YACHAI 41
Bibliamanta yachacujcunata bautizarichun ayudashunchij (parte 1)
“Cancunaca Cristo quillcashca, ricunalla quillcami canguichij. Ñucanchijmi chaitaca cancunaman curcanchij” (2 CORINTIOS 3:3).
CANTO 78 Diospaj Shimita yachachishunchij
CAITAMI YACHASHUN *
Bibliamanta yachacuj bautizarijpica tucui huauqui panicunami cushilla sintirinchij. (Párrafo 1-ta ricui).
1. 2 Corintios 3:1 al 3-pi nishca shinaca ¿Bibliamanta yachacuj bautizarijpica ima shinataj sintirinchij? (Página 1-pi tiyaj fotota ricui).
¿ÑUCANCHIJ congregacionmanta Bibliamanta estudiaj bautizarijpica ima shinataj sintirinchij? De seguro cushillami sintirinchij (Mateo 28:19). Cutin ñucanchijhuan yachacuj bautizarijpica ashtahuanmi cushiyarinchij (1 Tesalonicenses 2:19, 20). Cunanlla bautizarishca huauqui panicunaca paicunapaj yachachijcunamantapish, congregacionpi caj shujtaj huauqui panicunamantapish alajatami parlancuna (2 Corintios 3:1-3-ta liyipai).
2. a) ¿Imatataj tapurina canchij? b) ¿Ima shinataj shuj estudiota callarichishcata ricuchinchij? (Notata ricui).
2 Cai chuscu último huatacunapi muyundij Allpapi 10 millón gentecuna Bibliata estudiacujta yachashpaca cushillami sintirinchij. * Cai huatacunapica 280 mil gentecunami bautizarishcacuna. Shinapish achcacunaca manaraj bautizarishcacunachu. ¿Paicunataca ima shinataj ayudai tucunchij? Jehová Diosca pacienciata charishcamantami gentecuna paita sirvichun shuyacunraj. Ashalla tiempo faltashcamantami achca gentecuna Yayitu Diosta rijsichun, bautizarichun esforzarina canchij (1 Corintios 7:29a; 1 Pedro 4:7).
3. ¿Cai yachaipica imatataj yachashun?
3 Cunan punllacunapi yachacujcuna bautizarichun ayudanami minishtirishca can. Cuerpo Gobernante huauquicunaca Bibliamanta yachacujcuna bautizarichun imata ruranata yachangapajca sucursalcunatami tapurcacuna. Cai yachaipi, catij yachaipimi superintendente de circuito huauquicunamanta, misionerocunamanta, achca experienciata charij precursorcunamanta yachai tucushun (Proverbios 11:14; 15:22). * Paicunamanta yachashpami alli yachachijcuna cachun ayudanga. Shinallataj yachacujcunapish cada uno imata rurai tucushcatami yachashun. Cai yachaipica yachacujcunapish bautizaringapaj imallata rurana cashcatami ricushun. Yachachijcunapish imata rurai tucushcatami yachashun.
CADA SEMANAMI ESTUDIANA CAN
Yachacujtaca: “¿Ashitohuan yachangapajca maipitaj tiyari tucunchij?” nishpami tapui tucunchij. (Párrafos 4 al 6-ta ricui).
4. ¿Bibliamanta yachacujcunata huasi pungupi yachachijpica paicunaca bautizaringachu?
4 Achca huauqui panicunaca gentecunataca huasi pungupimi yachachincuna. Chashna yachachijpica huaquincunaca Bibliamanta ashtahuan yachana munaitami charingacuna. Pero huasi pungupi yachachishcamantami ashallata yachachinchij. Maipica cada semana Bibliamanta estudiotaca mana chari tucunachu. Huaquin huauqui panicunaca Bibliamanta yachacujcunahuan parlashpa catingapajca maipica paicunapaj número de telefonotami mañancuna. Chashnami cai huauqui panicunaca paicunamanca shuj mensajeta cachai tucuncuna. * Bibliamanta yachacujcunaman mensajeta cachashpa, cayashpaca huaquin quillacunatami pasai tucunchij. Pero Bibliamanta yachacujcunaca mana ima cambiocunata ruranchu. Yuyashun: Bibliamanta yachacujcuna mensajecunallata chasquishpa ¿bautizari tucungacunachu? Mana. Paicunaca Diosman mingaringapaj, bautizaringapaj, Bibliamanta ashtahuan yachangapajmi esforzarina can.
5. a) Lucas 14:28 al 33-pica ¿Jesusca imatataj yachachirca? b) ¿Cai versocunapi nishca shinaca yachacujcunataca ima shinataj ayudai tucunchij?
