1. ¿Gentecunaman yachachishpaca imamantataj quishpirichun ayudanchij?

GENTECUNAMAN yachachishpaca paicuna quishpirichunmi ayudanchij. Jesusca Mateo 28:19, 20-pica: ‘Tucui cai pachata richij, ñuca yachacujcunata ruraichij. Paicunataca bautizaichij’ nircami. Yachacujcunaca quishpiringapajca bautizarinami can. Pero bautizaringapajca Jesús ñucanchijta quishpichingapaj huañushcata, pai causarishcatami crina can. Apóstol Pedroca Jesusta catijcunataca: ‘Chai bautismoca cunan punlla quishpirinatami ricuchin. Chaica Jesucristo causarishcamantami’ nircami (1 Pedro 3:21). Bautizarishca qꞌuipaca huiñai causana oportunidadtami chari tucun.

2. 2 Timoteo 4:1, 2-pi nishca shinaca ¿alli yachachijcuna cangapajca imatataj rurana canchij?

² Gentecuna Jesusta catichun ayudangapajca mana pꞌiñarishpa, sumajtami yachachina canchij (2 Timoteo 4:1, 2-ta liyipai). ¿Imamantataj sumajta yachachina canchij? Jesusca: ‘Cai pachata richij, ñuca yachacujcunata ruraichij, yachachichij’ nircami. Apóstol Pabloca Timoteotaca Jesús mandashcata pajtachishpa, esforzarichunmi yachachirca. Pabloca: “Imata yachachicushcatapish alli yuyaringui. Chashna cashpami, canllatajpish quishpiringui, can yachachishcata uyajcunapish quishpiringacuna” nircami (1 Timoteo 4:16). Gentecuna Jesusta catichun ayudangapajca alli yachachijcunami cana canchij.

3. ¿Cai yachaipica imatataj ricushun?

³ Tucui semanacunami achca gentecunaman Bibliamanta yachachinchij. Pero pasaj yachaipi ricushca shinaca gentecuna bautizarichun ima shina ayudanatami ricurcanchij. Cai yachaipipish  yachachijcuna, yachacujcunata bautizarichun ayudangapajca imacunallata ruranatami ricushun.

4. ¿Yachacujcunamanca imamantataj mana tucuita yachachina canchij? (Notata ricui).

⁴ Tucuicunami Bibliamanta yachachinata munanchij. Chaimantami huaquinpica Bibliamantaca siempre parlanata munanchij. Pero Huillaj revistamanta, Tandanacushcacunahuan Bibliata yachashun nishca partemanta, gentecunaman estudiota cucushpaca mana dimastij parlanachu canchij. Biblia yachachichunmi saquina canchij. Yachachijca ima yachaimanta o ima versomanta mana tucuita intindichinachu can * (Juan 16:12). Manaraj bautizarishpa mashnata yachashcata y cunan mashnata yachashcapi yuyai. Tal vez bautizarishpaca importante yachachishcacunallatami yacharcangui (Hebreos 6:1). ¿Canca mashna tiempopitaj Bibliamanta ashtahuan yachai tucurcangui? Achca tiempopichari Bibliamantaca intindi tucurcangui. Chaimanta yachacujcunamanca tucui ñucanchij yachashcacunata ama una sola yachachishunchij.

5. a) 1 Tesalonicenses 2:13-pi nishca shinaca ¿yachacuj imata intindichuntaj munanchij? b) ¿Yachacuj imata yachashcata parlachunca imatataj rurana canchij?

⁵ Yachacujca ima yachacushcacuna Bibliamanta cashcata yachachunmi munanchij (1 Tesalonicenses 2:13-ta liyipai). Yachacujtaca tigra parlachunmi animana canchij. Versocunamantapish ñucanchijlla parlanapaj randica pai ima intindishcata parlachunmi saquina canchij. Shinallataj Bibliapi yachashcacunata paipaj causaipi ima shina pajtachichunmi ayudana canchij. Versocunata liyishca qꞌuipaca chai versomanta imata yuyashcata, imata intindishcata parlachunmi huaquin tapuicunata rurana canchij (Lucas 10:25-28). Por ejemplo, cai tapuicunata rurashunchij: “¿Cai versopica Jehová Diospaj ima cualidadcunatataj yachashcangui? ¿Ima yachashca versoca ima shinataj canta ayudai tucun?” (Proverbios 20:5). Yachacujca Bibliamanta achcata yachanapaj randica chai yachachishcacunata cꞌuyana, paipaj causaipi pajtachinami ashtahuan importante can.

6. ¿Imamantataj experienciata charij huauqui o panita estudiota cunaman acompañachun invitana canchij?

