1. ¿Imata decidinataj valishca can?

YAYA mamacuna alli decisioncunata agllajpica huahuacunaca cushillami causangacuna. Cutin mana alli decisioncunata agllajpica huahuacunaca causaipimi problemacunata charingacuna. Pero huahuacunapishmi alli decisioncunata agllana can. Tucuicunami Jehová Diosta sirvinata decidina canchij (Salmos 73:28).

2. a) ¿Bibliapi nishca shinaca Jesuspaj yaya mamaca ima alli decisioncunatataj agllarcacuna? b) ¿Jesuspish ima alli decisioncunatataj agllarca?

² Jesuspaj yaya mamaca paicunapaj huahuacuna Diosta sirvichunmi ayudanata munarcacuna. Paicunapaj ima decidishcahuanmi Diosta sirvina importante cashcata ricuchircacuna (Lucas 2:40, 41, 52). Jesuspish Jehová Diospaj munaita pajtachina decisiontami agllarca (Mateo 4:1-10). Jesusca jatunyashpaca Diosta tucuipi cazuj, mana manchaj, llaquij runami tucurca. Diosta sirvij tucui yaya mamacunaca paicunapaj huahuacuna Jesús shina cajpica cushillami sintirincunaman.

3. ¿Cai yachaipica ima tapuicunamantataj yachashun?

³ ¿Jehová Diosca Jesuspajca ima alli decisioncunatataj agllarca? ¿Diosta alli sirvij yaya mamacunaca Jesuspaj yaya mama ima decidishcamantaca imatataj yachai tucuncuna? ¿Diosta sirvij jovencunapish Jesús ima decidishcamantaca imatataj yachai tucuncuna? Cai yachaipimi cai tapuicunamantaca yachashun.

4. ¿Jehová Diosca Jesuspajca ima alli decisiontataj agllarca?

⁴ Jehová Diosca Jesusta alli huiñachichunca alli yaya mamatami  agllarca (Mateo 1:18-23; Lucas 1:26-38). Bibliapi Mariapaj causaimanta yachashpaca Jehová Diosta achcata cꞌuyaj cashcata paipaj Shimita valorashcatami yachanchij (Lucas 1:46-55). Josepish Jehová Dios mandashcacunata cazushpami paita cꞌuyashcata cushichisha nishcata ricuchirca (Mateo 1:24).

5, 6. ¿Jehová Diosca Jesús ima llaquicunahuan chꞌimbapurachuntaj saquirca?

⁵ Jehová Diosca Jesuspajca charij yaya mamataca mana agllarcachu. Jesús huacharishca qꞌuipami paipaj yaya mamaca Jehová Diosman shuj ofrendata curca. Diosman cushca ofrendaca paicunaca pobre cashcatami ricuchirca (Lucas 2:24). Nazaret pueblopi paipaj huasi ladollapimi Joseca shuj carpinteriata charishcanga. Jesuspaj yaya mamaca siete o yalli huahuacunatami charishcangacuna. Chaimantami paicunaca minishtirishca cosascunallahuan causashcangacuna (Mateo 13:55, 56).

⁶ Jehová Diosca paipaj churitaca huaquin peligrocunamantami cuidarca. Pero huaquin llaquicunata chꞌimbapurachunmi saquirca (Mateo 2:13-15). Por ejemplo, huaquin familiacunaca callaripica Jesús Mesías cashcataca mana crircacunachu. Jesusca caita yachashpaca llaquillami sintirishcanga (Marcos 3:21; Juan 7:5). Jesús jovenraj cajpimi paipaj yaya Joseca huañushcanga. Chaimantami paica achcata sufrishcanga. Paica punta churi cashcamantami carpinteriapi trabajana tucushcanga (Marcos 6:3). Ña jovenyashpaca paipaj familiatami cuidana tucushcanga. Familiata mantiningapajpish tal vez sinchitami trabajana tucushcanga. Chaimantami paica trabajashca huashaca shaicushca sintirinataca alli yacharca.

