Alli gentecuna sufrinaca maitataj justo cangari. Alli gentecuna sufrijta ricushpami maijancunaca, ¿imapajtaj allita rurangapaj esforzarinchij? nishpa yuyancuna.

Huaquincunaca cutin cutinmi shujtaj cuerpopi huacharishpa huañunchij nincunami. Chaimantami cai causaipi allicunata rurashpa cutin shujtaj cuerpopi huacharishpaca alli causashun nincuna. Cutin cai causaipi mana allicunata rurashpa cutin huacharishpaca achca llaquicunatami charishun nincunami. Pero tapuri:

• ¿Ñaupa ima mana allita rurashcamanta cunan llaquita apanaca ima allitaj cangayari?

• Ñaupa mana allicunata rurashcamanta cunan llaquita apana cashpaca, ¿imapajtaj alli causangapaj, ama ima llaquita charingapaj esforzarinchijman?

  ASHTAHUAN YACHANGAPAJCA

  JW.ORG paginapi ¿Diosca imamantataj llaquicuna tiyachun saquin? nishca videota ricui.

Diosca mana llaquicunahuan castiganchu

Llaquicunaca maipipish, ima horapish japinllami. Ima llaqui japinataca mana yachanchijchu.

“Mishanacuipica mana alli callpajcunallachu mishancuna. Macanacuipipish mana cꞌari cꞌaricunallachu mishancuna. Micunatapish mana yachajcunallachu allita micuncuna. Charijyanatapish mana alli yuyaiyujcunallachu charijyancuna. Chasquinatapish mana sumajta rimajllata alli chasquincunachu. Ashtahuanpish ima punlla ima tucuna cashpaca, chashna tucunllami” (ECLESIASTÉS 9:11).

Juchayuj huacharishcamantami sufrinchij

Gentecunaca juchaca mana alli ruraicunami can ninmi. Pero Bibliapica Adán Evapaj huahuacuna cashcamantami allicunapish millaicunapish juchayuj cashcata ricuchin.

“Ñucaca mamapaj huijsapi tiyarishca pachamantami millai cashcani. Ñuca mamaca juchayujtami chichushca” (SALMO 51:5).

Juchaca achca llaquicunatami apamushca

Juchami Diosmanta caruyachishca. Juchamantami shujtajcunahuanpish mana alli apanacui tucunchij. Shinallataj ñucanchij yuyai, shungu, cuerpopish huajllirishcami can. Chaimantami sufrinchij.

‘Allita ñuca rurasha nicushpapish, millaita ruranaca ñucallapitaj tiyashcatami yachani’ (ROMANOS 7:21).

“Huachana nanaihuan huarmi aij nicuj shinami, Dios rurashca tucuicunaca shuj shinalla cunancama aij nicujta yachanchij” (ROMANOS 8:22).