¿Runacunaca problemacunata tucuchishpa ima hora tranquilo causashunchu? Tucui problemacunata tucuchingapajca imamanta problemacuna tiyashcatami yachana canchij.

Shuj ejemplopi yuyashun. Tom shuti runaca ungüihuan anchayashpami huañurca. ¿Paica imamantataj huañurca? Tom runa manaraj huañujpimi shuj doctorca: “Tom runa ungushca nanaihuan chayajpica caishuj doctorcunaca pai imamanta ungurishcataca mana investigashcacunachu” nirca. Caipi ricushca shinaca paita atindijcunaca nanaita calmachingapajllami aliviaj jambita cushcangacuna. Chaimantami Tom runataca doctorcunaca mana jambi tucurcacuna.

Cunan punllacunapi tiyaj problemacunatapish aliviaj jambita cuj shinallami allichisha nincuna. Por ejemplo, gobiernocunaca tucui shuhuacunata tucuchingapajca camaracunata, policiacunata, leycunatami churashcacuna. Chashna churajpipish mana alli gentecunaca imata munashcata, paicuna imata yuyashcatami rurashpa catincuna. Chaimantami gobiernocunaca mana tucui problemacunata tucuchi pudishcacuna.

Daniel causashca llajtapica pobrezami miraricun. Paica: “Ñaupaca alli causaitami charircanchij. Pi shuhuanatapish mana mancharcanchijchu. Pero cunanca mana tranquilo causai tucunchijchu. Ñuca causashca llajtapi pobreza miraricushcamantami, achca gentecunaca paicunapajlla charisha nishpa shujtajcunata llaquichicuncuna” ninmi.

Shuj runaca paipaj llajtapi llaquicuna tiyashcamantami shujtaj ladopi causanaman rirca. Paica: “Ñuca llajtapica familiacunapish politicocunapish religionta pushajcunapish achca jovencunata guerraman richun nishpami, chaipi mishachun obligajcuna carca. Ñuca llajtahuan macanacujcunapish chashnallatajmi rurajcuna carca. Tucui chaicunata ricushpami gobiernocunapi mana confiana cashcata ricurcani” ninmi. Paica chai qꞌuipami Bibliata estudiai callarirca.

¿Bibliapica imatataj yachachin?

• Génesis 8:21-pica: “Cai pachapi causajcunaca huambramanta pachami millaita rurana yuyailla causancuna” ninmi.

• Jeremías 17:9-pica: “Runapaj shunguca tucui imatapish yalli, umajlla millai shungumi. Chaitaca pi mana yachai tucunchu” ninmi.

• Mateo 15:19-pica: ‘Huañuchina, huainayana, shuhuana, llullashpa huillana, cꞌamina, cai tucui millai yuyaicunaca shungumantami llujshin’ ninmi.

Gentecunaca mana alli ruraicunataca mana saquishcacunachu. Ña ricushca shinaca problemacunaca punllantami miraricun (2 Timoteo 3:1-5). Cunan punllacunapica mushuj aparatocunata charishpapish achcata yachashpapish alli causangapajca mana imata rurai tucushcacunachu. ¿Imamanta? ¿Gentecunaca problemacunata allichi tucunchu? ¿Problemacunata allichinaca jahuallachu can? Caitami yachashun.

Yuyashun, ñucanchij poderta charishpaca gentecunapaj mana alli ruraicunatami tucuchinchijman. Pero mana alli ruraicunata tucuchishpapish cai pachapi tranquilo causaitaca mana charinchijmanchu. ¿Imamantataj chashna ninchij?

Bibliapica: “Pipish quiquin causaitaca mana mandai tucunchu” ninmi (Jeremías 10:23). Cai versopi  nishca shinaca, ñucanchijllataj mana mandai tucunchijchu. Ima shinami yacu ucupi causangapajpish mana rurashca canchij. Chashnallatajmi shujtajcunata mandangapajpish mana rurashca canchij.

Caipi yuyai. Gentecunaca paicuna ima shina causanata, imata ruranata shujtajcuna decidichunca mana munancunachu. Por ejemplo, paicunaca shulluna alli cashcata o mana alli cashcata, huahuacunaman estudiachinata o mana estudiachinata paicunallatajmi decidisha nincuna. Chashna yuyashcamantami paicunapura caruyanacushcacuna. Bibliapi nishca shinaca ñucanchijca pipaj causaitaca mana mandai tucunchijchu. Shinaca ¿pitaj alli mandai tucun?

Diosca tucui gentecunatami rurashca. Chaimantami pailla alli mandai tucun. Achcacunaca Yaya Diosca ñucanchijmantami cungarishca nincunami. Pero chaica mana ciertochu can. Bibliapi tiyaj sumaj yuyaicunata yachashpami Dios ñucanchijmanta achcata preocuparij cashcata yachanchij. Shinallataj Bibliapi ricushpami ñucanchijllataj problemacunata mana tucuchi valishcata intindinchij. Chashnami runacuna imamanta llaquicunapi urmashcatapish cuenta japinchij. Alemania llajtamanta shuj estudiashca runaca: “Gobiernocunaca ñaupa tiempomanta gentecuna ima problemacunata charishcata yachashpapish mana imata rurashcacunachu” ninmi.

Jesusca cashnami nirca: ‘Yachaica allita ruraj cashcataca ruraicunahuanmi ricuchin’ nirca (Lucas 7:35, NM). Bibliapi tiyaj consejocuna alli cashcata intindingapajca shuj ejemplota ricushun. Salmo 146:3-pica: “Mandajcunapica ama shunguta churaichu. Huañujlla runacunapipish ama shunguta churaichu” ninmi. Cai versopimi gentecunapaj nishcacunapi ama shunguta churachun consejan. Kenneth runa causashca llajtapica achca llaquicunami tiyan. Paica: “Politicocunaca tucui llaquicunatami allichisha nincuna. Chaita rurasha nishpapish mana pudishcacunachu. Paicuna mana imata allichi tucushcata ricushpami Bibliapi tiyaj consejocuna cierto cashcata cuentata cuni” ninmi.

Daniel runaca cutinmi cashna nin. Paica: “Ñucaca gentecuna mana mandai tucushcataca cada punllami cuentata cuni. Bancopi achca cullquita charishpapish trabajomanta jubilarishpapish alli causaitaca mana charishcacunachu. Shinapish maipica paicuna munashcata mana pajtachishpami llaquilla causacuncuna” ninmi.

Bibliapica gentecunapaj nishcacunapica shunguta ama churachunmi yachachin. Shinallataj cai Allpapi alli causanamantami yachachin.