1. ¿1935 huatapica shuj conferenciata uyashca qꞌuipaca bautizarishca jovenca imata ruranatataj saquirca?

SHUJ jovenca 1926 huatapimi 18 huatacunata charishpa bautizarirca. Paipaj yaya mamaca Bibliamanta yachacujcunami carca. Chai tiempopica testigo de Jehovacunataca chashna nishpami rijsijcuna carca. Paipaj yaya mamaca quimsa churicunata, ishqui ushushicunatami Jehová Diosta sirvichun, Jesuspaj ejemplota catichun yachachishcacuna carca. Chai tiempopica Bibliamanta yachacujcunaca tucuicunami Jesús huañushcata yuyarishpaca tandata micujcuna carca, vinota ubyajcuna carca. Cai bautizarishca jovenpish chaillatatajmi ruraj carca. Pero 1935 huatapica Washington, Estados Unidos llajtapi shuj jatun tandanacuipimi huauqui Joseph Rutherfordca yallitaj achcacuna nishca conferenciata yachachirca. Cai jovenca chai conferenciata uyashpami tandata micunata, vinota ubyanata saquirca. ¿Chai conferenciapica imatataj alli intindirca?

2. ¿Huauqui Rutherfordca imatataj alli intindichirca?

² Huauqui Rutherfordca chai conferenciapica Apocalipsis 7:9-pi parlashca yallitaj achcacuna picuna cashcatami intindichirca. Chai punllacunacamaca Bibliamanta yachacujcunaca: “Yallitaj achcacunaca jahua pachamanmi ringacuna, pero mana sinchi feta charishcamantami Jesushuanca mana mandangacuna” nishpami yuyajcuna carca. Pero huauqui Rutherfordca Bibliahuanmi: “Yallitaj achcacunaca mana jahua pachapichu causangacuna. Paicunaca Jesús parlashca shujtaj ovejacunami can. Yallitaj achcacunaca jatun llaqui punllacunamanta quishpirishpami cai Allpapi huiñaita causangacuna”  nishpa yachachirca (Apocalipsis 7:14). Jesusca: “Mana cai corralpi caj shujtaj ovejacunatapish charinimi. Paicunatapish pushamunami cani. Paicunapish ñuca rimaitami uyangacuna. Shuj canllallami tucunga, shuj michijllami tiyanga” nircami (Juan 10:16). Cai shujtaj ovejacunaca cai Allpapi huiñaita causana esperanzata charij testigo de Jehovacunami can (Mateo 25:31-33, 46). Cunanca huaquin huauqui panicuna, párrafo 1-pi parlashca jovenpish cai mushuj yachachishcacunata intindishpa imata rurashcata ricushun (Salmo 97:11; Proverbios 4:18). *

3, 4. ¿1935 huatapica achca huaranga huauqui panicunaca imatataj cuentata curcacuna?

³ Chai jatun tandanacuipi huauqui Rutherfordca conferenciata cucushpaca caitami nirca: “Paraíso Allpapi huiñaita causanata shuyajcuna shayaripaichij” nircami. Chai jatun tandanacuipica casi 20 mil huauqui panicunami carca. Chai tandanacuiman rishca shuj huauquica 10 mil yalli huauqui panicunami shayarircacuna nircami. Chaimi paicuna shayarishcata ricushpaca huauqui Rutherfordca caimi yallitaj achcacuna nirca. Tandanacushcacunaca chaita uyashpaca achcatami cushicurcacuna. Shayarishca huauqui panicunaca Yayitu Dios paicunataca jahua pachaman richunca espíritu santohuan mana agllashcatami intindircacuna. Cayandij punllaca chai tandanacuipica 840 huauqui panicunami bautizarircacuna. Bautizarishcacunapuramantaca achcacunami shujtaj ovejacunamanta carca.

⁴ Chai qꞌuipaca achca huaranga huauqui panicuna, párrafo 1-pi parlashca bautizarishca huauquipishmi Jesús huañushcata yuyarina tandanacuipi tandata micunata, vinota ubyanata saquircacuna. Shuj huauquica: “1935-pica Jehová Dios ñucataca jahua pachaman richunca paipaj espíritu santohuan mana agllashcatami intindircani. Chaimantami Jesús huañushcata yuyarina tandanacuipi tandata micunata, vinota ubyanata saquircani. Ñucaca cai Allpapi huiñaita causanata, cai Allpata paraisota rurangapaj chaipi ayudanatami munani” nircami. Achca huauqui panicunapish chashnallatajmi yuyarcacuna (Romanos 8:16, 17; 2 Corintios 1:21, 22). 1935 huatamantami yallitaj achcacunaca ashtahuan mirarishcacuna. Paicunaca cai Allpapi caj jahua pachaman rigrij Diosta sirvijcunahuanmi tandalla sirvishpa caticuncuna.