7. a) ¿Huahuacunata charishpaca imallatataj tapurina can? b) Proverbios 2:1-6-pi nishca shinaca ¿yaya mamacunaca huahuacunamanca imallatataj yachachina can?

⁷ Cazarashcacuna cashpa huahuacunata charisha nishpaca cashna tapuri: “¿Ñucanchijca Diosta cꞌuyajcuna, paipaj Shimita pajtachijcuna, humildecunachu canchij? ¿Cunanlla huacharishca huahuata cuidachunchu Jehová Diosca ñucanchijta agllanman?” (Salmos 127:3, 4). Ña yaya o mama cashpaca cashna nishpa tapuri: “¿Trabajana importante cashcataca ñuca huahuacunaman yachachinichu? (Eclesiastés 3:12, 13). ¿Cai mundopaj mana alli munaicunamanta, mana alli cosascunamantachu  ñuca huahuacunataca cuidani?” (Proverbios 22:3). Huahuacunata cuidasha nishpapish mana tucui problemacunamantachu cuidai tucungui. Pero paicuna chai problemacunahuan chꞌimbapurachunmi ayudai tucungui. ¿Ima shinataj ayudai tucungui? Bibliapi alli consejocunata mashcachunmi ayudai tucungui (Proverbios 2:1-6-ta liyipai). Por ejemplo, shuj cꞌuyashca familia Jehová Diosmanta caruyajpica Diosta tucuipi cazuna imamanta importante cashcatami yachachina cangui (Salmo 31:23). Shuj cꞌuyashca familia huañujpica chai llaquita chꞌimbapurachun, tranquilo sintirichunmi huaquin versocunata mashcachun ayudai tucungui (2 Corintios 1:3, 4; 2 Timoteo 3:16).

8. Deuteronomio 6:6, 7-pi nishcacunataca ¿Josepish Mariapish ima shinataj pajtachircacuna?

⁸ Yaya mamacunaman cushca consejocunata catishcamantami Josepish Mariapish Jesusta Diospaj ñaupajpi alli ricurichun ayudarcacuna (Deuteronomio 6:6, 7-ta liyipai). Josepish Mariapish Jehová Diostaca achcatami cꞌuyajcuna carca. Paicuna shina huahuacuna Jehová Diosta cꞌuyachun ayudanami importante carca.

9. ¿Josepish Mariapish ima importante decisioncunatataj agllarcacuna?

⁹ Josepish Mariapish paicunapaj huahuacunahuanmi Jehová Diosta sirvinata agllarcacuna. Cada semanacunami Nazaretpi saquirij sinagogaman rijcuna carca. Shinallataj Jerusalenmanmi cada huata pascua fiestata rurangapaj rijcuna carca (Lucas 2:41; 4:16). José paipaj familiahuan chaiman ricushpaca Diospaj pueblohuan ima tucushcatami parlajcuna cashcanga. Shinallataj Bibliapi parlaj lugarcunatapishmi visitashcangacuna. Huahuacunata charishcamantami Jehová Diosmanta cutin cutin huahuacunaman yachachinaca ashtahuan sinchi cashcanga. Pero Diosta adoranata manataj saquishcamantami tucui familia Jehová Diospaj ñaupajpi alli ricurirca.

10. ¿Diosta sirvij yaya mamacunaca Josemanta Mariamantaca imatataj yachai tucuncuna?

¹⁰ ¿Diosta sirvij yaya mamacunaca Josemanta Mariamantaca imatataj yachai tucuncuna? Yaya mamacuna cancunapaj huahuacunamanca ruraicunahuan, nishcacunahuanmi  Jehová Diosta tucui shunguhuan cꞌuyashcata ricuchina canguichij. Tucuimanta yallica huahuacuna Jehová Diosta sirvichunmi ayudana canguichij. Huahuacuna Bibliata liyina programata charichun, Diosta mañachun, tandanacuicunaman richun, huillanaman llujshichun ayudanami importante can (1 Timoteo 6:6). Pero huahuacunamanca imalla minishtishca cosascunatami cuna can (1 Timoteo 5:8). Caipi yuyashun. Ñallami Diablopaj ruraicunaca tucurigrin. Cancunapaj huahuacuna paraíso Allpaman yaicuchunca cai mundopi charishca cosascunaca mana ayudangachu. Ashtahuanpish Yaya Dioshuan alli apanacushpallami quishpiri tucungacuna * (Ezequiel 7:19; 1 Timoteo 4:8).

