquicunata apachun, ñucanchijmanta huañuchunmi saquirca (Juan 3:16). Chaimantami Jehová Dios ñucanchijta cꞌuyashcataca tucui shunguhuan crinchij.

7. ¿Jesusca ima shinataj cꞌuyashcata ricuchirca?

⁷ Jesusca paipaj discipulocunataca cꞌuyanimi nircami (Juan 13:1; 15:15). Pero Jesusca  paipaj discipulocunatapish ñucanchijtapish cꞌuyashcataca mana nishcacunallahuan ricuchircachu. Ashtahuanpish paica ruraicunahuanmi ricuchirca. Paica: “Maijanpish paihuan alli apanacujcunamanta huañujca yallitaj cꞌuyajmi. Chashna cꞌuyajca pi mana tiyanchu” nircami (Juan 15:13). ¿Jehová Diospish, Jesuspish ñucanchijta cꞌuyashcata yachashpaca imatataj rurana canchij?

8. 1 Juan 3:18-pi nishca shinaca ¿imatataj rurana canchij?

⁸ Jehová Diosta, Jesusta cazushpami paicunata cꞌuyashcata ricuchinchij (Juan 14:15; 1 Juan 5:3). Jesusca huauqui panicunatapish cꞌuyachunmi mandarca (Juan 13:34, 35). Chashna cꞌuyashcataca shimillahuanca mana ricuchinachu canchij. Ashtahuanpish ruraicunahuanmi cꞌuyaitaca ricuchina canchij (1 Juan 3:18-ta liyipai). ¿Huauqui panicunata cꞌuyashcataca ima shinataj ricuchishun?

9. ¿Juanca cꞌuyaimantaca imatataj rurarca?

⁹ Juanca paipaj yayahuanmi pescadocunata japishpa achca cullquita gananata agllai tucurca. Pero chaipaj randica Jehová Diosmanta, Jesusmanta tucui vida gentecunaman predicanatami agllarca. Chashna decidishcamantami paitaca catirashpa llaquichircacuna. Shinallataj ña mayorlla cajpica shuj islamanmi prezu cacharcacuna (Hechos 3:1; 4:1-3; 5:18; Apocalipsis 1:9). Juanca prezupi cashpapish shujtajcunamanta preocuparishcatami ricuchirca. Por ejemplo, paica Patmos islapi cashpaca Apocalipsis librotami quillcarca. Imalla tucunata yachachunmi Juanca chai librotaca congregacioncunaman quillcashpa cacharca (Apocalipsis 1:1). Paica Patmos islamanta llujshishca qꞌuipami Jesuspaj causaimanta parlaj Juan librota quillcarca. Shinallataj huauqui panicunata animangapaj, sinchiyachingapajmi quimsa cartacunata quillcarca. ¿Paipaj ejemplotaca ima shinataj catina canchij?

10. ¿Ima shinataj gentecunata cꞌuyashcataca ricuchinchij?

¹⁰ Diabloca cullquita charingapaj, famoso tucungapaj ñucanchij tiempota, fuerzata gastachunmi munan. Pero muyundij Allpapica huauqui panicunaca gentecunaman predicangapaj, Jehová Diospajman cꞌuchuyachun ayudangapajmi tucui pudishcata rurancuna. Huaquincunacarin tiempo completotami Diosta sirvincuna. Chashnami paicunaca shujtajcunata cꞌuyashcata ricuchincuna.

11. ¿Huauqui panicunaca Jehová Diosta, shujtajcunata cꞌuyashcataca ima shinataj ricuchishcacuna?

¹¹ Achca huauqui panicunami paicunapaj familiacunata mantiningapajca tiempo completota trabajancuna. Pero chashnapish paicunaca Diospaj organizaciontami apoyancuna. Por ejemplo, llaquipi caj huauqui panicunata ayudashpa, tandanacuna huasicunata shayachishpa o allichishpa, o muyundij Allpapi apoyangapaj cullquicunata cushpami apoyancuna. Shinallataj shaicushca cashpapish tandanacuicunamanmi rincuna. Tandanacuicunapipish manchaita mishashpami comentancuna. Llaquicunata charishpapish tandanacuicunapimi shujtajcunata animancuna. Chashnami Jehová Diostapish, huauqui panicunatapish cꞌuyashcata ricuchincuna (Hebreos 10:24, 25). Huauqui panicuna cashna cꞌuyaita ricuchishcamantami paicunataca achcata agradicinchij.

12. ¿Juanca huauqui panicunamanca ima shinataj cꞌuyaita ricuchirca?

¹² Juanca huauqui panicunamanca paicunata  felicitashpami cꞌuyaita ricuchirca. Pero paicuna corregichun minishtijpica corregishpami cꞌuyaita ricuchirca. Por ejemplo, pai quillcashca cartacunapica huauqui panicunapaj sinchi femanta, paicunapaj alli ruraicunamantami felicitarca. Pero juchapi ama urmachunpishmi consejarca (1 Juan 1:8–2:1, 13, 14). Shinallataj ñucanchijpish huauqui panicunapaj alli ruraimantami felicitana canchij. Pero shuj huauqui o pani imapi pandaricujpi o mana allita ruracujpica cꞌuyaihuanmi corregina canchij. Alli amigocuna cashpaca cꞌuyaimantami shujtajcunata consejashun (Proverbios 27:17).

13. ¿Imatataj mana rurana canchij?