5. ¿Tandata micunata, vinota ubyanata saquijcunaca Diospaj ñaupajpi alli ricuringapajca imatataj rurana can?

⁵ Cunan punllacunapish maijan huauqui o panica jahua pachaman rinata tucui shunguhuan crishcamantami Jesús huañushcata yuyarinapi vinota ubyancuna, tandata micuncuna. Pero tiempohuanca jahua pachaman ringapajca mana agllashca cashcatami cuentata cuncuna. ¿Paicunaca Diospaj ñaupajpica allichu ricurincuna? (1 Corintios 11:28). Maijancunaca mana alli intindishcamantami jahua pachaman rishun nishpa yuyajcuna carca. Pero paicuna pandaricushcata intindishpa, tandata micunata, vinota ubyanata saquishpa, Jehová Diosta tucui shunguhuan sirvishpaca Diospaj ñaupajpimi alli ricuringacuna. Diospish paicunataca paipaj shujtaj ovejacunata shinami chasquinga. Cai huauqui panicunaca Jehová Diosta, Jesusta agradicingapajmi Jesús huañushcata yuyarina tandanacuimanca  rinatapish mana saquina can. 1935 huatapimi achca huauqui panicunapish tucui caicunata pajtachircacuna.

6. ¿Jesusca angelcunataca imata rurachuntaj mandan?

⁶ Jatun llaqui punllacunaca ñallami callaringa. Chaimantami Apocalipsis capítulo 7–pi jahua pachaman rigrijcunamanta, cai Allpapi causagrij yallitaj achcacunamanta imata yachachishcata alli intindina canchij. Chai capitulopica Jesusca angelcunataca jahua pachapi causachun agllashcacunata huiñaipaj sellangacamaca cai Allpata ama llaquichichunmi mandan (Apocalipsis 7:1-4). Jahua pachaman richun agllashcacunaca Jesushuanmi mandangacuna, sacerdotecunapishmi tucungacuna (Apocalipsis 20:6). 144 mil agllashcacuna jahua pachapi causanata chasquijpica Jehovapish, Jesuspish, angelcunapish cushillami sintiringacuna.

7. a) Apocalipsis 7:9, 10-pi nishca shinaca ¿apóstol Juanca picunatataj ricurca? b) ¿Paicunaca imatataj ruracuncuna? (Página 1-pi tiyaj dibujota ricui).

⁷ 144 mil agllashcacunata ricushca qꞌuipaca apóstol Juanca Armagedonmanta quishpirij yallitaj achcacunatami ricurca. Cai yallitaj achcacunaca 144 mil agllashcacunamanta maihuan yallimi cancuna. Apóstol Juan nishca shinaca pi mana yupaipaj yallitaj achcacunami can (Apocalipsis 7:9, 10-ta liyipai). Paicunaca yurajlla churanacunata churashcami can. Caica Yayitu Diosta, Jesusta tucui shunguhuan sirvishcata, Diablopaj ruraicunapi mana chagrurishcatapishmi ricuchin (Santiago 1:27). Chai yallitaj achcacunaca Jehová Diospish, Jesuspish paicunallami ñucanchijta quishpichijcuna nishpami sinchita caparincuna. Shinallataj paicunapaj maquicunapipish ramacunata aisashcami cancuna. Chashnami Jehová Dios agllashca Rey Jesusta apoyashcata ricuchin (Juan 12:12, 13-ta ricui).

8. ¿Yallitaj achca gentecuna quishpirijta ricushpaca Jehová Diospish, angelcunapish ima shinataj sintiringacuna?

⁸ (Apocalipsis 7:11, 12-ta liyipai). Jahua pachapi tucui angelcuna, Jehová Diospish jatun llaquimanta yallitaj achca gentecuna quishpirijta ricushpami achcata cushicungacuna. Chaimantami tucui angelcunaca Yayitu Diosta alabangacuna.

9. Apocalipsis 7:13 al 15-pi nishca shinaca ¿yallitaj achcacunaca imatataj ruracuncuna?

⁹ (Apocalipsis 7:13-15-ta liyipai). Apóstol Juanca yallitaj achcacunaca “churanacunata Ovejapaj yahuarpi tajshashpa yurajllata rurajcunami” nircami. Caica ¿imatataj nisha nin? Paicuna alli concienciata charinata, Diospaj ñaupajpi alli ricurinatami nisha nin (Isaías 1:18). Cai yallitaj achcacunaca Jesús huañushcapi feta churashcamanta, Diospaj amigos cashcamantami paiman mingarishcacuna, bautizarishcacunapish (Juan 3:36; 1 Pedro 3:21). Chaimantami paicunaca jatun tiyarinapi tiyacuj Diospaj ñaupajpi caj shina punllapish, tutapish cai Allpapi Yayitu Diosta sirvincuna. Shinallataj paicunaca Diospaj Gobiernota punta lugarpi churashpami muyundij Allpapi predicancuna, Jesuspaj discipulocunatapish rurancuna (Mateo 6:33; 24:14; 28:19, 20).