11. a) 1 Timoteo 6:17-19-pi nishca shinaca ¿yaya mamacuna huahuacuna alli decisionta agllachunca ima shinataj ayudai tucuncuna? b) ¿Tucui familiaca Diosta ashtahuan sirvingapajca imatataj rurai tucunguichij? (“ ¿Diosta ashtahuan sirvingapajca imataj rurai tucunguichij?” nishca recuadrota ricui). c) ¿Chaita rurashpaca ima bendicioncunataj chasquinguichij?

¹¹ Yaya mamacuna huahuacunata Diosta sirvichun ayudajta ricushpaca cushillami sintirinchij. Paicunaca huahuacunahuan tucui tandanacuicunaman ringapaj, jatun tandanacuicunaman ringapaj, huillanaman llujshingapajmi esforzarincuna. Huaquin familiacunacarin huillana minishtirishca lugarcunapimi predicanaman rincuna. Shujtajcunaca Betelta rijsinamanmi rincuna. Diosta adorana huasicunata shayachishpapishmi ayudancuna. Maipica chaipi ayudanaman ringapajca cullquimi minishtirin. Chaimantami tucui chaicunahuan ayudangapajca sinchi ricuri tucun. Pero paicuna sinchita esforzarishcamantami Jehová Diosca bendicianga (1 Timoteo 6:17-19-ta liyipai). Cashna shina familiacunapi huiñaj huahuacunaca jatunyashpapish cai alli cosascunata ruranataca manataj saquincunachu. Paicunapaj yaya mamacunatapish chashna yachachishcamantami agradicincuna * (Proverbios 10:22).

12. ¿Jesusca jatunyashpaca imata ruranataj agllarca?

¹² Jehová Diospish Josepish Mariapish Jesuspajca siempremi alli decisioncunata agllarcacuna. Pero Jesús ña huiñashpaca paillatajmi alli decisioncunata agllana carca (Gálatas 6:5). Ñucanchij shinallatajmi Jesusca imata decidinata, pai munashcata ruranata agllai tucurca. Shinapish Diospaj amigo canatami agllarca (Juan 8:29). Jesuspaj ejemploca cunan punllacunapish jovencunataca achcatami ayudai tucun.

13. ¿Jesusca uchillamantaca ima decisiontataj agllarca?

¹³ Jesusca uchillamantami paita huiñachij yaya mamata cazunata agllarca. Paica ñuca  yaya mamata yallimi yachani nishpaca mana nunca yuyarcachu. Paipaj yaya mama tucui ima nishcata cazushpami causarca (Lucas 2:51). Jesusca punta churi cashcamantami huaquin responsabilidadcunata pajtachina cashcanga. Paica familiata mantiningapajmi paipaj yayapaj trabajota alli ruraj carca.

14. ¿Jesús Diospaj Quillcachishcacunata alli estudiaj cashcataca ima shinataj yachanchij?

¹⁴ Josepish Mariapish Diospaj milagromanta Jesús huacharishcatami paiman huillashcangacuna. Shinallataj angelcunapish imallata nishcatami huillashcangacuna (Lucas 2:8-19, 25-38). Pero yaya mama yachachishcallahuanca Jesusca mana saquirircachu. Paillatajmi Dios Quillcachishcacunataca estudiarca. ¿Ima shinataj chaitaca yachanchij? Shuj punllaca Jesusca doce huatacunata charishpaca Jerusalenpi yachachijcunapaj tapuicunatami cutichirca. Chaimi yachachijcunaca Jesús ima shina cutichijta ricushpaca mancharishca saquirircacuna (Lucas 2:46, 47). Paica huambraraj cashpapish Jehová Dios paipaj Yaya cashcatami seguro carca (Lucas 2:42, 43, 49).

