Jovencuna achca tiempota internetllapi pasashpaca cai llaquicunapimi urmai tucuncuna:

• Celularta o tabletta ricushpalla pasanatami munangacuna.

• Internetta utilizashpami shujtajcunata llaquichingacuna. Mana cashpaca shujtajcunami paicunata llaquichingacuna.

• Paicuna mana ricusha nijpipish maipica pornografiami ricuringa.

VICIOTA JAPINAMANTA

Internetpi maijan pugllaicuna o programacunaca gentecuna chaicunallapi tiempota pasachun rurashcami can. En defensa de la conversación nishca libropica: “Maijan aplicacioncunaca viciota japichun rurashcami can” ninmi. Shinallataj aplicacioncunapi ricurij propagandata ricujpica chaicunata churaj empresacunaca achca cullquitami ganancuna.

CAIPI YUYAI: ¿Cambaj huahuacunaca celularllapi, tabletllapichu pasan? ¿Huahuacuna tiempota alli utilizachunca ima shinataj ayudai tucungui? (EFESIOS 5:15, 16).

INTERNETPI LLAQUICHINAMANTA

Maijancunaca internetllapi pasashcamantami pꞌiñaj tucushpa shujtajcunata maltratancuna.

Huaquin gentecunaca shujtajcuna paicunata ricuchun, famoso tucusha nishpami chashna comportarincuna. Cutin shujtajcunaca paicunataca shuj fiestaman mana invitashcamantami paicunata pꞌiñashcata yuyashpa llaquirincuna.

CAIPI YUYAI: ¿Cambaj huahuacuna internetta utilizacushpaca shujtajcunata llaquichishcachu? (Efesios 4:31). ¿Imalla ruraicunapi paicunata mana invitashcamantaca pꞌiñarincunachu?

PORNOGRAFIATA RICUNAMANTA

Cunan punllacunapica lluchulla cꞌaricunata, huarmicunata internetpi ricunaca jahuallami can. Maijan yayacuna paicunapaj huahuacuna chai mapa cosascunata ama ricuchun huaquin programacunata utilizajpipish maipica huahuacunaca chaicunata ricushpami catincuna.

Lluchullacunapaj fotocunata mensajecunapi cachana o chasquinaca shuj delitomi cai tucun. Shinallataj huaquin llajtacunapica lluchulla jovencitocunapaj fotocunata mensajepi cachana o chasquinaca, pornografía infantil nishca delitomi can.

CAIPI YUYAI: ¿Cambaj huahuacuna lluchullacunapaj fotocunata chasquinata o cachanata ama munachunca ima shinataj ayudai tucungui? (EFESIOS 5:3, 4).

HUAHUACUNATA YACHACHI

Huahuacunapaj celularcunata utilizanaca jahualla cajpipish yaya mamacuna paicunata ricurachunmi minishtincuna. Shuj libropi nishca shinaca, huahuacunaman celularta alli yuyashpa utilizanata manaraj yachachishpa shuj celularta cunaca achca peligrosomi can.

Can imata pajtachisha nishcapi shuj señalta churai. Mana cashpaca can imata rurasha nishcata quillcai:

• Internetpi shujtajcunata alli tratachunmi ñuca huahuahuan parlasha nini.

• Paita pi mana invitashcamanta ama llaquirichunmi paihuan parlasha nini.

• Ñuca huahua internetpi mana allicunata ama ricuchunmi tucui pudishcata rurasha nini.

• Ñuca huahua celularpi ima charishcatami ricusha nini.

• Mashna tiempota celularta utilizai tucushcatami ñuca huahuahuan parlasha nini.

• Ñuca huahua tutacunapi pailla cuartopi cashpa celularta ama utilizachunmi parlasha nini.

• Micuna rato celularta ama pi utilizachunmi familiahuan parlasha nini.