⁶ Experienciata charij yachachijcunatami Bibliamanta yachachinaman acompañachun invitai tucunchij. Cai huauqui panitaca: “¿Allichu Bibliamanta yachachicuni? ¿Biblia yachachichunchu saquina cani?” nishpami  tapuna canchij. Alli yachachijcuna cangapajca humildecunami cana canchij (Hechos 18:24-26-ta ricui). Estudiocunaman acompañajtaca, “¿yachacujca alli intindicujchu yuyachin?” nishpami tapuna canchij. Shuj semana o ashtahuan semanacunata mana estudiota cui tucushpaca shuj huauqui o pani yachachichunmi mañana canchij. Chashnami yachacuj siempre Bibliamanta yachana importante cashcata intindinga. Bibliamanta yachacujca ñuca estudiomi can, ni pi estudiotaca mana cunachu can nishpaca mana yuyanachu canchij. Ashtahuanpish yachacujcuna yachanata mana saquichun, bautizarichunmi munanchij.

7. ¿Yachacuj Bibliamanta yachashpa cushilla sintirichunca imatataj rurana canchij?

⁷ Imata yachashcataca ciertotaj cashcatami cushilla yachachina canchij. Yachacujca chaitami ricunga (1 Tesalonicenses 1:5). Chashnami yachacujca cushilla sintiringa. Ñucanchij causaipipish Biblia yachachishcacuna ima shina ayudashcatami parlai tucunchij. Yachacujca Biblia yachachishcacunata paipaj causaipi ayudai tucushcatami cuentata cunga.

8. a) ¿Yachacujta ayudangapajca imallatataj rurana canchij? b) ¿Imamantataj chaitaca rurana canchij?

⁸ Yachacuj shuj problemata charijpica pai charishca laya problemacunata charij huauqui panicunapaj experienciacunamantami parlai tucunchij. Chai huauqui panicuna ima shina chai problemacunata chꞌimbapurashcatapishmi parlai tucunchij. Mana cashpaca maijan huauqui panipaj experienciami ayudai tucun. Paicuna compañachunmi mañana canchij. Shinallataj “Bibliata yachashpami cambiashcacuna” nishcata jw.org * paginaman yaicuchunmi animana canchij. Chai experienciacunamanta, videocunamanta yachashpaca Biblia yachachishcacuna paitapish ayudai tucushcatami intindinga.

9. ¿Yachacuj paipaj amigocunaman paipaj familiaman Bibliamanta parlachunca imatataj rurana canchij?

⁹ Yachacuj cazarashca cajpica paipaj cusa o huarmi Bibliamanta yachachunmi invitai tucunchij. Shinallataj imata yachashcacunatapish amigocunaman familiacunaman parlachunmi animai tucunchij (Juan 1:40-45). Cashnami ni tucungui: “¿Cai yuyaitaca ima shinataj cambaj familiaman intindichingui? ¿Caimanta cambaj amigoman parlangapajca  ima versotataj utilizanguiman?” Yachacujta chashna tapushpami alli yachachijcuna cachun ayudashun. Yachacujca publicador cangapaj listo cashpaca huauqui panicunahuanpishmi predicai tucunga. Yachacujtaca, “¿Bibliamanta yachasha nijta rijsinguichu?” nishpami tapui tucunchij. Rijsinimi nijpica paita visitangapaj Bibliamanta yachachingapajmi mashcana canchij. ¿Ima shinataj Bibliamanta yachachinchij? * nishca videotapish ricuchi.

10. 1 Tesalonicenses 2:7, 8-pi nishca shinaca ¿yachachijcunaca ima shinataj Pablopaj ejemplota cati tucunchij?

¹⁰ Shungumantami yachacujcunamantaca preocuparina canchij. Ñucanchij huauqui panicunata shinami ricuna canchij (1 Tesalonicenses 2:7, 8-ta liyipai). Diosta sirvingapaj paicunapaj causaipi cambiocunata ruranaca mana jahuallachu can. Chaimanta tandanacuicunapi alli amigocunata mashcachun animashunchij. Paicunahuan pasangapaj tiempota surcushpaca paipaj amigocuna cashcatami ricuchishun. Paicunata cayashpa, shuj mensajeta cachashpa o shuj ratito paicunata ricunaman rishpaca shungumanta preocuparishcata ricuchishunchij.

11. ¿Yachacuj congregacionpi ima shina sintirichuntaj munanchij?

¹¹ Africa llajtapica: “Shuj huahuata huiñachingapajca tucui comunapi causajcunami minishtirin” nincunami. Chashnallatajmi “shuj yachacujta Diosta sirvichun ayudangapajca tucui congregacionpi tiyaj huauqui panicuna minishtirin”. Chaimantami yachachijcunaca congregacionpi huauqui panicunata rijsichun ayudana canchij. Chaita rurajpica yachacujca Jehová Diospajmanmi cꞌuchuyanga. Dioshuan alli amigopishmi tucunga. Problemacunata charishpapish ñaupajmanmi cati tucunga. Yachacujtaca congregacionpaj parte cashcata, huauqui panicunata familiata shina ricuchunmi ayudai tucunchij. Diosta sirvijcunahuan alli apanacuchun ayudajpica Diosta mana sirvij amigocunamantapish jahuallami caruyanga (Proverbios 13:20). Diosta mana sirvij amigocuna paimanta caruyajpica Diospaj pueblopimi alli amigocunata taringa (Marcos 10:29, 30; 1 Pedro 4:4).