15. ¿Jesusca Diospaj munaita ruranata agllashcataca ima shinataj ricuchirca?

¹⁵ Jesusca Diospaj munai maijan cashcata yachaj chayashpaca chaitami pajtachirca (Juan 6:38). Jesusca gentecuna paita pꞌiñana cashcataca allimi yacharca. Chaita yachashpapish Jehová Diosta cazunatami agllarca. Huata 29-pi bautizarishpaca paipaj Yayapaj munaita ruranatami decidirca (Hebreos 10:5-7). Jesusca caspipi huañucushpapish Diospaj munaita rurashpa catinatami agllarca (Juan 19:30).

16. ¿Huahuacunaca Jesusmantaca imatataj yachai tucuncuna?

¹⁶ Yaya mamata cazui. José y María shinallataj cambaj yaya mamacunapish juchayujcunami can. Pero Jehová Diosca yaya mamacunamanmi huahuacunata cuidachun, yachachichun mingashca. Cambaj yaya mamacuna consejashcata uyashpa, paicunapaj autoridadcunata respetashpaca tucui imapipish allimi causangui (Efesios 6:1-4).

17. Josué 24:15-pi nishca shinaca ¿jovencunaca imatataj cada uno decidina can?

¹⁷ Pita sirvinata agllai. Canllatajmi Jehová Dios pi cashcata, paipaj munai maijan cashcata,  chai munaitaca ima shina pajtachi tucushcata yachai tucungui (Romanos 12:2). Chashnami cambaj causaipi Jehová Diosta sirvinata agllangui (Josué 24:15-ta liyipai; Eclesiastés 12:1). Bibliata cada punlla liyishpa, estudiashpaca Jehová Diostami ashtahuan cꞌuyangui. Shinallataj cambaj fepish ashtahuanmi sinchiyanga.

18. a) ¿Jovencunaca imatataj decidina can? b) ¿Imamantataj chashna decidina can?

¹⁸ Cambaj causaipi Jehovapaj munaita pajtachinata agllai. Diabloca can yachashcacunahuan canllataj beneficiarishpaca cushillami causangui nishpa yuyachunmi munan. Pero cai mundopaj charina cosascunallapi yuyajcunaca achca llaquicunatami apancuna (1 Timoteo 6:9, 10). Cutin Jehová Diosta uyashpa, paipaj munaita punta lugarpi churashpaca tucuipimi alli ringa. Chashnami yachaj cashcatami ricuchingui (Josué 1:8, NWT ).

19. ¿Yaya mamacunaca imamantataj huahuacunamanca paicunapaj ejemplohuan yachachina can?

¹⁹ Yaya mamacuna cancunapaj huahuacuna Diosta sirvichun ayudangapaj tucui pudishcata ruraichij. Jehová Diospi confiaichij. Paillatajmi cancuna alli decidichun ayudanga (Proverbios 3:5, 6). Yaya mamacuna cancunapaj huahuacunaman cancunapaj ejemplohuan yachachijpica paicunaca chaitami yuyaringacuna. Chaimanta huahuacuna Diospaj ñaupajpi alli ricurichunca yaya mamacunami alli decisioncunata agllana can.

20. ¿Diosta sirvinata agllaj jovencunaca ima bendicioncunatataj chasquingacuna?

²⁰ Jovencuna cancunapaj yaya mamacunaca alli decisioncunata agllachunmi ayudai tucun. Pero Diospaj ñaupajpi alli ricuringapajca cancunallatajmi esforzarina canguichij. Chaimantami Jesuspaj ejemplota catishpa Jehová Diosta sirvinata agllanguichij. Chashna rurashpaca cancunapaj causaipipish Diosta sirvishpami ocupado causanguichij (1 Timoteo 4:16). Shamuj punllacunapicarin alli causaitami charinguichij.