Allicunata rurangapajca ima alli o mana alli cashcatami clarota intindina canchij. Chashnami huaquinpi mana alli sintirishpapish alli ruraicunataca mana saquishun.

Cunan punllacunapica musicacunapi, peliculacunapi, o compañerocunami huahuacunataca tucui laya panda yuyaicunata nishpa pandachi tucuncuna. Chaicunata uyashpami huahuacunaca ima alli cashcata, ima mana alli cashcataca dudai callaringacuna.

Ashtahuantajca ña joven tucushpami problemacunataca charinga. La charla padre e hijo nishca libropica: “Internetpi, televisionpica jovencuna famoso tucuchunmi tucui laya yuyaicunata ningacuna. Paicunapaj compañerocunapish chai yuyaicunallatatajmi ningacuna. Chaicunata chꞌimbapurangapajmi jovencunaca listos cana can. Paicunaca ima alli, o mana alli cashcata intindishpami, paicunapaj amigocuna mana munajpipish alli decisioncunata agllana can” ninmi. Huahuacunaca ima alli o mana alli cashcataca uchillamantami yachana can.

Ima alli o mana alli cashcata intindichi

BIBLIAMANTA SHUJ YUYAI: “Sinchi micuica sinchiyashcacunapajllami. Shinallataj ima alli cashcata, ima mana alli cashcatapish agllana yuyaita charijcunapajllami” (Hebreos 5:14).

• Alli o mana alli cashcataca chꞌimbapuraicunahuan yachachi. Por ejemplo: “Caica allimi can, caica mana allichu can”. “Caita rurashpaca cꞌuyaj cashcatami ricuchishun, caita mana rurashpaca cꞌuyaj cashcataca mana ricuchishunchu”. “Caita rurashpaca shujtajcunata respetaj cashcatami ricuchishun, caita mana rurashpaca shujtajcunata mana respetashcatami ricuchishun” ni. Chashna intindichijpimi huahuaca can yachachishcacunataca ruraicunahuan pajtachinga.

• Imamanta huaquin ruraicuna alli o mana alli cashcata intindichi. Cambaj huahua alli concienciata charichunca alajatami intindichina cangui. Por ejemplo: “¿Imamantataj honrados cana canchij? ¿Shuhuanaca imamantataj mana alli can? ¿Llullajpica shujtajcunaca ñucanchij amigo casha ningachu?” nishpa tapuicunata rurai.

• Alli yuyaicunata charinaca paipaj allipaj cashcata ricuchi. Por ejemplo: “Can honrado cajpica shujtajcunaca canpimi confiangacuna”, o “Can cꞌuyaj cajpica shujtajcunaca canhuan canatami munangacuna” ni.

 Cambaj familiaca ima alli o mana alli cashcataca allimi yachana can

BIBLIAMANTA SHUJ YUYAI: “Crijtaj cashcataca cancunallataj alli ricurichigari” (2 Corintios 13:5).

• Tucui cambaj familiami ima alli o mana alli cashcataca yachana can.

  • Familiapica mana llullanachu canguichij.

  • Mana macanacunachu canguichij.

  • Mana ajanacunachu canguichij.

Chashnami cambaj huahuacunaca familiapi allicunata ruranaca importante cashcata intindingacuna.

• Cambaj huahuacunamanca ejemplocunahuan ima alli o mana alli cashcata yachachi. Paipaj compañerocunapaj ruraicunahuan o televisionpi, Internetpi tiyashca ruraicunahuan comparai. Por ejemplo, “¿Can cashpaca imatataj ruranguiman carca?” o “¿Ñucanchij familiaca imatataj ruranman carca?” nishpa tapui.

Alli ruraicunata rurachun animai

BIBLIAMANTA SHUJ YUYAI: “Alli yuyaiyuj caichij” (1 Pedro 3:16).

• Allita rurajpi felicitai. Cambaj huahua honrado cajta ricushpaca, “can honrado cashcamantami cushicuni” nishpa felicitai. Cutin mana allita rurashcata huillajpica manaraj corrigishpa canman huillashcamanta agradici.

• Mana allita rurajpi corrigi. Cambaj huahua ima mana allita rurashca cajpica paillataj chaita allichichun saqui. Shinallataj, familiapica imamanta chai ruraicunata mana saquij cashcata intindichi. Huaquin yaya mamacunaca huahuacunata rimashpaca, “mana allitami sintichishun” yuyashpami mana imata nincuna. Pero, paicunaman ima alli o mana alli cashcata intindichishpaca alli concienciata charichunmi ayudashun.