5 Gentecuna paipaj discipulocuna tucuchunca Jesusca huaquin ejemplocunata churashpami yachachirca. Paica torreta shayachisha nij runamantami parlarca. Jesusca: “Maijantaj shuj torreta shayachisha nishpaca, tucuringacama rurangapajca mashna pajtana cashcata ricungapajca ¿manachu tiyarishpa ricunguichijraj?” nircami. Shinallataj macanacungapaj risha nij shuj mandajmantami parlarca. Chai jatun mandajca paipaj soldadocuna shujtaj soldadocunata mishai tucushcatami alli ricunaraj can nircami (Lucas 14:28-33-ta liyipai). Gentecunaca manaraj Jesuspaj discipulocuna tucushpami paita catisha nishpaca alli yuyanaraj can. Paicunataca cada semanami Bibliamanta estudiachun animana canchij. ¿Ima shinataj chaicunataca rurai tucunchij?
6. ¿Bibliamanta yachacuj bautizarina munaita charichunca imallatataj rurana canchij?
6 Puntapica gentecunaman huasi pungupi yachachicushpaca ashtahuan tiempotami yachachina canchij. Por ejemplo, shuj versollata liyinapaj randica caishuj versocunata liyingapajpish esforzarinami canchij. Yachacuj Bibliamanta yachangapaj ashtahuan tiempota cujpica: “Ashtahuan yachangapajca ¿maipitaj tiyari tucunchij?” nishpami tapuna canchij. Chashnami Bibliamanta yachanata munashcata o mana munashcata yachashun. Paicuna ashtahuan yachasha nijta ricushpaca “¿shuj semanapica ishqui cutin visitai tucunchijchu?” nishpami tapui tucunchij. Chashna yachai callarishpaca bautizarinatami munanga. Yachacuj imallata rurana cashcata yachashun.
ALLIMI PREPARARINA CAN
Estudiota cungapaj alli prepararishunchij. Yachacujtapish alli preparachun ayudashunchij. (Párrafos 7 al 9-ta ricui).
7. ¿Shuj estudiota cungapajca imallatataj rurana canchij?
7 Yachachijca shuj estudiota cungapajmi alli prepararina can. Yachachigrishca informaciontami alli liyina canchij. Chaipi tiyaj versocunata valishca yuyaicunatami mashcana canchij. Yachachigrishca temata, titulocunata, parrafocunapaj tapuicunata, “liyipai” nishca versocunata, chaipi tiyaj fotocunata, shinallataj chai temamanta parlaj videocunatapishmi ricuna canchij. Qꞌuipaca yachacuj imalla minishtishcata ricushpa jahualla shimicunahuan, intindirinalla yuyaicunahuan yachachingapajmi esforzarina canchij. Chashnami paicunapaj causaipi ima yachachishcacunataca pajtachinga (Nehemías 8:8; Proverbios 15:28a).
8. Colosenses 1:9, 10-pi apóstol Pablo nishca shinaca ¿yachacujcunata ayudangapajca imallatataj rurana canchij?
8 Bibliamanta yachacujcuna imalla minishtishcamantami Jehová Diosta mañana canchij. Shina rurashpami prepararishcata ricuchinchij. Paicunaman Biblia yachachishcata alli intindichingapaj Dios ayudachunmi mañana canchij. Chashnami Biblia yachachishcacunaca paicunapaj shunguman chayanga (Colosenses 1:9, 10-ta liyipai). Cashna nishpa tapurishunchij: “¿Bibliata yachacujpajca ima intindinataj sinchi canga?” Yachacujcunata ayudanataca mana cungarinachu canchij.
9. ¿Yachacujcuna alli prepararichunca ima shinataj ayudana canchij?
9 Yachajcunaman yachachinata mana saquijpica paicunaca Jehová Diosta y Jesustami valorangacuna. Shinallataj paicunamantami ashtahuan yachanata munangacuna (Mateo 5:3, 6). Bibliamanta yachacuj Biblia yachachishcacunamanta alli beneficiarichunca cada estudiopi concentrarichunmi ayudana canchij. Chaipajca “cada yachaipaj alli prepararishpa ima yachashcataca cambaj causaipi ima shina pajtachi tucushcapimi yuyana cangui” nishpami yachachina canchij. Shuj temamanta paillataj alli prepararichunmi paihuan preparashpa yachachina canchij. * Qꞌuipaca tapuipaj respuesta maijan cashcata parrafopi mashcachunmi ayudana canchij. Chai huashaca paipaj propio shimicunahuan respuestata nichunmi ayudana canchij. Chashnami yachacuj imata cutichijta uyashpaca intindishcata o mana intindishcata yachashun. ¿Yachacujca imallatataj ashtahuan rurana can? Ricushun.
TUCUI PUNLLACUNAMI BIBLIATA LIYINA, JEHOVÁ DIOSTA MAÑANA CAN
Yachacujtaca Jehová Diosta mañachun yachachishunchij. (Párrafos 10 y 11-ta ricui).
