Bibliata yachashpami achca gentecunaca paicunapaj causaita cambiashcacuna. Cunanca Ricardomanta, Andresmanta yachashun.

RICARDOCA CASHNAMI PARLARCA: Ñucaca 15 huatacunata charishpami shuhua gentecunahuan apanacui callarircani. Paicunahuan tandanacushpaca paicuna shinami comportarircani. 10 huatacunata carcelman rinatapishmi munarcani. Chashna yuyanaca muspa shinachari ricurin. Pero ñuca llajtapica carcelman rijcunataca achcatami respetajcuna carca. Ñucaca paicuna shinami casha nircani.

Huainayashpa, drogacunata fumashpa, pitapish mana alli tratashpami causarcani. Shuj tutaca shujtaj pandillerocunahuan macanacungapajmi revolverhuan participarcani. Caipimi ñucataca huañuchinga yuyarcanimi. Antes miticushpami rircani. Cutin qꞌuipataca ¿imatataj ñuca causaihuanca ruracuni? nishpami yuyarcani. Chaimantami ñuca causaipica cambianata yuyarircani. Pero, ¿ima shinataj cambiai tucuni? ¿Pitaj ñucataca ayudanga? nishpami tapurircani.

Ñuca familiapica casi tucuicunami achca problemacunahuan llaquilla causajcuna carca. Pero shuj tioca paipaj familiahuan alli gentecunami carca. Bibliamanta yachashcacunatapish paicunapaj causaipimi pajtachijcuna carca. Shuj cutinca Diospaj shutica Jehová cashcatami ñucaman yachachircacuna. Revolverhuan macanacuipi participashca qꞌuipami, “ama chashna catingapaj Jehová Dios ñucata ayudahuai” nishpa mañarcani. Chai cayandij punllallami ñuca huasimanca shuj testigo de Jehová shamurca. Paimi Bibliamanta yachachi callarirca.

Bibliata yachai callarishca qꞌuipallami ñuca mana alli amigocunaca paicunahuan tandanacuchun cutin cayarcacuna. Paicunata saquina sinchi cajpipish, cancunahuanca mana llujshishachu nircanimi. Bibliata ashtahuan yachangapajmi decidido carcani. Cunanca mushuj causaitami callarishcani. Chaimantami dimastij cushilla sintirini.

Shuj punllaca carcelmanmi 10 huatacunata risha nircani. Chashna nishpapish carcelmanca mana rishcanichu. Cunanca gentecunamanmi yachachisha nini. Chaimantami, “10 huatacunata ñucapish gentecunata ayudangapaj shuj oportunidadta cuhuai” nishpa Diosta mañarcani. Diosca ñuca mañashcatami contestashca. Cunancamaca 17 huatacunatami predicacushcani.

Ñaupa amigocunaca achca huatacunatami carcelpi can. Huaquincunacarin ñami huañushcacuna. Ñuca familiacuna Yaya Dios munashca shina causashcamantami ñucapish cambiarcani. Paicunataca achcatami respetani. Pero tucuimanta yallica Diostami pai yachachishcamanta diosolopagui nini.

 ANDRESPISH CASHNAMI PARLARCA: Ñuca huacharishca llajtapica gentecunaca drogarishpa, huañuchinacushpa, shuhuashpa, huainayashpami causajcuna carca. Chai chaupipimi huiñarcani. Ñuca yayaca achca tragotami ubyaj carca. Drogarina viciotapishmi charij carca. Ñuca yaya mamaca siempremi litunacushpa, macanacushpa causajcuna carca.

Jovenraj cashpami tragota ubyanapi, drogarina viciopi urmarcani. Callepimi shuhuashpa, shuhuashca cosascunata cꞌatushpa pasaj carcani. Huatacuna huashaca ñuca yayaca ñucahuan alli apanacusha nishpami drogacunata, shujtaj shuhuashca cosascunata cꞌatuchun yachachirca. Chashna cꞌatushcamantami achca cullquita rato ganai callarircani. Shuj punllaca huasipi cajpimi policiacunaca “shuj runatami casi huañuchishcangui” nishpa carcelman aparcacuna. 5 huatacunatami carcelpi cangui nircacunapishmi.

Shuj tutamantaca tucui prezupi cajcunatami: “Testigo de Jehovacunami yachachinaman shamushca, chaiman richij” nishpa invitarcacuna. Chaimi paicunata uyanaman rircani. Paicuna yachachishcaca allimi uyarirca. Chaimantami Bibliata yachanata decidircani. Paicunaca Bibliahuanmi ima mana alli cashcata achijta yachachircacuna.

Bibliata yachai callarishca huashami shujtaj prezucunaca Bibliata yachanata saquinami cangui nishpa amenazarcacuna. Cambiocunata rurangapajmi pi ñucata ayudachun minishtircani. Chaimantami Jehová Diosta fuerzasta cuchun, yachaita cuchun mañarcani. Chashnami shujtajcuna Bibliata ama yachachun nijpipish Bibliamanta yachashpa catircani. Chai qꞌuipaca shujtajcunamanpish mana manchashpami huillarcani.

Carcelmanta llujshina horas chayajpica ashtahuan carcelpi saquirinatami munarcani. Carcelpi amañarishca cashcamantami chaimanta llujshingapajca sustarircani. Ña carcelmanta ricujpimi huaquincunaca: “Ñucanchijta michij pastorcito tigramupangui” nircacuna.

Yayitu Dios ñucata ayudachun mana saquishca cashpaca ima shinachari ñuca causaica canman carca. Paimi ñuca causaita cambiachun ayudarca. Pai cꞌuyaihuan ayudashcamantami cambiai tucushcani. Chaimantami Diostaca tucui shungumanta agradicini. *