12. ¿Yachacujmanca imamantataj Diosman mingarinamanta bautizarinamanta parlana canchij?

¹² Yachacujmanca Diosman mingarinamanta bautizarinamantami cutin cutin parlana canchij. Ñucanchijca gentecuna Diosta  sirvishpa bautizarichunmi munanchij. Chaimantami paicunamanca Bibliamanta yachachinchij. Yachacujca huaquin quillacunata Bibliamanta yachacushpa, tandanacuicunamanpish ri callarishpaca testigo de Jehová tucuchun ayudasha nishcatami intindina can.

13. ¿Yachacujca bautizaringapajca imallatataj rurana can?

¹³ ¿Bibliamanta yachacujca bautizaringapajca imacunallatataj rurana can? Jehová Diostami rijsina, cꞌuyana can. Paipimi fetapish churana can (Juan 3:16; 17:3, QC, 1989). Diospaj amigo, huauqui panicunapajpish amigomi cana can (Hebreos 10:24, 25; Santiago 4:8). Tiempohuanca mana alli cosascunata saquishpami paipaj juchacunamanta arrepintirina can (Hechos 3:19). Biblia yachachishcacunapi feta churashcamantami shujtajcunaman predicana can (2 Corintios 4:13). Ultimotacarin Diosman mingarishpami, bautizarina can (1 Pedro 3:21; 4:2). Yachacuj bautizaringapaj cambiocunata rurajpica felicitanami canchij. Pai bautizarijpica tucuicunami cushilla sintirinchij.

14. ¿Yachachijca yachacuj Diosta sirvisha nishcata yachangapajca imatataj tapurina can?

¹⁴ Yachacujta Diosman mingarichun, bautizarichun ayudangapajca pacienciami minishtirin. Pero Jehová Dios sirvisha nishcata o mana sirvisha nishcatami yachana canchij. Chaipajca: “¿Yachacujca Jesuspaj mandashcacunata pajtachingapajchu esforzarin? ¿Bibliamanta yachana alaja cajta ricushpallachu yachanata munan?” nishpami tapurina canchij.

15. ¿Yachacuj bautizarisha nishcataca ima shinataj yachai tucunchij?

¹⁵ Maipica yachacuj Diosta sirvingapaj esforzaricushcata o mana esforzaricushcatami ricuna canchij. Por ejemplo, ¿Jehová Diosta cꞌuyashcatachu parlan? ¿Paitachu mañan? (Salmo 116:1, 2). ¿Bibliatachu liyinata munan? (Salmo 119:97). ¿Tucui tandanacuicunamanchu rin? (Salmo 22:22). ¿Paipaj causaipica minishtirishca cambiocunatachu rurashca? (Salmo 119:112). ¿Ima yachashcacunataca paipaj familiacunaman, amigocunamanchu huillan? (Salmo 9:1). Ashtahuancarin ¿testigo de Jehová canatachu munan? (Salmo 40:8). Caicunata mana pajtachicujta ricushpaca imamanta mana pajtachicushcatami yachana canchij. Ña yachaj chayashpaca chaimantami cꞌuyaihuan parlana canchij. *

16. ¿Yachacujman Bibliamanta yachachinataca ima horastaj saquina canchij?

 ¹⁶ Yachacujman Bibliamanta yachachishpa catinata o mana catinatami alli ricuna canchij. Cashna nishpa tapurishunchij: “¿Yachacujca cada estudiota chasquingapajca allichu prepararin? ¿Tandanacuicunamanca rinatachu munan? ¿Mana alli ruraicunatapish saquishcachu? ¿Panda religionmantapish caruyashcachu?” Caicunata mana rurashca cajpica ¿imatataj rurana canchij? Cashna laya gentecunaman Bibliamanta yachachishpa catishpaca yacupi mana yaicusha nijta nadanata yachachicuj shinami can. Yachacuj ima yachashcata mana valorajpi, paipaj causaipi cambiocunata mana rurajpica ¿yachachishpa catinachu canchij? Tal vez Bibliamanta yachachinatami saqui tucunchij.

17. 1 Timoteo 4:16-pi nishca shinaca ¿Bibliamanta alli yachachijcuna cangapajca imatataj rurana canchij?

¹⁷ Gentecunata Jesusta catichun ayudanami ñucanchijpajca importante can. Yachacujcunataca bautizaringacamami ayudasha ninchij. Chaimantami Biblia yachachichun saquina canchij. Ñucanchij crishcacunatapish shungumantami yachachina canchij. Huauqui panicunahuan alli apanacuchunmi animana canchij. Diosman mingarichun, bautizarichunpishmi animana canchij. Shinallataj Diosta sirvisha nishcata o mana sirvisha nishcataca allimi ricuna canchij. (“ Yachachijca imatataj rurana can” nishca recuadrota ricui). Gentecunata quishpirichun ayudashpaca cushillami sintirinchij. Chaimanta yachacujcunata bautizaringacama ayudashunchij.