HUAQUINCUNACA, “ACHCA CULLQUITA CHARISHPALLAMI CUSHILLA CAUSAITA CHARISHUN” NINCUNAMI. Chaimantami dimastij burro laya trabajashpa causancuna. Pero, ¿cullquita charishpalla, ñucanchij munashcacunata charishpallachu cushilla causai tucunchij? Cai temamanta yachajcuna ima nijta ricushun.

Gentecunapaj causaimanta parlaj shuj revistapica: “Minishtishcacunata tucui charishca jahua ashtahuan cullquita mashcajcunaca mana cushilla causai tucunchu” ninmi. Shinallataj sicologiamanta parlaj shuj revistapica: “Cullqui munaillahuan causashpaca llaqui causaitami charishun” ninmi. Achca huatacuna huashamanmi Bibliaca cai yuyaimantaca ña parlarca. 1 Timoteo 6:9, 10-pica: “Tucui millaita ruranata callarichijca, cullqui munaimi. Chaita munashcamantami maijancunaca achca llaquicunata apacuncuna” ninmi. ¿Gentecuna cullqui solopi yuyashpa causashcamantaca ima llaquicunatataj charishcacuna?

CHARISHCACUNAPI YALLITAJ SUSTARISHPACA DORMITAPISH MANA DORMI VALISHUNCHU. Bibliapica: “Trabajaj runaca ashallata micushpapish, huijsa pajtajta micushpapish sumajta dorminllami. Ashtahuanpish achca charinacuna tiyashpaca, mana dormijta saquinchu” ninmi (Eclesiastés 5:12).

CHARISHCACUNA CUSHICUITA MANA CUJPICA LLAQUILLAMI SINTIRISHUN. Huaquincunaca achca cullquita charishca jahuapish ashtahuanmi mashcashpa catincuna. Chaimantami Bibliapica: “Cullquita yalli cꞌuyajca, mashnata charishpapish mana cushicunchu. Charinacunata yalli cꞌuyajpish chaihuanca, paipaj ima allita mana japinchu” ninmi (Eclesiastés 5:10). Familiahuan sumajta causashpa, alli amigocunata charishpa, Diospaj munaita alli pajtachishpaca cushillami causashun. Pero chashna causanata ladoman saquishpa, charinacunallata mashcashpaca llaquillami causashun.

CULLQUIPISH CHARISHCACUNAPISH IMAPAJ MANA VALIJTA RICUSHPACA LLAQUIRISHUNMI. Bibliapica: “Ama charij tucuna yuyailla caichu. Chaita saquishpa alli yuyaita japiyari. ¿Maitataj yangalla caj charinacunapica, cambaj yuyaita churanguiyari? Chaicunaca alas jundajpi águila jatarishpa, jahuata rij shina ñapish chingaringallamari” ninmi (Proverbios 23:4, 5).

CHARISHCA COSASCUNALLAHUANMI CUSHICUNA CANCHIJ. Bibliapica: “Cai pachamanca imata mana apamushcanchijchu. Imata mana apashunchu. Chaimanta micunata, churanatapish charishpaca, chaillahuan ña cushi cashunchij” ninmi (1 Timoteo 6:7, 8). Charishcacunallahuan cushilla causajcunaca mana shujtajcunamanta envidiata charincunachu. Shinallataj mana yanga cosascunata randishpa cullquita gastancunachu. Chaimantami paicunaca mana yallitaj sustarishpa tranquilo causaita charincuna.

SHUJTAJCUNATAMI AYUDANA CANCHIJ. Bibliapica: “Imatapish cujmi, cushcata japijta yalli cushicun” ninmi (Hechos 20:35). Pipish shungumanta imata cujca ashallata cushpapish cushillami sintirin. Chashna rurajta ricushpami shujtajcunaca paihuan apanacunata munangacuna, respetangacuna, shinallataj minishtishca horaspimi paitaca ayudangacuna (Lucas 6:38).

CꞌUYAJCUNAMI CANA CANCHIJ. Bibliapica: “Yuyu calditollata micushpapish, cꞌuyanacushpa causanamari alli. Ashtahuanpish huirayashca huagra aicha cusashcallata micushpapish, pꞌiñanacushpalla causashpaca ima allitaj cangari” ninmi (Proverbios 15:17). Cai versopi yachachishca shinaca shujtajcunaman cꞌuyaita ricuchinami charishcacunata yalli alli can. Cai revistapimi cꞌuyaita ricuchinamanta ashtahuan yachashun.

Sudáfrica llajtamanta Sabina huarmica Diospaj mandashcacunata pajtachina valishca cashcatami yacharca. Paipaj cusa shitashpa rijpimi paipish paipaj huahuacunapish ima minishtishcacunata mana charircacuna. Chaimantami ishqui partepi trabajaj carca. Chai trabajoman ringapajca 4 de la mañanatami madrugana carca. Chashna trabajana cashpapish Yaya Diosmantami yachai callarirca. ¿Yaya Diosmanta ña yachashpaca ima shinashi causai callarirca?

Cullquita mana tanto charishpapish Yaya Diosmanta yachashpami Sabinaca cushilla sintirirca (Mateo 5:3). Shinallataj Diospaj pueblo ucupi alli amigocunata charishcamantami cushilla sintirin. Cunanca shujtajcunamanpish cushillami Diospaj Shimita yachachicun.

Yaya Dios yachachishcacunaca ñucanchij allipajmi can. Chaimantami charishcacunallahuan causashpa, shujtajcunata ayudashpaca cushilla causashun.