¹³ Huauqui panicuna imata nijpipish mana utca pꞌiñarishpami cꞌuyaita ricuchinchij. Jesús manaraj huañujpi ima tucushcata yuyashun. Jesusca paipaj discipulocunamanca huiñai causaita charingapajca ñuca aichatami micuna canguichij, ñuca yahuartami ubyana canguichij nircami (Juan 6:53-57). Caita uyashpaca achcacunami mancharishpa Jesusta catinata saquircacuna. Pero Jesuspaj amigocunapish, Juanpish mana tucuita intindishpapish paihuanmi saquirircacuna. Caita uyashpapish Jesusca pandaricunmi nishpaca mana yuyarcacunachu. Ashtahuanpish Jesús tucuipi verdadta nishcata yachashpami paipi confiarcacuna (Juan 6:60, 66-69). Shinallataj ñucanchijpish huauqui panicuna imata nijpipish mana utca pꞌiñarinachu canchij. Ashtahuanpish paicuna ima nisha nishcataca allimi intindinaraj canchij (Proverbios 18:13; Eclesiastés 7:9).

14. ¿Huauqui panicunataca imamantataj mana pꞌiñana canchij?

¹⁴ Juanca huauqui panicunata ama pꞌiñachunmi advirtirca. Cai mandashcacunata mana cazushpaca Diablo munashcatami rurashun (1 Juan 2:11; 3:15). Apóstol Juan causacun punllacunapica Diabloca huauqui panicuna paicunapura pꞌiñanacuchun, chꞌicanyarinacuchunmi pandachirca. Por ejemplo, Diotrefesca congregacionpimi huauqui panicunata chꞌicanyachicurca (3 Juan 9, 10). Paica superintendente huauquicunatapish mana respetajchu carca. Chaimantami paicunata chasquij huauqui panicunataca congregacionmanta llujchisha nij carca. Cunan punllacunapish Diabloca huauqui panicuna paicunapura pꞌiñanacushpa causachunmi  munan. Chaimanta ñucanchijca huauqui panicunataca mana pꞌiñanachu canchij. Tucuipimi apoyana canchij.

15. ¿Tucuimanta yallica familiata pushajcunaca imatataj rurana can?

¹⁵ Familiata pushajcunaca minishtirishca cosascunata familiacunaman cushpami paicunata cꞌuyashcata ricuchincuna (1 Timoteo 5:8). Pero tucuimanta yallica familiata pushajca paipaj familiacuna Dioshuan alli apanacuchunmi ayudana can (Mateo 5:3). Jesuspaj ejemplota ricushun. Juan libropica Jesús caspipi cajpica Juanpish, Jesuspaj mamapish chaipi cashcatami ricuchin. Jesusca llaquinaita sufricushpapish paipaj mamataca apóstol Juanmanmi cuidachun mingarca (Juan 19:26, 27). Mariaca ashtahuan churicunata, ushushicunatami charirca. Paicunaca minishtishca cosascunata cushpami ayudanman carca. Pero paicuna Jesuspaj discipulocuna manaraj tucushcamantami Jesusca paipaj mamataca espiritualmente cuidachun Juanman mingarca.

16. ¿Juanca ima responsabilidadcunatataj charirca?

¹⁶ Juanca achca responsabilidadcunatami charirca. Paica apóstol cashcamantami huillanapi alli ejemplota cuna carca. Shinallataj paica cazarashcami cashcanga. Chaimantami paipaj familiamanca minishtirishca cosascunata cushcanga. Shinallataj Dioshuanpish alli apanacuchunmi ayudashcanga (1 Corintios 9:5). ¿Familiata pushajcunaca Juanmantaca imatataj yachai tucuncuna?

17. ¿Familiata pushajcunapajca espiritualmente familiata ayudanaca imamantataj valishca can?

¹⁷ Familiata pushaj huauquicunapish huaquin responsabilidadcunatami pajtachina can. Por ejemplo, Yayitu Diosta ama pingachingapajmi trabajopica alli trabajaj cana can (Efesios 6:5, 6; Tito 2:9, 10). Huaquincunacarin congregacionta pushajcuna o siervo ministerialcunami can. Chaimantami paicunaca predicanapipish alli ejemplota cuna can. Shinallataj huauqui panicunatapish visitashpa, animashpami ayudana can. Shinapish huarmihuan, huahuacunahuan Bibliamanta yachanataca manataj saquinachu can. Chaita rurajpica familiacunaca paicunata tucuipi ayudashcamanta, Jehová Diosta sirvichun ayudashcamantami achcata  agradicingacuna (Efesios 5:28, 29; 6:4, NWT ).

18. ¿Juanca imatataj seguro carca?

¹⁸ Juanca achca huatacunatami causarca. Paipaj causaipica alaja experienciacunata, desanimachij experienciacunatami charirca. Chashnapish Jesús mandashcata cazushpa huauqui panicunaman cꞌuyaita ricuchingapajmi esforzarirca. Chaimantami Juanca Jehová Diospish, Jesuspish paita cꞌuyashcata seguro carca. Llaquicunahuan cajpipish paicuna ayudanapimi confiarca (Juan 14:15-17; 15:10; 1 Juan 4:16). Diablopish, paita apoyajcunapish Juan cꞌuyaita ricuchichunca mana jarcai tucurcacunachu.

19. ¿1 Juan 4:7-pica imata rurachuntaj animan?

¹⁹ Cunan punllacunapipish Juan causashca punllacunapi shinallatajmi cai Allpata Diablo mandacushcamantaca achca pꞌiñanacuicuna tiyan (1 Juan 3:1, 10). Diabloca ñucanchij huauqui panicunata cꞌuyanata saquichunmi munan. Chaimanta ñucanchij huauqui panicunata cꞌuyashcataca rimaicunahuan, ruraicunahuan ricuchishunchij. Chaita rurashpaca huauqui panicunahuanmi Jehová Diostaca tandalla, cushilla sirvishun (1 Juan 4:7-ta liyipai).