10. a) ¿Yallitaj achcacunaca imatataj crincuna? b) ¿Yayitu Diosca imatataj pajtachinga?

¹⁰ Juanca Diospaj carpa huasica tucui gentecunahuanmi nircami. Chaimantami yallitaj achcacunaca jatun llaqui punllacuna huasha Jehová Dios paicunata cuidashpa catinata crincuna. Yayitu Diosca paicuna shuyacushcatapishmi pajtachinga. ‘Diosca paicunapaj ñahuicunamantaca, tucui huiquitami pꞌichanga.  Huañuipish, huacaipish, llaquipish, nanaipish ña mana ashtahuan tiyangachu’ (Apocalipsis 21:3, 4).

11, 12. a) Apocalipsis 7:16, 17-pi nishca shinaca ¿yallitaj achcacunaca ima bendicioncunatataj chasquingacuna? b) ¿Shujtaj ovejacunaca imamantataj Jesús huañushcata yuyarina tandanacuiman rincuna?

¹¹ (Apocalipsis 7:16, 17-ta liyipai). Cunan punllacunapica huaquincunaca Yayitu Diosta sirvicushpapish yaricaimanta, cullqui illaimanta, macanacuicuna tiyashcamantami llaquilla causancuna. Shujtajcunacarin Diosta sirvishcamantami carcelpi cancuna. Shinapish yallitaj achcacunaca jatun llaqui punllacunamanta quishpirishpa achca micunatapish, Diosmanta achca yachanacunatapish charinata yachashpami cushilla sintirincuna. Yayitu Diosca Diablopaj ruraicunata tucuchicushpaca yallitaj achcacunatami cuidanga. Jatun llaqui punllacuna qꞌuipaca Jesusca quishpirijcunataca causaita cuj yacu llujshicunmanmi pushanga. Armagedonmanta quishpirij yallitaj achcacunallami mana nunca huañushpa paraisoman pasana esperanzata charingacuna (Juan 11:26).

¹² Shujtaj ovejacunaca cai sumaj esperanzata charishcamantami Jehová Diostapish, Jesustapish achcata agradicincuna. Jehová Diosca paicunata jahua pachaman richun mana agllashpapish cieloman rigrijcunata shinallatajmi achcata cꞌuyan. Jesús huañushcata yuyarina tandanacuiman rishpami shujtaj ovejacunapish, jahua pachaman rigrijcunapish Jehová Diosta, Jesusta alabai tucuncuna.

13, 14. ¿Jesús huañushcata yuyarina tandanacuimanca imamantataj tucuicuna rina canchij?

¹³ Cai último huatacunapica achca congregacioncunapimi Jesús huañushcata yuyarishpaca ni maijancuna tandata mana micuncuna, vinotapish mana ubyancuna. Jesús huañushcata yuyarinaman rij mil gentecunamantaca casi shujllami tandata micun, vinota ubyan. Chai tandanacuiman rijcunaca achcacunami paraíso Allpapi causana esperanzata charincuna. ¿Cai Allpapi causana esperanzata charijcunaca imamantataj Jesús huañushcata yuyarina tandanacuiman rincuna? Caipi yuyashun, shuj amigo cazaracujpica paicunata cꞌuyashcamanta, apoyashcamantami acompañanchij. Chashnallatajmi shujtaj  ovejacunapish Jesusta, jahua pachaman rigrijcunata cꞌuyashcamanta, apoyashcamanta Jesús huañushcata yuyarina tandanacuiman rincuna. Chashna tandanacushpaca Jesús huañushcamanta, paraíso Allpapi causana esperanzata charishcamantami agradicishcata ricuchincuna.

¹⁴ Jesusca paipaj apostolcunataca ñuca huañushcata yuyarishpa caitaca ruracunguichijlla nishpami mandarca (1 Corintios 11:23-26). Jesús mandashcata cazushpami shujtaj ovejacunaca Jesús huañushcata yuyarina tandanacuimanca mana faltancuna. Paicunaca jahua pachaman richun agllashcacuna cai Allpapi mana tiyangacamami Jesús huañushcata yuyarina tandanacuita rurashpa catingacuna. Shinallataj cai alaja tandanacuiman tucuicuna richunmi invitancuna.