10. a) ¿Imamantataj yachacujca Bibliata cada punlla liyina can? b) ¿Yachacuj Bibliata liyishpaca ima shinataj beneficiari tucun?
10 Bibliata yachacuj cada semana estudiota chasquishpapish paillatajmi Diosta uyanata paihuan parlanata yachana can. ¿Ima shinataj Diosta uyai tucun? Bibliata tucui punllacuna liyishpa (Josué 1:8; Salmo 1:1-3). JW.ORG paginapi Bibliata liyingapaj programata liyichun, imprimichunpishmi ayudai tucunchij. * Shinallataj Jehová Diosmanta Bibliapi ima yachachijta paipaj causaipipish ima yachashcata pajtachichunmi ayudai tucunchij. Chashnami yachacujca paipaj causaipi imalla yachashcata pajtachishpa beneficiaringa (Hechos 17:11; Santiago 1:25).
11. a) ¿Yachacujtaca Yaya Diosta mañachunca ima shinataj ayudana canchij? b) ¿Bibliamanta yachacujca imamantataj mañanataca mana saquina can?
11 Yachacujtaca cada punlla Yayitu Diosta mañachunmi yachachina canchij. Estudiota callaringapajpish tucuchingapajpish Yaya Diostami shungumanta mañana canchij. Yachacujtapish ayudahuai nishpami mañana canchij. Chashnami yachacujca Jesuspaj shutipi shungumanta Jehová Diosta mañanata yachanga (Mateo 6:9; Juan 15:16). Caipi yuyashun. Yachacuj cada punlla Bibliata liyishpa, Diosta mañashpaca paipajmanmi cꞌuchuyanga (Santiago 4:8). Caicunata pajtachishpaca Diosman mingarichun, bautizarichunmi ayudanga. ¿Imallatataj rurachuntaj ayudanga?
DIOSHUANMI ALLI AMIGO CANA CAN
12. ¿Yachacuj Diospaj amigo tucuchunca ima shinataj ayudana canchij?
12 Biblia yachachishcacunaca yachacujpaj shunguman, yuyaimanmi chayana can. Yachacuj Jehová Diosmanta yachachunmi munanchij. Pero pai yachashcaca shungumanmi chayana can. Chashnami paipaj causaipi pajtachi tucunga. Jesusca alli yachachijmi carca. Chaimantami pai yachachishcacunaca gentecunapaj yuyaiman chayarca. Jesús yachachishcacuna shunguman chayajpimi gentecunaca paita catircacuna (Lucas 24:15, 27, 32). Yachacujca Yayitu Dios de verdad tiyashcatami ricuna can. Paitaca Diostaj cashcata, shuj Yayata shina, shuj amigota shinami ricuna can (Salmo 25:4, 5). Yachacujman yachachicushpaca Diospaj cualidadcunamantami yachachina canchij (Éxodo 34:5, 6; 1 Pedro 5:6, 7). Ima yachaimanta yachachicushpapish Jehová Dios ima shina cashcatami intindichina canchij. Chashna pai llaquij, cꞌuyaj cashcata valorachun ayudashunchij. Jesusca: ‘Cambaj Mandaj Taita Diosta tucui shunguhuan cꞌuyangui. Cai mandashcami tucuimanta ashtahuan yalli alli can’ nircami (Mateo 22:37, 38). Yachacujcunata Jehová Diosta de verdadtaj tucui shunguhuan cꞌuyachun ayudangapaj esforzarishunchij.
13. ¿Yachacuj Jehová Dios ima shina cashcata ashtahuan rijsichunca ima shinataj ayudai tucunchij?
13 Yachacujmanca Jehová Dios imamanta cꞌuyashcatami paimanca parlana canchij. Diosta mashnataj cꞌuyashcata ricushpaca paipish Diospaj amigo canata, paita cꞌuyanatami munanga (Salmo 73:28). Por ejemplo, shuj publicacionpi o shuj versopi “Jehová Dios cꞌuyaj, yachaj, cashcata ruraj, tucui poderta charijta ricushpaca chaimantami ñucanchijca paitaca cꞌuyanchij” nishpami yachacujmanca yachachi tucunchij. Yachacujcuna bautizaringapaj imata ashtahuan rurana cashcata ricushun.
TANDANACUICUNAMANMI RINA CAN
Yachacujtaca Bibliamanta yachachi horasmantami tandanacuicunaman richun animana canchij. (Párrafos 14 y 15-ta ricui).