15. ¿Jesús huañushcata yuyarina tandanacuipica ima shinataj Jehová Diosta, Jesusta agradicinchij?

¹⁵ Jesús huañushcata yuyarina tandanacuipica Jehová Diosta, Jesustami cantashpa, mañashpa alabai tucunchij. Cai huataca “Jehová Diostapish, Jesustapish pagui nishunchij” nishca conferenciatami charishun. Caita uyashpaca Jehová Diostapish, Jesustapish ashtahuanmi agradicishun. Tandata, vinota pasachicun ratoca tandaca Jesuspaj cuerpota ricuchishcata, vinoca Jesuspaj yahuarta ricuchishcatami yuyarina canchij. Shinallataj Jehová Dios paipaj Churita cushcamanta ñucanchij huiñai causaita chari tucushcatapishmi yuyarina canchij (Mateo 20:28). Jesús huañushcata yuyarina tandanacuiman rishpaca Jehová Diosta, Jesustapish cꞌuyashcatami ricuchishun.

16. ¿Cielopi causagrijcunapish, cai Allpapi causagrijcunapish imamantataj Diospajca valishca can ninchij?

¹⁶ Jehová Diospajca jahua pachapi causagrijcunapish, shujtaj ovejacunapish valishcami can. Paicunataca achcatami cꞌuyan. Jahua pachaman rigrijcunamantapish, shujtaj ovejacunamantapish Jehová Diosca paipaj Churitami huañuchun curca. Cai ishqui grupocunami Jehová Diosta, Jesusta tucui shunguhuan sirvina can (Salmo 31:23). Jehová Diosca jahua pachapi causanata shuyajcunamanpish, cai Allpapi causanata shuyajcunamanpish paita sirvichunmi cada unoman espíritu santota cun.

17. ¿Jahua pachaman rigrijcunaca imatataj tucui shunguhuan shuyacuncuna?

¹⁷ Jahua pachaman rigrijcunaca mana chai esperanzahuan huacharincunachu. Paicunataca Jehová Diosmi jahua pachaman rina munaita charichun agllan. Paicunaca paicuna imata shuyacushcata chasquingapajmi Yayitu Diosta mañancuna. Jahua pachapi espíritu cuerpota charina ima shina canata mana yachashpapish Jehová Dioshuan, Jesushuan,  angelcunahuan, shujtaj agllashcacunahuanpish tandalla canatami tucui shunguhuan munancuna (Filipenses 3:20, 21; 1 Juan 3:2).

18. ¿Shujtaj ovejacunaca imatataj shuyacuncuna?

¹⁸ Shujtaj ovejacunaca cai Allpapi huiñaita cushilla causanatami shuyacuncuna. Chashna causanataca tucui gentecunami munancuna (Eclesiastés 3:11). Shujtaj ovejacunaca cai Allpa shuj paraíso tucuchun ayudanatami munancuna. Shinallataj paicunapaj propio huasicunata shayachinata, alaja jardincunata, huertacunata ruranatami shuyacuncuna. Paicunapaj familiacunahuanpish alli saludta charishpa cushilla causanatami shuyacuncuna (Isaías 65:21-23). Paicunaca muyundij Allpata, alaja urcucunata, sachacunata, yacucunata, Jehová Dios tucui rurashcacunata rijsinatami shuyacuncuna. Ashtahuancarin paraíso Allpapi cada punlla Jehová Diospajman ashtahuan cꞌuchuyanatami cushilla shuyacuncuna.

19. a) ¿Imamantataj Jesús huañushcata yuyarina tandanacuiman rina canchij? b) ¿Cai tandanacuitaca ima punllapitaj rurashun?

¹⁹ Jehová Diosca tucui paita alli sirvijcunamanmi sumaj causaita cusha nishca (Jeremías 29:11). Tucuicunami Jesús huañushcata yuyarina tandanacuiman rishpa Jehová Diostapish Jesustapish alabanchij, pagui ninchij. Cashna tandanacuita cada huata ruranaca Jesuspaj discipulocunapajca tucuimanta yalli valishcami can. 2021 huatapica Sábado 27 de marzotami inti huashicushca qꞌuipa Jesús huañushcata yuyarishun. Cai huatapica cai sumaj tandanacuiman ringapajca achcacunaca ima jarcaicunata mana charingacunachu. Cutin shujtajcunaca gobiernocuna jarcajpipish o prezupi cashpapish Jesús huañushcata yuyarina tandanacuitami rurangacuna. Tucui huauqui panicunapish, gentecunapish cai sumaj tandanacuiman shamuchunmi invitanchij. Chai tandanacuiman rijpica Jehová Diospish, Jesuspish, angelcunapish cushillami sintiringacuna.