14. Hebreos 10:24, 25-pi nishca shinaca ¿yachacujca imatataj rurana can?
14 Tucuicunami yachacuj bautizarichun munanchij. Chaipajca yachacujtami tandanacuicunaman richun animana canchij. Experienciata charij huauqui panicunaca: ‘Yachacujcuna tandanacuicunaman rishpaca ratomi bautizarincuna’ nincunami (Salmo 111:1). Huaquin yachachijcunaca yachacujtaca: “Huasipica mana tucuita yachai tucunguichu. Chaimantami tandanacuicunaman rina cangui” nishpami animancuna (Hebreos 10:24, 25-ta liyipai). Hebreos 10:24, 25-tami yachacujman liyina canchij. Shinallataj cai versocuna tandanacuiman rina imamanta importante cashcatami ricuchina canchij. ¿Ñucanchij tandanacuicunapica imatataj ruranchij? * nishca videotapishmi ricuchi tucunchij. Yachacujcunataca tucui tandanacuicunaman richunmi animana canchij.
15. ¿Yachacuj tucui tandanacuicunaman richunca imatataj rurana canchij?
15 ¿Yachacuj huaquinllapi o shuj cutinlla tandanacuiman rijpica imatataj rurana canchij? Yachacujta ‘tandanacuicunamanmi rina cangui’ ninapaj randica ñucanchij tandanacuicunapi ima yachashcacunatami cushilla paiman parlana canchij. Shinallataj Huillaj revistata, Jesús shina causashunchij huillashunchij nishca pꞌangatami saquina canchij. Chashnami tandanacuipi imalla yachacushcata yachanga. Catij tandanacuipi imallata yachagrishcatami ricuchina canchij. Shinallataj imamanta ashtahuan yachasha nishcatami tapuna canchij. Tandanacuiman punta cutin rishpaca chaipi imata yachashcata imata uyashcata intindishpaca shujtaj religioncunapi mana nunca yachashcatami cuentata cunga (1 Corintios 14:24, 25). Tandanacuicunapica Diosta alli sirvijcunatami rijsinga. Diosta alli sirvijcunami yachacujcuna bautizarichunpish animanga.
16. a) ¿Yachacuj bautizarichun ayudangapajca imatataj rurana canchij? b) ¿Catij yachaipica imatataj yachashun?
16 Cai yachaipi ricushca shinaca ¿yachacuj bautizarichunca ima shinataj ayudai tucunchij? Yachacuj Bibliamanta yachana importante cashcata cuentata cuchunmi cada semana estudiachun animana canchij. Yachagrishca yachaitapish alli prepararichunmi animana canchij. Shinallataj Bibliata liyishpa, Jehová Diosta mañashpami paipaj amigo cai tucungui nishpami yachachina canchij. Tandanacuicunaman richunpishmi animana canchij. (“ Bibliamanta yachacujca imatataj rurana can” nishca recuadrota ricui). Catij yachaipica Bibliamanta yachachijcuna yachacujcunata bautizarichun ayudangapaj imallata rurana cashcatami yachashun.
CANTO 76 Cushicushpa huillashunchij
^ par. 5 Piman imata yachachinaca chai persona alli yuyachun, causaipi cambiachun ayudanami can. 2020 huatapaj versoca Mateo 28:19-manta japishcami carca. Cai versopica gentecunaman Bibliamanta yachachina importante cashcatami yuyachishca. Shinallataj gentecuna bautizarishpa Jesuspaj discipulocuna tucuchun ayudana importante cashcatami yuyachishca. Cai yachaipipish catij yachaipipish gentecunaman alli yachachingapaj imallapi mejoranatami yachashun.
^ par. 2 ALLI INTINDISHUNCHIJ: Gentecunaman Bibliamanta cutin cutin parlashpaca ñami shuj estudiota callarichishcanchij. Bibliamanta o ima publicacioncunamanta informacionta gentecunaman ishqui cutin ricuchishca qꞌuipaca paicuna yachanata munajta ricushpaca ñucanchij informepimi shuj estudiota callarishcata anotai tucunchij.
^ par. 3 Cai yachai 41, yachai 42-pica julio de 2004 a mayo de 2005 de Nuestro Ministerio del Reino “Dirijamos estudios bíblicos progresivos” nishca yachaimanta japishcatami ricushun.
^ par. 4 Publicadorcunaca ima laya huillacushpapish gentecunapaj datocunatami respetana canchij. Chashnami ñucanchij causan llajtapi churashca leycunata respetashun.
^ par. 9 “Cambaj yachacujta ima shina allichirina cashcata yachachi” nishca videota ricui. Caita ricungapajca jw.org paginaman yaicui. PUBLICACIONCUNA > LIBROCUNA > FOLLETOCUNAPISH nishcaman yaicui.
^ par. 10 PUBLICACIONCUNA > LIBROCUNA, FOLLETOCUNAPISH nishcaman yaicui.
^ par. 14 JW.ORG paginaman yaicui, ÑUCANCHIJTA RIJSI > TANDANACUICUNA nishcaman yaicui.
